A ummi cazin ah kal

A ummi cazin ah kal

Dawtnak le Dinnak a Ngeimi Pathian

Dawtnak le Dinnak a Ngeimi Pathian

Lam khatkhat in nulepa he kan i lawhnak a um

“Pa Lian le Sui Sui, bia pakhat in hal kaan duh hna, ngakchia pakhat kan zoh tikah a sinah a nu le a pa i an sining hna a ngeih kha kan hmuh tawn a si ko lo maw?” tiah Sang Sang nih a hal hna.

“A si, kan fanute hi a nu he an i lo tuk tiah ka ti tawn. A nu i a ziaza hmanh a ngeih” tiah Pa Lian nih a ti ṭhan.

“Nan fanute cu a nu he an i lo taktak ko. A kan Sertu kan Pa kong he aa tlai zongin cutin kan chim khawh ve. Jehovah nih thil a sermi hna le kanmah le kanmah kan i zoh tikah Pathian i a sining hna le zeibantuk Pathian dah a si ti kha kan hmuh khawh” tiah Sang Sang nih a leh ṭhan.

“Hngalh duh awk ngai a si. Mah kong cu voikhat hmanh ka ruat bal lo” tiah Pa Lian nih a ti.

“A taktak ti ah cun mah kong cu Baibal ah hmuh khawh a si. Rom 1:20 ah hitin a ti: ‘Vawlei a ser hramthawk te khan Pathian nih cun hmuh khawh a si lomi a sining kha fiang tein a langhter ko; cucu zungzal in a hmunmi a ṭhawnnak le Pathian a sinak kha an si. Cucu minung nih khan Pathian thil sermi ah hin an hmuh khawh ko hna’” tiah Sang Sang nih a chimh. Mah cu zeitindah a si khawh tiah Pa Lian nih a hal.

Sang Sang nih hitin a chimh chap: “Pa Lian, fale cung i pa pakhat nih a ngeihmi dawtnak kha ruathmanh. Nangmah bantukin pa ṭha a simi pakhat nih cun a fale kha a zohkhenh zungzal hna. A caancaan ah cun a fa nih a pa bia kha ngai loin le upat loin a um hmanhah a pa nih a herhmi thil kha a bawmh i a dawt peng rih ko. Pa pakhat nih zeicah cutin a  tuah? A ruang cu Jehovah nih nulepa sinah chungkhar kha tlaihchan in fale cungah dawtnak langhter dingin a ser chih hna caah a si. Mah nulepa dawtnak nih kan cungah Jehovah nih a ngeihmi dawtnak kha a langhtermi a si.

Kan nun khawh peng nakhnga Jehovah nih a herhmi thil vialte kha dawtnak in a kan timhpiak

“Jehovah kha kan hngalh lo hmanhah a sermi thil hna in kan herhmi thil kha a kan pek peng rih ko. Cucaah Matthai 5:45 ah hitin a tinak a si: ‘Cuticun vancung khua i a ummi nan Pa fale cu nan si lai. Anih nih cun a ṭhami he a ṭhalomi he, an cungah a ni kha a tlanter i, ṭhatnak a tuahmi he ṭhatlonak a tuahmi he, an cungah a ruah kha a surter.’ Ruah le nitlang in ṭhatnak kan hmu taktak a si ko lo maw? Mah hna thawngin kan nung kho i tirawl zong kan cin khawh. Cun mah a hrampi a herhmi thil hna caah kan i lawmh zong lawmh lo zongah Jehovah nih a kan zohkhenh peng rih ko. Mah nih Jehovah cu dawtnak Pathian a si ti kha a langhter a si ko lo maw? A taktak ti ah cun dawtnak cu Pathian i a lang bikmi a sining a si tiah Baibal nih a ti. 1 Johan 4:8 ah hitin kan rel: ‘Pathian cu dawtnak a si.’”

Mah hnuah Sang Sang nih Pa Lian kha dinnak kong a ruahter. “Nang cu pa ṭha pakhat in na fale kha dinnak le dawtnak he na zohkhenh hna a si ko lo maw? Mah lengah midang upat thiam awk le mahle ṭuanvo aa hngalmi si awk in an ṭhang lai tiah na zumhmi ziazalei he aa tlaimi nunphung he aa tlak in nun ding zong kha na cawnpiak ko hna lai. Mi nih anmah le an chungkhar caah dinnak an duh ti cu a fiang ko. Ding tein kan pehtlaih hna seh ti kan duh bantukin mi pawl zong nih dinnak kha sunsak hna seh ti kan duh. Zeicah? Atu zong hi Sertu i a sining hna kha kan langhtermi a si.”

Mah hnuah Sang Sang nih Pa Lian le Sui Sui kha Jehovah kong a langhtermi mah Baibal cang hna hi a relpiak hna:

  •  “A lam vialte cu a dik i a hmaan. Zumhawktlak le hlen hmang lo Pathian a si, Amah cu a ding i a dik.”—Deuteronomi 32:4.

  • “Bawipa nih dinnak le ṭhatnak cu a duh.”—Salm 33:5.

A kan Sertu Jehovah nih dinnak kha a duh bantukin kannih zong nih kan duh ve. Zeicatiah Pathian muikeng in ser kan si caah a si, chim duhmi cu Jehovah i a sining tampi he ser chih kan si caah mah hna kha kan nunnak ah ri pakhat tiang kan langhter khawh tinak a si. (Genesis 1:27) Asinain zeidah a ding i a ding lo timi tu cu kanmah tein biakhiah awkah Jehovah nih nawl a kan pe lo. Pathian nih phunglam le nawlbia hna kha a kan pek i mah ningin vawleicung i a fale hna kha nunter a kan duh. Pathian nawlbia hna kha an buar tikah dinlonak a hung um.

Sang Sang nih hitin a chim chap: “Chingchiah awk tlak a simi kong pakhat in kaan chimh rih hna lai. Ram tam deuh i upadi hna cu a luancia kum thong tampi lioah an ṭialmi Baibal ah a ummi upadi hna he aa lawhnak tampi a um ti kha nan hngal maw?” Pa Lian le Sui Sui cu an khuaruah a har.

Sang Sang nih a bia kha hitin a peh: “Tahchunhnak ah, ram tampi i upadi hna ah lainawnnak, firnak le zuanzamnak hna kha nawl an awnh lo. Mah vialte kha a luancia kum 3,500 lio in Baibal ah ṭial a rak si cang. Jehovah i a dingmi mah phunglam ningin kan nun tikah Pathian i a dinnak kha kan langhtermi a si i kan nunnak ah lungsinak le nuamhnak kan hmuh khawh.”

Jehovah i a dinnak kha minung nih kan ngeih caah sualnak kong he aa tlaiin upadi hna kha an chuahnak a si

Sang Sang nih a chimmi vialte kha an ngaih dih hnuah Jehovah cu dawtnak le dinnak a ngeimi Pathian a si ti kha Pa Lian le Sui Sui  nih an hngalhthiam. Midang he i pehtlaih tikah dawtnak le dinnak sining hna langhter cu a biapi bikmi a si tiah an ruah zungzal. An fale cungah dawtnak le dinnak langhter peng awkah an i zuam. Hram aa sihmi mah bantuk duhnak hna an ngeihmi cu Sertu Jehovah Pathian i a sining hna kan langhtermi a si ti kha an hngalhthiam.

Jehovah i a sining hna kha a theih caah Pa Lian cu a lung a cawlcang tuk. Mah nih Jehovah cu a caah a um taktakmi a siter i a nupi le a fale cungah dawtnak langhter deuh awkah a tuah dingmi thil pakhatkhat a um tiah a hun ruah. Mikip cungah dawtnak langhter in ding tein a pehtlaih hnanak thawngin Jehovah i zohchunh cu ṭhatnak a um lai tiah a ruah.

Sang Sang nih lunglawm tein hitin a leh: “Mah cu a ṭha tuk Pa Lian, na ruahning hi Baibal tha peknak he aa tlak tuk. Mi tampi nih an hngalhmi Baibal cangkhat kha hmuhsak kaan duh.” Sang Sang nih Baibal kha a kau i a tanglei i langhtermi hi Pa Lian kha a relpiak:

  • “Mi nih kan cungah tuah hna seh ti nan duh bantuk khan midang cung zongah va tuah ve u; hihi Moses Nawlbia le profet hna cawnpiaknak an sullam cu a si.”—Matthai 7: 12.

Jehovah nih dawtnak le dinnak lengah a dang sining ṭha hna zong a ngei rih tiah Sang Sang nih a chim. Pa Lian le Sui Sui nih Jehovah i duh nungmi a sining hna kong kha tam deuh in hngalh an duh.