A ummi cazin ah kal

A ummi cazin ah kal

Kan Zapi tein Lamhruainak Kan Herh

Kan Zapi tein Lamhruainak Kan Herh

Pa Lian cu a lungre a thei ngaingai. * Thil sining nih a lungre a theihter. A chungkhar a zohkhenh khawh hna nakhnga a hmunmi rian kawl aa zuamnak cu a sau ngai cang. A fale kha fimnak le a ṭha deuhmi hmailei nunnak ngei hna seh ti a duhpiak hna. Asinain mah cu a si kho lo dingmi a lo. Aa ruahchanh khawh bikmi cu ngandam tein um a si. Mah lawngah rian a ṭuan khawh peng lai, a chungkhar kha a zohkhenh khawh hna lai i inn hlan man zong a pek khawh lai. Asinain pakhatkhat a can sual ahcun a chungkhar kha ahonihdah a zohkhenh hna lai timi kongah a lungre a thei tuk.

Pa Lian i a nupi Sui Sui zong a lungre a thei ve. Atu hrawng an i pehtlaihnak cu a ṭha lo ngai. Pa Lian cu rianṭuannak in a ṭin tikah a ba tuk tawn. Sui Sui nih a fale kha ziaza ṭha le upatnak zeitindah langhter ding a si timi a cawnpiak hna tikah Pa Lian nih ka bawm seh ti a duh nain a fale caah caan a pe kho hna lo. Amah le Pa Lian atu le atu an i sik lengmangmi zong a lung a ṭha lo. Cutin an i sikmi cu an fale ca zongah a ṭha lo. Mah lengah an fale pakhatkhat an dam lo ah tah zeitindah an tuah lai? Sii thlopnak le siizung umnak caah tah tangka khoika in dah an hmuh lai? A cang khomi thil hna kha Sui Sui nih ruahhmanh a duh ti lo!

Pa Lian le Sui Sui nih an sangah a ummi hna i an sining zong a hlan bantukin a si ti lo kha an hmuh. Mi pawl zong pakhat le pakhat caan tlawmpal lawng an i pe kho cang hna i Pa Lian te nih an uar ngaimi ṭuanṭi duhnak lungput zong a um ti lomi a lo. An theihhngalhmi hna zong anmah bantukin harnak an ton vemi le hmailei caah an lungre a theih vemi kha an hmuh. Aho  sin hmanhah lungdaihnak taktak a um ti lomi a lo. Mah buaibainak hna caah tawnghtham khawh ning hmu in daihnak le lungsinak hmuh khawh a si ahcun zeitlukin dah a ṭhat hnga tiah Sui Sui nih atu le atu a ruah tawn. Pa Lian le Sui Sui cu an i zuam tuk ko nain an i zuamnak vialte cu san a tlai lomi a lo.

Nikhat cu Pa Lian le Sui Sui nih an tonmi buaibainak kong kha an i ruah.

Pa Lian nih “lungdaihnak le lawmhnak hmuh khawhnak lam hmu kho u sih law zeitlukin dah a ṭhat hnga?” tiah a ti.

“A si! Kei zong mah kong cu ka ruah ve. Kan tonmi buaibainak vialte hi tawnghtham khawh ning a um ko lai” tiah Sui Sui nih a leh.

“Asinain nunnak kong he aa tlaimi biaknaklei zumhnak le ruahnak hna cu tampi a um. A zapi tein cun kan hlathlai khawh lai lo caah lawmhnak a pe khomi lam cu zeitindah kan hmuh khawh lai? Mah lengah nunnak ah tonmi buaibainak caah tawnghtham khawh ning a um tiah ahopaoh nih an ti. Asinain zeihmanh nih minung kan nunnak hi a thleng kho taktak hlei lo ti cu nang zong na hngalh ko. Kei cu tawnghtham khawh ning kawl zong hi man a ngei lai tiah ka ruat lo” tiah Pa Lian nih a ti ṭhan.

Pa Lian nih a chimmi kha Sui Sui nih a cohlan ko nain an chungkhar caah bawmhnak cheukhat hmuh a duh tuk. Zeitin a si hmanhah bawmhnak hmuh khawhnak lam khatkhat cu a um ko lai tiah a ruah.

Nang zong Pa Lian le Sui Sui nih an tonmi buaibainak bantukin thil cheukhat caah na lungre a thei ve ko lai. An tonmi buaibainak hna cu vawleicung pumpi ah ton tawnmi a si. Hmunkip ah a ummi hna nih a ṭhami ngandamnak, lungdaihnak le a nuammi chungkhar nunnak kha hmuh an duh. Asinain mah vialte hmuh khawh ding timi cu a har tukmi a lo. Daihnak le lawmhnak hmuh khawhnak lam cu hmuh khawh a si hnga maw?

^ cat. 2 Mah cauk ah aa telmi a kong hna cu nuva tuah hnih kar i biaruahnak phun in ṭial a si.