A ummi cazin ah kal

A ummi cazin ah kal

 BIAHALNAK 1

Zeibantuk Minung Dah Ka Si?

Zeibantuk Minung Dah Ka Si?

ZEICAH A BIAPIT?

Zeibantuk minung dah na si i zeidah na zumh ti kha na hngalh ahcun hneknak na ton tikaha a ṭhami biakhiahnak na tuah khawh lai.

NANGMAH SI LAW ZEITINDAH NA TUAH LAI?

Mah thil sining hi na mitthlam ah cuanter hmanh: Karen cu nuamhsaihnak puai ah a phaknak minit pahra hmanh a rauhhlan ah a hnulei in a theih tukmi aw pakhat kha a theih.

“Ziah, mah kaa ah cun na dir ko?”

Karen cu a hnulei ah aa mer i a hawinu Jessica kha a chin on kami beer thawl hnih he a hmuh. Jessica nih Karen kha beer thawl khat a pek pah in “ka ngakchia tuk rih, ti hlah mu” tiah a ti.

Karen nih al a duh ko nain Jessica cu a hawi a si fawn. Nuamh a thiam lomi tiah a ti ding zong kha a duh lo. Cun Jessica cu nu ṭha pakhat a si. Mah a dinnak thawngin zeidah a cang hlei lai. ‘Beer din pei a si ko cu. Ritnak siivai hmanmi hmanh a si ṭung lo’ tiah Karen nih a ruah.

Nangtah Karen bantuk thil sining na ton ahcun zeitindah na tuah lai?

RUAT ṬHAN

Mah bantuk thil sining ah a ṭhami biakhiahnak tuah khawh awkah zeibantuk minung dah ka si i zeidah ka zumh ti kha hngalh a hau. Cutin na hngalh ahcun midang nih na cungah huham an ngei kho lai lo i nangmah tein biakhiahnak na tuah khawh lai.​—1 Korin 9:26, 27.

Mah tein biakhiahnak tuah khawh awkah zeitindah na tuah khawh? A hnuah aa telmi biahalnak hna kha phi law tuahchun hmanh.

 1 KA ṬHATNAK CU ZEI HNA DAH AN SI?

Thil ti khawhnak le sining ṭha hna ngeihmi hngalh­nak nih mahle mah i zumhnak a ngeihter.

BAIBAL CHUNG I ZOHCHUNHAWK: “Phungchim cu a thiam lo zong ka si ko lai, sihmanhsehlaw hngalhnak ah cun ka niam deuh hrimhrim lo” tiah lamkaltu Paul nih a ṭial. (2 Korin 11:6) A hngalhmi Baibal fimnak thawng­in ralchanhnak hna a ton tikah fek tein a dir kho. A ṭhatlonak in chimmi bia ruang­ah amahle amah aa zumhnak a zor lo.​—2 Korin 10:10; 11:​5.

NANGMAH LE NANGMAH I DOTHLAT. Pahrang na ngeihmi asiloah na thiammi pakhat kha a tanglei ah ṭial.

Atu na ngeihmi sining ṭha pakhat kha ṭial. (Tahchunhnak ah, zohkhenh

a hmangmi, a siangmi, zumhawk a tlakmi, caan a upatmi na si maw?)

2 KA CHAMBAUNAK CU ZEI HNA DAH AN SI?

Thir cikcin pakhat ah aa pehnak kual hna cu a chambaunak a si bantukin kan chambaunak zong nih kan ruahnak ningin um peng khawh ti loin a kan umter khawh.

BAIBAL CHUNG I ZOHCHUNHAWK: Paul nih a chambaunak kha a hngalh i hitin a ṭial: “Ka chunglei mi cu Pathian phung ah khan aa lawm; sihmanhsehlaw ka chung i phung dang a rak um ve kha ka hngalh​​—⁠​cu phung cu ka lung nih a ṭha a timi phung a rak dohtu kha a si. Cu phung nih cun, ka pum chung i rian a ṭuanmi sualnak phung sal ah khan a ka ser.”​—Rom 7:22, 23.

NANGMAH LE NANGMAH I DOTHLAT. Zei na chambaunak hna dah na tei a herh?

 3 KA HMUITINH CU ZEIDAH AN SI?

Taxi pakhat kha hlangin datsi a dih tiang hmunkhat lawngah atu le atu na helter lai maw? Cutin tuah cu hruh a si lengah phaisa sawksam zong a si!

Zeidah kan i cawn khawh? Hmuitinh na ngeih lo ahcun nunnak lam na tlau lai. Hmuitinh na ngeih ahcun mah kha phanh khawh awkah zeitindah ka kal lai ti kha a hlankan in naa timhtuah lai.

BAIBAL CHUNG I ZOHCHUNHAWK: Paul nih hitin a ti: “Ka tlik tik­ah tinhmi kawl fiang tein ka ngei.” (1 Korin 9:26) Paul cu nunnak ca lawng kha biapi ah ruat loin tinhnak a ngei i mah aa tinhnak ningin a nung.​—Filipi 3:12-14.

NANGMAH LE NANGMAH I DOTHLAT. Hmai kum chungah tlinh na duhmi hmuitinh pathum kha ṭial.

4 A FEKMI KA ZUMHNAK CU ZEIDAH A SI?

Zeibantuk minung dah ka si ti kha na hngalh ahcun thlichia fakpi in a hran lioah a hram thukpi in a thlami thingkung bantuk na si lai

A fekmi zumhnak na ngeih lo ahcun lungawṭawm in na um lai. Mah tein i tlaihmi na ngeih lo ahcun a rong a phunphun in aa thlengmi kinglang bantukin ṭhirual hna lakah na si lai.

Mah canah midang nih zei an tuah hmanhah a fekmi na zumhnak ningin na nun ahcun zeibantuk minung dah na si ti na langhtermi a si.

BAIBAL CHUNG I ZOHCHUNHAWK: Profet Daniel cu kum hra fai a si lioah a nulepa, zumtu hawi pawl he aa hlatnak hmunah a um ko nain Pa­thian nawlbia kha a zulh i ‘i thurhhnawmhter lo awkah bia a khiah.’ (Daniel 1:8, NW) Cuticun i zumhnak a ngei. A fekmi a zumhnak ningin a nung.

NANGMAH LE NANGMAH I DOTHLAT. A fekmi na zumhnak cu zeidah a si? Tahchunhnak ah: Pathian na zum maw? Na zumh ahcun zeicah na zumh? Zeinihdah Pathian a um taktak ti kha aan zumhter?

Pathian i ziazalei phunglam hna nih a ka ṭhathnemh tiah na zum maw? Na zumh ahcun zeicah?

A fakmi thlichia nih a hranh hmanhah fek tein a dirmi thingkung he i lawh na duh maw? Asiloah thlizil nih a hranh menmen in a ṭilmi thinghnah he dah i lawh na duh? Naa tlaihmi kha a feh nakhnga tuah. Cutin na tuah ahcun fek tein a dirmi thingkung he naa lo lai. Mah lengah Zeibantuk Minung Dah Ka Si? timi biahalnak i a phi kha hngalh awkah bawmtu a si lai.