A ummi cazin ah kal

A ummi cazin ah kal

 ṬHEN 1

“A Tlaumi Tuu Kha Ka Kawl Lai”

“A Tlaumi Tuu Kha Ka Kawl Lai”

Tuu pakhat cu khoika ah dah ka kal lai i khoika ah dah ka phanh lai ti kha a hngal lo. Hramh a ei pah bu in zei ruangah ti hngal loin tuurun he aa hlatnak hmun ah a phan. Atu cu tuurun zong a hmu ti lo i tuukhal zong a hmu ti lo. Khua a hun mui thluahmah. Doh ṭhan khawhnak a ngei lomi tuu cu sahrang pawl an umnak nelrawn ah thinphan dai loin a um. Mah lio caan ah a theih pengmi aw kha a theih. Mah aw cu tuukhaltu aw a si. Tuukhal cu tuu sinah a tli i a cawi. A angki chungah a pom i inn ah a tlunpi.

Jehovah Pathian nih mah bantuk tuukhal he amahle amah kha atu le atu aa tahchunh. Baibal ah Pathian nih hitin bia a kan kamh: “Keimah hrimhrim nih ka tuu kha ka zohkhenh cang hna lai i ka kawl cang hna lai.”​​—⁠Ezekiel 34:​11, 12.

‘Ka Zohkhenhmi Hna Ka Tuu’

Jehovah Pathian i a tuu cu ahote dah an si? Jehovah kha a daw i a biami hna kha an si. Baibal nih hitin a ti: “Ra tuah u, kun u sih law bia u sih; a kan Sertu BAWIPA hmaiah cun kan khuk i bil u sih! Amah cu kan Pathian a si, kannih cu a kan zohkhenhmi kan si, a kan cawmmi tuurun kan si.” (Salm 95:​6, 7) Tuu hna nih tuukhal hnu kha an zulh bantukin a salle hna zong nih tuukhal a simi Jehovah Pathian hnu kha zulh an duh ve. A si ahcun annih cu sualnak a ngei lomi an si maw? An si lo. A caancaan ah cun Pathian salle hna cu ‘aa ṭhekmi tuu,’ “a tlaumi tuu,” le ‘lam a tlaumi tuu’ an si tawn. (Ezekiel 34:12; Matthai 15:24; 1 Piter 2:​25) A sal pakhat cu bupi he duhsah duhsah tein aa hlat hmanhah Jehovah Pathian nih a kir ṭhan lai tiah aa ruahchan.

 Jehovah Pathian kha na tuukhal in na ruat rih maw? Tuchan ah Pathian nih tuukhal a si kha zeitindah a langhter? A kong pathum in zoh hna u sih:

A caan hmaan tein thlarau rawl a kan pek. ‘Tlonnak hmun ṭha ah khan ka tlonter hna lai. Khika ah an i din lai, khika ram hninhnonak hmun ah khan an um lai i ram ṭam awk tampi an hmuh lai.’ (Ezekiel 34:14) Jehovah Pathian nih a caan hmaan tein pekmi thlarau rawl kha a kan simh nakhnga lo a phunphun in a kan timhpiak i a kan pek. Na thlacamnak aan letmi capar pakhat, phungchimnak pakhat asiloah video pakhat kha naa cinken ti maw? Mah hna ruangah Pathian nih a ka zohkhenh ti kha na zumh a si ko lo maw?

A kan huhphenh i a kan bawmh. Jehovah Pathian nih hitin bia a kan kamh: ‘A tlaumi tuu kha ka kawl hna lai, hma a ingmi kha ka thlop hna lai, a zawmi kha thazaang ka pek hna lai.’ (Ezekiel 34:16) Lungretheih ruangah tha a dermi le lung a kuaimi hna kha Jehovah Pathian nih thazaang a pek hna. Zumtu khat hna ruangah, a dang kong hna ruangah fahnak a ingmi tuu hna kha damnak an hmuh nak­hnga a bawmh hna. Bupi in lam a tlaumi le a chiatnaklei in hmuhnak a ngeimi hna kha kir ṭhan dingin a sawm hna.

Zohkhenh an herh tiah a kan ruah. ‘An i ṭheknak hmun paoh khan ka chuahpi hna lai, a tlaumi tuu kha ka kawl hna lai.’ (Ezekiel 34:​12, 16) A tlaumi tuu kha ka hmu ṭhan ti lai lo tiah Jehovah Pathian nih a ruat lo. Pathian nih tuu pakhat a tlau caan kha a hngalh i mah tuu kha a kawl, a hmuh ṭhan tikah aa lawm tuk. (Matthai 18:​12-​14) Mah lengah a sal taktak a simi hna kha “ka tuurun, ka mi, ka cawmmi ka saṭil” ti zongin a auh hna. (Ezekiel 34:31) Nang zong Pathian tuu na si.

A tlaumi tuu kha ka hmu ṭhan ti lai lo tiah Jehovah Pathian nih a ruat lo. Mah tuu kha a hmuh ṭhan tikah aa lawm tuk

“Hlanlio Caan bantuk khan Kan Ni Hna cu Tharter Ṭhan ko Hna”

Jehovah Pathian nih zeicah aan kawl i kir ṭhan dingin aan sawm? A ruang cu i nuam seh ti aan duh caah a si. A tuu hna cungah “thluachuahnak ruah kha ka pek hna lai” tiah bia aa kam. (Ezekiel 34:26) Mah cu a fiangmi biakam a si. Nangmah theng zong hlanah cutin na rak ruah bal ko lai.

Jehovah Pathian kong na theihka lio kong kha ruat ṭhan hmanh. Tahchunhnak ah, Pathian min le minung caah Pathian tinhnak kong he aa pehtlaimi biatak na theihka ah zeitindah na um? Civui le Pengkomh civui hna ah unau hna he lungrual tein nan ummi zeitlukin dah a nuamh kha naa cinken ti maw? Hngalh duhnak a ngeimi kha thawngṭha na chimh i inn ah na kir ṭhan tikah naa nuam tuk a si ko lo maw?

Cu bantuk nuamhnak kha na hmuh khawh ṭhan. Hlanlio Pathian salle nih hitin thla an cam: ‘Maw Jehovah, nangmah lei ah kan mer ṭhan law kan rak kir ko lai; Hlanlio caan bantuk khan kan ni hna cu tharter ṭhan ko hna.” (Ţahnak Hla 5:21, NW) Jehovah nih an thlacamnak kha a ngaihpiak hna caah a sinah an kir ṭhan i hlanlio bantukin nuam tein an biak ṭhan. (Nehemiah 8:​17) Nang zong Jehovah Pathian nih cutin siter aan duh ve.

Jehovah Pathian sinah kir ṭhan timi cu chim awkah a fawi nain tuah awkah a har. Kir ṭhan tikah ton hngami harnak cheukhat le mah kha zeitindah tei khawh a si ti kha zoh hna u sih.