A ummi cazin ah kal

A ummi cazin ah kal

Tuanbia 88: Johan Nih Jesuh Tipil A Pek

Tuanbia 88: Johan Nih Jesuh Tipil A Pek

Hi mipa lu cung ah ṭhuro a rung ṭum hi zoh tuah u. Mipa cu Jesuh a si. Amah cu kum 30 a si cang. Cun amah he a ummi cu Johan a si. Amah kong kha tlawmpal kan rak cawn kha. Mari nih a rualchan Elizabeth a va tlawn lio i Elizabeth pum chung i ngakchiate aa lawmh caah a rak cawl kha nan hngal ti maw? Khi ngakchiapate cu Johan a si. Sihmanhsehlaw Johan le Jesuh cu atu ah zei an tuah lio dah a si.

Jesuh tipil a in lio

Johan nih Jesuh kha Jordan Tiva ti chung ah a hnim khawh cangka a si. Mi pakhat tipil pek ti cu mah ti cun tuah a si. Hmasa bik ah amah cu ti chung ah hnim dih a si i, cu hnu ah thawh ṭhan a si. Johan nih mi hna kha mah ti cun a tuah hna caah Tipil petu Johan tiah amah cu auh a si. Sihmanhsehlaw zeicahdah Johan nih Jesuh cu tipil a pek?

Jesuh cu Johan sin ah a ra i amah kha tipil pek awk ah a fial caah Johan nih tipil a pekmi cu a si. An tuah ciami thil ṭhalo ruang ah an ngaihchiatnak langhter a duhmi hna kha Johan nih tipil a pek hna. Sihmanhsehlaw Jesuh cu ngaihchiat awk in thil ṭhalo a rak tuah bal maw? Tuah bal hlah, zeicahtiah amah cu vancung in a rung ṭummi Pathian Fapa a si. Cucaah kong dang ruangtu ah Johan kha tipil pek awk a rak fialmi a si. Zei ruang ahdah a si ti zoh tuah u sih.

Hika i Johan sin a rat hlan ah hin Jesuh cu lettama a si. Lettama pakhat cu thing in cabuai le ṭhutdan te hna ti bantuk a sertu a si. Mari a vapa Josef cu lettama a si i, Jesuh zong kha cubantuk si ve awk ah a rak cawnpiak. Sihmanhsehlaw Jehovah nihcun a Fapa cu lettama ṭuan awk ah vawlei ah a run thlah lo. A bik in rian pakhat fial awk a ngei i, cu rian cu thok awk ah a caan a tling cang. Cucaah a Pa duhnak tuah awk ah a ratnak langhter awk ah Johan kha tipil pek awk ah a rak fial. Hi cu Pathian a lung a tling maw?

A si, Jesuh cu ti chung in a thawh hnu ah van in aw pakhat nih: ‘Hi cu ka Fapa a si. Amah cung ah ka lung a tling,’ tiah a ti caah a lung a tling kan ti khawh. Cun vancung aa hung bang in a um i, hi ṭhuro cu Jesuh cung ah a rung ṭum. Asinain ṭhuro taktak a si lo. Ṭhuro a lomi a si. Angaite cu Pathian thiangthlarau a si.

Atu cu Jesuh nih ruah awk thil tampi a ngei, cucaah ni 40 chung a kinnak hmun ram lak ah a kal. Cuka ahcun a sin ah Satan a ra. Voi thum tiang Pathian upadi he aa ralchan mi thil tuah awk ah Satan nih Jesuh cu a tukforh. Sihmanhsehlaw Jesuh nih a rak tuah duh lo.

Khi hnu ah Jesuh cu a rak kir ṭhan i amah hnu zultu, asiloah, a zultu a si hmasa bikmi minung cheukhat kha a ton hna. An lak i cheukhat an min cu Andru, Piter (Saiman tiah zong auh a si), Filip le Nathanael (Bartholomu tiah zong auh a si) an si. Jesuh le hi a zultu thar hna cu Kalili peng lei ah an kal. Kalili ahcun Nathanael a chuah nak khua a simi Kana ah an i din. Cuka ahcun Jesuh cu nupi ṭhitnak puai nganpi pakhat ah a kal ve i, hmasa bik khuaruahharnak kha a rak ser. Mah cu zeidah a si nan hngal maw? Ti kha mitsurzu ah a canter.

Matthai 3:13-17; 4:1-11; 13:55; Marka 6:3; Johan 1:29-51; 2:1-12.



Biahalnak hna

  • Hmanthlak chung i mipa pahnih hi ahodah an si?
  • Zeitindah mi pakhat cu tipil pek a si?
  • Tuah tawn ningin Johan nih ahote dah tipilnak a pek hna?
  • Zei aa thleidang mi ruangah dah Jesuh nih Johan kha tipil ka pe tiah a ti?
  • Jesuh tipil a in mi nih a lung a ton kha zeitindah Pathian nih a langhter?
  • Jesuh hmunking ah ni 40 chung a kal tikah zeidah a cang?
  • Jesuh hnu zultu asiloah a zultu hmasa bik cheukhat hna cu ahote dah an si i hmasa bik a tuahmi khuaruahharnak cu zeidah a si?

Biahalnak dang hna

  • Matthai 3:13-17 rel.

    Jesuh nih a zultu pawl tipil innak caah zei zohchunhawk dah a chiah piak hna? (Salm 40:7, 8; Matt. 28:19, 20; Luka 3:21, 22)

  • Matthai 4:1-11 rel.

    Jesuh nih Baibal thiam ngai in a hmannak nih Baibal hmaan tein hlathlai awkah zeitindah tha a kan pek? (Matt. 4:5-7; 2 Pit. 3:17, 18; 1 Johan 4:1)

  • Johan 1:29-51 rel.

    Tipil petu Johan nih a zultu pawl kha aho sinah dah lam a hmuhsak hna i nihin ah amah cu zeitindah a nawl kan i cawn khawh? (Johan 1:29, 35, 36; 3:30; Matt. 23:10)

  • Johan 2:1-12 rel.

    Jesuh hmasa bik a tuahmi khuaruahharnak nih Jehovah nih a salle kha thilṭha zeihmanh pek loin a um lai lo ti kha zeitindah a langhter? (Johan 2:9, 10; Salm 84:11; Jeim 1:17)