A ummi cazin ah kal

A ummi cazin ah kal

ṬHEN HLEIRIAT

Tipil Innak le Pathian He Nan I Pehtlaihnak

Tipil Innak le Pathian He Nan I Pehtlaihnak

Khrihfa tipil cu zeitindah pek a si?

Tipil in awk aa tlakmi si dingah zeidah a herh?

Mi pakhat nih Pathian sin pumpeknak kha zeitindah a tuah?

Tipil in a sinak a ruang bik cu zeidah a si?

“Hika ah hin pei ti a um hi, zei nih dah tipil in a ka donh lai?” Cucu kum zabu pakhatnak i Ethiopia bawi pakhat nih biahalnak a tuahmi a si. Filip timi Khrihfa pakhat nih Jesuh cu biakammi Messiah a si tiah a rak chimh. Ethiopia mipa cu Cathiang in a hngalhmi nih a lung a suk tuk i a hngalhmi ningin a rak tuah. Tipil in a duhnak kong kha a rak langhter!—Lamkaltu 8:26-36.

Kumzabu pakhatnak i Ethiopia bawi

2 Jehovah Hngaltu pakhat he hi cauk a hmai lei i ṭialmi kha ṭha tein nan rak cawn cang a si ahcun ‘Zei nih dah tipil in a ka donh’ ti i hal awkah timhcia na si men lai. Atu ah Paradis ah zungzal nunnak Baibal biakamnak kong kha na hngalh cang. (Luka 23:43; Biathlam 21:3, 4) Cun mithi sining le thawhṭhannak ruahchannak kong zong na hngalh cang. (Phungchimtu 9:5; Johan 5:28, 29) Pumhnak ah Jehovah Hngaltu hna he i hawikomh in a hmaanmi biaknak phung an zulhning kha nangmah theng nih na hmuh fawn cang. (Johan 13:35) A biapi bikmi cu Jehovah Pathian he pehtlaihnak ṭha na rak thawkmi kha a si.

3 Pathian rian ṭuan na duh kha zeitindah na langhter khawh lai? Jesuh nih a zultu pawl kha “miphun vialte kha ka zultu ah va ser hna u;…tipilnak va pe hna u” tiah a rak ti hna. (Matthai 28:19) Amah Jesuh theng ti chung i tipil a innak thawngin zohchunh awk kha a rak chiah. Ti in theh a rak si lo, cun a lu cung zong ah ti tlawmpal in toih a rak si lo. (Matthai 3:16) “Tipil” timi biafang hi “hnim” timi Grik biafang in a rami a si. Cu a si caah Khrihfa tipil innak timi sullam cu ti chung ah pil lak in hnim tinak a si.

4 Tipil innak cu Jehovah Pathian he pehtlaihnak ngeih a duhmi vialte ca ah a herhmi pakhat a si. Tipil in cu Pathian rian ṭuan na duh kha zapi hmai ah na langhter a si. Cu nih cun Jehovah duhnak tuah na duh kha a langhter. (Salm 40:7, 8) Asinain tipil in ding aa tlakmi si awkah rikhiahmi kehlan cheukhat kha na kar a hau.

HNGALHNAK LE ZUMHNAK A HERH

5 Hmasa bik kehlan kha na rak kar cang. Zeitin in dah? Baibal ningcang tein na hlathlainak thawngin Jehovah Pathian le Jesuh kong he aa tlaimi hngalhnak na cawnnak in a si. (Johan 17:3) Sihmanhsehlaw tamdeuh in cawn chap a hau. Khrihfa hna nih ‘Pathian duhnak dik tein hngalhnak in khah’ an duh. (Kolose 1:9, NW) Hi kongah Jehovah Hngaltu hna sin i Khrihfabu pumhnak nih tampi an bawmh lai. Cu bantuk pumhnak ah i pumh cu a biapi. (Hebru 10:24, 25) Hmaan tein naa pumhnak nih Pathian kong na hngalhnak a karhter lai.

Pathian Bia a hmaanmi hngalhnak cawn cu tipil in awk aa tlakmi si dingah a biapimi kehlan a si

Baibal cawnpiaknak

6 Tipil in ding aa tlakmi si awkah Baibal chung bia vialte hngalh dih a herh lo. Ethiopia bawi cu hngalhnak tlawmpal a rak ngei ko nain, Cathiang chung bia cheukhat kha a hngalhthiam nakhnga bawmhnak a rak herh. (Lamkaltu 8:30, 31) Cu bantuk cun nang zong tamdeuh in na cawn a herh ve. A taktak ti ahcun Pathian kong cawn cu zei tik hmanh ah a dong kho lai lo. (Phungchimtu 3:11) Asinain, tipil na in hlan ah, a tlawm bik in a hrampi Baibal cawnpiaknak kha na hngalh le na cohlan a hau. (Hebru 5:12) Cu cawnpiaknak chungah mithi sining le Pathian min le a Pennak a biapitnak kong biatak aa tel.

7 “Zumhnak lo in Pathian lungton khawh a si lo” caah hngalhnak ngeih lawng in a za lo. (Hebru 11:6) Hlanlio Korin khuami cheukhat nih Khrih zultu hna phungchimmi kha an theih tikah “an zumh i tipilnak an in” tiah Baibal nih a ti. (Lamkaltu 18:8) Cu bantuk cun Baibal hlathlainak thawngin Baibal kha Pathian thawchuah hnawhmi in na zumh awk a si. Baibal cawnnak nih Pathian kamhmi le Jesuh raithawinak i khamh khawhnak a hmual kha zumh ding an bawmh awk a si.—Joshua 23:14; Lamkaltu 4:12; 2 Timote 3:16, 17.

MIDANG KHA BAIBAL BIATAK CHIMHNAK

8 Na lung chungah na zumhnak a ṭhan thluahmah tikah na hngalhmi midang chimh loin um a har kha na hmuh lai. (Jeremiah 20:9) Pathian le aa tinhmi kong midang chimh duhnak na hun ngei chin lengmang lai.—2 Korin 4:13.

Zumhnak nih na zumhmi kha midang hrawm ding an forh awk a si

Mi sinah a zumhnak a chimmi pa

9 Na rualchan, na hawikom, na innpa le na rianṭuan hawi hna sinah Baibal biatak kong kha fim ngaiin chim hram na thawk khawh. A caan a cut tikah Jehovah Hngaltu hna nih ningcang tein an tuahmi phungchimnak ah tel na duh lai. Cuti tel na duh ahcun Baibal aan cawnpiakmi Hngaltu sinah zalong tein chim. Zapi sin phungchim ding naa tlak kha hmuh a si ahcun nangmah le aan cawnpiaktu kha khrihfa upa pahnih he i ton awkah timh a si lai.

10 Mah nih khan Pathian turun a zohkhenhtu Khrihfa upa cheukhat he ṭha deuh in an theihhngalhter lai. (Lamkaltu 20:28; 1 Piter 5:2, 3) Annih nih Baibal a hrampi cawnpiakmi na hngalh i na zumh, Pathian phunglam hna ningin na nun le Jehovah Hngaltu pakhat si na duh taktak kha an hmuh ahcun tipil a ing rih lomi thawngthanhtu pakhat in zapi sin i thawngṭha bia a chimtu si awk naa tlak kha an in chimh lai.

11 Asinain, zapi sin phungchimtu si awk aa tlakmi si dingah na ziaza cheukhat naa thlen a hau men lai. Cu chungah a thlithup in na tuahmi ziaza cheukhat ngol aa tel lai. Tipil a ing rih lomi thawngthanhtu na si hlan ah nu le pa sualnak, zu ritnak le ritnak sii hmannak ti bantuk sualnak ngan in na thian a hau.—1 Korin 6:9, 10; Galati 5:19-21.

I NGAIHCHIHNAK LE I THLENNAK

12 Tipil in ding aa tlakmi na si hlan ah kehlan cheukhat na kar a hau. Lamkaltu Piter nih hitin a ti: “Nan sualnak cu an hnawhpiak hna nakhnga, i ngaihchih u law Pathian lei ah khan i mer tuah u.” (Lamkaltu 3:19) I ngaihchih timi cu hlan i rak tuahmi pakhatkhat cungah rim khi a si. A ziaza a ṭhalomi pakhat cu aa ngaihchih awk a si, a ziaza a ṭha pahmi pakhat zong i ngaihchih a hau ve. Zeiruangah a si? Mi vialte hi misual kan si dih i Pathian ngaihthiamnak kan herh dih caah a si. (Rom 3:23; 5:12) Baibal na cawn hlan ah Pathian duhnak kha na rak hngal lo. Cucaah Pathian duh ningin tling tein zeitindah na rak nun khawh lai? Cu ruangah i ngaihchih a hau.

13 I ngaihchih hnuah i thlen, asiloah “i mer” a hau. Ngaihchihnak lawng in a za lo. Hmasa na nunning kha na hlawt lai i atu thawk in a hmaanmi thil tuah awkah fek tein biakhiahnak na tuah lai. I ngaihchihnak le i thlennak cu tipil in hlan ah tuah hngami kehlan an si.

MAH LE MAH I PUMPEKNAK

14 Tipil in hlan ah kar awk a simi a biapimi kehlan dang a um rih. Mah le mah Jehovah Pathian sinah i pumpek a hau.

15 Lungtho tein thla na cam i Jehovah Pathian sinah naa pumpek tikah zei hmanh ngan loin a zungzal in ka pum kaa pe tiah bia naa kam a si. Ziah mi pakhat nih cutin tuah a duh? Pa pakhat nih ngaknu pakhat a helh hei ti u sih. Mah nu kong a hun hngalh deuh i a ziaza ṭha hna a hun hmuh deuhdeuh tikah a hun uar chin lai. A caan a cut tikah ṭhitnak nawl a hal kha a phung a si. I ṭhitum awk a hal cu rian aa chap a si nain, dawtnak nih kha a biapimi kehlan kar awkah a lung a thawhter lai.

16 Jehovah kha ṭha tein na hun hngalh i na dawt tikah cun khenkhamtu um loin a rianṭuan le ri ser loin biak awkah na lung a tho lai. Pathian Fapa Jesuh Khrih hnu zulh a duhmi paoh cu ‘mah zawn aa ruat lomi an si lai.’ (Marka 8:34) Kan duhmi le kan i hmuitinhmi nih tling tein Pathian nawlngaih awk a donhlonak thawngin mah zawn lawng aa ruatmi kan si lo. Cucaah tipil na in hlan te khan Jehovah Pathian a duhnak tuahnak cu na nunnak ah a biapi bikmi hmuitinh a si awk a si.—1 Piter 4:2.

KA TLINH LAI LO TIMI PHANNAK KHA TEINAK

17 Cheukhat nih mah a biapimi kehlan hlan ding kha an ṭihṭanh caah Jehovah sin i pek dingah an i cungcang. Pathian sin aa pumpe cangmi Khrihfa pakhat in Pathian hmai biaceih an si lai kha an ṭih caah a si kho. Tlinh lai lo le Jehovah lawmhter lai lo kha an thin a phang i, cucaah a sin i pek lo law law ah a ṭha deuh lai tiah an ruah.

18 Jehovah kha dawt na hun thiam tikah amah sin i pumpe in cu ningin a ṭha bik in nun awkah na lung a tho lai. (Phungchimtu 5:4) A sin naa pumpek hnu ahcun ‘Bawipa duhning in na nung kho lai i amah duhnak kha na tuah zungzal khawh lai.’ (Kolose 1:10) Pathian na dawt caah a duhnak tuah kha a har tuk in na hmu lai lo. Lamkaltu Johan nih a ṭialmi hi bia hi na hna a tla ve lai ti cu a fiang ko: “Pathian kan dawt ti cu a nawl kan zul ti nak a si ko. Cun a nawlbia cu kan caah a har tuk lo.”—1 Johan 5:3.

19 Pathian sin aa pumpemi si awkah mitling si a herh lo. Jehovah nih na chambaunak kha a hngalh i na tuah khawh leng tuah dingin zeitik hmanhah aa ruahchan lo. (Salm 103:14) Teinak hmu seh ti an duh caah an bawmh lai. (Isaiah 41:10) Jehovah kha na lungthin dihlak in naa bochan ahcun, “na lam kha a tluanter hna lai” kha na zumh khawh.—Phungthlukbia 3:5, 6.

TIPIL INNAK CU PUMPEKNAK HMELCHUNHNAK A SI

20 Atu te i kan cawnmi kong ruah ṭhannak nih thlacamnak in Jehovah sin i pumpek awkah an bawmh lai. Pathian a daw taktakmi aho poah nih ‘khamh a si nakhnga zapi hmaiah kaa in a chim’ awk zong a si. (Rom 10:10, NW) Cucu zeitindah na tuah lai?

Pathian sinah thlacam in pumpeknak na tuah cang maw?

Thla a cammi pa

21 Tipil in na duhnak kong kha nan Khrihfabu zohkhenhtu kha theihter. Baibal a hrampi cawnpiaknak a huapmi biahalnak hna kha Khrihfa upa cheukhat hna he i ruahṭi ṭhan awkah aan timhpiak lai. Mah Khrihfa upa hna nih sining a tlinh tiah an hna a tlak ahcun, a caan aa rem tikah tipil na ing kho cang tiah an in chimh te lai.* Tipil pek caan ah tipil innak a sullam tuaktan ṭhannak phungchimnak pakhat a um tawn. Phungchimtu nih tipil a ing dingmi vialte kha biahalnak pahnih a phi pek awkah a sawm hna, cucu an zumhnak ‘zapi hmai ah kaa in chim’ mi phun khat a si.

22 Tipil na innak theng nih khan Pathian sin aa pumpe cangmi atu Jehovah Hngaltu pakhat na si kha zapi theih a siter. Tipil ing ding pawl nih ti chungah an pum dihlak an i hnimnak in Jehovah sin aa pumpe cangmi an si kha zapi hmai ah an langhter.

TIPIL NA INNAK SULLAM

23 Jesuh nih a zultu pawl kha “Pa le Fapa le thiang thlarau min in tipil” pek nan si lai tiah a ti hna. (Matthai 28:19) Mah nih khan tipil a ing hngami nih Jehovah Pathian le Jesuh Khrih an nawlngeihnak a cohlan ti kha a chim duhmi a si. (Salm 83:18; Matthai 28:18) Cun Pathian thiang thlarau, asiloah a rianṭuan ṭhawnnak a dirhmun le a rianṭuannak a cohlan zong a langhter.—Galati 5:22, 23; 2 Piter 1:21.

Tipil in timi sullam cu nunning hlun thihter in Pathian duhnak tuah awkah nun ti a si

Tipil a ingmi pa

24 Asinain tipil innak cu ti chung i hei i hnim men khi a si lo. A biapi tukmi thil i hmelchunhnak a si. Tichung pilnak cu hlan i na nunning a thi cang ti hmelchunhnak a si. Tichung in hun chuah cu atu Pathian duhning in ka nung cang lai ti langhternak a si. Cutin na tuah cu Jehovah Pathian sin naa pek a si, rian pakhat, midang asilole bu pakhat sin naa pekmi a si lo kha philh hlah. Pathian sin naa pekmi le tipil na inmi cu Pathian he i hawikomhnak—i pehtlaihnak—a hramthawk a si.—Salm 25:14.

25 Tipil innak hi khamhnak ca aamahkhannak a si lo. Lamkaltu Paul nih hitin a rak ṭial: “Nan khamhnak a tlin nakhnga, ṭih le phang lengmang in ṭuan ko u.” (Filipi 2:12) Tipil innak cu a thawknak lawng a si. Biahalnak tuah ding cu Pathian dawtnak ah zeitindah na hmunh lai ti hi a si? Cu kong cu hmanung bik ṭhen nih a fianter lai.

BAIBAL CAWNPIAKMI

  • Khrihfa tipil innak cu pum dihlak in ti chungah i hnim a si, ti in theh a si lo. —Matthai 3:16.
  • Tipil in ding kehlan khawh awkah hngalhnak cawnnak in i thawk in zumhnak langhter a hau, cu hnuah i ngaihchih le i thlen in Pathian sinah i pumpek a hau. —Johan 17:3; Lamkaltu 3:19; 18:8.
  • Mi nih Jesuh hnu zulh awkah anmah zawn lawng an i ruah lo bantukin nang zong Jehovah sin i pumpek awkah nangmah zawn lawng naa ruah awk a si lo.—Marka 8:34.
  • Tipil innak cu nunning hlun thihter in Pathian duhnak tuah awkah nun timi hmelchunhnak a si.—1 Piter 4:2.

*  Tipil innak cu Jehovah Hngaltu hna kum fate tuahmi civui ah aa tel lengmang.


Biahalnak Hna

1. Ethiopia bawi nih tipil in ka duh tiah zeicah a rak ti?

2. Tipil innak kong kha zeicah fakpi in ruah awk a si?

3. (a) Jesuh nih a zultu pawl kha zei nawlbia dah a pek hna? (b) Tipil innak cu zeitindah tuah a si?

4. Tipil innak nih zeidah a langhter?

5. (a) Tipil in ding aa tlakmi si awkah kar hngami hmasa bik kehlan cu zeidah a si? (b) Zeiruangah Khrihfa pumhnak cu a biapit?

6. Tipil in ding aa tlakmi si awkah Baibal hngalhnak zeizat dah na ngeih a herh?

7. Baibal hlathlainak nih zeitindah an ṭhathnemh awk a si?

8. Na hngalhmi midang chimh awkah zeinihdah an bawmh lai?

9, 10. (a) Ahote sinah dah Baibal biatak chim hram na thawk khawh? (b) Jehovah Hngaltu hna nih ningcang tein an tuahmi phungchimnak ah tel na duh ve ahcun zeidah na tuah awk a si?

11. Mi a cheu cu zapi sin phungchimtu si awk aa tlakmi si hlan ah zei bantuk thlennak dah an tuah awk a si?

12. Zeicah i ngaihchih a hauh?

13. I thlennak cu zeidah a si?

14. Tipil na in hlanah zei a biapimi kehlan dah na kar awk a si?

15, 16. Pathian sin i pumpeknak timi cu zei sullam dah a si i, cutin tuah awkah mi pakhat cu zeinihdah a lung a thawhter?

17. Mi cheukhat nih Pathian sin i pek ding kha zeicah an i cungcang?

18. Jehovah sin i pek awkah zeinihdah na lung a thawhter khawh?

19. Pathian sin i pumpek ding kha zeicah ṭih awk a si lo?

20. Jehovah sin i pumpeknak cu zeicah a thlithup in tuahmi a si lo?

21, 22. Na zumhnak kha ‘zapi hmai ah zeitindah na chim’ khawh?

23. “Pa le Fapa le thiang thlarau min in tipil” in timi sullam cu zeidah a si?

24, 25. (a) Tipil innak hmelchunhnak cu zeidah a si? (b) Zei biahalnak dah phit a herh?