A ummi cazin ah kal

A ummi cazin ah kal

ṬHEN NGA

Tlanhnak Man—Pathian Laksawng Ngan Bik

Tlanhnak Man—Pathian Laksawng Ngan Bik

Tlanhnak man cu zeidah a si?

Cucu zeitindah timhtuah a si?

Na caah zei sullam dah a ngeih?

Naa lawmhnak zeitindah na langhter khawh?

Laksawng na hmuh balmi lakah zei laksawng dah a sunglawi bik? Laksawng sung a si ti awkah a man fah a hau lo. A ngaitein, laksawng pakhat a man taktak kha tangka in tah khawh a si lo. Mah nakcha cun, laksawng pakhat nih na lung an lawmhter asiloah na nunnak ah a herhmi kha tlam a tlinter ahcun cucu na caah a sung tukmi a si ko.

2 Naa ruahchan khawhmi laksawng vialte lakah a ṭha bikmi laksawng pakhat a um. Cucu Pathian nih minung a kan pekmi laksawng a si. Jehovah pekmi laksawng tampi a um nain, a sung bikmi cu a Fapa Jesuh Khrih tlanhnak man raithawinak hi a si. (Matthai 20:28) Hi ṭhen ah kan hmuh lai bantukin tlanhnak man cu na hmuh khawhmi laksawng vialte lakah a sung bikmi a si, zeicahtiah lunglawmhnak nganpi le na herh bikmi thil kha an pek khawh. A ngaitein tlanhnak man cu na caah Jehovah dawtnak nganbik a langhnak a si.

TLANHNAK MAN CU ZEIDAH A SI?

3 Fiangte in chim ahcun, tlanhnak man cu sualnak le thihnak in minung luatternak caah Jehovah hmanmi lam a si. (Efesa 1:7) Cu kong Baibal cawnpiakmi hngalhthiam awk caah Eden dum i thil a rak cangmi kha ruah ṭhan a hau. Adam nih sualnak a tuah ruangah zeidah a sungh timi kan hngalhthiam lawngah tlanhnak man, man a ngeih zia kha kan hngalh khawh lai.

4 Jehovah nih Adam a ser tikah, a man a sung tukmi a tlingmi nunnak a pek. Adam caah zei sullam dah a ngeih kha ruat hmanh. A tlingmi pum le lungthin in a ser caah a zaw lai lo, a tar lai lo i a thi lai lo. Mi tlingmi pakhat in, Jehovah he a hlei khunmi pehtlaihnak a rak ngei. Baibal nih “Adam cu Pathian fapa a si” tiah a ti. (Luka 3:38) Cucaah dawtnak a ngeimi pa le fa bantukin Jehovah Pathian he pehtlaihnak ṭha taktak a rak ngei. Jehovah nih vawlei i a ummi a fa Adam he pehtlaihnak a tuah i, lung a tlintermi rian a pek i a sinin zei dah aa ruahchan kha a chimh.—Genesis 1:28-30; 2:16, 17.

5 Adam cu ‘Pathian he i lo in ser’ a rak si. (Genesis 1:27) Cu nih Adam cu Pathian he an muisam aa lo ti a chim duhmi a si lo. Hi cauk Ṭhen 1 nak i kan rak cawn cang bangin, Jehovah cu hmuh khawh lomi thlarau a si. (Johan 4:24) Cucaah Jehovah cu thi le sa pum a ngei lo. Adam cu Pathian he i loin ser a si ti tikah dawtnak, fimnak, dinnak le ṭhawnnak hna ti bantuk Pathian ngeihmi sining hna he ser a si tinak a si. Adam nih a Pa a lawhnak a biapimi lam khat cu zalonnak a ngeihmi kha a si. Cucaah Adam cu timhtuah cangmi thil lawng a tuah khomi seh bantuk a si lo. Mah canah a hmaan, hmaan lo thim in mah tein bia a chat khomi a si. Pathian nawl ngaih kha aa thim ahcun vawlei cung Paradis ah zungzal nunnak a hmu lai.

6 Adam nih Pathian nawl a rak ngai lo i thi ding in biachah a si tikah, a manfak tukmi kha a rak sung. A sual caah a tlingmi a nunnak le thluachuah dang vialte a sung dih. (Genesis 3:17-19) Ngaihchiat awk ngai cu Adam nih a sunglawimi nunnak kha amah ca lengah hmailei a tefa ca zongah a rak sung. Pathian Bia nih hitin a ti: “Sualnak cu mipa pakhat thawngin vawlei cungah hin a tlung i cu a sualnak nih cun thihnak kha a ratpi. Cun mi vialte cu an sual dih caah thihnak nih cun mi vialte cu a ciah dih hna.” (Rom 5:12) A si, Adam sinin sualnak ro kan co dih cio. Cucaah, amah le a tefa hna kha sualnak le thihnak sal ah a ‘zuar’ hna tiah Baibal nih a ti. (Rom 7:14) Pathian nawl ngaih lo ding kha an i thim hramhram caah Adam le Evi caah ruahchannak a um lo. Kannih a tefa vialte ca ah tah zeitindah?

7 Jehovah nih tlanhnak man in minung kha a khamh hna. Tlanhnak man timi cu zeidah a si? Sullam phun hnih a ngei. Pakhatnak tlanhnak man sullam cu luatter awkah asiloah cawk ṭhan awkah pekmi a man khi a si. Raltuknak i tlaihmi mi pakhat thlah awkah pekmi a man he tahchunh khawh a si. Pahnihnak tlanhnak man sullam cu khuhpiakmi asiloah cawkmi a man, thil pakhatkhat a man khi a si. Thil hrawh i a rawkmi thil rulh in pekmi a man he aa lo. Tahchunhnak ah, mi pakhat nih thil sual a tuah ahcun, a rawkmi thil he a man aa tlukmi zat kha a liam lai.

8 Tlanhnak man nih kan zapi cung i Adam tluntermi sunghnak nganpi kha khuhpiak in sualnak le thihnak sal sinak in luatter cu zeitindah a si khawh lai? Jehovah timhpiakmi tlanhnak man le cucu na caah zei sullam dah a ngeih ti kha i ruah u sih.

TLANHNAK MAN JEHOVAH TIMH NINGCANG

9 A tlingmi nunnak sungh a si caah, a tling lomi minung nunnak nih khakha a caw kho lo. (Salm 49:7, 8) A herhmi cu sunghmi he a man aa tlukmi tlanhnak man a si. Mah khakha Pathian Bia ah “nunnak caah nunnak” tiah timi a tling i a dingmi phunglam he aa tlak. (Deuteronomi 19:21) Cu a si ah, Adam sunghmi a tlingmi nunnak man kha zeinihdah a khuh lai? A man aa tlukmi tlanhnak caah a tlingmi minung nunnak pakhat a herh.—1 Timote 2:6.

Tlanhnak man pek awkah Jesuh a thi

Jehovah nih a Fapa ngeihchunte kha kanmah caah tlanhnak man in a pek

10 Jehovah nih tlanhnak man kha zeitindah a timh? A tlingmi thlarau fapa lakah pakhat kha vawlei ah a thlah. Sihmanhsehlaw Jehovah nih thlarau fapa a zei paoh kha a rak thlah menmi a si lo. A caah a sung bikmi, a Fapa ngeihchunte kha a rak thlah. (1 Johan 4:9, 10) Cu fapa nih cun vancung a inn kha lungtho tein a kal tak. (Filipi 2:7) Hi cauk ṭhen hmasa deuh i kan rak cawn cang bangin, Jehovah nih thil khuaruahhar a tuah i a Fapa nunnak kha Mari nauinn ah a rak ṭhial. Pathian thiang thlarau thawngin, Jesuh cu sualnak a ngei lomi a tlingmi minung in hrin a rak si.—Luka 1:35.

11 Mi pakhat nih mi tampi, minung nuai tampi caah tlanhnak man cu zeitindah a pek khawh? Mah minung nuai tampi hna cu tah zeitindah misual an hung si? Adam nih sualnak a tuah ruangah a tlingmi nunnak a rak sungh kha philhhlah. Cucaah a tefa hna kha a tlingmi nunnak a pe kho hna lo. Mah canah, sualnak le thihnak tu a pek hna. Baibal nih “Adam hmanung bik” tiah a timi Jesuh cu a tlingmi nunnak a ngei i sualnak a tuah bal lo. (1 Korin 15:45) Phun dangin, kanmah khamh awkah Jesuh nih Adam hmun kha a rolh. Jesuh nih Pathian nawl tlingte in a ngaih i a tlingmi a nunnak raithawinak i a peknak thawngin, Adam sualnak man kha a rak cham. Cucaah Jesuh nih Adam tefa hna hi ruahchannak a kan pek.—Rom 5:19; 1 Korin 15:21, 22.

12 Baibal nih Jesuh a thih hlan i a intuarmi harnak kong kha a dikthliar in a chim. Fak piin an tuk, tung cungah an khenh chih i tem ngai in tung cungah a thi. (Johan 19:1, 16-18, 30; Thlaihhlei) Jesuh nih zeicah cu tluk in harnak a in a herh? Satan nih Jehovah sal a simi paoh harnak lakah zumhawktlak an si peng le si peng lo kong i lunghrinnak a chuahtermi kha a hnu ṭhen khat ah kan cawn te lai. Harnak nganpi a ing nain zumhawktlak a sinak thawngin Satan zuamcawhnak kha Jesuh nih a ṭha bik in a leh khawh. Khuachia nih zei a tuah hmanhah, zalonnak a ngeimi mi tling a simi pakhat nih Pathian cungah tling khitkhet in zumhfekmi a si kho ti kha Jesuh nih a langhter. A Fapa dawt zumhfehnak ruangah Jehovah cu aa lawm taktak lai!—Phungthlukbia 27:11.

13 Tlanhnak man cu zeitindah pek a si? A.D. 33, Judah thla Nisan 14 ah Pathian nih sualnak ngei lomi a tlingmi a Fapa kha thihnak nawl a rak pek. Cucaah Jesuh nih a tlingmi a minung nunnak kha ‘voikhat ah za lakin a pek chanh.’ (Hebru 10:10) Jesuh thih hnu ni thumnak ni ah, Jehovah nih thlarau nunnak a rak pek ṭhan. Jesuh nih van ah Adam tefa hna caah a tlingmi a minung nunnak kha tlanhnak man ca in Pathian a rak pek. (Hebru 9:24) Sualnak le thihnak sal in minung luat awkah a herhmi tlanhnak man ca i Jesuh pekmi raithawinak man kha Jehovah nih a rak cohlan.—Rom 3:23, 24.

NA CAAH TLANHNAK MAN A SULLAM

14 Mi sual kan si ko nain, tlanhnak man thawngin a man khiah khawh lomi thluachuah kan hmu kho. Pathian laksawng ngan bik in atu le hmailei ah hmuh laimi ṭhatnak cheukhat kong i ruah u sih.

15Sual ngaihthiamnak. Tlinlonak ro kan co caah, a dingmi thil tuah awk kan i harh taktak ko lai. Kan zapi in kan biachim le kan tuahsernak in kan sual tawn. Sihmanhsehlaw Jesuh tlanhnak man raithawinak thawngin “kan sualnak cu ngaihthiam kan si.” (Kolose 1:13, 14) Asinain ngaihthiammi si awkah ngaihchihnak taktak ngeih a hau. A Fapa tlanhnak man raithawinak kan zumhnak thawngin ngaihthiam kan si nakhnga toidor tein Jehovah kan hal awk a si.—1 Johan 1:8, 9.

16Pathian hmai ah chia le ṭha thleidannak lungthin thiannak. Sual aa phuhrungmi lungthin nih ruahchannak ngei loin man ngei lo ka si timi ruahnak fawi tein a kan ngeihter khawh. Asinain, tlanhnak man thawngin ngaihthiam kan si caah mi tlinglo kan si ko nain chia le ṭha thleidannak lungthin thiang he Jehovah kan biak khawh. (Hebru 9:13, 14) Jehovah he zalong tein bia ruahnak nawl zong a kan ngeihter khawh. Cu a si caah, thlacamnak in zalong tein kan naih khawh. (Hebru 4:14-16) Chia le ṭha thleidannak lungthin thiang ngeih pengnak nih lung daihnak, mah le mah i upatnak le lunglawmhnak a kan pek.

17Hi vawlei paradis ah zungzal nunnak ruahchannak. “Sualnak man cu thihnak a si, sihmanhsehlaw Pathian laksawng cu zungzal nunnak a si i cu nunnak cu kan Bawipa Jesuh Khrih he aa pehtlaimi nunnak a si” tiah Rom 6:23 nih a ti. Hi cauk Ṭhen 3 nak ah, a ra laimi vawlei Paradis thluachuah kong kan rak i ruah cang. (Biathlam 21:3, 4) Cu hmailei thluachuah vialte le a tlingmi ngandamnak he zungzal nun ding cu Jesuh kan ca a thih ruang i hmuh hngami thluachuah an si. Cu thluachuah hmuh khawh awkah, tlanhnak man laksawng cungah lawmhnak langhter a hau.

ZEITINDAH NAA LAWMHNAK NA LANGHTER KHAWH?

18 Tlanhnak man ruangah Jehovah cungah zeicah kan i lawmh tuk ding a si? Laksawng pakhat hi a petu a dihmi a caan, a thazang asiloah a man tuak tikah a hleiin a sung khun. Cu laksawng a kan petu nih lungtak in a kan dawt caah a si ti kan hngalh tikah kan i lung hmuih tuk. Laksawng vialte lak ah tlanhnak man hi a sung bik, zeicahtiah a kan pekmi vialte lak ah Pathian nih sunghralhnak ngan bik a in caah a si. “Pathian nih vawlei hi a dawt hringhran caah a Fapa ngeihchunte kha a pek” tiah Johan 3:16 nih a ti. Tlanhnak man cu Jehovah nih a kan dawt a langhter bikmi thil a si. Kan caah lungtho tein a nunnak a pemi Jesuh dawtnak zong a langhter. (Johan 15:13) Cucaah Jehovah le a Fapa nih pumpak cio in a kan dawt ti kha tlanhnak man laksawng nih kan lung a fianter awk a si.—Galati 2:20.

19 Tlanhnak man Pathian laksawng cung naa lawmhnak kha zeitindah na langhter khawh? Cu thil an petu, Jehovah kong tamdeuh hngalh naa zuamnak in a si. (Johan 17:3) Baibal cawnnak ca i an chuahmi hi bawmtu cauk nih hin cutin tuah awk an bawmh lai. Jehovah na hun hngalh deuhdeuh ah na dawtnak a ngan deuhdeuh ve lai. Phundang in chim ahcun, cu dawtnak nih a lungton an zuamter lai.—1 Johan 5:3.

Nu pakhat Baibal a rel

Tlanhnak man laksawng cung kan i lawmhnak langhternak lam khat cu Jehovah kong tamdeuh hngalh awk cawnnak a si

20Jesuh tlanhnak man raithawinak kha zum. Amah Jesuh theng nih “fapa a zummi paoh cu zungzal nunnak an ngei” tiah a ti. (Johan 3:36) Zeitindah Jesuh kan zumh cu kan langhter khawh? Cu bantuk zumhnak cu hmurka lawngin langhter ding a si lo. Jeim 2:26 nih ‘zumhnak cu tuahnak loin a thi’ tiah a ti. A si, a hmaanmi zumhnak cu “tuahnak” in kan langhter. Jesuh kan zumh langhternak lam khat cu kan kaa lawngin si loin kan tuahsernak zongin kan si khawh chung a nawl kan i cawnnak hin a si.—Johan 13:15.

21Kum fate tuahmi Bawipa Zanriah hmannak ah i tel. A.D. 33 Nisan 14 zanlei ah “Bawipa zanriah” tiah Baibal nih a timi a hlei khunmi puai kha Jesuh nih a rak thawk. (1 Korin 11:20; Matthai 26:26-28) Cu puai cu Khrih thihnak Philhlonak ti zong in ti a si. Jesuh nih tlanhnak man caah a tlingmi a nunnak a pekmi kha lamkaltu hna le an hnu i a hmaanmi Khrihfa ah aa cang hngami vialte philhlonak caah cu puai cu a rak thawkpi hna. Cu puai he aa tlaiin “keimah philhlonak ah run tuah u” tiah Jesuh nih a fial hna. (Luka 22:19) Philhlonak tuah tikah tlanhnak man he aa tlaimi Jehovah le Jesuh nih an langhtermi dawtnak ngan kha a kan theihter ṭhan. Kum fate tuahmi Jesuh a thih Philhlonak i i telnak thawngin tlanhnak man cung kan i lawmhnak kha kan langhter khawh.*

22 A ngaite ti ahcun Jehovah pekmi tlanhnak man cu a sung tukmi laksawng sung a si. (2 Korin 9:14, 15) Cu a man a fak tukmi laksawng cu mithi ca hmanh ah man a ngei. Zeitindah a si timi kha Ṭhen 6 le 7 nih a fianter lai.

BAIBAL CAWNPIAKMI

  • Tlanhnak man cu Jehovah nih sualnak le thihnak in minung a khamh hna nak lam a si. —Efesa 1:7.
  • Jehovah nih a Fapa ngeihchunte kan ca thi dingin vawlei i a run thlahnak thawngin tlanhnak man kha a pek.—1 Johan 4:9, 10.
  • Tlanhnak man thawngin kan sualnak ngaihthiam kan si i chia le ṭha thleidannak lungthin thiang le zungzal nunnak ruahchannak kan ngei.—1 Johan 1:8, 9.
  • Jehovah kong tam deuh hngalh awk kan cawnnak, Jesuh tlanhnak man raithawinak kan zumhnak le Bawipa Zanriah hmannak i kan i telnak thawngin tlanhnak man cung kan i lawmhnak kan langhter.—Johan 3:16.

*  Bawipa Zanriah sullam he aa tlaiin hngalh chapnak caah Thlaihhlei kha zoh.


Biahalnak Hna

1, 2. (a) Laksawng pakhat cu zeitik ah dah na caah man a ngeih khun? (b) Tlanhnak man cu na hmuh khawhmi laksawng vialte lakah man a ngei bik tiah zeicah ti khawh a si?

3. Tlanhnak man cu zeidah a si i, cu laksawng man a ngeih zia hngalhthiamnak caah zeidah hngalh a herh?

4. Adam caah a tlingmi nunnak cu zei sullam dah a ngeih?

5. Baibal nih Adam cu ‘Pathian he i lo in ser’ a si a ti tikah zeidah a chim duhmi a si?

6. Adam nih Pathian nawl a ngaih lo tikah zeidah a rak sungh i, a tefa tah zeitindah a hnorsuan hna?

7, 8. Tlanhnak man nih zei sullam phun hnih dah a ngeih?

9. Zei bantuk tlanhnak man dah a herh?

10. Jehovah nih tlanhnak man kha zeitindah a timh?

11. Zeitindah mi pakhat nih mi nuai tampi caah tlanhnak man a pek khawh?

12. Jesuh sifah harnak inmi nih zeidah a langhter?

13. Tlanhnak man cu zeitindah pek a rak si?

14, 15. “Kan sualnak cu ngaihthiam kan si” nakhnga zeidah kan tuah awk a si?

16. Zeinihdah Pathian kha chia le ṭha thleidannak lungthin thiang he a kan biakter khawh i cu bantuk lungthin thiang ngeih man cu zeidah a si?

17. Jesuh kan ca a thih ruangah zei thluachuah dah hmuh khawh a si?

18. Tlanhnak man ruangah Jehovah cungah zeicah kan i lawmh awk a si?

19, 20. Tlanhnak man Pathian laksawng cung kan i lawmhnak kha zei lam in dah kan langhter khawh?

21, 22. (a) Zeicah kum fate tuahmi Bawipa Zanriah hmannak puai ah kan i tel awk a si? (b) Zei kong dah Ṭhen 6 le 7 nak ah fianter a si lai?