A ummi cazin ah kal

A ummi cazin ah kal

 Ṭhen 12

Zeitindah Pathian Naih Khawh A Si?

Zeitindah Pathian Naih Khawh A Si?

1. Pathian nih thlacamnak vialte a ngai maw?

Pathian nih thlacamnak in a sin naih awkah miphun vialte kha a sawm hna. (Salm 65:1) Asinain, thlacamnak vialte tu cu a ngai lo. Tahchunhnak ah, a nupi cungah a puarhrangmi pa thlacamnak cu a ngai lai lo. (1 Piter 3:7) Israel mi hna zong nih ṭhatlonak an tuah lengmang tikah Pathian nih an thlacamnak a ngaihpiak hna lo. Asinain, sualnak ngan a tuahmi hna hmanh an i ngaihchih ahcun Pathian nih an thlacamnak a ngaihpiak hna lai. Thlacamnak cu tinvo sung taktak a si.​—Isaiah 1:​15; 55:7 rel.

Pathian Nih Thlacamnak Vialte A Ngai Maw? timi video kha zoh

2. Zeitindah thla kan cam awk a si?

Jehovah cu a kan Sertu le a hmaanmi Pathian a si caah amah sin lawng ah thla kan cam awk a si. (Matthai 4:​10; 6:9) Kannih cu mitlinglo kan si leng ah Jesuh cu kan sualnak ruangah a thih caah a min in Pathian sinah thla kan cam awk a si. (Johan 14:6) Kan i ciahmi asiloah ṭialmi thlacamnak bia hna in thlacam lengmang kha Jehovah nih a duh lo. Kan lung chung in a chuakmi bia in cam hna seh ti a duh.​—Matthai 6:7; Filipi 4:​6, 7 rel.

Sertu nih kan lung chung in kan cammi zong a theih khawh. (1 Samuel 1:​12, 13) Ih lai le thawhka, rawl ei caan le harnak ton caan ti bantuk zei bantuk caan paoh ah thlacam awk a kan sawm.​—Salm 55:22; Matthai 15:⁠36 rel.

3. Khrihfa hna cu zeicah an i pumh?

Kannih cu Pathian a zum lomi le vawleicung ah daihnak ka umter lai timi Pathian biakam zei i a rel lomi hna lakah kan nun caah Pathian naih cu a fawi lo. (2 Timote 3:​1, 4; 2 Piter 3:​3, 13) Cucaah zumtu unau pawl he i hawikomh in pakhat le pakhat thazaang kan i pek a hau.​—Hebru 10:24, 25 rel.

 Pathian a dawmi hna he i hawikomhnak nih Pathian naih awk a kan bawmh khawh. Jehovah Tehte Hna pumhnak ah midang zumhnak in thazaang laknak caanṭha kan hmuh.​—Rom 1:​11, 12 rel.

4. Zeitindah Pathian naih khawh a si?

Baibal in na hngalhmi kong ṭha tein na ruahnak thawng in Jehovah kha na naih khawh. A tuahmi thil, ruahnak a kan cheuhmi le a biakam kong kha ṭha tein ruat. Thlacamnak le ṭha tein ruahnak nih Pathian dawtnak le a fimnak sunsak chin awk a kan bawmh lai.​—Joshua 1:8; Salm 1:​1-3 rel.

Pathian kha na zumh i naa bochan lawng ah na naih khawh lai. Asinain zumhnak cu nawn pek a haumi thingkung he aa lo. Na zumhnak kong ṭha tein na ruahnak thawng in na zumhnak a feh nakhnga tuah lengmang.​—Matthai 4:4; Hebru 11:​1, 6 rel.

5. Pathian kan naih ahcun zei ṭhatnak dah kan hmuh lai?

Jehovah nih amah a dawmi kha a zohkhenh hna. An zumhnak le zungzal nunnak an i ruahchannak a hrawk khomi zei thil paoh in a huhphenh khawh hna. (Salm 91:​1, 2, 7-​10) Pathian nih kan ngandamnak a hrawk khomi le kan i nuamhnak a tlauter khomi nunning hrial awkah ralrin a kan pek. Cun a ṭha bikmi nunning zong a kan cawnpiak.​—Salm 73:27, 28; Jeim 4:​4, 8 rel.