A ummi cazin ah kal

A ummi cazin ah kal

Tuanbia 108: Damaskas Lei Kalnak Lam Cung Ah

Tuanbia 108: Damaskas Lei Kalnak Lam Cung Ah

Vawlei i a tlu mipa khi aho a si ti nan hngal maw? Saul a si. Amah cu Steven lung in a chepmi hna an angki a zohkhenhpiak mi hna kha a si ti philh hlah u. Khi ceunak khi zoh hmanh u! Zeidah a cang?

Steven an thah hnu in, Saul nih Jesuh zultu hna kawl in harnak pek awk ah mi kha a hruai hna. Innkhat hnu innkhat ah a kal i a tlaih hna i, thong chung ah khan a thlak dih hna. Zultu tampi cu khua dang ah an zam i an phaknak kip ah khan “thawng ṭha bia” cu an va thanh chin. Sihmanhsehlaw Saul cu khua dang zong ah khan Jesuh zultu pawl kawl awk ah a kal ve. Atu ah amah cu Damaskas lei lam ah a kal. Sihmanhsehlaw lam cung ah hi khuaruahhar thil hi a tlung:

Chikkhatte ah van in ceunak pakhat nih Saul a velchum vialte cu a run ceuh. Cutikah hika i kan hmuh bang hin vawlei ah a tlu. Cun aw pakhat nih: ‘Saul, Saul! Zeicahdah na ka hrem?’ a ti. Saul he a kal ṭimi hna nih ceunak cu an hmuh i aw thawng cu an theih, asinain a chimmi bia cu an hngal kho lo.

A ceumi ruangah Saul a mit a caw

Saul nih: ‘Ahodah na si Bawipa?’ tiah a hal. ‘Na hremmi Jesuh ka si,’ tiah aw nih cun a ti. Jesuh nih zeicahdah hitin a ti ti ahcun Saul nih Jesuh zultu pawl a hrem tik hna ah Jesuh nih amah hrem bantuk in a ruah caah a si.

Cutikah Saul nih: ‘Zeidah ka tuah lai, Bawipa?’ tiah a hal.

‘Tho law Damaskas khua chung ah va lut tuah. Khika ah na tuah awk hnga kha an rak in chimh lai,’ tiah Jesuh nih a ti. Saul cu a tho i a mit a au tik ah zeihmanh a hmu kho lo. A mit a caw ai! Cucaah amah he a kal ṭimi hna nih a kut in an hruai i Damaskas khua chung ah an luhpi.

Cu lio ahcun Jesuh nih Damaskas khua chung i amah zultu pakhat sin ah: ‘Tho tuah, Ananias. Lam ding an timi lam ah khan va kal. Judas a inn ah khan Saul an ti mipa a um maw tiah va hal hna. A bik in ka sal si awk ah keimah nih ka thim cang,’ tiah a ti.

Ananias nih cubang in a tuah. Saul kha a ton tik ah, a cung ah a kut a chuan i: ‘Khua na hmuh ṭhan nak hnga le thiangthlarau in na khah nak hnga Bawipa nih a rak ka thlah cang,’ tiah a ti. Chikkhatte ahkhin nga phukphuhri bantuk a simi thil zeilo khi Saul mit chung cun a tla i, khua cu a hmuh ṭhan khawh.

Saul cu miphun tampi hna sin ah a ṭhawng ngaingaimi phung chimtu ah hman a rak si. Amah cu lamkaltu Paul tiah hngalh a si cang i, amah kong cu tampi kan cawn ṭhan rih te lai. Sihmanhsehlaw hmasa bik ah, Pathian nih Piter cu zei tuah awk ah dah a thlah ti zoh rih u sih.

Lamkaltu 8:1-4; 9:1-20; 22:6-16; 26:8-20.



Biahalnak hna

  • Steven an thah hnuah Saul nih zeidah a tuah?
  • Saul Damaskas lei a kal lio ah zei khuaruahhar thil dah a cang?
  • Jesuh nih Saul kha zei tuah awk dah a chimh?
  • Jesuh nih Ananias kha zei lamhruainak dah a pek i zeitindah Saul cu khua a hmuh ṭhan?
  • Saul cu zei min indah hngalh a hun si i amah cu zeitindah hman a si?

Biahalnak dang hna

  • Lamkaltu 8:1-4 rel.

    Hremnak le tuknak tilet nih dirhka mi Khrihfabu kha a dennak nih Khrihfa zumhnak kha zeitindah a karhter i mah he aa lomi zei thil dah tuchan zongah a hung um? (Lam. 8:4; Isa. 54:17)

  • Lamkaltu 9:1-20 rel.

    Saul kha zei rian pathum pek awk aa timhnak dah Jesuh nih a phuan? (Lam. 9:15; 13:5; 26:1; 27:24; Rom 11:13)

  • Lamkaltu 22:6-16 rel.

    Zeitindah Ananias kan lawh khawh i mah cucu zeiruangah a biapit? (Lam. 22:12; 1 Tim. 3:7; 1 Pit. 1:14-16; 2:12)

  • Lamkaltu 26:8-20 rel.

    Saul Khrihfa biaknak lei a hun i thlennak nih nihin zumlotu innchung hawi a ngeimi hna kha zeitindah thazaang ṭhawnnak a pek hna? (Lam. 26:11; 1 Tim. 1:14-16; 2 Tim. 4:2; 1 Pit. 3:1-3)