A ummi cazin ah kal

A ummi cazin ah kal

THLAIHHLEI

Bawipa Zanriah—Pathian Thang A Ṭhattermi

Bawipa Zanriah—Pathian Thang A Ṭhattermi

Khrihfa hna cu Khrih thihnak ruahnolhnak tuah awkah fial an si. Cucu “Bawipa zanriah” tiah ti a si. (1 Korin 11:20) Mah kha zeinihdah a biapitter? Zei tik ah le zeitin in dah tuah ding a si?

Mah kha Jesuh Khrih nih A.D. 33, Judah Lanhtak Puai zan ah a rak thawkpi hna. Lanhtak Puai cu Judah Nisan thla ni 14 ah kum khat ah voi khat lawng an rak tuah. Judah mi hna nih ṭhal caan i chun le zan aa canh ni kha rak hngah dawh an si. Cu ni cu chun ah suimilam 12 le zan ah suimilam 12 hrawng a um ni a si. Ṭhal caan chun le zan aa canh ni thlade ka kha Nisan thla hram thawknak tiah an ti. Lanhtak Puai cu Nisan ni 14, nitlak hnu ah an rak tuah.

Jesuh cu a zultu hna he Lanhtak Puai an rak tuah i Judas Iskariot a rak chuahter hnu lawngah Bawipa Zanriah kha a rak tuahpi hna. Bawipa Zanriah nih hin Judah Lanhtak Puai ai kha a rolh caah kum khat ah voikhat lawng tuah awk a si.

Thawngṭha Baibal ṭialtu Matthai nih hitin a ti: “Jesuh nih changreu kha a lak i thla a cam dih in a cheu i a zultu kha a pek hna. ‘I lak u law ei u; hihi ka pum a si,’ tiah a ti. Cun hrai kha a lak i Pathian sinah lawmhnak bia a chim dih in, annih cu a pek hna i, ‘Nan dihlak in ding u. Hihi ka thi a si, biakam fehternak thisen, sual ngaihthiamnak ca i mi tampi ca i thlet mi cu a si.’ ”—Matthai 26:26-28.

Mi a cheu nih cun Jesuh nih changreu le mitsurhang kha a pum le a thi taktak ah a canter tiah an zumh. Asinain changreu a pek hna lioah Jesuh pumsa cu amah ning tein a um ko. A zultu pawl nih Jesuh thi le sa taktak kha an rak ei maw? Ei nemmam hlah, cutin an tuah ahcun minung sa an ei a si lai i Pathian nawlbia an buar a si hnga. (Genesis 9:3, 4; Levitikas 17:10) Luka 22:20 ah Jesuh nih hitin a ti: “Hi hrai hi nan caah ka thletmi ka thi in khenhchihmi Pathian biakamnak [“biakam thar,” NW] a si.” Cu hrai cu a biafang ning taktak in “biakam thar” a rak si maw? Cutin a si kho lo, biakamnak timi cu hnatlaknak pakhat a si caah kut in tongh khawh a si lo.

changreu le mitsurhang

Cucaah changreu le mitsurhang cu hmelchunhnak men an si. Changreu nih a tlingmi Khrih pum kha a langhter. Lanhtak Puai i a taangmi changreu pakhat kha Jesuh nih a rak hman. Cu changreu cu thilnu telh loin sermi a si. (Exodus 12:8) Baibal nih thilnu kha sualnak asiloah rawhralnak langhternak caah a hman. Cu a si caah changreu nih Jesuh pekmi a tlingmi pum kha a langhter. Sualnak a ngei lomi pum a si.—Matthai 16:11, 12; 1 Korin 5:6, 7; 1 Piter 2:22; 1 Johan 2:1, 2.

Mitsurhang sen nih Jesuh thi kha a langhter. Cu thi nih cun biakam thar kha a fehter. Jesuh nih “sual ngaihthiamnak ca” ah ka thi kha ka thlet tiah a rak ti. Cuticun minung cu Pathian mit ah an hung thiang kho i Jesuh he sermi biakam thar chungah an hung lut kho. (Hebru 9:14; 10:16, 17) Hi biakamnak asiloah hnatlaknak nih hin zumhawktlakmi Khrihfa 144,000 kha vancung kainak nawl a pek hna. Cuka ah annih cu mi vialte thluachuah hmuhnak caah siangpahrang le tlangbawi in rian an ṭuan lai.—Genesis 22:18; Jeremiah 31:31-33; 1 Piter 2:9; Biathlam 5:9, 10; 14:1-3.

Ahote dah Ruahnolhnak i hmelchunhnak a hmang ding an si? Nawlbia thar ah aa telmi—vancung ruahchannak a ngeimi—lawng mitsurhang le changreu a hmang ding an si. Vancung siangpahrang si dingah thim an si kha Pathian thiangthlarau nih a langhter lai. (Rom 8:16) Annih cu Jesuh he Pennak biakamnak chung ah aa telmi zong an si.—Luka 22:29.

Vawlei cungah zungzal nun aa timmi hna tah zeitindah? Jesuh nawlbia kha an ngaih i Bawipa Zanriah hmannak pumhnak ah an i tel ve, sihmanhsehlaw a hmang cu an hmang lo, upat tein a zohtu ah an i tel. Kumkhat ah voikhat Nisan 14 nitlak hnu ah Jehovah Hngaltu hna cu Bawipa Zanriah hmannak ah an i pum. Vawlei cung dihlak ah mi thong tlawmte lawng nih vancung ruahchannak an ngei nain, Khrihfa vialte caah cu zanriah hmannak cu a biapi. Cucu Jehovah Pathian le Jesuh Khrih dawtnak cung i lawmhnak langhter khawhnak caan a si.—Johan 3:16.

← A sawhmi ṭhen kha zoh