A ummi cazin ah kal

A ummi cazin ah kal

Tuanbia 110: Timote-Paul Bawmtu Thar

Tuanbia 110: Timote-Paul Bawmtu Thar

Lamkaltu Paul he hika i nan hmuhmi tlangvalpa cu Timote a si. Timote cu Listra khua chung ah a innchungkhar mi hna he an um. A nu cu Zunis a si i a pi cu Lois a si.

Hi cu Paul nih Listra khua a tlawn voithumnak a si. Cu hlan kum khat hrawng ah khan Paul le Barnabas cu phung chim awkah hi khua an rak phan hmasa cang. Atu ah Paul cu a hawipa Silas he an rak tlawng ṭhan hna.

Timote le Paul

Paul nih Timote kha zei bia dah a chimh nan hngal maw? ‘Keimah le Silas sin ah na kal duh ve hnga maw? Lam hlapi mi hna sin i phung chim awk ah na kan bawm kho hnga maw?’ tiah a hal.

‘A si, ka kal duh ko lai,’ tiah Timote nih a leh. Cucaah Timote cu a innchungkhar mi kha a kaltak hna i Paul le Silas sin ahcun a rak kal ve. Sihmanhsehlaw an khual tlawnnak kong kan cawn hlan ah Paul cungah zeidah a rak tlung ti kha zoh hmasa hmanh u sih. Damaskas lam cung i a sin ah Jesuh a langhnak in kum 17 hrawng a si cang.

Nan hngal ti maw? Paul cu Damaskas lei ah Jesuh zultu pawl hrem awk ah a rak ra. Sihmanhsehlaw atu cu amah theng cu zultu pakhat a si cang! A hnu ahcun a ral cheukhat nih Jesuh kong a chim kha an duh lo caah amah kha thah awk in khua an khang. Sihmanhsehlaw zultu pawl nih Paul cu a luat nak hnga an bawmh. Bawm pakhat chung ah an sanh i khua kulhnak vanpang cung in lenglei ah an thlak.

Khi hnu ah Paul cu phung chim awkah Antiok ah a kal. Hika ah hin Jesuh zultu pawl cu Krifa an ti hmasa bik hna. Cun Paul le Barnabas cu lam hlapi ram hna ah phung chim awk ah Antiok in hin an thlah ṭhan hna. An va tlawnmi khuapi pakhat cu Timote a umnak khua Listra cu a si.

Cun kumkhat hnu ah Paul cu Listra khua ah a voihnihnak a ra ṭhan. Paul le Silas he Timote cu a kal ve tik ah, khuazei ah an kal ti nan hngal maw? Ram hmanthlak hi zoh u law an tlawnmi hmun cheukhat kong kha zoh hmanh u sih.

Hmasa bik ah a naihte i a ummi khua Ikonium ah an kal, cun a khua hnihnak cu Antiok cu a si. Cuhnu ah Troas ah an kal i, cun Filipi, Thesalonika le Berea ah an kal. Ram hmanthlak chung ah hin Athens khua nan hmu maw? Paul nih cuka ahcun phung a chim ve. Khi hnu ah Korinth khua ah kum khat le a cheu phung an chim. A donghnak ah Efesa khua ah tlawmpal an cam. Cun tilawng in Sisaria khua ah an hung kir i, Paul a umnak Antiok khua tiang kha an tlawng.

Cucaah Timote cu “thawng ṭha bia” chim awk ah le Krifabu tampi dirh awk ah Paul kha a bawmh i meng thong tampi a rak tlawng. Nan upat deuh tik ah, Timote bantuk in zumh awk tlak mi Pathian sal nan si ve lai maw?

Lamkaltu 9:19-30; 11:19-26; A ngan 13 in 17; 18:1-22.

Khuaram hmanthlak

1. Rom; 2. Malta; 3. Berea; 4. Thesalonika; 5. Korinth; 6. Filipi; 7. Athens; 8. Khrit; 9. Troas; 10. Efesa; 11. Melitas; 12. Kolose; 13. Antiok; 14. Ikonium; 15. Listra; 16. Saipras; 17. Antiok; 18. Sisaria; 19. Joppa; 20. Damaskas; 21. Jerusalem; 22. Rilipi (Mediterranean)



Biahalnak hna

  • Hmanthlak chung i tlangvalpa cu ahodah a si, khuazei ah dah a um i a nu le a pi min cu hodah an si?
  • Paul nih amah le Silas he lam hlapi i thawngṭha chim awkah kal na duh maw tiah a hal tikah Timote nih zeitindah a leh?
  • Jesuh zultu pawl kha khuazei ah dah Khrihfa tiah an auh hmasa bik hna?
  • Paul, Silas le Timote Antiok khua in an kal hnuah khuazei khua hna dah an tlawn?
  • Timote nih Paul kha zeitindah a bawmh i nihin mino pawl nih anmah le anmah zei bia dah an i hal awk a si?

Biahalnak dang hna

  • Lamkaltu 9:19-30 rel.

    Lamkaltu Paul nih thawngṭha ruangah ralchanhnak a ton tikah ralrin thiamnak kha zeitindah a langhter? (Lam. 9:22-25, 29, 30; Matt. 10:16)

  • Lamkaltu 11:19-26 rel.

    Lamkaltu 11:19-21 chung ṭialmi bia nih thiang thlarau cu thawngṭha chimnak rian ah lam a kan hruaitu le lam a kan hmuhsaktu a si ti kha zeitindah a langhter?

  • Lamkaltu 13:13-16, 42-52 rel.

    Lamkaltu pawl cu ralchanhnak ruangah an hnabei a dong hlei lo ti kha Lamkaltu 13:51, 52 nih zeitindah a langhter? (Matt. 10:14; Lam. 18:6; 1 Pit. 4:14)

  • Lamkaltu 14:1-6, 19-28 rel.

    “Bawipa kut chungah khan an chiah hna” timi bia nih mithar pawl kan bawmh hna tikah a hleihluat in lungretheihnak ngeihlo awkah zeitindah a kan bawmh? (Lam. 14:21-23; 20:32; Johan 6:44)

  • Lamkaltu 16:1-5 rel.

    Timote nih cuarpartan duhnak a ngeihmi nih ‘thawngṭha ruangah thil vialte’ tuah a biapitnak kha zeitindah a hlei in a langhter? (Lam. 16:3; 1 Kor. 9:23; 1 Thes. 2:8)

  • Lamkaltu 18:1-11, 18-22 rel.

    Jesuh thengte nih phungchim rianṭuannak lam a hruainak he aa tlaiin Lamkaltu 18:9, 10 nih zeidah a langhter i mah nih nihin kannih kha zei zumhnak dah a kan pek? (Matt. 28:20)