A ummi cazin ah kal

A ummi cazin ah kal

ṬHEN SARIH

Na Dawtmi A Thimi hna Caah Ruahchannak Taktak

Na Dawtmi A Thimi hna Caah Ruahchannak Taktak

Thawhṭhannak a um taktak lai tiah zeitindah kan hngalh?

Jehovah nih mithi thawhter a duh ti kha zeinihdah a langhter?

Ahote dah a thoṭhan lai?

Mipuar hrang ral pakhat sinin ka zam tiah hei i ruat hmanh. Amah cu nangmah nakin a ṭhawn deuh lengah tlik zong a ṭhawng deuh fawn. Na hawile cheukhat a thah hna na hmuh caah zaangfahnak a ngeih lo kha na hngalh. Fak piin heh tiah na tli chih nain, an naih chin lengmang. Ruahchannak um dawh a lo ti lo. Asinain ruahlopi in, na pawngah khamhtu a hung chuak. Amah cu na ral nakin a ṭhawn deuh lengah kan bawmh lai tiah bia an kamh. Zeitluk in dah na hna a ngam lai!

2 Cu bantuk phun in ral nih an dawi. Kan zapi in a kan dawi dih. Tuan deuh capar ah kan cawn cang bantukin, Baibal nih thihnak kha ral tiah a ti. Ahohmanh nih cu ral cu kan hrial kho lo i kan do kho lo. Mah ral nih kan dawtmi hna nunnak a lak kha kannih a tamdeuh nih kan hmuh. Sihmanhsehlaw Jehovah cu cu ral nakin a let tampi in a ṭhawng deuh. Amah cu dawtnak a ngeimi Khamhtu a si i thihnak a tei khotu a si zong a langhter cang. Cun thihnak ral kha zungzal ca in ka hrawh lai tiah bia aa kam. Baibal nih “tei hmanung bik ding ral cu thihnak a si” tiah a ti. (1 Korin 15:26) Cucu thawngṭha a si!

3 Mi pakhatkhat an thihmi nih zeitindah a kan hnorsuan ti kha tlawmpal ruat ta u sih. Cutin ruahnak nih kan lung a lawmhter hngami kong kha hngalhthiam awkah a kan bawmh lai. Jehovah nih mithi an nung ṭhan lai tiah bia aa kam. (Isaiah 26:19) Annih cu nunnak an ngei ṭhan lai. Cucu thawhṭhannak ruahchannak a si.

KAN DAWTMI PAKHAT A THIH TIKAH

4 Na dawtmi nih an in thih tak bal maw? Na lungfahnak, na ngaihchiatnak le bawm khotu an um lo timi na ruahnak hna cu in tuar a har tuk tiah na ti ko lai. Cu bantuk caan ah, Pathian Bia in hnemhnak kan herh. (2 Korin 1:3, 4, NW) Thihnak he aa tlai in Jehovah le Jesuh nih zeitindah an intuar ti hngalh awkah Baibal nih a kan bawmh. A pa sining tlingte in a langhtermi Jesuh nih pakhatkhat nih thih tak a fah zia kha a hngalh. (Johan 14:9) Jesuh cu Jerusalem khua a kal fate, cu khua pawng i a ummi Bethani khua i Lazaruh le a farle Mari le Martha kha a va leng tawn hna. Cucaah an i kom ngaingai. Baibal nih “Jesuh nih Martha le a nau nu le Lazaruh kha a dawt hna” tiah a ti. (Johan 11:5) Asinain, hmasa ṭhen ah kan cawn cang bangin, Lazaruh cu a rak thi.

5 A hawipa a thih tikah Jesuh nih zeitindah a intuar? Lazaruh a thih ruangah a ngaih a chiami a rualchan hna le a hawile kha Jesuh nih a va ton hna. A hmuh tik hna ah Jesuh cu a ngaih a chia tuk. “A hnarno a ṭam i a lung a hno.” Cun cu kong ṭialmi nih “Jesuh cu a ṭap” tiah a ti. (Johan 11:33, 35) Ruahchannak a um lo ruangah Jesuh a ngaih a chia tinak a si maw? A si lo. A ngaingai ti ahcun, Jesuh nih thil khuaruahhar pakhat a um lai kha a hngalh. (Johan 11:3, 4) Asinain, thihnak nih a ngaih a chiatter.

6 Phundang in cun, Jesuh a ngaih a chiatmi hi thazang petu a si. Mah nih khan Jesuh le a Pa nih thihnak an huat ti kha a kan theihter. Sihmanhsehlaw Jehovah Pathian nih mah ral kha a doh khawh i a tei khawh! Pathian nih Jesuh kha zei tuah dah a fial ti zoh u sih.

“LAZARUH, RA CHUAK TUAH”

7 Lazaruh cu an rak vui cang caah thlan kharnak lung kha ṭhial u tiah Jesuh nih a ti hna. Lazaruh an vuinak ni li a si cang i a ruak a nam cang lai caah Martha nih a rak al. (Johan 11:39) Minung hmuh ningin zoh ahcun zei ruahchan awk dah a um kho ti lai?

8 Thlankharnak lung an ṭhial hnuah, Jesuh nih awthang piin “Lazaruh ra chuak tuah” tiah a ti. Zeidah a hung cang? ‘Mithipa cu a hung chuak.’ (Johan 11:43, 44) Cuka i a um mi hna an i lawmh lai ning khi na ruat kho maw? Lazaruh cu an ṭapa, an rualchan, an hawikom asilole an innpa a si ah siseh a thih kha an theih dih. Asinain an dawtmi cu pa cu an lakah a hung dir. Cu thil cu a si kho lomi thil si dawh a lo ko lai. Lawmhnak he an kuh lai ti cu a fiang ko. Thihnak teinak a va si dah!

Lazaruh thawhṭhannak nih lunglawmhnak nganpi a chuahter.—Johan 11:38-44

Jesuh nih Lazaruh a thawhter

9 Jesuh nih mah khuaruahhar thil kha keimah ṭhawnnak in ka tuah tiah a rak ti lo. Lazaruh a auh hlan i a thlacamnak ah, thawhṭhannak a Hrampi cu Jehovah a si tiah a rak fianter. (Johan 11:41, 42) Jehovah nih hi bantuk thil kong ah atu lawng hi a ṭhawnnak a hman a si lo. Lazaruh thawhṭhannak cu Baibal chungah ṭialmi thawhṭhannak pa kua lakah pakhat lawng a si.* Cu kong rel le cawn cu lung a nuam. Thawhter ṭhanmi chungah upa le ngakchia, nu le pa, Israel mi le miphun dang an i tel caah mah nih Pathian cu duhdanh a ngei lo ti a kan cawnpiak. Baibal i cu kong ṭialmi nih lung a lawmhter tuk! Tahchunhnak ah, Jesuh nih ngakchia nute kha thihnak in a thawhter lioah a nu le a pa cu “an khuaruah a har tuk [“an i lawm tuk,” NW].” (Marka 5:42) A si, Jehovah nih philh khawh lomi lunglawmhnak a pek hna.

10 Jesuh nih a thawhter mi hna cu a hnu ah an thi ṭhan. Cu a si ah a rak thawhter mi hna kha sullam ngei lo a si maw? A si lo. Mah Baibal chung bia nih khan a biapimi biatak cungah zumhfehnak le ruahchannak a kan ngeihter.

THAWHṬHANNAK KONG IN CAWNNAK

Elijah, nuhmei nu le a thoṭhanmi a fapa

Elijah nih nuhmei nu fapa a rak thawhter. —1 Siangpahrang 17:17-24

11 Baibal nih mithi nih cun “zeihmanh an hngal lo” tiah a ti. Annih cu khoika hmanh ah an nung lo i, hngalhnak an ngei lo. Lazaruh kong nih cu biatak cu a fehter. Lazaruh a nun ṭhan tikah vancung kong chim in mi lung a thawhter maw? Asiloah hell mei ṭih a nunning kong chim in mi a ṭihter maw? Cutin a rak chim lo. Baibal chungah Lazaruh nih cutin a chimmi a um lo. Ni li chung a thih lioah, “zeihmanh a hngal lo.” (Phungchimtu 9:5) Lazaruh cu thihnak ah aa hngilh.—Johan 11:11.

12 Lazaruh kong nih thawhṭhannak cu phuah chommi tuanbia si loin a taktak a si ti zong a kan cawnpiak. Jesuh nih Lazaruh kha hmutu tehte mibu hmai ah a rak thawhter. Jesuh a huami, biaknak lamhruaitu pawl hmanh nih mah thil kha an al lo. “Zeitindah kan tuah lai? Hipa nih hin hmelchunhnak tampi a tuah ṭung” ti tu in an ti. (Johan 11:47) Mi tampi nih a thoṭhanmi pa kha an va zoh. Cu ruangah annih lak i a tam deuh cu Jesuh zumtu an hung si. Jesuh Pathian thlahmi a si a langhtertu a nungmi tehte Lazaruh an hmuh caah a si. Cu tehte cu hmual a ngeih tuk caah zaangfahnak a ngei lomi Judah biaknak lam hruaitu pawl nih Jesuh le Lazaruh kha thah an timh hna.—Johan 11:53; 12:9-11.

Piter nih Dorkas a thawhter

Lamkaltu Piter nih Dorkas timi Khrihfa nu pakhat a rak thawhter. —Lamkaltu 9:36-42

13 Thawhṭhannak hi a si taktak mi in cohlan awkah aa tlak lomi a si maw? A si lo, zeicahtiah Jesuh nih “thlan chung i a ummi mithi vialte” cu ni khatkhat ah an tho ṭhan lai tiah a ti. (Johan 5:28) Jehovah cu nunnak vialte a Sertu a si. Nunnak a thar in a ser ṭhan khawh ti kha zumh i harh awk a si maw? A ngaingai ti ahcun, Jehovah thluak cung tu ah aa hngat deuh. Kan dawtmi a thimi hna kha aa cinken kho dih hnga maw? Universe hi arfi rel cawk loin a khat nain, Pathian nih pakhat cio kha min a pek hna! (Isaiah 40:26) Cucaah Jehovah Pathian nih kan dawtmi a thimi hna kong kha a neknok tiangin aa cinken khawh i, nunnak a pek ṭhan khawh hna.

14 Jehovah nih mithi thawhter a duh hna tiah Baibal nih a ti. Cucu zeitindah kan zumh khawh? Zumhawktlakmi Job nih “mi cu a thih ahcun a nung ṭhan kho lai maw?” tiah biahalnak a rak tuah. Jehovah nih a ka thawhter ṭhan hlan tiang thlan chungin ka hngah lai tiah Job nih a chimmi a si. Cun Jehovah kha hitin a ti: “Na ka auh lai i kan leh lai, na kut tuahmi thil cu hmuh na ka duh lai.”—Job 14:13-15.

15 Ruat tuah hmanh! A ngaingai ti ahcun Jehovah nih mithi nunter ṭhan kha a duh. Cu kong i Jehovah lungput kan hngalh tikah kan i nuam a si lo maw? Sihmanhsehlaw hmailei thawhṭhannak cu zeitindah a si lai? Ahote dah a tho ṭhan lai i, khoika ah dah an thawh lai?

“THLAN CHUNG I A UMMI MITHI VIALTE”

16 Baibal chung thawhṭhannak kong nih hmailei thawhṭhannak kong tampi a kan chimh. Hi vawlei ah thihnak in thawhter a rak simi hna cu an dawtmi hna he an rak i tong ṭhan. Hmailei thawhṭhannak cu cu bantuk cun a si ve lai—nain cu nakin a ṭha deuh lai. Ṭhen 3 nak ah kan rak cawn bantukin Pathian tinhnak cu vawlei pumpuluk paradis canter kha a si. Cucaah mithi cu raltuknak, sualnak le zawtnak in a khatmi hi vawlei i nun awkah an thoṭhan lai lo. A dai i a nuammi vawlei ah zungzal nunnak nawl an hmu lai.

17 Ahote dah a thoṭhan lai? Jesuh nih “thlan chung i a ummi mithi vialte nih a [Jesuh] aw an theih lai caan kha a ra lio, cun an thlan khan an chuak lai” tiah a ti. (Johan 5:28, 29) Cubantuk cun, Biathlam 20:13 zong nih “rili nih a chung i a thimi kha a hun chuah hna. Thihnak le mithi khua [“Hades,” NW] zong nih khan, an hrenmi mithi kha an hun chuah ve hna.” “Hades” nih hin thlan kha a sawh. (Thlaihhlei kha zoh.) Thlan vialte cu an lawng dih lai. Cuka ah aa dinmi nuai tampi hna cu an thoṭhan lai. Lamkaltu Paul nih “minung hi miṭha he miṭhalo he thihnak in kan thoṭhan dih lai, ti hi kaa ruahchanmi a si” tiah a ti. (Lamkaltu 24:15) Cucu zei sullam dah a ngeih?

18 Baibal kan rel tikah “miṭha” mi ah Jesuh vawlei cung a rat hlan i a rak nungmi tampi an i tel. Noah, Abraham, Sarah, Moses, Ruth, Esther le a dang mi tampi kha na hngalh hna lai. An zumhnak a ṭhawngmi nu, pa cheukhat kong kha Hebru angan 11 ah ṭial a si. Sihmanhsehlaw “miṭha” mi ah kan chan i a thimi Jehovah salle zong an i tel. Thawhṭhannak ruahchannak ruangah thih ṭihnak in kan luat kho.—Hebru 2:15.

Paradis ah mithi cu an thoṭhan lai i an dawtmi hna he an i tong ṭhan lai

Paradis ah mithi an thoṭhan

19 Jehovah an hngalh lo ruangah amah a bia lomi le a nawl a ngailomi hna kongah tah zeitindah? Nuai tampi “miṭhalo” pawl kha philh an si lai lo. Annih zong an ṭhoṭhan ve lai i a hmaanmi Pathian kong cawn awk le biak awkah caan pek an si lai. Kum thongkhat chungah, mithi cu an thoṭhan lai i vawlei cungah zumhawktlak tein Jehovah a biami hna he i hawikomhnak caan ṭha pek an si lai. Cu caan cu caan sunglawi a si lai. Kha caan kha Baibal nih Biaceihnak Ni tiah a ti.#

20 A rak nung balmi vialte an zapi in an thoṭhan dih lai tinak a si maw? A si lo. Baibal nih mithi cheukhat cu “Gehenna” ah an um tiah a ti. (Luka 12:5, NW) Gehenna timi cu hlanlio Jerusalem khua leng i hmunthur hlonhnak hmun min a si. Mithi ruak le hmunthur kha cuka ah an khangh hna. Judah mi hna nih vui awk a tlak lo an timi le thawhṭhannak hmuh ding a tlak lo tiah an ruahmi mithi ruak kha cuka ahcun an hlonh hna. Cucaah Gehenna timi nih zungzal rawhnak kha tlak ngaiin a langhter. Jehovah cu biaceihtu ngan bik a si nain, Jesuh kha a nungmi he a thimi he biaceihnak nawl a pek. (Lamkaltu 10:42) Miṭhalo le an ziaza remh a duh lomi an si tiah bia a ceihmi hna cu a thawhter hna lai lo.

VANCUNG THAWHṬHANNAK

21 Thawhṭhannak phun dang a simi thlarau pum in vancung ah thawhṭhannak kong zong Baibal nih a chim. Baibal chung ṭialmi ah cu bantuk phun in a thoṭhanmi tahchunhnak pakhat cu Jesuh Khrih lawng a si.

22 Jesuh cu minung pakhat in thah a si hnuah, Jehovah nih mah zumhawktlak a Fapa kha thlan ah um zungzal awk nawl a pe lo. (Salm 16:10; Lamkaltu 13:34, 35) Pathian nih Jesuh kha a rak thawhter nain, minung pum cun a si lo. Lamkaltu Piter nih Khrih cu “pum cun thihnak a huat, sihmanhsehlaw thlarau cun a nung” tiah a rak fianter. (1 Piter 3:18) Cucu thil khuaruahhar taktak a si. Jesuh cu a ṭhawngmi thlarau pakhat in a thoṭhan cang. (1 Korin 15:3-6) Cu bantuk a sunglawimi thawhṭhannak phun a hmumi lakah Jesuh hi hmasa bik a si. (Johan 3:13) Sihmanhsehlaw hmanung bik cu a si lo.

23 Jesuh nih a rauh hlan ah van ah ka kai cang lai ti kha a hngalh caah zumhawktlak a zultu pawl kha nan ca i “hmun va timh” awkah van ah ka kal lai tiah a ti hna. (Johan 14:2) Van i a kai hngami pawl kha Jesuh nih “turun hmete” tiah a auh hna. (Luka 12:32) Cu zumhawktlak Khrihfa bu hmete cu pa zeizat dah an si? Biathlam 14:1 ah lamkaltu Johan nih “khua ka hun zoh i Zion Tlang i Tufa a dir ko kha ka hmuh; a sinah cun mi thong za khat le thong sawm li le thong li an um i cu hna cu an cal i amah min le a Pa min khenhmi kha an si” tiah a ti.

24 Zumhawk a tlakmi Jesuh lamkaltu pawl tel in Khrihfa 144,000 hna cu vancung nunnak hmu dingin an thoṭhan lai. Zei tikah dah an thawh lai? Lamkaltu Paul nih Khrih a phak caan chungah a si lai tiah a rak ṭial. (1 Korin 15:23, NW) Ṭhen 9 nak ah na cawn lai bantukin, kannih cu cu caan ah kan nung cang. Cu a si caah 144,000 chung in a taangmi mi tlawmte hna cu atu an thih le cangka in vancung i nun awkah an thoṭhan colh. (1 Korin 15:51-55) Asinain, a tam deuh tu cu vawlei cung Paradis i nun awkah hmailei ah an tho te lai.

25 Jehovah nih kan ral thihnak kha a tei taktak lai i zungzal ca in a hrawh lai! (Isaiah 25:8) Asinain ‘van ah a thoṭhanmi hna cu zeidah an tuah lai’ tiah na ti ko lai. Annih cu vancung i a ṭha bikmi Pennak cozah bu chungmi an si lai. Cu cozah kong cu a changtu ṭhen ah tam deuh in kan cawn lai.

BAIBAL CAWNPIAKMI

  • Baibal chung thawhṭhannak bia nih a fiangmi ruahchannak a kan pek.—Johan 11:39-44.
  • Jehovah nih mithi kha nunter ṭhan a duh hna.—Job 14:13-15.
  • Thlan chung i a ummi vialte cu an tho ṭhan lai.—Johan 5:28, 29.

*  A dang thawhṭhannak kong kha 1 Siangpahrang 17:17-24; 2 Siangpahrang 4:32-37; 13:20, 21; Matthai 28:5-7; Luka 7:11-17; 8:40-56; Lamkaltu 9:36-42; le 20:7-12 ah hmuh a si.

#  Biaceihnak Ni kong le zei zoh in dah biaceih an si lai timi kong hngalh chapnak caah zaangfahnak in Thlaihhlei kha zoh.


Biahalnak Hna

1-3. Kan zapi in zei ral nih dah a kan dawi i, Baibal cawnpiaknak cu zeiruangah hnemtu ngai a si?

4. (a) Jesuh nunning nih mithi kong he aa tlaiin Jehovah intuar mi kha zei ruangah a kan hngalhter? (b) Jesuh nih a hleikhunmi zei i hawikomhnak dah a rak ngeih?

5, 6. (a) Jesuh cu a ngaih a chiami Lazaruh chungkhar le a hawile he an um lioah zeitindah a um? (b) Zeicah Jesuh a ngaih a chiatmi hi thazang petu a si?

7, 8. Lazaruh sining kha minung hmuh ningin zoh ahcun ruahchannak um dawh a lo lo nain, Jesuh nih zeidah a rak tuah?

9, 10. (a) Jesuh nih Lazaruh a thawhter lio i a ṭhawnnak Hrampi he aa tlaiin zeitindah a chim? (b) Baibal chung i thawhṭhannak kong relnak ṭhathnemnak cheukhat cu zeidah an si?

11. Phungchimtu 9:5 ah ṭialmi biatak kha Lazaruh thawhṭhannak kong nih zeitindah a fehter?

12. Lazaruh thawhṭhannak kha a taktak a si tiah zeicah kan zumh khawh?

13. Jehovah nih mithi a thawhter khawh taktak ti zumh awk zei a kong dah a um?

14, 15. Job nih a chim bantukin Jehovah nih mithi thawhter a duh ti kha zei nih dah a langhter?

16. Zei bantuk thil sining ah dah mithi cu an thawh ṭhan lai?

17. Thawhṭhannak cu zei tluk in dah a kauh?

18. A thoṭhan ding “miṭha” mi ah ahote dah aa tel i, cu ruahchannak nih nang tah zeitindah an ṭhathnem?

19. “Miṭhalo” cu ahote dah an si i, Jehovah nih zaangfahnak ngeiin zei caanṭha dah a pek hna lai?

20. Gehenna cu zeidah a si i, cuka ah cun ahote dah a kal?

21, 22. (a) Zei bantuk thawhṭhannak phun dang dah a um? (b) Thlarau in hmasa bik ah a thoṭhanmi cu ahodah a si?

23, 24. Jesuh i “turun hmete” kha ahote in dah dirh a si i, pa zeizat dah aa tel?

25. A changtu ṭhen ah zei kong dah kan cawn lai?