A ummi cazin ah kal

A ummi cazin ah kal

 Ṭhen 11

Baibal Phunglam Nih Zeitindah A Kan Ṭhathnem?

Baibal Phunglam Nih Zeitindah A Kan Ṭhathnem?

1. Zeicah lamhruainak kan herh?

Baibal phunglam nih runvennak tuah chung awkah zeitindah a kan forh?​—SALM 36:9.

A kan Sertu cu kanmah nakin a let tampi in a fim deuh. Dawtnak a ngeimi pale bantukin a kan zohkhenh. Kannih cu Pathian tel loin kanmah tein lam i hruai kho ding in sermi kan si lo. (Jeremiah 10:23) Cucaah ngakchia nih nulepa lamhruainak an herh bantukin kan dihlak in Pathian lamhruainak kan herh ve. (Isaiah 48:17, 18) Baibal phunglam cu Pathian laksawng a si i mah nih lam a kan hruai.​—2 Timote 3:​16 rel.

Jehovah phunglam nih atu ah a ṭha bikmi nunnak le hmailei ah zungzal nunnak zeitindah hmuh khawh a si kha a kan cawnpiak. Pathian cu a kan Sertu a si caah a lamhruainak kha kan zulh awk a si.​—Salm 19:​7, 11; Biathlam 4:​11 rel.

2. Baibal phunglam timi cu zeidah a si?

Baibal phunglam cu a hrampi biatak kha a si. Asinain, nawlbia tu cu cuset khaset timi thil sining ah hman a si. (Deuteronomi 22:8) Baibal phunglam pakhat cu thil sining pakhat he zeitindah aa pehtlaih ti hngalhthiam awkah ruah le tuaktan a hau. (Phungthlukbia 2:​10-​12) Tahchunhnak ah, Baibal nih nunnak cu Pathian pekmi laksawng a si tiah a ti. Mah a hrampi Baibal phunglam nih rianṭuannak ah, inn ah le tlunkal tikah lam a kan hruai khawh. Kanmah le midang himnak caah runvennak tuah chung awk zong ah a kan bawmh khawh.​—Lamkaltu 17:28 rel.

3. A biapimi phunglam pahnih cu zeidah an si?

Jesuh nih a biapi bikmi phunglam pahnih kong a rak chim. Pakhatnak phunglam nih minung kan nun hnawh chan bikmi cu Pathian hngalh, dawt le zumhfek tein Pathian biak kha a si ti a langhter. Biakhiahnak kan tuah fate mah phunglam kha kan ruah awk a si. (Phungthlukbia 3:6) Mah phunglam a zulmi hna cu  Pathian hawikom an si lai i nuamhnak taktak le zungzal nunnak an hmu lai.​—Matthai 22:36-​38 rel.

A pahnihnak phunglam nih midang he pehtlaihnak ṭha ngeih awk a kan bawmh khawh. (1 Korin 13:​4-7) Mah phunglam zulhnak ah Pathian nih mi a pehtlaih hna ning i cawn aa tel.​—Matthai 7:​12; 22:39, 40 rel.

4. Baibal phunglam nih zeitindah a kan ṭhathnem?

Baibal phunglam nih chungkhar pawl kha aa dawmi le lung aa rualmi si awkah a cawnpiak hna. (Kolose 3:​12-​14) Chungkhar i ṭhencheu lo awkah a bawmmi a dang phunglam cu ṭhitumnak hi zungzal ca a si awk a si timi phunglam a si.​—Genesis 2:​24 rel.

Baibal phunglam kan zulh ahcun kan rian a hmun lai i kan hna a ngam lai. Tahchunhnak ah, dingfel te le teima tein um ding timi Baibal phunglam a zulmi kha rianngeitu pawl nih an duh hna. (Phungthlukbia 10:​4, 26; Hebru 13:18) Baibal nih kan ngeihmi ah lungsi awk le thilri chawva nakin Pathian he kan i pehtlaihnak tu biapi deuh ah chiah awk a kan cawnpiak.​—Matthai 6:​24, 25, 33; 1 Timote 6:​8-​10 rel.

Baibal phunglam zulhnak nih kan ngan a damter khawh. (Phungthlukbia 14:30; 22:24, 25) Tahchunhnak ah, zu tamtuk in din lo ding timi Pathian phunglam zulhnak nih zawtnak le khawndennak in a kan huhphenh khawh. (Phungthlukbia 23:20) Jehovah nih zu kha a zafang lawng in dinnak nawl a kan pek. (Salm 104:15; 1 Korin 6:​10) Pathian phunglam nih kan tuahsernak lawng si loin kan ruahmi zong i ralrin awk a kan cawnpiak. (Salm 119:97-​100) Asinain a hmaanmi Khrihfa hna nih Pathian phunglam an zulh cu ṭhatnak hmuh an duh ca lawng ah a si lo, Jehovah thangṭhatter an duh ca zong ah a si.​—Matthai 5:​14-​16 rel.