A ummi cazin ah kal

A ummi cazin ah kal

ṬHEN LI

Jesuh Khrih Cu Ahodah A Si?

Jesuh Khrih Cu Ahodah A Si?

Jesuh i a biapimi umhmun cu zeidah a si?

Khoika in dah a rat?

Zei bantuk minung dah a si?

Vawlei ah a min a thangmi tampi an um. A cheu cu an khua asiloah an ram ah mi nih ṭha tein theihmi an si. Cheukhat bel cu vawlei pumpi theih an si. Asinain minthangmi pakhatkhat a min na hngalh men in a kong ṭha tein na hngalh tinak a si lo. Cun a hnulei sining le zeibantuk minung a si taktak kha a dikthliar in na hngalh tinak a si fawn lo.

2 Jesuh Khrih cu vawlei cungah a luancia kum 2,000 hrawngah a rak nungmi a si ko nain, vawlei pumpuluk nih a kong zeimaw tal cu an theih. Asinain, Jesuh ahodah a si taktak timi kongah mi tampi cu an lung aa tuai. Cheukhat nih miṭha pakhat men a si an ti. A cheu nih profet a si an ti. Jesuh cu Pathian a si i biak awk a si tiah a zummi hmanh an um. Biak awk a si taktak maw?

3 Na caah Jesuh kong biatak hngalh hi a biapi. Zeicah? Baibal nih “Pathian taktak a simi nangmah hngalh le nangmah nih na thlahmi Jesuh Khrih hngalh hi zungzal nunnak cu a si” tiah a ti caah a si. (Johan 17:3) A si, Jehovah Pathian le Jesuh Khrih kong biatak hngalh cu vawlei cung paradis ah zungzal nunnak hmuhtertu a si. (Johan 14:6) Cupinah, zeitin nun ding, midang he zeitin i pehtlaih ding timi ah Jesuh nih zohchunh awk ṭha bik a kan chiahpiak fawn. (Johan 13:34, 35) Hi cauk i ṭhenkhatnak ah Pathian kong biatak kan rak i ruah cang. Atu ah Baibal nih Jesuh Khrih kong zeidah a kan cawnpiak taktak ti kha i ruah u sih.

BIAKAMMI MESSIAH

4 Jesuh a chuah hlan piin, Pathian thlahmi Messiah asiloah Khrih a ra lai tiah Baibal nih a rak chimchung. “Messiah” (Hebru biafang) le “Khrih” (Grik biafang) timi upatnak min pahnih hi “Chiti Thuhmi” timi sullam a ngei. Chim duhmi cu Pathian nih mah biakammi Pa kha a hleikhunmi rian pek awkah chiti a thuh lai tinak a si. Hi cauk i a hnu ṭhen dangdang ah Pathian biakammi tlinnak i a biapimi Messiah rian kong kha kan cawn chap te lai. Cun Jesuh nih atu hmanh in a kan pek khawhmi laksawng kong zong kan cawng lai. Asinain mi tampi nih Jesuh a chuah hlanpi in ‘ahodah Messiah a si hnga?’ tiah an rak ti len.

5 A.D. kumzabu pakhatnak i Nazareth khua mi Jesuh zultu pawl nih Jesuh kha chimchungmi Messiah a si hrimhrim tiah an rak zumh. (Johan 1:41) Zumtu lak i pakhat a simi Simon Piter nih Jesuh kha “Messiah kha na si” tiah fiang tein a rak ti. (Matthai 16:16) Mah zultu pawl le kannih nih Jesuh hi biakammi Messiah a si taktak tiah zeitindah kan zumh khawh?

6 Jesuh hlan i a nungmi Pathian profet pawl nih Messiah kong kha a neknok tiang in an rak chimchung. Mah nih khan Messiah kha thleidan khawh awkah mi kha a bawmh hna lai. Hiti hin tahchunh khawh a si: Na hmuh bal lomi mi pakhat kha mi an tamnak mawṭaw dinhnak asiloah tlanglawng asiloah vanlawng dinhnak ah va don awk an in fial hei ti u sih. Mi pakhatkhat nih a kong tlawmpal an chimh tikah bawmtu a si a si lo maw? Cu bantuk te cun, Jehovah nih Baibal ah profet hna hmangin Messiah nih zeidah a tuah lai i zeidah a hmuhton lai timi kong kha tampi a chim. Cu chimchung bia tampi a tlinmi nih Messiah kha fiang tein thleidan khawh awkah zumhawktlak a simi hna kha a bawmh hna lai.

7 Hi tahchunhnak pahnih hi ruat hmanh. Pakhatnak ah, Biakammi cu Judah ram khua hmete a simi Bethlehem ah a chuak lai tiah profet Mikah nih kum 700 leng in a rak chimchung. (Mikah 5:2) Jesuh cu khoika ah dah a chuah taktak? Mah khua hmete ahkhan a chuak! (Matthai 2:1, 3-9) Pahnihnak ah, kum zabu tampi a hlankan in Denial 9:25 ah ṭialmi chimchungbia nih Messiah chuah caan A.D. 29* kong kha a chim. Cu le a dang chimchungbia pawl tlinnak nih Jesuh cu biakammi Messiah a si kha a langhter.

Jesuh tipil a ing

Jesuh cu tipil a in tikah, Messiah asiloah Khrih a hung si

8 A.D. 29 a dongh laite ah Jesuh Messiah a si a langhtermi thil dang a hung chuak. Cu kum cu Jordan Tiva ah Tipil petu Johan sin i tipil in awk i a rak kal kum kha a si. Jehovah nih Johan kha Messiah thleidan khawh awkah hmelchunhnak kan pek lai a rak ti. Mah kha Jesuh tipil a in tikah Johan nih a rak hmuh. Zeidah a cang ti kha Baibal nih hitin a chim: “Tipil a in dih cangka cun Jesuh cu ti chung cun a chuak. Van kha aa hung i Pathian Thlarau cu ṭhuro bantukin a rung zuan i a cung i aa fut kha a hmuh. Cun vancung in aw pakhat a rung thang i, ‘Amah hi ka dawtmi ka Fapa, a si, Amah cungah hin ka lung a tling,’ tiah a ti.” (Matthai 3:16, 17) Johan nih kha thil a hmuh le a theih tikah Jesuh cu Pathian thimmi a si kha a zumh. (Johan 1:32-34) Pathian thlarau asiloah rianṭuan ṭhawnnak toih a si ni, mah ni bak khan Jesuh cu Hruaitu le Siangpahrang in thimmi, Messiah asiloah Khrih a rak si.—Isaiah 55:4.

9 Baibal chimchungbia tlinnak le Jehovah Pathian thengte chimmi bia nih Jesuh cu biakammi Messiah a si ti kha fiangte in a langhter. Sihmanhsehlaw Jesuh Khrih kong he aa tlaimi khoika in dah a rat, zeibantuk minung dah a si? timi a biapimi biahalnak pahnih a phi hi Baibal nih a kan chimh.

JESUH KHOIKA IN DAH A RAT?

10 Vawlei a rat hlan ah Jesuh cu van ah a rak um tiah Baibal nih a ti. Mikah nih Messiah cu Bethlehem ah a chuak lai, “Amah a hram cu kan hnuleipi caan” khan aa thawk tiah a rak chimchung. (Mikah 5:2) Amah Jesuh theng zong nih minung in hrin ka si hlanah van ah ka rak um tiah voi tampi a chim. (Johan 3:13; 6:38, 62; 17:4, 5) Van ah thlarau minung pakhat in Jesuh cu Jehovah he pehtlaihnak ṭha a rak ngei.

11 Jesuh cu Jehovah sunsak bikmi Fapa a si i cutin a sinak a ruang a um.# Pathian nih hmasa bik ah a ser caah “Pathian fater” tiah ti a si. (Kolose 1:15) Aa phun dangmi a siternak a ruang dang zong a um. Amah cu “Pathian Fapa ngeihchunte” a si. (Johan 3:16) A sullam cu Jesuh lawng Pathian nih dairek in a ser tinak a si. Cun Pathian nih zeizong vialte a ser lioah Jesuh lawng a rak hman fawn. (Kolose 1:16) Cun, Jesuh cu “Bia” ti zong in auh a si. (Johan 1:14) Mah nih Pathian bia chimtu a si kha a kan chimh, Pathian fale dang a simi thlarau le minung hna sinah thawngpang le lamhruainak chimtu a si lai ti cu a fiang ko.

12 Mi cheukhat nih an zumh bantukin, Fater le Pathian hi an i tluk maw? Cucu Baibal cawnpiakmi a si lo. Hmasa catlangbu i kan hmuh bantukin Fapa cu sermi a si. Curuangah, a fiang komi cu anih cu hram thawknak a ngei nain, Jehovah Pathian tu cu hram thawknak zong donghnak zong a ngei lo. (Salm 90:2) Fapa ngeih chunte zong nih a Pa tluk ding kha aa zuam bal lo. Pa cu Fapa nakin a ngan deuh tiah Baibal nih fiang tein a kan cawnpiak. (Johan 14:28; 1 Korin 11:3) Jehovah lawnglawng “Lian Ngan Bik Pathian” a si. (Genesis 17:1) Cu a si caah, anih cu tluktu a ngei lo.%

13 Jehovah le a Fater cu van arfi hna le vawlei ser an si hlan in, kum nuai tampi chung an rak i kom. Zeitluk in dah pakhat le pakhat an hei i dawt lai! (Johan 3:35; 14:31) Cu Fapa dawt cu a Pa he an i lo. Cu ruangah Fapa cu “hmuh khawh lomi Pathian mui” a si tiah Baibal nih a rak ti nak kha a si. (Kolose 1:15) A si, minung a simi Fapa pakhat nih lam tampi in a pa a lawh tuk khawh bantukin, vancung Fapa nih a Pa sining le ziaza hna kha a langhter ve.

14 Jehovah Fapa ngeihchunte nih vancung kha a kal tak i minung pakhat in nun awkah vawlei ah a rung ṭum. Sihmanhsehlaw ‘thlarau a simi cu, minung pakhat in zeitindah a chuah khawh lai?’ tiah na ruah khawh men. Khakha tlamtlinter awkah Jehovah nih thil khuaruahhar a rak tuah. Vancung i a Fater nunnak kha Judah ngaknu thiang Mari nauinn chungah a ṭhial. Minung pa pakhat telnak um loin, Mari nih a tlingmi fapa kha a hrin i Jesuh tiah min an sak.—Luka 1:30-35.

JESUH CU ZEI BANTUK MINUNG DAH A SI?

15 Jesuh vawlei cung a nun lio i a chimmi le a tuahmi nih a kong kha ṭha tein a kan hngalhter. Cuhleiah, Jesuh thawngin Jehovah kha ṭha deuh in kan hun hngalh. Zeiruangah? Fapa nih a Pa mui tlingte in a langhter ti kha philhhlah. Curuangah Jesuh nih “keimah a ka hmutu paoh nih cun ka Pa kha an hmuh” tiah a zultu kha a rak ti hna. (Johan 14:9) Thawngṭha cauk—Matthai, Marka, Luka le Johan—tiah theihmi Baibal cauk uk li nih Jesuh Khrih a nuncan, a tuahsernak le a ziaza kong kha tampi a kan chimh.

16 Jesuh cu “Cawnpiaktu saya” in zapi hngalh a si. (Johan 1:38; 13:13) Mi kha zeidah a cawnpiak hna? Biapi bik in a cawnpiakmi hna cu, “pennak thawngṭha bia” a si, cucu vawlei cung dihlak a uk i nawlngaimi minung caah a dong lomi thluachuah a pe hngami vancung cozah timi Pathian Pennak a si. (Matthai 4:23) Cu thawngṭha cu aho sinin dah a rat? Jesuh theng nih “ka cawnpiakmi hna hi keimah cawnpiakmi a si lo, a ka thlahtu ka Pa sinin a rami cawnpiaknak a si,” tiah a rak ti, cucu Jehovah sinin a ra tinak a si. (Johan 7:16) Ka Pa nih Pennak thawng ṭha minung theihter a duh hna ti kha Jesuh nih a hngalh. Ṭhen 8 ah Pathian Pennak le cu pennak nih zeidah a tlinter lai timi kong tamdeuh in kan cawn te lai.

Jesuh nih a zultu a cawnpiak hna

Hmunkip i a hmuhmi hna kha Jesuh nih phung a chimh hna

17 Jesuh nih khoika ah dah a cawnpiak hna? Mi a hmuh hna nak hmun kip—khuate, khuapi, market le inn—ah a si. Mi a sin rat lai kha Jesuh nih aa ruahchan bal lo. Mi sin tu ah a va kal. (Marka 6:56; Luka 19:5, 6) Zeicahdah Jesuh cu phungchimnak le cawnpiaknak caah teimak chuah in cu tluk tam in a caan a rak hman? Mahkha Pathian nih tuah seh ti a duhmi a si caah a si. Jesuh cu a Pa duhnak a tuah zungzal. (Johan 8:28, 29) Phung a chimnak a ruang dang zong a um rih. Amah ton ah a rami mibu cungah zaangfahnak a ngeih ca zongah a si. (Matthai 9:35, 36) Pathian le aa tinhmi biatak kong a cawnpiaktu hna ding biaknak lamhruaitu pawl nih mibu kha an daithlanh hna. Pennak kong zei tluk tam in theih an herh kha Jesuh nih a hngalh.

18 Jesuh cu dawtnak le zaangfahnak a ngeimi a si. Cucaah mi nih naih a fawimi le mi zaangfah thiam in an hmuh. Ngakchia hmanh a sin an um ah an hna a ngam. (Marka 10:13-16) Jesuh cu duhdanh a ngei lo. Rawhralnak le dinlonak kha a huat. (Matthai 21:12, 13) Nu pawl upatnak le tinvo an rak ngeih setsai lo caan ah upatnak in a rak chawnhbiak hna. (Johan 4:9, 27) Jesuh cu aa toidor taktakmi a si. Voikhat cu a zultu pawl ke kha a rak ṭawl, cucu sal phunniam tuah tawnmi rian a si.

1. Jesuh cu phung a chim; 2. Jesuh nih mizaw a damter hna

19 Jesuh cu midang herhmi a hmu thiam ngaimi a si. Mahkha Pathian thlarau ṭhawnnak thawngin thil khuaruahhar a tuah i mi a damter hna lioah a lang khun. (Matthai 14:14) Tahchunhnak ah a sinah mi thinghmuimi pakhat a ra i “na duh ahcun na ka thianter khawh ko” tiah Jesuh kha a ti. Cu pa intuarmi harnak ruangah Jesuh cu a lung a ṭha lo. A zaangfah ngaingai caah a hei banh i a tongh i “nangmah thianter kha ka duh, va thiang cang,” tiah a ti. Mi zawpa cu a dam! (Marka 1:40-42) Cu pa cu zeitindah a um lai ti khi na ruat kho maw?

A DONGH TIANG ZUMHAWKTLAKMI A SI

20 Pathian nawl ngaihnak ah Jesuh nih zohchunhawk ṭha bik a chiah taak. Zei bantuk thil sining lak i ralchannak le harnak a ton hmanh ah vancung a Pa sinah zumhawktlak a si peng. Satan tukforhnak kha fek tein a doh i hlawhtling ngaiin a tei. (Matthai 4:1-11) Voikhat cu a rualchan cheukhat nih an zumh lo caah, “a hrut cang” ti tiangin an ti. (Marka 3:21) Sihmanhsehlaw Jesuh nih aa teiter hna lo i Pathian rian kha ṭha tein a ṭuan peng. Serhsatnak bia he ningcang lo in tuahto a si tik hmanh ah, sumnak a ngei peng i a ralchanhtu hna kha harnak pek aa zuam lo.—1 Piter 2:21-23.

21 A ral pawl nih puarhrang ngai in an tuahto i fak ngai in a thih tiang Jesuh cu zumhawktlak a si peng. (Filipi 2:8) Minung pakhat in a thih ni i a intuarmi kha ruathmanh. An tlaih, a hmaan loin sual an puh, ziknawh eimi biaceihtu nih sual an phawt, mibu nih an nihsawh, ralkap nih an hrem. Tung ah an khenh chih i a thaw a dih lai ah “aa liim cang” tiah a rak au. (Johan 19:30) Asinain, a thih hnu nithumnak ni ah, vancung a Pa nih thlarau nunnak in a thawhter ṭhan. (1 Piter 3:18) Cun zarh tlawmpal a rauh hnuah, van ah a rak kai ṭhan. “Pathian orhlei kam ah khan a ṭhu” i nawlngeimi siangpahrang si lai kha a hngak.—Hebru 10:12, 13.

22 Jesuh nih a thih tiang zumhawktlak a sinak thawngin zeidah a rak liim? Jesuh thihnak nih Jehovah i a hram thawk tinhnak a simi vawlei cung paradis i zungzal nunnak lam kha a kan hunpiak. Jesuh thihnak nih mah kha zeitindah a tuah khawh ti kha a changtu ṭhen ah kan i ruah lai.

BAIBAL CAWNPIAKMI

  • Chimchungbia tlinnak le Pathian theng chimmi bia nih Jesuh cu Messiah asiloah Khrih a si ti kha a langhter.—Matthai 16:16.
  • Jesuh cu vawlei i a rat hlanah van ah thlarau minung in saupi a rak um.—Johan 3:13.
  • Jesuh cu cawnpiaktu saya a si, dawtnak le zaangfahnak a ngeimi zong a si, cun Pathian nawl ngaihnak ah a tlingmi zohchunhawk ṭha zong a si.—Matthai 9:35, 36.

*  Jesuh he aa tlaiin Daniel chimchungbia tlinnak fianternak kha Thlaihhlei ah zoh.

#  Jehovah cu Sertu a si caah Pa tiah ti a si. (Isaiah 64:8) Jesuh cu Pathian nih a ser caah Pathian Fapa tiah ti a si. Cu ruangah, a dang thlarau hna le minung Adam hmanh kha Pathian fapa tiah ti an si ve.—Job 1:6; Luka 3:38.

%  Thlaihhlei ah Fater le Pathian an i tluk lo langhter chapmi kha zoh.


Biahalnak Hna

1, 2. (a) Minthangmi pakhatkhat na hngalh tikah zeicah a kong ṭha tein na hngalh tinak a si lo? (b) Jesuh he aa tlaiin zei lungtuainak dah a um?

3. Na caah Jesuh kong biatak hngalh cu zeicah a biapit?

4. “Messiah” le “Khrih” timi upatnak min sullam hi zeidah a si?

5. A zultu pawl nih Jesuh kong he aa pehtlaiin zeidah fiang tein an zumh?

6. Messiah thleidan khawh awkah Jehovah nih zumhawktlak a simi hna a bawmh hna ning kha tahchunhnak in fianter.

7. Jesuh he aa tlaiin zei chimchungbia pahnih dah a rak tling?

8, 9. Jesuh tipil a in lioah Messiah a si kha zeinihdah a langhter?

10. Vawlei a rat hlan i Jesuh umnak he aa tlaiin Baibal nih zeidah a kan cawnpiak?

11. Jesuh cu Jehovah sunsak bikmi Fapa a si ti kha Baibal nih zeitindah a langhter?

12. Fapa ngeihchunte le Pathian an i tluk lo ti kha zeitindah kan hngalh?

13. Baibal nih Fapa kha “hmuh khawh lomi Pathian mui” tiah a ti tikah zeidah a chim duhmi a si?

14. Jehovah Fapa ngeihchunte cu minung in zeitindah hrin a si?

15. Jesuh thawngin Jehovah kong ṭha deuh in kan hngalh khawh tiah zeicah kan chim khawh?

16. Jesuh nih mi kha biapi bik in zeidah a cawnpiak hna i, a cawnpiaknak cu khoika in a rami bia dah a si?

17. Jesuh nih mi kha khoika ah dah a cawnpiak hna i, zeicah cu tluk i zuam in mi cu a cawnpiak hna?

18. Jesuh i zei a ziaza nih dah na lung an hmuih bik?

19. Jesuh cu midang herhmi a hmu thiam ngaimi a si kha zei tahchunhnak nih dah a langhter?

20, 21. Jesuh nih zumhfek tein Pathian nawl a rak ngaihmi zohchunh awk ṭha kha zeitindah a chiah taak?

22. Jesuh nih a thih tiang zumhawktlak a sinak thawngin zeidah a rak liim?