A ummi cazin ah kal

A ummi cazin ah kal

THLAIHHLEI

1914—Baibal Chimchungbia Ah A Biapimi Kum

1914—Baibal Chimchungbia Ah A Biapimi Kum

Kum sawmli hlan deuh khan Baibal siangngakchia hna nih 1914 kum ah a biapimi thil a um lai tiah an rak chimchung. Cu thil cu zeidah an si? Zei nih dah 1914 kum cu a biapimi kum a siter?

Luka 21:24 ah ṭial a rak si bangin Jesuh nih hitin a rak chim: “Ramdang mi nih Jerusalem khua cu an naan lai i an caan a dih hlan tiang an ke tangah a um lai.” Jerusalem khua cu Judah miphun khualipi, siangpahrang David tefa hna uknak khua a si. (Salm 48:1, 2) Asinain cu siangpahrang hna cu ramdang siangpahrang hna he an i thlei dang. Annih cu Jehovah a aiawhtu in “BAWIPA siangpahrang ṭhutdan” cungah a ṭhumi an si. (1 Chanrelnak 29:23) Cucaah Jerusalem cu Jehovah uknak hmelchunhnak a si.

Zei tikah le zei tin in dah Pathian uknak cu ‘ramdang mi nih an naan’? Babilon miphun nih Jerusalem an rak tei kum B.C. 607 ah a si. “BAWIPA siangpahrang ṭhutdan” cu a rak lawng i David tefa hna siangpahrang an rak ṭuannak cu a rak cat. (2 Siangpahrang 25:1-26) Cuticun ‘an naang’ zungzal lai maw? Naang zungzal hlah, zeicahtiah profet Ezekiel nih hmanung bik Jerusalem siangpahrang Zedekiah kong he aa tlaiin hitin a rak chimchungmi a um: “Na sumthawng kha i phoih, na bawiluchin kha chia.…rawhralnak kha, siangpahrang a si ding taktak a rat hlan tiang, ka tlunter lai. Cun amah cu zeizong vialte kha ka pek dih lai.” (Ezekiel 21:26, 27) David bawiluchin aa chinhtu “ding taktak” cu Jesuh Khrih kha a si. (Luka 1:32, 33) Cucaah ‘an naannak’ cu Jesuh siangpahrang a si tikah a dong lai.

Cu a biapimi thil cu zei tik ah dah a rak um? Jesuh nih ramdang mi nih cun ri khiahmi caan chung lawng an uk lai tiah a rak langhter. Daniel a ngan 4 chung bia cu mah caan kha zei can dah a rauh lai ti hngalh khawh awk tawhfung a si. Cucu Babilon siangpahrang Nebukhadnezzar manhmi, chimchungbia mang he aa pehtlai. Thingkung nganpi haumi kha a rak hmuh. Cu thing hmui cu thir cikcin le dar cikcin in khimh a si caah a corh kho ti lo. Cuticun vancungmi nih “kum sarih” chung um seh tiah a ti.—Daniel 4:10-16.

Baibal ah, thingkung kha uknak aiawh in hman a si tawn. (Ezekiel 17:22-24; 31:2-5) Cucaah langhternak thingkung haumi nih Jerusalem siangpahrang hna nih a aiawhmi Pathian uknak zeitindah a cah lai kha a langhter. Asinain, ‘Jerusalem khua naan a si lai nak’ cu chikkhat “kum sarih” chung lawng a si lai ti kha langhnak hmuhmi in kan theih. Zei can dah a rauh lai?

Biathlam 12:6, 14 nih kum thum le a cheu cu “ni thong khat le ni za hnih le ni sawm ruk” he aa tluk tiah a langhter. Cu a si caah “kum sarih” cu ni 2,520 a si. Asinain ramdang mi nih Pathian uknak kha Jerusalem an tei hnu ni 2,520 chung lawng ‘an naang’ lo. Cu a si caah cu chimchungbia cu caan sau deuh a si ti cu a fiang ko. Nambar 14:34 le Ezekiel 4:6 ningin “ni khat kha kum khat” in chiah a si ahcun “kum sarih” cu kum 2,520 a si lai.

Kum 2,520 cu Babilon nih Jerusalem a tei i David tefa bawi ṭhutdan a lak kum B.C. 607 October thla ah aa thawk. Cucu 1914 kum October thla ah a rak dong. Cu tikah ‘ramdang mi caan’ cu a rak dong i Jesuh Khrih cu Pathian i vancung siangpahrang ah ser a si cang.—Salm 2:1-6; Daniel 7:13, 14. Vawlei cungah zungzal nun aa timmi hna tah zeitindah? Jesuh nawlbia kha an ngaih i Bawipa Zanriah hmannak pumhnak ah an i tel ve, sihmanhsehlaw a hmang cu an hmang lo, upat tein a zohtu ah an i tel. Kumkhat ah voikhat Nisan 14 nitlak hnu ah Jehovah Hngaltu hna cu Bawipa Zanriah hmannak ah an i pum. Vawlei cung dihlak ah mi thong tlawmte lawng nih vancung ruahchannak an ngei nain, Khrihfa vialte caah cu zanriah hmannak cu a biapi. Cucu Jehovah Pathian le Jesuh Khrih dawtnak cung i lawmhnak langhter khawhnak caan a si.*—Johan 3:16.

Jesuh nih a rak chimchung bantukin vancung siangpahrang in a ‘phanhnak’ kha a lang ngaimi vawlei thil sining hna—raltuknak, mangṭam, lihnin le rai in a langhter. (Matthai 24:3-8; Luka 21:11) Mah thil hna nih khan 1914 kum ah Pathian i vancung Pennak aa thawk taktak ti le hi chan ṭhalo ‘donghnak’ aa thawk cang ti kha fiang tein a langhter.—2 Timote 3:1-5.


*  B.C. 607 October in B.C. 1 October tiang hi kum 606 a si. Zero timi kum a um lo caah B.C. 1 October in A.D. 1914 October tiang hi kum 1,914 a si. Kum 606 le 1,914 fonh ahcun kum 2,520 a si. B.C. 607 i Jerusalem tei a sinak kong hngalhchap awkah Jehovah Hngaltu hna chuahmi Insight on the Scriptures cauk i “Chronology” timi capar timi cauk kha zoh.

“CAAN SARIH”
kum 2,520
kum 606 1/4
B.C. 607 October in B.C.1
December 31 tiang
kum 1,913 3/4
A.D. 1 January 1 in 1914
October tiang
607

“Ramdang mi nih Jerusalem khua cu an naan lai”

Jerusalem cu hrawh a si
←B.C. A.D.→ 1914

‘Siangpahrang a si ding taktak a ra’

Jesuh Khrih cu Siangpahrang a ṭuan

← A sawhmi ṭhen kha zoh