A ummi cazin ah kal

A ummi cazin ah kal

Tuanbia 95: Jesuh A Mi Cawnpiak Ning

Tuanbia 95: Jesuh A Mi Cawnpiak Ning

Nikhat cu Jesuh nih mipa pakhat kha na innpa na dawt hna lai tiah a ti. Mipa nihcun Jesuh cu: ‘Ahodah ka innpa cu a si?’ tiah a hal. Hi mipa a ruahnak kha Jesuh nihcun a hngalh. Cu mipa nihcun a innpa cu a miphun hawi le a biaknak khatmi hna lawng kha an si tiah a ruah. Cucaah Jesuh nih zeitindah a ti ti kha zoh tuah u sih.

A caancan ahcun Jesuh nih tuanbia hmang in mi kha a cawnpiak hna. Cubantuk in atu zong a tuah ve. Judah mi le Samaria mi kong tuanbia pakhat a chimh. Judah mi tampi nih Samaria mi kha an huat hna ti cu kan hngalh cang. Jesuh chimmi tuanbia cu hitin a si:

Nikhat ah Judah mi pakhat cu tlang lam in Jeriko lei ah a kal. Cutik ah mifir pawl nih an hun zuanhnawh i a tangka vialte kha an lakpiak dih hnu ah thi deng in fung in an tuk tak.

Khi hnu ah Judah tlangbawipa pakhat hi cuka lam ahcun a ra. An tuk mipa cu a hei hmuh. Zei a tuah lai tiah dah nan ruah? Asinain lam khattelei kam in a kaltak ziar ko. Cun biaknak lei i aa zuam ngaimi a dang mi pakhat a ra ṭhan. Amah cu Levi mi a si. A dir ve maw? Dir hlah, an tuk mipa bawmh awk ah khan a dir duh ve lo. Tlangbawipa le Levi mipa hlapi an lam zulh in an kal khi nan hmuh khawh ko hna lai.

Sihmanhsehlaw an tuk mipa sin i a ummi hi zoh tuah u. Samaria mi a si. Amah nihcun Judah mipa kha a bawmh lengmang. A hma ah si a thuhpiak. Cu hnu ah Judah mipa kha a lak i a hma a dam tiang aa dinh khawh nak hnga mi hmun pakhat ah a chiah.

Innpa bantuk a simi Samaria mipa

Hi tuanbia a chim dih in, Jesuh nih mipa cu: ‘Hi hna pathum lak ah an tuk mipa sin ah a innpa bantuk in rian a ṭuanmi cu aho a si tiah dah na ruah? Tlangbawipa maw, Levi mipa maw, a si lo ah Samaria mipa dah?’ tiah a hal.

Cutikah khi mipa nihcun: ‘Samaria mipa a si. An tuk mipa cung ah amah cu zangfahnak a ngei,’ tiah a leh.

Jesuh nih: ‘Na chimmi cu a hmaan. Cucaah va kal law amah bantuk cun midang kha va tuah ve hna,’ tiah a ti.

Jesuh a mi cawnpiak ning hi nan duh ve lo mei? Baibal chung i Jesuh a chimmi hna hi ṭha tein kan ngaih ahcun a biapimi thil tampi kan hngalh khawh lai. A si ko lo mei?

Luka 10:25-37.



Biahalnak hna

  • Mipa pakhat nih Jesuh kha zei bia dah a hal, zeicah a hal?
  • Jesuh nih a caancaan ah zeidah a hman i a cawnpiak hna, Judah mi le Samaria miphun hna kongah zeidah kan rak cawn cang?
  • Jesuh chimmi tuanbia ah Jeriko lei khual a tlawngmi Judah mipa nih lam ah zeidah a ton?
  • Judah mi tlangbawi pakhat le Levi mipa pakhat cuka lam ah an rat tikah zeidah a cang?
  • Hmanthlak chungah an tukmi Judah mipa a bawmtu hi ahodah a si?
  • Jesuh nih tuanbia a chim dih hnuah zei bia dah a hal hna i mipa nih zeitindah a leh?

Biahalnak dang hna

  • Luka 10:25-37 rel.

    Jesuh nih bia lehnak pek colh nakin thli pakhat cungah ruahthiamnak hman awkah nawlbia a thiam ngaimi pa kha zeitindah a bawmh? (Luka 10:26; Matt. 16:13-16)

    Jesuh nih a bia a ngaitu pawl nih mi thleidannak lungthin kha an tei nakhnga zeitindah bianabia a rak hman? (Luka 10:36, 37; 18:9-14; Titas 1:9)