A ummi cazin ah kal

A ummi cazin ah kal

ṬHEN HLEIHNIH

Pathian Lung A Tongmi Lam In Nunnak

Pathian Lung A Tongmi Lam In Nunnak

Zeitindah Pathian hawikom na si khawh?

Satan zuamcawhnak ah zeitin in dah naa tel?

Zei tuahsernak nih dah Jehovah lung a lawmhter lo?

Pathian duhning in zeitindah na nun khawh?

Zei bantuk minung dah hawikom ah naa thim lai? Hmuhning, duhmi le sunsakmi aa lomi pakhatkhat he hawikom si na duh ko lai. Miding mifel a si i zaangfahnak tibantuk ziaza a ngeimi zong kha komh na duh hna lai.

2 Minung tuanbia chungah, Pathian nih mi cheukhat kha a hawikom si awkah a rak thim hna. Tahchunhnak ah, Jehovah nih Abraham kha ka hawi tiah a ti. (Isaiah 41:8; Jeim 2:23) David cu Pathian duh dawtmi phun a si caah “ka duh mi phun” a si tiah a rak ti. (Lamkaltu 13:22) Cun Jehovah nih profet Daniel kha “duh a nung tukmipa” in a rak hmuh.”—Daniel 9:23, NW.

3 Jehovah nih Abraham, David le Daniel kha zeiruangah a hawile ah a ruah hna? Abraham kha “ka nawl na ngaih caah a si” tiah a rak ti. (Genesis 22:18) Cucaah tuah a fialmi hna toidor tein a tuahmi kha Jehovah nih a naih hna. Israel mi hna kha hitin a ti hna: “Ka bia nan ngaih ahcun nan Pathian ka si lai i ka mi nan si lai.” (Jeremiah 7:23) Nang zong Jehovah a bia na ngaih ahcun, a hawi na si kho ve!

JEHOVAH NIH A HAWILE KHA THAZANG A PEK HNA

4 Pathian hawikom si man kha ruathmanh. Jehovah nih “amah lei i an lung soisel awk a um lomi hna cungah a ṭhawnnak” langhter awk caanṭha a kawl tiah Baibal nih a ti. (2 Chanrelnak 16:9) Jehovah nih na caah a ṭhawnnak kha zeitindah a langhter? Lamkhat cu Salm 32:8 ah ṭial a si i hitin kan rel: “Na zulh awk hnga lam kha kan hmuhsak lai, kan cawnpiak lai i lungthin kan cheuh lai.”

5 Jehovah zohkhenhnak kha hmual ngei ngaiin a langhter! Na herhmi lamhruainak kha an pek lai i mah kha na hman caah an ven lai. Pathian nih na inmi tukforhnak le hneksaknak kha inkhawh awkah bawmh an duh. (Salm 55:22) Jehovah kha na lungthin dihlak in a rian na ṭuan ahcun salm caṭialtu pa bantukin hi bia hi fek tein na zumh khawh ve: “BAWIPA ka sinah a um cu ka hngalh zungzal, amah cu keimah he naihte ah a um i zeihmanh nih an ka hnin kho lo.” (Salm 16:8; 63:8) A si, Jehovah nih a duh ningin nun awkah an bawmh khawh. Sihmanhsehlaw, na hngalh bantukin cutin tuahter an duh lomi Pathian ral pakhat a um.

SATAN ZUAMCAWHNAK

6 Hi cauk i Ṭhen 11 nak nih zeitindah Satan Khuachia nih Pathian nawlngeihnak a zuamcawh ti kha a fianter. Satan nih Jehovah kha lihchim a puh i Adam le Evi kha mah tein a hmaan, hmaan lo biachahnak nawl a pek hna lo caah Pathian cu a ding lo ti phun in a langhter. Adam le Evi an sual hnu i hi vawlei ah an tefa khah hram an i thawk tikah Satan nih minung lungthin kongah biahalnak a rak chuahter. Pathian sinah “minung nih an in dawt caah an in biakmi a si lo. Caanṭha ka pe hmanh law mizei paoh Pathian a domi si dingin ka tuah khawh lai” tiah Satan nih minung kha sual a puh hna. Job timi pa kongah Satan nih cutin zumhnak a ngeih kha a lang. Job cu hodah a si i, Satan zuamcawhnak ah zeitindah aa tel?

7 Job cu a luancia kum 3,600 hrawngah a rak nungmi a si. Cu pa cu miṭha a si i Jehovah nih hitin a rak ti: “Vawlei cungah hin amah bantuk soisel awk um lo, miding, Pathian a ṭih i ṭhatlonak a mertakmi hi an um lo.” (Job 1:8) Job nih Pathian lung a rak lawmhter.

8 Pathian a biami Job lungput he aa tlaiin Satan nih biahalnak a rak chuahter. Khuachia nih Jehovah kha hitin a ti: “Job nih hin Pathian cu a lak in maw a ṭih? Amah le a inn le a ngeihmi vialte cu hau in na kulh hna lo maw? Nangmah nih a kut rianṭuannak cu thluachuah na pek i ram chungah hin a ngeihmi thil cu an karh. Sihmanhsehlaw atu cu na kut hei chuah law a ngeihmi thil vialte khi tawng tuah ngat, na hmai hrimhrim ah an volhpamh ko lai.”—Job 1:10, 11.

9 Job nih ṭhatnak a hmuh caah pei Pathian a biak ko cu tiah Satan nih a ti. Hneksaknak a in ahcun Job nih Pathian kha a mertak ko lai tiah a ti rih. Satan zuamcawhnak kha Jehovah nih zeitindah a rak leh? Cu zuamcawhnak cu Job lungput he aa pehtlaih caah Jehovah nih Job hneksaknak nawl kha Satan a rak pek. Cu ti cun, Job nih Pathian a dawt le dawt lo kha a fiang lai.

JOB CU HNEKSAK A SI

10 A rauhhlan ah Satan nih a phunphun in Job cu a rak hneksak. A saṭil cheukhat cu mi nih an fir, a cheu cu mi nih an thah hna. A sinum tam deuh zong an thah hna. Mah nih a khuasaknak a harter. Culengah thli fakpi a hran ruangah a fale pahra an thi i ngaihchiatnak zong a tong. Ṭih a nungmi thil kha a rak ton ko nain, “Job nih sualnak a tuah lo i Pathian cu a mawhchiat lo.”—Job 1:22.

Job cu a zumhnak a feh ruangah Pathian nih thluachuah a rak pek

Job cu a zumhnak a feh ruangah Pathian nih thluachuah a rak pek

11 Satan nih a rak ngol lo. Job nih a ngeihmi thil sunghnak le sinum le fale thihnak kha a in khawh ko lai nain, zawtfahnak a in ahcun Pathian kha a mertak ko lai tiah Satan nih a rak ruah. Cucaah Jehovah nih Satan kha Job cungah fih a nungmi hma fak tlunternak nawl a pek. Sihmanhsehlaw Job nih cu ruang zongah Pathian a zumhnak kha a rak thlau lo. Mah nak cha cun hitin a ti: “Ka thih tiang ka zumhfehnak cu ka hlaw lai lo!”—Job 27:5, NW.

12 Job nih a cung i a tlungmi harnak kha Satan ruangah a si ti a hngal lo. Khuachia nih Jehovah nawlngeihnak a zuamcawhnak kong kha a dikthliar in a hngalh lo caah harnak a inmi kha Pathian ruangah a si tiah a ruah. (Job 6:4; 16:11-14) Asinain, Jehovah cungah zumhfek tein a um zungzal. Job zumhfehnak nih amah ca ṭhatnak caah Pathian a biak timi Satan bia a palh kha a langhter!

13 Job a zumhnak a feh ruangah Jehovah nih Satan zuamcawhnak kha hmual ngei ngaiin a rak leh khawh. Job cu Jehovah hawi a rak si taktak i a zumhnak a feh ruangah Pathian nih thluachuah a rak pek.—Job 42:12-17.

NAA PEHTLAIH NING

14 Satan nih a rak chuahtermi Pathian cung zumhfehnak kongkau cu Job he lawng dairek in aa pehtlaimi a si lo. Nangmah he zong aa pehtlai ve. Cucu Phungthlukbia 27:11 nih fiang tein a langhter, Jehovah Bia nih hitin a ti: “Ka fapa, fim law ka lung ka lawmhter tuah, cu ti cun a ka soitu kha ka leh khawh hna lai.” Job a thih hnu kum tampi a luan hnu i ṭialmi cu bia nih Satan nih Pathian kha a zuamcawh peng rih i a salle zong kha sual a puh peng rih hna ti a langhter. Jehovah duh ningin kan nun ahcun, Satan sual puhnak al khawh awk kan bawmh a si i mah nih Pathian lung a lawmhter. Cu kong he aa tlaiin zeitindah na ruah? Na nunnak ah mersannak cheukhat na tuah ko lai nain, Satan lih puhnak alnak nawl na hmuh a si caah naa lawm a si lo maw?

15 Satan nih hitin a timi hi zohhmanh: “Mi nih cun a ngeihmi vialte cu a nunnak caah cun a sian ko lai ta.” (Job 2:4) “Mi” tiah Satan nih a ti caah Job lawng si loin mi vialte kha sual a puh hna ti a lang. Cucu a biapit tuknak zawn a si. Satan nih Pathian cung i na zumhfehnak ah biahalnak a chuahter. Harnak na ton tikah Pathian nawlngai lo in lam ding na kaltakmi kha Khuachia nih hmuh a duh. Satan nih zeitindah aa zuam?

16Ṭhen 10 nak ah kan rak cawn cang bangin minung kha Pathian sinin pialter awkah Satan nih lam phun tampi a hman. Phundang cun, “seh awk kawl ah, chiandeih bangin a vak cuahmah ko.” (1 Piter 5:8) Baibal na cawn le cu ningin nun naa zuam tikah hawikom, rualchan asiloah midang sinin ralchannak a rat tikah Satan huham ngeihnak kha na hmuh khawh.* (Johan 15:19, 20) Phundang cun, Satan nih “ceunak vancungmi bantuk aa siter.” (2 Korin 11:14) Khuachia nih Pathian duhmi nunnak lam khan pialter awkah aa hngal setsai lomi lam kha a hman khawh. Kei cu Pathian lung a tong khomi miṭha ka si lo tiah ruat in lungdongh awk zongah a tuah khawh. (Phungthlukbia 24:10) Satan cu “seh awk kawl ah chiandeih bangin a vak cuahmahmi” a si ah siseh, “ceunak vancungmi bantuk aa siter” ah siseh a chuahtermi zuamcawhnak cu hihi a si: Hneksaknak asiloah tukforhnak na ton ahcun Pathian na bia ti lai lo ti hi a si. Cu a si caah Job bantukin a mi zuamcawhnak kha zeitindah na leh khawh lai i Pathian cungah zumhfekmi na si kha na langhter khawh lai?

JEHOVAH NAWLBIA ZULHNAK

17 Pathian duh ningin na nunnak thawngin Satan zuamcawhnak kha na leh khawh. Cu ah zeidah aa tel? Baibal nih hitin a ti: “Bawipa na Pathian cu na lungthin vialte le na ruahnak vialte le na ṭhawnnak vialte in na dawt lai.” (Deuteronomi 6:5) Pathian na dawtnak a ṭhan bantukin, a duhnak tuah na duhnak cu a ṭhang ve lai. “Pathian kan dawt ti cu a nawl kan zul tinak a si ko” tiah lamkaltu Johan nih a rak ṭial. Jehovah kha na lungthin dihlak in na dawt ahcun, ‘a nawlbia cu a har tuk lo’ kha na hmuh lai.—1 Johan 5:3.

18 Jehovah nawlbia hna cu zeidah an si? Cheukhat ah hrial awk ziaza aa tel. Tahchunhnak ah, “Jehovah Huatmi Kha Hrial” tiin biatlang bunhmi rinlikulh kha zoh. Cuka ah Baibal nih fiang tein sual a phawtmi ziaza kha na hmuh hna lai. Vun zoh ta duak ahcun cheukhat cu a ṭhalomi ziaza si dawh an lo lai lo. Sihmanhsehlaw cherhchanmi cathiang kha ṭha tein ruah hnuah Pathian nawlbia i fimnak kha na hmuh lai. Na ziaza i thlen ding cu na tonmi vialte lakah a har bikmi zuamcawhnak a si kho men. Asinain, Pathian duh ningin nunnak nih lungsinak le lunglawmhnak an pek lai. (Isaiah 48:17, 18) Mahlengah cu nunning cu na phak khawhmi an si. Zeitindah theih khawh a si?

JEHOVAH HUATMI KHA HRIAL

Ṭhatlonak a tuahṭimi pahnih
Zu a ding i kuak a zumi nuva
Thil a firminu
  • Lai nawnnak.—Exodus 20:13; 21:22, 23.
  • Nu le pa sualnak.—Levitikas 20:10, 13, 15, 16; Rom 1:24, 26, 27, 32; 1 Korin 6:9, 10.
  • Thlarau thiamnak.—Deuteronomi 18:9-13; 1 Korin 10:21, 22; Galati 5:20, 21.
  • Siasal biaknak.—1 Korin 10:14.
  • Zuritnak.—1 Korin 5:11.
  • Firnak.—Levitikas 6:2, 4; Efesa 4:28.
  • Lihchimnak.—Phungthlukbia 6:16, 19; Kolose 3:9; Biathlam 22:15.
  • Hakkauhnak.—1 Korin 5:11.
  • Zaang-ennak.—Salm 11:5; Phungthlukbia 22:24, 25; Malakhi 2:16; Galati 5:20.
  • Aa tlak lomi holh. —Levitikas 19:16; Efesa 5:4; Kolose 3:8.
  • Thi ningcang loin hmannak.—Genesis 9:4; Lamkaltu 15:20, 28, 29.
  • Chungkhar zohkhenh duh lonak.—1 Timote 5:8.
  • Hi vawlei raltuknak asiloah nainganzi buainak ah i telnak.—Isaiah 2:4; Johan 6:15; 17:16.
  • Sahdah hmannak asiloah nuamhnak phun in ritnak sii hmannak.—Marka 15:23; 2 Korin 7:1.

19 Jehovah nih kan tuah khawhmi leng tiangin a kan hal bal lo. (Deuteronomi 30:11-14) Kan thil ti khawhnak le kan ri ngeihnak kha kanmah nakin a hngalh deuh. (Salm 103:14) Mahlengah, Jehovah nih a nawl ngaih awkah thazang a kan pek khawh. Lamkaltu Paul nih hitin a rak ṭial: “Pathian nih a biakamnak cu a zulh ko lai i nan in khawh leng tiangin tukforhnak cu nan cungah a tlunter lai lo. Tukforhnak nan in tikah inkhawhnak thazang an pek hna lai i chuah khawhnak lam zong an serpiak hna lai.” (1 Korin 10:13) Inkhawhnak ngeih awkah Jehovah nih “a si tawnmi leng thil ti khawhnak ṭhawnnak” in an bawmh khawh. (2 Korin 4:7, NW) Hneksaknak tampi a in hnu ah Paul nih hitihin a rak chim khawh: “Khrih nih ṭhawnnak a ka pekmi thawngin zei thil hmanh hung chuak hna sehlaw ka ton khawh ko hna.”—Filipi 4:13.

PATHIAN DUHMI ZIAZA NGEIHNAK

20 Pathian lungton awkah a huatmi hrial lawngin a za lo. A duhmi zong duh a hau. (Rom 12:9) Hmuhning, duhmi le sunsakmi aa khatmi hna he i hawikomh na duh a si lo maw? Jehovah zong cuticun a si ve. Cu a si caah Jehovah duhmi kha duh khawh awkah cawng. Cu hna lakah cheukhat kha Salm 15:1-5 ah langhter an si, cuka ah Pathian hawikom a si tiah timi hna kong zong langhter a si. Jehovah hawile cu Baibal chung i ‘thlarau theitlai’ a tlaimi an si. Cu chungah “dawtnak, lawmhnak, daihnak, lungsaknak, zaangfahnak, ṭhatnak, zumhawktlakmi sinak, toidornak le mah le mah i tei khawhnak” te hna hi an i tel.—Galati 5:22, 23.

21 Baibal hmaan tein relnak le hlathlainak nih Pathian duhmi ziaza ngeih awkah an bawmh lai. Pathian halmi na cawnmi nih a ruahnak le na ruahnak i khah awkah an bawmh fawn lai. (Isaiah 30:20, 21) Jehovah na dawtnak a ṭhawn deuhdeuh bantukin a duh ningin nun duhnak na ngei deuhdeuh ve lai.

22 Jehovah duh ningin nun awkah i zuam a hau. Baibal nih na nunning naa thlenmi kha mi hlun i phoih i mithar i hruk he a tahchunh. (Kolose 3:9, 10) Jehovah nawlbia he aa tlaiin salm caṭialtu pa nih hitin a ṭial: “Ka zulh hna caah laksawng ka hmu.” (Salm 19:11) Pathian duh ningin nun cu nun man a ngei tukmi a si kha nangmah theng nih na hmuh ko lai. Cutin na tuahnak thawngin Satan zuamcawhnak kha na leh khawh lai i Jehovah lung na lawmhter lai!

BAIBAL CAWNPIAKMI

  • A nawl na ngaihnak thawngin Pathian hawi na si kho.—Jeim 2:23.
  • Satan nih mi vialte zumhfehnak kongah zuamcawhnak a chuahter.—Job 1:8, 10, 11; 2:4; Phungthlukbia 27:11.
  • Pathian duh lomi tuahsernak kha kan hrial awk a si.—1 Korin 6:9, 10.
  • Jehovah huatmi kan huat i a duhmi kan duh ve nak thawngin a lung kan ton khawh lai.—Rom 12:9.

*  Mah nih khan an ralchantu hna kha Satan nih pakhat cio in a uk hna a ti duhnak a si lo. Sihmanhsehlaw Satan cu atu chan pathian a si i, hi vawlei hi amah kut tangah a um. (2 Korin 4:4; 1 Johan 5:19) Cucaah Pathian duh ningin nun cu mi duh lomi nunning a si caah mi cheukhat nih an in ralchan lai.


Biahalnak Hna

1, 2. Jehovah nih komh tukmi hawikom in a hmuhmi hna cheukhat kha chim.

3. Zeiruangah Jehovah nih minung cheukhat kha a hawile si awkah a thim hna?

4, 5. Jehovah nih a ṭhawnnak kha a mi hna caah zeitindah a langhter?

6. Satan nih minung kha zeitindah sual a puh hna?

7, 8. (a) Job kha a chan hawi minung hna lakah zeinihdah aa thlei dangmi a siter? (b) Satan nih Job lungput he aa tlaiin zeitindah biahalnak a tuah?

9. Jehovah nih Satan zuamcawhnak kha zeitindah a rak leh i zeiruangah a si?

10. Job cungah zei hneksaknak dah a tlung i, zeitindah a rak leh?

11. (a) Satan nih Job kong he aa tlaiin sual a puhmi pahnihnak cu zeidah a si i, Jehovah nih zeitindah a rak leh? (b) Job nih a fak ngaimi a hma ruangah zeitindah a rak leh?

12. Khuachia zuamcawhnak kha Job nih zeitindah a rak leh?

13. Pathian cungah Job a zumhnak a feh ruangah zeidah a rak cang?

14, 15. Satan zuamcawhnak cu Job le mi vialte he aa pehtlai dih tiah zeicah kan chim khawh?

16. (a) Pathian sinin pialter awkah Satan nih zei lam hna dah a hman? (b) Khuachia nih cu lam hna cu zeitindah a hman?

17. Jehovah nawlbia ngaih awk a simi a ruang bik cu zeidah a si?

18, 19. (a) Jehovah nawlbia cheukhat cu zeidah an si? (Rinlikulh kha zoh.) (b) Pathian nih luan tuk in a kan hal lo ti kha zeitindah kan hngalh?

20. Pathian duhmi zei ziaza dah kan ngeih awk a si i zeiruangah cu hna cu a biapit?

21. Pathian duhmi ziaza ngeih awkah zei nih dah an bawmh lai?

22. Pathian duh ningin na nun ahcun zeidah hlawh na tlinter lai?