A ummi cazin ah kal

A ummi cazin ah kal

Tuanbia 85: Caw Inn Chungah Jesuh A Chuak

Tuanbia 85: Caw Inn Chungah Jesuh A Chuak

Hi ngakchiate cu ahodah a si nan hngal maw? A si, Jesuh a si. Atu naite ah khan caw inn chung ah a chuak. Caw inn cu saram an chiahnak inn a si. Mari nih Jesuh cu caw rawl einak kuangchung ah a thlim. Caw rawl einak kuang cu caw le a dang saram an ei awk rawl an chiahpiaknak hna thil a si. Asiahcun zeicahdah Mari le Josef cu hika hmun ah saram hna he humn khat ah an um ṭi? Hi cu naute chuahnak ding hmun a si lo, a si maw?

Si hlah. Asinain hika hmun an phaknak cu hitin a si. Rom siangpahrang Sizar Augustus nih mikip anmahle chuahnak khua cio ah milu relnak caah nan kal dih lai tiah upadi a rak chuah. Josef cu hika Bethlehem khua ah hin a rak chuak mi a si. Sihmanhsehlaw amah le Mari an hung phan tik ahcun, khoika hmanh ah an ca ah riahnak hmun a um ti lo. Cucaah hika saram hna sin ah hin an hung phanh cu a si. Cun cu ni thengte ahcun Mari nih Jesuh cu a hrin ai! Sihmanhsehlaw nan hmuh bang hin Jesuh cu dam tein a chuak ko.

Josef, Mari le bawhte Jesuh

Tuukhal hna Jesuh sin an rat hi nan hmu hna maw? Annih cu zan ah ram lak ah an tuu kha an zohkhenh hna, cun an pawngkam vialte ah ceunak a hung tlang. Cucu vancungmi pakhat a si. Sihmanh- sehlaw vancungmi nih: ‘ Ṭih hlah u! Nan caah thawngṭha ka ngei. Nihin ah Bethlehem khua chung ah Kri Bawipa cu a chuak cang. Amah nih mi hna kha a khamh hna lai! Amah cu puan in an zual i, caw rawl einak kuang chung ah an thlim ko kha nan hmuh lai,’ a ti hna. Cucangka cun vancungmi tampi an ra i Pathian kha an thangṭhat. Cucaah hi tuukhal hna cu rianrang in Jesuh zoh awk ah an kal i, atu cu an hmuh cang.

Zeicah Jesuh cu hitluk in aa thleidan ti nan hngal maw? Ahodah a si taktak nan hngal maw? Hi cauk i hmasa bik tuanbia ah Pathian Fater kong kan chim mi kha philh hlah u law. Hi Fapa cu van le vawlei le zeizong dang vialte sernak ah Jehovah he rian a rak ṭuan ṭi. Aw, cucu Jesuh a si!

A si, Jehovah nih vancung i a Fapa nunnak kha a lak i, Mari paw chung ah a chiah. Ngakchiadang an nule paw chung ah an ṭhan bang in Mari paw chung ahcun a ṭhang ve. Sihmanhsehlaw hi ngakchia cu Pathian Fapa a si. A donghnak ah Jesuh cu hi Bethlehem khua caw inn chung ah a chuak. Jesuh a chuak cang ti minung an chimh hna caah zeicahdah vancung mi cu hitluk in an lung aa lawmh hnga ti nan hngal maw?

Luka 2:1-20.



Biahalnak hna

  • Hmanthlak chung i ngakchiate cu ahodah a si i khuazei ah dah Mari nih a thlim?
  • Zeicah Jesuh cu saṭil an umnak caw inn ah a chuah?
  • Hmanthlak chung i caw inn ah a lutmi hna hi ahote dah an si i vancungmi pakhat nih zeidah a chimh hna?
  • Zeiruangah Jesuh cu aa thleidan?
  • Zeicah Jesuh cu Pathian Fapa tiah kan auh khawh?

Biahalnak dang hna

  • Luka 2:1-20 rel.

    Sizar Augustus cu Jesuh chuah lainak chimchungmi tlinnak i zei ka zawn ah dah aa tel? (Luka 2:1-4; Mik. 5:2)

    Zeitindah minung pakhat cu “lungthin ṭha” a ngeimi hna lakah aa telmi pakhat a si khawh? (Luka 2:14, NW; Matt. 16:24; Johan 17:3; Lam 3:19; Heb. 11:6)

    Khamhtu a chuah caah nautami Judah mi tuukhal hna nih lawmh awk a ruang an ngeih a si ahcun nihin Pathian salle nih a ngan deuhmi lawmhnak ngeih awk zei a ruang dah a um? (Luka 2:10, 11; Efe. 3:8, 9; Biat. 11:15; 14:6)