A ummi cazin ah kal

A ummi cazin ah kal

 ṬHEN 22

Pennak nih Vawlei ah Pathian Duhnak a Tlinter

Pennak nih Vawlei ah Pathian Duhnak a Tlinter

HI ṬHEN AA TINHMI

Pennak nih minung le vawlei he aa tlaimi Pathian biakam vialte kha a tlinter

1, 2. (a) A caan ah Paradis kha a um taktakmi in hmuh cu zeicah a har khawh men? (b) Pathian biakam kan zumhnak kha zeinihdah a fehter khawh?

ZUMHFEKMI unaupa pakhat cu chun nitlak rethei ngaiin rian a ṭuan hnuah pumhnak ah a ra. Mah unaupa cu a rian bawi nih rian tam tuk in a fial caah a tha a baa tuk. A chungkhar zohkhenhnak kongah a lungre a thei i a nupi a dam lo ca zongah a lungre a thei. Pumh thawknak hla music an chuah tikah a hna a ngam i a thawpi a chuah. Biakinn ah unau pawl he an i pumhṭi ca zongah aa nuam. Hla cu Paradis nunnak kong a si i hla bia nih mah kha mitthlam cuanter in cuka ah ka um tiah ruah awkah a forh. Mah hla cu a hlante in a duhmi a si i a chungkhar he an sakṭi tikah hmailei ruahchannak nih a lung hna a ngamter ṭhan.

2 Nangtah cutin na si bal maw? Tam deuh cu kan si ko lai. Asinain hi vawlei ṭhalo ah Paradis kha a um taktakmi in hmuh cu a har ko lai. Atu caan cu “harnak caan” a si i paradis he cun aa dang tuk. (2 Tim. 3:1) Zeinihdah kan i ruahchanmi kha a um taktakmi in a kan hmuhter lai? A rauhhlan ah Pathian Pennak nih minung vialte a uk dih hna lai ti kha zeitindah kan hngalh khawh? Jehovah chimchungbia cheukhat cu hlanlio ah zeitindah a rak tlin ti kha i ruah hna u sih. Mah hnuah mah chimchungbia hna le cu bantuk chimchungbia hna cu tuchan ah zeitindah khuaruahhar in a tlin timi kong kan i ruah lai. Mah nih kan zumhnak a fehter lai i a donghnak ah mah chimchungbia hna cu hmailei ah zeitindah a tlin lai timi kong kan i ruah lai.

Hlanlio ah Jehovah nih a Biakam a Tlinterning

3. Babilon ah sal i a taangmi Judah mi hna kha zei biakam nih dah an hna a ngamter hna?

3 A luancia BC kumzabu paruknak lioah Babilon ah sal a taangmi Judah mi hna nunnak kha ruathmanh. Mi tampi cu an nu le an pa bantukin sal sinak ah a ṭhangmi an si i an nunnak cu a har tuk. Jehovah an zumhnak kha Babilon mi nih an nihsawh hna. (Salm 137:1-3) Asinain kum tampi chung zumhfekmi Judah mi hna nih mah ruahchannak hi an i tlaih peng: Mah cu Jehovah nih a miphun kha an ram i kirter ṭhan awkah bia aa kammi kha a si. Cuka ah thil sining cu a ṭha tuk  lai tiah Jehovah nih a ti. Remh ṭhan hngami Judah ram kha Eden dum, paradis he hmanh a tahchunh. (Isaiah 51:3 rel.) Cu bantuk biakam nih Pathian miphun kha an zumhnak a fehter hna i an lung chungah a um khomi lunghrinnak kha a tlauter. Zeiti lam in dah? Chimchungbia cheukhat hi ruathmanh.

4. Judah mi hna cu an ram ah him tein an um lai timi he aa tlaiin Jehovah nih zeitindah bia aa kam?

4 Himnak. Sal taangmi hna cu paradis taktak ah si loin kum 70 chung kaltakmi lamhlatpi ah a ummi ram ah an kirmi a si, mah ram kha an lak i tam deuh nih cun an hmu bal lo. Baibal chan lioah chiandeih hi cenghngia, pawlai le a dang sahrang hna bantukin a tam ngaimi a si. Chungkhar lu a simi nih hitin khua a ruat men lai, ‘Ka nupi le ka fale kha zeitindah him tein ka chiah hna lai? Tuu le saṭil pawl kha zeitindah ka huhphenh hna lai?’ Cu bantukin lungretheih cu a phung a si ko. Asinain Isaiah 11:6-9 ah aa ṭialmi Pathian biakam kong an ruah tikah zeitlukin dah an hna a ngam lai khi ruathmanh. (Rel.) Aa dawh ngaimi langhternak bia hmangin Jehovah nih sal ah a taangmi hna le an saṭil pawl him tein an um lai tiah bia aa kam. Chiandeih nih Judah mi hna saṭil kha an seh hna lai lo caah cafang zi an ei bantuk a si lai. Zumhfekmi hna nih cu bantuk sahrang hna kha an ṭih a hau lai lo. Jehovah nih a miphun kha remh ṭhan hngami Judah ram lawngah si loin thetse ram le ramlak zongah nan him lai tiah bia a kamh hna.—Ezek. 34:25.

5. Jehovah nih kan herhmi vialte a kan pek lai ti zumh awkah sal sinak in a luatmi hna kha zei chimchungbia nih dah a bawmh hna?

5 Duhdim nunnak. A dang lungretheih awk a um rih. ‘Remh ṭhan hngami ram ah ka chungkhar kha ka cawm kho hna lai maw? Khoika ah dah kan um lai? Rian a um lai maw? Mah cu Babilon mi hna kut tangah kan ṭuanmi rian nakin a ṭha deuh lai maw?’ Cu bantuk biahalnak hna zong kha Jehovah nih chimchungbia hmangin a leh hna. Nawl a ngaimi ka miphun cungah ruah ka surter lai i “kumvui ṭha” ka pek hna lai tiah Jehovah nih bia aa kam. (Isa. 30:23) Umnak inn le rian ṭha kong zongah Jehovah nih hitin bia aa kam: “Inn an i sak lai i an umnak hna lai, midang nih an hmankanh hna lai lo. Mitsur dum kha an i ser lai i a mitsurhang kha an din hna lai, midang nih an dinkanh hna lai lo.” (Isa. 65:21) Babilon ah sal i an taan lio he tahchunh tikah an nunnak cu lam tampi in a ṭha deuh lai. Cu a si ah sal i a rak taantertu hna a poi bikmi thil tah zeitin?

6. Pathian miphun cu zei bantuk damlonak dah caan saupi an in, sal sinak in a luatmi hna kha Jehovah nih zei bia dah a kamh hna?

6 Thlaraulei ngandamnak. Pathian miphun cu sal i an taan hlanpi in thlaraulei ah an rak zaw, phundang cun Jehovah he an i pehtlaihnak a rak ṭha lo. Jehovah nih profet Isaiah hmangin hitin a ti hna: “Israel mi hna, nan lu cu hma a khat i nan lungthin le nan ruahnak cu a zaw.” (Isa. 1:5) Annih cu thlaraulei ah an mit a caw i an hna a chet. Mah cu Jehovah cawnpiaknak ngaih lo awkah an hna an i phih i Jehovah pekmi ceunak hmuh lo awkah an mit an i chinh caah a si. (Isa.  6:10; Jer. 5:21; Ezek. 12:2) Sal taannak in a kir ṭhanmi hna cu cutin an si rih ahcun zei himnak dah an hmuh khawh lai? Jehovah mithmai ṭha an sung ṭhan lai, a si ko lo maw? Asinain mah Jehovah biakam hi hnangamtertu taktak a si: “Cu ni a phak tikah cun, thangpi in an relmi cauk chung bia cu hnachet nih a theih khawh lai i muihnak chungah a ummi mitcaw kha an mit a dei lai i khua an hmu kho lai.” (Isa. 29:18) Jehovah nih aa toidor i aa ngaichihmi a miphun kha thlaraulei damnak a pek hna lai. Jehovah cawnpiaknak kha an cohlan i an zulh chung paoh cu nunnak a pemi lamhruainak le ceunak a pek hna lai.

7. Pathian nih sal ah a taangmi hna bia a kamhmi hna cu zeitindah a tlin, mah a tlinmi nih zeicah kan zumhnak a fehter?

7 Jehovah nih a biakam ningin a tuah maw? A phi kha Israel mi hna tuanbia ah hmuh khawh a si. An ram ah a kir ṭhanmi Judah mi hna kha Jehovah nih himnak, duhdim in nunnak le thlaraulei damnak a pek hna. Tahchunhnak ah, Jehovah nih anmah nakin a ṭhawng deuhmi le a tam deuhmi an pawngkam mi hna sinin a huhphenh hna. An saṭil pawl zong sahrang nih an seh hna lo. Judah mi hna nih Isaiah, Jeremiah le Ezekiel ti bantuk nih an ṭialmi Paradis he aa tlaimi chimchungbia a tlinmi kha a cheubang lawngin an rak hmuh ti cu a hmaan ko. Asinain mah cu an caah lungthawh awk ngaingai a si i mah lio caan ah an herhmi te a si. Jehovah nih hlanlio a miphun hna caah a tuahmi kong kan ruah tikah kan zumhnak a fek chin. Mah chimchungbia a cheubang a tlinmi hmanh lungthawh awk tuk a si ahcun a ngan deuh in a tlinmi chinchin cu zeidah a lawh lai? Tuchan kan caah Jehovah nih a tuahmi kha i ruah hna u sih.

Tuchan ah Jehovah nih a Biakam a hun Tlinterning

8. Tuchan Pathian miphun cu zei bantuk ‘ram’ dah kan ngeih?

8 Tuchan Jehovah miphun cu miphun pakhat lawng an si lo i ram pakhat chung lawngah a ummi zong an si lo. Mah nakcha in chiti thuhmi Khrihfa hna cu “Pathian Israel miphun” an si. (Gal. 6:16, NW) An hawile a simi “tuudang” cu an sinah an ra i ‘ram’ pakhat he aa lomi bupi ah Jehovah Pathian kha lungrual tein an biakṭi. Mah biaknak cu an nunnak ah a biapi tukmi a si. (Johan 10:16; Isa. 66:8, NW) Jehovah nih zei bantuk ‘ram’ dah a kan pek? Mah cu thlaraulei paradis a si. Cuka ah Eden dum bantuk sining kong Pathian biakam cu thlaraulei in a tling. Tahchunhnak cheukhat i ruah hna u sih.

9, 10. (a) Tuchan ah Isaiah 11:6-9 chimchungbia cu zeitindah a tlin? (b) Pathian miphun lakah daihnak a um ti a langhtermi zei thil dah kan hmuh?

9 Himnak. Isaiah 11:6-9 ah saram le saram karah siseh, saram le minung karah siseh remnak le daihnak a um lai ti kha kan hmuh. Mah bia cu tuchan ah thlaraulei in a tling maw? A tling. Cu bantuk thilnung hna nih harnak asiloah rawhralnak an chuahter lai lonak a ruang kha caang 9nak ah hitin kan hmuh: “Rili cu ti in a khah bantukin hi ram cu Bawipa hngalhnak in a khat lai.” “Bawipa hngalhnak” nih  saram hna lungput kha a thleng maw? A thleng lo, Cungnung Bik Pathian kong hngalhnak le a daimi a lam zulh ruangah aa thlengmi cu minung an si. Cucaah tuchan thlaraulei paradis ah mah chimchungbia a tlinmi kan hmuhmi cu lunglawmh awk ngai a si. Pennak uknak tangah Khrih zultu hna nih saram ziaza a simi puarhrannak kha hlawt awk le thlaraulei unau pawl he rem te le lungrual tein um awkah an cawn.

10 Tahchunhnak ah, hi cauk ah khoikalei hmanh kan ṭanlonak a ruang le khoikalei hmanh ṭan lo ruangah Pathian miphun hrem an sinak kong kan rak i ruah. Zaangennak in a khatmi hi vawlei ah thah awk i tlerhkhonh an si buin zaangennak ah aa tel lomi “miphun” nganpi an ummi hi khuaruahhar awk a si ko lo maw? Mah nih Messiah Siangpahrang uknak tangah a ummi hna nih Isaiah chimmi daihnak an hmuh ti a langhter. Jesuh nih a zultu hna i an hmelchunh cu pakhat le pakhat an i dawtmi hi a si lai tiah a rak chim. (Johan 13:34, 35) A hmaanmi Khrihfa vialte kha daihnak, dawtnak le nemnak langhter awkah Khrih nih “zumhawk a tlakmi le a fimmi sal” hmangin lungsau tein a cawnpiak hna.—Matt. 24:45-47.

11, 12. Tuchan vawlei ah zei bantuk mangṭam dah a tlung, asinain Jehovah nih a miphun kha zeitindah thlarau rawl tampi a timhpiak hna?

11 Duhdim nunnak. Vawlei ah thlaraulei mangṭam a tlung. Baibal nih hitin a chim: “BAWIPA nih hi bangin a ti:  Ram chungah mangṭam, rawl ca i mangṭam si loin le ti ca i tihaal si loin, BAWIPA bia theih duh ca i mangṭam cu ka tlunter lai ni a ra lio.” (Amos 8:11) Pathian Pennak rammi hna cungah tah mangṭam a tlung maw? Jehovah nih a miphun le a ral hna an i dannak kha hitin a chimchung: “Keimah a ka bia i ka nawl a zulmi cu ei awk le din awk tampi an ngei lai nain nannih cu nan rawl a ṭaam lai i nan ti a haal lai. Annih cu an lung aa lawm lai, sihmanhsehlaw nannih cu ningzahnak nan hmu lai.” (Isa. 65:13) Mah bia a tlinmi kha na hmu maw?

12 Thlarau rawl cu kan sinah a kau chinmi le a thuk chinmi tiva bantukin a luang. Thlaraulei mangṭam a tlunnak hi vawlei ah kannih cu Baibal hrambunhmi cauk, awkhumhmi, video, pumhnak, civui le Web site hna in thlarau rawl tampi kan hmuh. (Ezek. 47:1-12; Joel 3:18) Nifa na nunnak ah duhdim nunnak kong Jehovah biakam a tlinmi hmuh cu lungthawh awk tuk a si ko lo maw? Jehovah cabuai ah hmaan tein rawl na ei maw?

Thlarau rawl khim tein ei awk, him tein um awk le ngandam awkah Khrihfabu nih a kan bawmh

13. Mitcaw khua an hmu lai i hnachet khua an thei lai timi Jehovah biakam a tlin kha zeitindah na hmuh?

13 Thlaraulei ngandamnak. Tuchan ah mi tampi cu thlaraulei an mit a caw i an hna a chet. (2 Kor. 4:4) Asinain Khrih nih vawleicung pumpi i damlonak le zawtnak kha a thlop. Mitcawmi khua an hmuh le hnachetmi khua an theih kha na hmu bal maw? Mi nih Baibal biatak an hun hngalh tikah biatak hngalh lo awkah an mit a rak cawttermi le an hna a rak chehtermi biaknaklei hlennak in an luat. Cu bantuk mi kha na hmuh hna tikah mah biakam a tlinmi na hmuh a si: “Cu ni a phak tikah cun, thangpi in an relmi cauk chung bia cu hnachet nih a theih khawh lai i muihnak chungah a ummi mitcaw kha an mit a dei lai i khua an hmu kho lai.” (Isa. 29:18) Vawleicung pumpi ah kum fatin mi thong tampi nih cu bantuk thlaraulei damnak an hmuh. A Liannganmi Babilon a chuahtak i thlaraulei paradis ah kanmah he Pathian biak awkah a rami hna cu Jehovah nih a biakam a tlinter ti a langhtertu an si.

14. Zei langhtermi thil kong ruahnak nih dah kan zumhnak a fehter lai?

14 Hi cauk i ṭhen kip ah Khrih nih donghnak caan ah a zultu hna kha thlaraulei paradis ah a hruai hna ti a langhtermi thil a um. Mah paradis ah lam tampi in kan hmuhmi thluachuah kong kha ruat lengmang hna u sih. Cutin kan tuah ahcun hmailei ca i Jehovah biakam kan zumhnak cu a fek chin lai.

“Na Pennak cu rung Tlung ko Seh”

15. Vawlei hi paradis ah a cang lai ti kha zeicah kan zumh khawh?

15 Jehovah i a hramthawk aa tinhnak cu vawlei hi paradis ah canter kha a si. Adam le Evi kha paradis dum ah a chiah hna i vawleicung ah an tefa in khahter awk le thilnung pawl zohkhenh awkah nawl a pek hna. (Gen. 1:28) Asinain Adam le Evi cu dotu Satan leiah an ṭan caah an tefa vialte kha  tlinlonak, sualnak le thihnak ro an coter hna. Cutin a si ko nain Pathian tinhnak cu aa thleng bal lo. A chim cangmi bia cu tlin loin a um lai lo. (Isaiah 55:10, 11 rel.) Cucaah Adam le Evi tefa hna cu vawlei ah an khat lai i vawlei kha an uk lai, cun vawleicung paradis ah Jehovah sermi thil hna kha dawtnak in an zohkhenh hna lai ti kan zumh khawh. Mah caan a phanh tikah sal ah a taangmi Judah mi hna sinah rak chimmi paradis nunnak kong chimchungbia cu tling khitkhet tein a tling lai. Tahchunhnak cheukhat hi i ruah hna u sih.

16. Paradis ah kan hmuh laimi himnak he aa tlaiin Baibal nih zeitindah a langhter?

16 Himnak. A donghnak ah Isaiah 11:6-9 ah ṭialmi lungthawh awk ngai a simi bia cu a biafang ningin a tling dih lai. Nu, pa le ngakchia hna cu khoika i an kal hmanhah him tein an um lai. Minung an si ah saram an si ah zei harnak hmanh an chuahter ti lai lo. Vawleicung pumpi cu na inn a si lai. Tiva, tidil le rili ah him tein ti naa lio kho lai i tlang hna le phong hna ah him tein khual na tlawng kho lai. Khua a hun muih tik zongah na thin a phang lai lo. Ezekiel 34:25 bia cu a tlin cang lai caah Pathian miphun cu “saṭil tlonnak hmun ah khan lungdai tein an um lai i tu chungah khan an it lai.”

17. Pennak nih vawlei pumpi a uk tikah Jehovah nih kan herhmi vialte a kan pek lai tiah zeicah kan zumh khawh?

17 Duhdim nunnak. Sifahnak, vaitamin baunak le mangṭam ti bantuk a um ti lai lo caan khi na mitthlam ah cuanter hmanh. Tuchan ah Pathian miphun nih thlarau rawl tampi an hmuhmi hi Messiah Siangpahrang nih a uknak tangah a ummi hna kha a zeilei paohin a zohkhenh hna lai ti a langhtertu aamahkhaan a si. Jesuh nih vawleicung a um lioah a rawl a ṭaammi mi thong tampi kha changreu le nga tlawmte in a dangh hnanak thawngin cutin a tuah khawh kha a langhter. (Matt. 14:17, 18; 15:34-36; Mar. 8:19, 20) Pathian Pennak nih vawleicung pumpi a uk tikah hi bantuk chimchungbia hna hi a biafang ningin a tling lai: “Thlaici nan tuh tikah BAWIPA nih ruah a surter lai i a khohter hna lai i kumvui ṭha aan pek hna lai. Cun nan saṭil nih ram hno tampi an hmuh lai.”—Isa. 30:23.

18, 19. (a) Isaiah 65:20-22 ah ṭialmi chimchungbia cu na caah zei sullam dah a ngeih? (b) Kan chan cu “thingkung” bantuk a si lai timi nih zeidah a chimduhmi a si?

18 Tuchan ah mi tampi nih inn ṭha ngeih asiloah rian ṭha ngeih kha mang lawngah an mangh khawh. A rawkralmi hi vawlei ah mi tampi cu fakpi in le caan tampi rian an ṭuan ko nain anmah le an chungkhar caah ṭhatnak tlawmpal lawng an hmuh. Ṭhatnak vialte kha cu mirum le a hak a kaumi hna nih an i lak. Vawleicung pumpi ah mah chimchungbia a tlin tikah zeidah a lawh lai khi na mitthlam ah cuanter hmanh: “Mi nih inn an i sak lai i an umnak hna lai, midang nih an hmankanh hna lai lo. Mitsur dum kha an i ser lai i a mitsurhang kha an din hna lai, midang nih an dinkanh hna lai lo.  Thingkung bantukin ka mi cu an chan a sau lai. An ṭuanmi chungin an hmuhmi theitlai kha tlamtling tein an hman hna lai.”—Isa. 65:20-22.

19 Kan chan cu “thingkung” bantuk a si lai a ti tikah zeidah a chimduhmi a si? Thingkung nganpi tangah na dir i mah thingkung a umnak hi zei can dah a si cang timi kong na ruah tikah na khuaruah a har tuk ko lo maw? Mah thingkung cu na pi le na pu an chuah hlanpi in a um cangmi a si men lai. Atu bantukin mitling lo na si rih peng ko ahcun mah thingkung cu nangmah nakin sau deuh a nung men lai. Na thih hnupi hmanhah a nge kha sau chinchin in a samh rih ko lai. Asinain a ra laimi Paradis ah kan chan cu a saupi cang lai tiah dawtnak in Jehovah nih bia a kan kamh. (Salm 37:11, 29) Saupi a nungmi thingkung hna hmanh kan caah chikkhat a nung i a thi ṭhanmi hramhkung bantuk an si lai caan a phan cang lai.

20. Pennak tangah zumhfek tein a ummi hna cu zeitindah a tlingmi ngandamnak an hmuh lai?

20 A tlingmi ngandamnak. Atu ah mikip nih zawtnak le thihnak kan ton. Kan dihlak in damh khawh lomi zawtnak a simi sualnak kan ngei. Mah kha Khrih tlanhnak man lawng nih a damh khawh. (Rom 3:23; 6:23) Kum Thongkhat Uknak chungah Jesuh le amah he uktu a ṭuanṭimi hna nih minung kha tlanhnak man in ṭhatnak tling hmuh awkah an kan bawmh lai i zumhfekmi hna sualnak kha duhsah duhsah in an thenh lai. Mah tikah Isaiah chimchungmi mah bia hi a tling dih cang lai: “Kan ram i a ummi cu ka zaw tiah an zai ti lai lo i an sualnak vialte cu ngaihthiam an si lai.” (Isa. 33:24) Mitcaw, hnachet le kebei pakhat hmanh an um ti lai lo caan khi na mitthlam ah cuanter hmanh. (Isaiah 35:5, 6 rel.) Pumsalei a si ah, lungthinlei a si ah Jesuh nih a damh khawh lomi zei zawtnak hmanh a um lai lo. Pennak tangah zumhfek tein a ummi hna nih a tlingmi ngandamnak an hmuh lai.

21. Thihnak cu zeitindah tuah a si lai, mah biakam cu na caah zeicah hnemtu a si?

21 Zawtnak ruangah a chuakmi, sualnak man a simi thihnak tah zeitin? Mah thihnak cu kan “ral” a si. Mitlinglo a simi dihlak nih mah ral kha atu a si lo hmanhah a hnuah kan sung lai. (1 Kor. 15:26) Asinain thihnak cu Jehovah caah ṭih a nungmi ral a si maw? Isaiah nih a chimchungmi hi ruathmanh: “BAWIPA nih thihnak cu zungzal ca in a hrawh lai. Mi vialte cu an mitthli a hnawh hna lai.” (Isa. 25:8) Mah caan kha na mitthlam ah na cuanter kho maw? Ruakhumh a um ti lai lo i thlaan zong a um ti lai lo, cun ngaihchiat ruangah mitthli tlak zong a um ti lai lo. Jehovah nih mithi ka thawhter hna lai timi a biakam a tlinter lai caah lawmhnak mitthli tu a tla cang lai. (Isaiah 26:19 rel.) A donghnak ah, thihnak ruangah a chuakmi lungfahnak vialte kha Jehovah nih a damter cang lai.

22. Messiah Pennak nih vawleicung ah Pathian duhnak a tlinter dih tikah zeidah a cang lai?

22 Kum Thongkhat a dih tikah Pennak nih vawleicung ah Pathian duhnak a tlinter dih cang lai i Khrih nih Pennak kha a Pa a pek ṭhan lai. (1 Kor. 15:25-28) A donghnak ah minung cu mitling an si cang lai i dongh hngal lo khor in Satan thlah a si tikah hmanung bik hneksaknak ton awkah timhcia an si  cang lai. Mah hnuah Khrih nih rulhreu ṭhalo a simi Satan le a mi hna kha a hrawh dih cikcek hna lai. (Gen. 3:15; Biat. 20:3, 7-10) Asinain zumhfek tein Jehovah a dawmi hna tu cu a ṭha tukmi ruahchannak an ngei. Mah kong kha Baibal nih aa dawh bikmi biafang in a langhter. Mah cu zumhfekmi hna nih “Pathian fale hna luatnak a sunglawimi” kha an hmuh lai timi biakam a si.—Rom 8:21.

Pennak nih minung le vawlei he aa tlaimi Jehovah biakam vialte kha a tlinter lai

23, 24. (a) Pathian biakam a tling lai ti kha zeicah kan zumh khawh? (b) Zei tuah awkah dah bia na khiah?

23 Mah biakam cu ruahchannak, duhnak le saduhthahnak men ah hram aa bunhmi a si lo. Jehovah biakam pawl cu a tling hrimhrim lai. Zeicah? Hi cauk i ṭhen 1nak ah kan i ruahmi Jesuh bia kha ruat ṭhan hmanh. A zultu hna kha Jehovah sinah hitin thlacam awk a cawnpiak hna: “Na Pennak cu rung tlung ko seh, Vancung khua ah na duhnak an tuah bangin Vawleicung ah hin tuah si ve ko seh.” (Matt. 6:9, 10) Pathian Pennak cu mi pakhat i ruahnak chungah a ummi a si lo. A um taktakmi a si i atu ah van ah a uk cang. Pennak nih kum zakhat chungah Jehovah biakam a tlintermi kha Khrihfabu chungah fiang tein kan hmuh khawh. Cucaah Pathian Pennak nih vawleicung ah a nawlngeihnak dihlak a langhter tikah Jehovah biakam vialte a tling lai tiah kan zumh khawh.

24 Pathian Pennak a ra lai ti kha kan hngalh. Jehovah biakam vialte a tling lai ti kha kan hngalh. Zeicah? Pathian Pennak nih a uk cang caah a si. Cucaah ‘Pennak nih a ka uk kha ka nunning in ka langhter maw?’ tiah pakhat cio nih kan i hal awk a si. Pennak tangah zumhfek tein a ummi si awkah atu in fakpi in i zuam hna u sih, cuticun a ding i a dikmi a uknak in ṭhatnak kan hmu zungzal lai.