A ummi cazin ah kal

A ummi cazin ah kal

Hihi Pathian Tinhmi A Si Maw?

Hihi Pathian Tinhmi A Si Maw?

Tadinca kan rel ah siseh, TV kan zoh le radio kan ngaih ah siseh, mangṭam, raltuknak le hrocernak kong tampi a um! Nangmah na intuarmi theng zong kha ruat hmanh. Zawtnak asilole dawtmi pakhat thihnak nih lungrethei in an umter ko lai. ‘Harnak nih a ka tuam’ tiah a timi miṭhapa Job bantuk na si kho ve.​​—​Job 10:​15.

Hitin i hal:

  • Hihi keimah le midang caah Pathian tinhmi a si maw?
  • Ka harnak tei awkah khoika ah dah bawmhnak ka hmuh khawh lai?
  • Vawlei ah daihnak a um lai tiin ruahchan awk zeital a um maw?

Baibal nih mah biahalnak hna kha lungtling lakin a kan leh.

PATHIAN NIH VAWLEI AH HI BANTUK THLENNAK HI A TUAH LAI TIAH BAIBAL NIH A KAN CAWNPIAK.

Tarpa a no ṭhan

“An mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo.”​​—​Biathlam 21:​4


A ke a ṭhalomi ngakchianu a tli kho ṭhan

“Kebei cu an pet an lam lai i a holh kho lomi kha lunglawmhnak in a au in an au lai.” ​​—​Isaiah 35:​6


A mit a cawmipa khua a hmu ṭhan

“Mitcaw nih khua an hmuh lai.” ​​—​Isaiah 35:5


A dawtmi thihnak in a thawh ṭhan lai caah aa lawmmi nu

“Thlan chung i a ummi mithi vialte…an tho lai.” ​—​Johan 5:​28, 29


A zawmi ngakchiapa a dam ṭhan

“Ram chung i a ummi cu ka zaw tiah an zai ti lai lo.” ​​—​Isaiah 33:​24


Facang lo

“Ram chungah rawl tampi in um ko seh.” ​​—​Salm 72:​16


BAIBAL CAWNPIAKMI IN ṬHATNAK I LAK

Mipa pahnih Baibal an cawng

Mah kha lung duh saduhthah men a si tiah ruat in hlaw colh hlah. Mah kha ka tlinter lai tiah Pathian nih bia aa kam i, zeitindah a tlinter lai kha Baibal nih a fianter.

Sihmanhsehlaw Baibal nih mah nak tamdeuh in a fianter. Atu ah lung a tlingmi nunnak an ngeihter khomi a biapimi tawhfung kong zong a chim. Na lungre­theih­nak le na harnak kong chikkhat in ruat ta hmanh. Cu chungah tangka kong, chungkhar buainak, damlonak, dawtmi thihnak kong aa tel men lai. Baibal nih nihin na tonmi harnak kha tonghtham awkah an bawmh khawh i, a tang lei i biahalnak a phi in na hna an ngamter khawh:

  • Zeicah sifah harnak kan ton?
  • Khuasaknak kong lungretheihnak kha zeitindah tei khawh a si?
  • Kan innchungkhar hi zeitindah kan nuamhter khawh deuh lai?
  • Kan thih tikah zeiahdah kan can?
  • Dawtmi a thimi hna he kan i tong ṭhan lai maw?
  • Pathian nih hmailei tuah ding aa tinhmi a tlinter hrimhrim lai tiah zeitindah kan zumh khawh?

Hi cauk na relmi nih Baibal cawnpiakmi hngalh na duh kha a langhter. Hi cauk nih hin an bawmh lai. Catlangbu he aa tlaimi biahalnak pawl kha cahmai a tanglei ah a um kha zoh. Minung nuai tampi cu Jehovah Hngaltu hna he Baibal an i ruah tikah biahalnak le phitnak tuah kha an duh. Nang zong na duh ve lai tiah ruahnak kan ngei. Atu ah Baibal cawnpiakmi taktak cu zeidah a si timi na cawn i lawmhnak le lungtlinnak na hmuh bantukin Pathian nih thluachuah in pe ko seh!

BAIBAL KONG HNGALH KHAWH I ZUAM

Baibal cauk

Baibal cu cauk fatete uk 66 in komhmi a si. Fawi tein sawh khawh awkah a ngan, a hme tiin ṭhen a si. Hi cauk ah Baibal cang cherhchan a si tikah min hnu lei i hmasa bik nambar cu a ngan a si i, a changtu nambar cu a hme a si. Tahchunhnak ah, “2 Timote 3:​16” cherhchan tikah kuat hnih Timote a ngan 3, a hme 16 ti duhnak a si.

Hi cauk i cherhchanmi Baibal cacang na zohnak thawngin Baibal kha khulrang in na hun hngalh lai. Cun nifa Baibal relnak program zong ngeih i zuam. Nikhat ah Baibal a ngan 3 in 5 tiang na rel ahcun, kum khat ah a uk ningin na rel khawh dih lai.