A ummi cazin ah kal

A ummi cazin ah kal

ṬHEN RIAT

Pathian Pennak Cu Zeidah A Si?

Pathian Pennak Cu Zeidah A Si?

Pathian Pennak he aa tlaiin Baibal nih zeidah a kan chimh?

Pathian Pennak nih zeidah a tuah lai?

Pennak nih Pathian duhnak kha zeitik ah dah vawlei cungah a tlinter lai?

Vawlei cung pumpi i minung nuai tampi nih Bawipa Thlacamnak kha ṭha tein an hngalh. Cucu Jesuh theng cawnpiakmi a min a thangmi zohchunh awk thlacamnak a si. Cu thlacamnak cu sullam a ngei tukmi a si, hmasa bik thlacamnak pathum kong ṭha tein ruah ahcun Baibal cawnpiakmi taktak kong tamdeuh in hngalh awkah bawmtu a si lai.

2 Jesuh nih a bia a ngaimi hna kha zohchunh awk thlacamnak a thawknak kha hitin a cawnpiak hna: “Hi bantuk hin thla cu nan cam awk a si: ‘Vancung khua i a um kan Pa, Na min thiang cu upat si ko seh, na Pennak cu rung tlung ko seh; Vancung khua ah na duhnak an tuah bangin vawlei cungah hin tuah si ve ko seh.’ ” (Matthai 6:9-13) Cu thlacamnak pathum a sullam cu zeidah an si?

3 Pathian min Jehovah kong kha tampi kan rak cawn cang. Pathian nih minung caah zeidah a rak tuah i zeidah a tuah rih lai timi Pathian duhnak kong zong tlawmpal kan rak cawn cang. Asinain, Jesuh nih “na Pennak cu rung tlung ko seh” tiah thlacam ding a chim tikah zeidah a chim duhmi a si? Pathian Pennak cu zeidah a si? Cu nih Pathian min kha zeitindah upatnak a pek lai asilole a thianter lai? Pennak tlunnak le Pathian duhnak tuahnak cu zeitindah aa pehtlaih?

PATHIAN PENNAK TIMI CU

4 Pathian Pennak timi cu Jehovah Pathian nih a thimmi Siangpahrang in dirhmi cozah a si. Pathian Pennak ah Siangpahrang cu ahodah a si? Jesuh Khrih a si. Siangpahrang Jesuh cu minung uktu vialte nakin a ngan deuh caah “Bawi vialte Bawipa le siangpahrang vialte Siangpahrang” ti a si. (Biathlam 17:14) Jesuh cu zei bantuk uktu minung, a ṭhawng bikmi uktu hna nak hmanh in a let tampi in a ṭhawng deuh.

5 Pathian Pennak nih khuazei in dah a uk lai? Jesuh tah khoika ah dah a um? Tung cung i an thah hnuah a rak thoṭhan ti kha na theih ko lai. A thawh ṭhan hnu tlawmpal ah van ah a rak kai. (Lamkaltu 2:33) Cucaah, Pathian Pennak cu vancung ah a um. Cu ruangah mah pennak kha “vancung pennak” tiah Baibal nih a ti. (2 Timote 4:18) Pathian Pennak cu vancung ah a um ko nain, hi vawlei hi a uk lai.—Biathlam 11:15.

6 Zeinihdah Jesuh hi aa thleidang tukmi Siangpahrang a siter? Cutin a sitertu pakhat cu zeitik hmanh ah a thih lai lomi hi a si. Baibal nih Jesuh kha hi vawlei minung siangpahrang pawl he a tahchunh i “hrawh khawh lomi nunnak” a ngeimi tiah a ti. (Hebru 7:16) A sullam cu Jesuh tuahmi thil ṭha vialte hi an hmun zungzal lai tinak a si. Cupinah thil lianngan le thil ṭha kha a tuah hna lai.

7 Baibal nih Jesuh kong a rak chimchungmi hi bia hi ruat tuah hmanh: “A mi kha a uk khawh hna nakhnga BAWIPA duhnak kha zeidah a si ti a hngalh lai i BAWIPA cu a ṭih lai. Cun BAWIPA rian ṭuan kha aa lawmhnak a si lai. Lenglang men le mi chim chin bia men in bia a khiak lai lo; sifak mi kha an bia ṭhate in a ceihpiak hna lai i nauta pawl kha a ṭanh hna lai.” (Isaiah 11:2-4) Mah bia nih khan Jesuh cu miding a si i vawlei mi hna cungah zaangfahnak a ngei ti a langhter. Cu bantuk uktu ngeih cu na duh a si lo maw?

8 Pathian Pennak kong biatak a dang pakhat cu Jesuh lawng nih a uk lai lo, uktu ṭuan hawi a ngei lai ti hi a si. Tahchunhnak ah, lamkaltu Paul nih Timote kha “kan in khawh peng ahcun, a uk zong amah he kan uk ṭi lai” tiah a ti. (2 Timote 2:12) A si, Pathian thimmi Paul, Timote le a dang zumhawktlakmi hna cu vancung Pennak ah Jesuh he uktu an ṭuanṭi lai. Cu tinvo sung cu pa zeizat nih dah an hmuh lai?

9 Hi cauk i Ṭhen 7 nak ah langhter a rak si bangin, lamkaltu Johan nih langhnak pakhat ah hitin a rak hmuh: “Zion Tlang i tufa a dir ko kha ka hmuh; a sinah cun mi thong zakhat le thong sawm li le thong li an um i cu hna cu an cal i amah min le a Pa min khenhmi kha an si.” 144,000 cu ahote dah an si? Amah Johan theng nih hitin a kan chimh: “Tufa kha a kalnak kip ah an zulh. A taang rihmi minung hna lakin tlanhmi an si i Pathian sin le Tufa sinah pekchanh hmasa bikmi an si.” (Biathlam 14:1, 4) A si, annih cu vancungah Jesuh Khrih he uktu ṭuan dingin thimmi zumhawktlak zultu pawl an si. An thih in vancung nunnak i an thawhṭhan hnuah Jesuh he “vawlei cu an uk lai.” (Biathlam 5:10) 144,000 a tlin nakhnga caah Pathian nih lamkaltu chan in khan zumhawktlak Khrihfa hna kha a rak thim hna.

10 Minung uktu dingah Jesuh le 144,000 timh an simi hi dawtnak taktak a si. Zeicahtiah Jesuh nih minung pakhat sining le harnak tonmi kha a hngalh. Paul nih Jesuh cu “kan santlaihlonak ah kan cung i zaangfahnak a ngei kho lomi tlangbawi a si lo. Kan tlangbawi ngan hi kanmah bantukte in tukforhnak a ing vemi a si, sihmanhsehlaw sualnak bel zeihmanh a tuah lomi a si” tiah a ti. (Hebru 4:15; 5:8) Amah he uktu a ṭuan hnga dingmi hna zong minung pakhat in harnak an rak ing ve. Mah lengah, tlinlonak le a dang zawtnak phunphun zong an rak tuar. Cucaah minung tonmi harnak hi an hngalhthiam lai ti cu a fiang ko!

PATHIAN PENNAK NIH ZEIDAH A TUAH LAI?

11 Jesuh nih a zultu pawl kha Pathian Pennak rung tlung ko seh tiah thlacam awk a rak chimh hna lioah, “vancung khua ah na duhnak an tuah bangin vawlei cungah hin tuah si ve ko seh” ti zong in thlacam ding a rak fial hna. Pathian cu vancung ah a um i, zumhawktlakmi vancungmi nih a duhnak kha an tuah zungzal. Asinain, Ṭhen 3 nak ah a ṭhalomi vancungmi pakhat nih Pathian duhnak tuah kha a ngol i Adam le Evi kha misual a rak siter hna ti kong kan rak cawn. Satan Khuachia tiah kan theihmi cu miṭhalopa vancungmi kong Baibal chimmi kha Ṭhen 10 nak ah tamdeuh in kan cawn te lai. Satan le Satan zulh awk aa thimmi khuachia tiah timi thlarau hna kha van ah umnak caan tlawmpal pek an si. Cucaah van ah a ummi kip nih Pathian duhnak an tuah lo. Cucu Pathian Pennak uknak aa thawk tikah a rak i thleng. Siangpahrang a ṭuan kami Jesuh Khrih nih Satan kha a rak doh.—Biathlam 12:7-9.

12 A tanglei i profet bia nih zeidah a rak cang ti kha a langhter: “Atu cu Pathian khamhnak a phan cang! Atu cu Pathian nih a ṭhawnnak kha siangpahrang bantukin a langhter cang. Atu cu Messiah nih khan a nawlngeihnak kha a langhter cang. Kannih kan unau hna sual a puhtu, Pathian hmai ah dir riangmang in chunzan in sual a puh zungzaltu hna kha, vancung in lengah hlonh a si cang.” (Biathlam 12:10) Mah Baibal cang ah a biapi tukmi thil pahnih langhter a si kha na hmu maw? Pakhatnak ah, Jesuh Khrih ukmi Pathian Pennak cu aa thawk cang. Pahnihnak ah, Satan cu van in vawlei ah an thlak cang.

13 Cu thil phun hnih ruangah zei thil dah a chuak? Van ah zeidah a cang ti kha hitin kan rel: “Nannih van hna le khika i a ummi vialte hna, i lawm tuah u.” (Biathlam 12:12) A si, vancung ah Satan le a khuachia pawl an um ti lo, Jehovah Pathian cungah zumhawktlakmi lawngte an um cang caah zumhtlakmi vancungmi hna cu an i nuam. Van ahcun daihnak le remnak tlamtling in a um cang. Pathian duhnak cu van ah tuah a si cang.

14 Vawlei tah zeitindah a um? Baibal nih hitin a ti: “Sihmanhsehlaw vawlei le rili caah cun ṭihnung a va si hringhran dah! Zeicahtiah Khuachia cu nan sinah a rung ṭum cang i cu pin ah caan tawite lawnglawng ka ngei ti kha a hngalh fawn caah a thin a linh in a lin ko.” (Biathlam 12:12) Satan cu van in thlak a si ca le a caan tawite lawng a taan caah a thin a hung. A thin a hun ruangah vawlei ah lungretheihnak asiloah thil “ṭihnung” kha a chuahter. Cu kong cu a hun changtu ṭhen ah tamdeuh in kan cawn lai. Mah kong kha lung chungah chia in biahalnak kha hitin kan tuah khawh, Pennak nih vawlei cungah Pathian duhnak kha zeitindah a tuah khawh lai?

15 Hi vawlei ca i Pathian duhnak kha ruat ṭhan hmanh. Mah kong kha Ṭhen 3 nak ah na rak cawn cang. Hi vawlei ca i Pathian duhnak cu minung hi thih loin miding lawngin a khatmi paradis i canter ding a si kha Eden dum ah a rak chim. Satan nih Adam le Evi kha misual ah a canter hna i mah nih khan Pathian duhnak kha vawlei ah a tlinter lo nain Pathian tinhmi cu aa thleng lo. Jehovah nih “a dingmi cu ram chung [“vawlei,” NW] ah himte in an um lai i ram cu zungzal in anmah ta a si lai” timi tinhmi kha a ngei peng rih. (Salm 37:29) Mah kha Pathian Pennak nih a tlinter lai. Zeitin in dah?

Van in Satan le a khuachia pawl thlak an simi nih vawlei ah harnak a tlunter. Cu harnak cu a rauhhlan ah a dong cang lai

Raltuknak, mangṭam le zaangennak hmanthlak

16 Daniel 2:44 i hmuhmi chimchungbia hi ruat tuah hmanh. Hitin kan rel: “Cu siangpahrang hna chan ahcun vancung Pathian nih pennak pakhat a ser lai i cu pennak cu zeitik hmanhah a rawk lai lo; hi pennak vialte hi a hrawh dih hna lai i a donghter dih hna lai, sihmanhsehlaw cu pennak tu cu zungzal in a hmun lai.” Mah nih Pathian Pennak he aa tlaiin zeidah a langhter?

17 Pakhatnak ah, Pathian Pennak cu “cu siangpahrang hna chan” ah asiloah siangpahrang tampi an um lioah dirh a si lai ti a langhter. Pahnihnak ah, Pennak cu zungzal in a hmun lai ti a langhter. Zei cozah hmanh nih a tei lai lo i a hmun a rolh lai lo. Pathumnak ah, Pathian Pennak le hi vawlei cozah kar lak ah raldohnak a um lai ti a langhter. Pathian Pennak nih a tei lai. A donghnak ah mah lawnglawng kha minung cungah nawl a ngeimi cozah a si lai. Cu tikah minung cu an rak hngalhmi vialte lak i a ṭha bikmi uknak tangah an i nuam lai.

18 Baibal ah Pathian Pennak le hi vawlei cozah i hmanung bik raldohnak kong tampi a um. Tahchunhnak ah, donghnak caan a naih chin bantukin thlarau ṭhalo hna nih ‘vawlei cung siangpahrang vialte’ kha hlen awkah lihbia an karhter lai tiah a ti. Zei ca ah dah a si? “Lian Ngan Bik Pathian ni lianngan ni ah pakhat le pakhat i do hna seh ti caah a si.” Vawlei siangpahrang pawl cu ‘Hebru holh in Armageddon tiah timi hmun ah’ an i pum. (Biathlam 16:14, 16) Mah Baibal cang a hme pahnih nih minung cozah hna le Pathian Pennak i hmanung bik raldohnak kha Har-Magedon asiloah Armageddon tiah a ti.

19 Armageddon hmangin Pathian Pennak nih zeidah a tlinter lai? Hi vawlei ca i Pathian duhnak kha ruat ṭhan hmanh. Jehovah Pathian nih vawlei Paradis ah amah a biami miding le mitling a simi hna in khahter kha aa tim. Atu ah khakha a tlin nakhnga lo zeinihdah a donh. Pakhatnak ah, misual kan si caah kan zaw i kan thi. Asinain, zungzal in kan nun khawh nakhnga caah Jesuh cu kan caah a thi ti kha Ṭhen 5 nak ah kan rak cawn cang. Thawngṭha Johan chungah khumhmi hi bia hi naa cinken ṭheu lai: “Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai.”—Johan 3:16.

20 Dawnkhantu a dang pakhat cu mi tampi nih thil ṭhalo an tuahmi hi a si. Lih an chim, an i hleng, nu le pa sualnak an tuah. Pathian duhnak tuah kha cu an duh lo. Thil ṭhalo a tuahmi hna cu Pathian ral Armageddon ah hrawh an si lai. (Salm 37:10) Pathian duhnak vawlei ah tuah a si lonak a ruang dang cu cozah nih cutin tuah awkah mi kha an forh hna lo caah a si. Cozah tampi cu san an tlai lo, an puarhrang i an ziaza a rawkral. Baibal nih fiangte in hitin a chim: “Minung nih minung cu harnak pek in a uk.”—Phungchimtu 8:9, NW.

21 Armageddon hnuah, minung cu cozah pakhat lawng a simi Pathian Pennak tangah an um cang lai. Mah Pennak nih khan Pathian duhnak kha a tlinter lai i thluachuah tampi a ratpi lai. Tahchunhnak ah, Satan le a khuachia pawl kha a hrawh hna lai. (Biathlam 20:1-3) Zumhawktlakmi minung pawl an zawt i an thih ti nakhnga lo caah Jesuh i raithawinak a hmual kha a hman lai. Pennak tangah a ummi hna cu zungzal an nung lai. (Biathlam 22:1-3) Vawlei cu paradis ah ser a si lai. Cucaah Pennak nih Pathian duhnak kha vawlei ah a tlinter lai i Pathian min kha a thianter lai. Cu a sullam cu zeidah a si? A donghnak ah Pathian Pennak tang i a ummi vialte nih Jehovah min kha an upat lai tinak a si.

PATHIAN PENNAK NIH ZEITIK AHDAH A TUAH LAI?

22 Jesuh nih a zultu pawl kha “na Pennak cu rung tlung ko seh” tiin thlacam ding a chimh hna lioah Pennak cu kha caan ah a tlung rih lo ti cu a fiang. Jesuh vancung a kai tikah tah a rak tlung maw? Tlung hlah, Jesuh a thawhṭhan hnu ah Piter le Paul nih Salm 110:1 i “BAWIPA nih siangpahrang ka BAWIPA cu a thawh i, ‘Na ral cu na ke tangah ka chiah hna hlan tiang, ka orhlei kam ah hin ṭhu tuah’ ” timi chimchungbia kha Jesuh cungah a tling tiah an ti. (Lamkaltu 2:32-34; Hebru 10:12, 13) Hngah caan a rak um.

Pathian Pennak tangah Pathian duhnak cu van ah tuah a si bantukin vawlei ah tuah a si lai

Rili ah ni a tlak lio

23 Hngah caan cu zei can dah a rauh lai? Kum zabu 19 ah lungthin ṭha a ngeimi Baibal siangngakchia pawl nih hngah caan cu 1914 kum ah a dih lai tiah an tuak. (Mah nithla kong kha Thlaihhlei ah zoh.) 1914 i aa thawkmi vawlei thil umtuning nih Baibal siangngakchia pawl tuakmi a hmaan kha a langhter. 1914 i Baibal chimchungbia tlinnak nih Khrih cu Siangpahrang a si cang i vancung ah Pathian Pennak cu uk hram aa thawk cang ti a langhter. Cucaah, kannih cu Satan caah “caan tawite lawnglawng” a taan caan ah kan nung. (Biathlam 12:12; Salm 110:2) A rauhhlan ah Pathian Pennak nih hi vawlei ah Pathian duhnak a tlinter hrimhrim lai tiah kan chim khawh. Cucu thawngṭha taktak a si tiah na ruat maw? A hmaanmi a si tiin tah na zum maw? A hnu ṭhen nih cu kong he aa tlaiin Baibal cawnpiakmi taktak kha an theihter lai.

BAIBAL CAWNPIAKMI

  • Pathian Pennak cu vancung cozah a si, Jesuh Khrih cu Siangpahrang a si i amah he uktu ṭuan dingah minung 144,000 kha thim an si.—Biathlam 14:1, 4.
  • Pennak cu 1914 ah uk hram aa thawk, kha caan thawk khan Satan cu van in vawlei ah thlak a rak si.—Biathlam 12:9.
  • A rauh hlan ah Pathian Pennak nih minung cozah hi a hrawh lai i, vawlei hi paradis a siter lai.—Biathlam 16:14, 16.

Biahalnak Hna

1. A min a thangmi zei thlacamnak kong dah atu kan i ruah lai?

2. Jesuh nih a zultu pawl thlacam awk i a cawnpiakmi hna pathum kha zeidah a si?

3. Pathian Pennak kong he aa tlai in zeidah hngalh kan herh?

4. Pathian Pennak cu zeidah a si i, a siangpahrang cu ahodah a si?

5. Pathian Pennak cu khuazei ah dah a um i zeidah a uk lai?

6, 7. Zeinihdah Jesuh cu aa thleidangmi Siangpahrang a siter?

8. Ahote dah Jesuh he uktu a ṭuan lai?

9. Pa zeizat dah Jesuh he uktu a ṭuan lai i, Pathian nih zei tik caan in dah a rak thim hna?

10. Minung uktu dingah Jesuh le 144,000 timh an simi hi zeicah dawtnak taktak a si?

11. Zeicahdah Jesuh nih a zultu pawl kha vancung ah Pathian duhnak tuah a si nakhnga thlacam a rak fial hna?

12. Biathlam 12:10 ah zei a biapimi thil pahnih dah langhter a si?

13. Satan van in thlak a si caah zei thil dah a chuak?

14. Vawlei ah Satan thlak a si caah zeithil dah a rak um?

15. Hi vawlei ca i Pathian duhnak cu zeidah a si?

16, 17. Daniel 2:44 nih Pathian Pennak he aa tlaiin zeidah a langhter?

18. Pathian Pennak le hi vawlei cozah hna i hmanung bik raldohnak a min kha zeidah a si?

19, 20. Atu vawlei ah Pathian duhnak a tlin nakhnga lo zeinihdah a donh?

21. Pennak nih Pathian duhnak kha vawlei cungah zeitindah a tlinter lai?

22. Jesuh vawlei cung a rat lioah asilole a thawhṭhan hnuah Pathian Pennak a tlung rih lo ti kha zeicah kan hngalh?

23. (a) Pathian Pennak cu zeitik in dah uk hram aa thawk? (b) Zei kong dah a hnu ṭhen ah ruah a si lai?