A ummi cazin ah kal

A ummi cazin ah kal

A Rauhhlan ah Daihnak le Lawmhnak a Um Cang Lai!

A Rauhhlan ah Daihnak le Lawmhnak a Um Cang Lai!

Pa Lian le Sui Sui nih vawleicung ah pakhat le pakhat dawtnak in aa pehtlaimi miṭha pawl in an khah lainak ni a phan lai ti kha an hngalh caah an lung a cawlcang tuk. Mangṭam, zawtnak asiloah thihnak a um ti lai lomi vawlei, mikip nih daihnak le lawmhnak an hmuh lainak vawlei ah nun cu zeitlukin dah a ṭhat lai ti kha an ruah. Mah vialte kha si colh seh ti an duh.

Hngalh duhnak he Pa Lian nih hitin a hal: “Mah vialte hi zeitikah dah a si lai?”

Sang Sang nih Pa Lian kha hitin a leh: “Na biahalnak cu hngalh duh awk ngai a si. Pa Lian, a si ah cun bia pakhat in hal kaan duh. Jesuh tiah an auhmi pa kong kha na thei bal maw?”

“Fimnak bia cheukhat a chim tiah ka theih bal. Asinain mah cu ka biahalnak he zeitindah aa pehtlaih?” tiah Pa Lian nih a hal ṭhan.

Sang Sang nih hitin a chimh: “Jesuh vawleicung a rak nun lio a luancia kum 2,000 hrawngah a zultu hna nih atu na ka halmi bia hi an rak hal ve. Jesuh nih a phi a chim tikah a cangmi thil tampi aa telmi ‘hmelchunhnak’ pakhat kha a chimh hna. Mah hmelchunhnak ah aa telmi thil vialte hmunkhat ah a tlin tikah bia a kamhmi hna thlennak caan a nai cang tiah a chimh hna.”—Matthai 24:3.

“Hmelchunhnak” ah aa telmi thil sining hna nih a rauhhlan ah thlennak a um cang lai ti kha an langhter. Mah hna kha nangtah na hmu maw?

“Hmelchunhnak tiah na ti bang? Mah cu hngalh duh awk ngai a si. Mah kong cu rak kan chim” tiah Pa Lian nih a ti.

“Baibal ah mah hmelchunhnak ah aa telmi thil sining a phunphun kong kha a chim” tiah Sang Sang nih Pa Lian kha a chimh. Baibal kha a kau i hitin a ti: “Mah hi hmelchunhnak cheukhat an si.”

  •  “Ram khat le ram khat an i do lai, peng khat le peng khat an i tu lai.”—Matthai 24:7.

  • ‘Mangṭam a tlung lai.’—Matthai 24:7.

  • ‘Ṭhatlonak a karh lai.’—Matthai 24:12.

  • ‘Ṭih a nungmi lihnin a tlung lai.’—Luka 21:11.

  • ‘Hmun kip ah tlangrai zawtnak a tlung lai.’—Luka 21:11.

Tuchan ah mah vialte cu a cangmi a lo tiah Pa Lian le Sui Sui nih an ti colh. A taktak ti ah cun mah thil hna ruangah an lungre a theihmi le hmailei caah an thin a phanmi a si.

Sang Sang nih hitin a ti: “Mah hmelchunhnak a tlinmi nih a rauhhlan ah Jehovah Pathian uknak cu vawleicung ah a tlung cang lai tiah a chim duhnak a si. Mah uknak thar cu Baibal nih Pathian Pennak tiah a auh.” A rauhhlan ah mah Pathian Pennak nih a tuah hngami kong a langhtermi mah Baibal cang hi Sang Sang nih a relpiak hna:

  • “Cu siangpahrang hna chan ah cun vancung Pathian nih pennak pakhat a ser lai i cu pennak cu zeitikhmanh ah a rawk lai lo; cu pennak cu midang sinah aa ṭhial lai lo; hi pennak vialte hi a hrawh dih hna lai i a donghter dih hna lai, sihmanhsehlaw cu pennak tu cu zungzal in a hmun lai.”—Daniel 2:44.

Sang Sang nih hitin a chim chap: “Pathian Pennak nih hi vawlei a uk tikah ṭhatlonak, dinlonak le ziaza rawhralnak vialte cu zungzal in an lo cang lai. Zeitlukin dah a ṭhat lai ti kha ruathmanh u.”

Mah thil hna ruangah Pa Lian le Sui Sui cu an lung a cawlcang tuk i mah daihnak a ummi vawlei thar ah annih zong um an duh tuk ve.

“Mah a ṭha tukmi hmailei nunnak hmuh khawh awkah keimah le Sui Sui nih zeidah kan tuah lai?” tiah Pa Lian nih a hal.

Sang Sang nih hitin a leh: “Man a ngeimi thil pakhatkhat hmuh kan duh ahcun kanmah lei in pakhatkhat pek ve a hau  ti kha nan hngalh ko. Adam le Evi nih an rak sunghmi thil kha ruathmanh u. An tuahsernak in zeidah kan i cawn khawh?”

Pa Lian nih hitin a ti: “Pathian halmi ningin an nun lo caah Paradis ah an hmuhmi a tlingmi nunnak kha an rak sung.”

Sang Sang nih hitin a chim ṭhan: “Cubantukin tuchan zongah Jehovah Pathian nih a kan halmi a um ve. A rauhhlan ah a si cang laimi vawlei Paradis ah nun kan duh ahcun Pathian le amah nih a kan halmi hna kha hlathlai a herh i mah halmi ningin nun khawh awkah i zuam a herh.”

Mah vialte cu aa tlak tukmi a si ti kha Pa Lian nih a cohlan. Asinain mah halmi hna kha amah le Sui Sui nih kan tlinh kho hnga maw tiah a ruah.

Jehovah nih daihnak le lawmhnak hmuh khawhnak lam kha zulh dingin a kan sawm

“Jehovah Pathian nawlngaih cu thilrit a si lo. Zeicatiah dawtnak a ngeimi Pa pakhat in kan caah a ṭha bikmi thil lawng kha tuah dingin a kan hal. Pathian nih daihnak a ummi vawlei tharlei kalnak lam kha hmuhsak lawng si loin lam thluangthluan ah amah lamhruainak kha zulh ding zongin a kan sawm. Baibal ah a ummi dawtnak aa telmi mah sawmnak kha ruathmanh” tiah Sang Sang nih a ti i a zumh nakhnga a bawmh.

  • “Keimah cu Bawipa nan Pathian, nan ca ṭhatnak cawnpiak an duhtu hna le nan zulh awk hnga lam an hmuhsaktu hna ka si. Ka nawlbia kha rak ngai u law ti ka hei duh dah! Thluachuahnak cu nan caah, zeitikhmanh i a reu bal lomi tiva bantukin, a luan in a luang zungzal ko hnga! Ti kam a deng lengmangtu tilet bantukin teinak cu nan sinah a phan ko hnga! Nan tefa cu rili kam thetse zat in an tam hnga i zeitikhmanh i rawk kho lo dingin ka ser hna hnga.”—Isaiah 48:17-19.

A ṭha tukmi mah Baibal bia hna ruangah Pa Lian le Sui Sui cu thazaang an hmu. Anmah le an chungkhar caah ṭhathnemhnak  a chuahter hngami nunning in nun cu an duh tuk. Dinnak le daihnak a ummi vawlei ah an fale he nunṭi nakin a ṭha deuhmi thil kha a ruah hmanh an ruat kho ti lai lo.

Sang Sang nih hitin a ti hna: “Jehovah Pathian nih a kan cawnpiakmi hna kha kan hlathlai i mah cawnpiaknak hna ningin nun awkah a si khawh chungin kan i zuam ahcun mah thluachuah vialte kha kan zapi tein kan hmuh lai.”

Hngalh duhnak taktak he Pa Lian nih hitin a hal: “Mah vialte cu zeitindah kan cawn khawh lai? Nangmah le Par Ku nih na kan bawm kho lai maw?

“Bawmh kan in duh tuk hna. A taktak ti ah cun daihnak le lawmhnak hmuh khawhnak lam kha hmu in mah lam ningin kal khawh awkah nan herhmi bawmhnak cu kan in pek khawh ko hna.”