A ummi cazin ah kal

A ummi cazin ah kal

Tuanbia 101: Jesuh An Rak Thah

Tuanbia 101: Jesuh An Rak Thah

Tuksapur thil a tlungmi hi zoh tuah u! Jesuh cu an thah cang. Thingtung cung ah an thlai. A kut le a ke ah thir in an khenh chih. Jesuh cu ahote nih dah zeicahdah cutin an tuah duh hnga?

Jesuh a thih lio

Mi cheukhat nih Jesuh cu an huat caah a si. Annih cu ahotedah an si nan hngal hna maw? Anmah lak i pakhat cu a ṭha lo mi vancungmi Seitan Rulhreu a si. Amah cu Jehovah a bia ngaih lo awk ah Adam le Evi a rak hruaitu hna cu a si. Cun Jesuh a ral hna hi tuksapur sualnak a tuahtertu hna zong cu Seitan ṭhiamṭhiam cu a si.

Hi thingtung cung ah Jesuh an thlai i thir in an khenh chih hlan zong ah, a ral hna nih a cung ah ṭhatlonak rian tampi an ṭuan cang. Gethsemane dum chung ah an rat i an tlaih lio kha nan hngal rih ko lo mei? Khi ral hna cu ahotedah an si? A si, annih cu biaknak lamhruaitu pawl an si. Cun zeidah a rak tlung rih zoh hmanh u sih.

Jesuh cu biaknak lamhruaitu pawl nih an tlaih i an kalpi lio ah khan a lamkaltu pawl cu an zam dih. An ṭih tuk caah Jesuh kha amah lawngte in a ral hna sin ah an kaltak. Sihmanhsehlaw lamkaltu Piter le Johan cu hla pi ah an kal lo. Jesuh cu zeitindah an tuah ti hngalh awk ah an zulh ve.

Tlangbawi hna nih Jesuh cu tlangbawi ngan a rak simi tarpa Annas sin ah an kalpi. Cuka ahcun mibupi cu saupi an um ve lo. Cu hnu ah Jesuh kha tlangbawi ngan a ṭuan liomi Kaiafas inn ah an kalpi ṭhan. Biaknak lamhruaitu tampi cu Kaiafas inn ahcun an rak i pum.

Hika kaiafas a inn ah hin a bia cu an ceihpiak. Mi kha Jesuh lih bia puh awk ah an luhpi hna. Biaknak lamhruaitu vialte nih: ‘Jesuh cu thah a si lai,’ tiah an ti dih. Cun a hmai ah cil an chak i, an kuttum in an cumh.

Cu vialte in an tuah lengmang lio ahcun Piter cu innleng tual chung ah a um ko. Khuasik zan a si caah mi hna cu mei an to cio. Annih nih mei an toh cio lio ahcun, salnu pakhat nih Piter cu a zoh i: ‘Hi mipa zong hi Jesuh he aa kawmmi a si ve,’ tiah a ti.

Piter nih: ‘Si hlah, ka si ṭung lo!’ tiah a leh.

Voithum tiang mi hna nih Piter cu Jesuh sin ah na rak um ve ko tiah an ti. Sihmanhsehlaw Piter nih a hmaan lo tiah a rak al. Piter nih a voithumnak a al lio ah Jesuh nih aa mer i a zoh. Cu lihbia a chim caah Piter cu a ngaih a chia i, a leng ah a va chuak i a ṭap.

Cacawn ninga ni zingka ni a hung chuah tik ah, tlangbawi hna nih an i pumhnak khaan nganpi, Sanhedrin Khaan an timi ah Jesuh cu an kalpi. Cuka ahcun zeitindah kan tuah lai ti kha an i ceih. Cun cu lio i Judah ram uktupa Pontius Pilat sin ah an kalpi ṭhan.

Tlangbawi hna nih ‘hi pa hi misual a si, thah awk a si’ tiah Pilat sin ah an chim. Pilat nih Jesuh cu bia a hal hnu ah ‘sualnak a tuahmi zeihmanh ka hmu lo’ tiah a ti. Cun Pilat nih Jesuh cu Herod Antipas sin ah a kuat. Herod cu Galili ram uktu a si nain Jerusalem khua ah a phan. Herod zong nih Jesuh sualnak a tuahmi a hmu lo. Cucaah Pilat sin ah a kuat ṭhan.

Pilat nih Jesuh cu thlah a duh ko. Sihmanhsehlaw Jesuh a ral hna nihcun thong tlami a dang pakhat tu kha thlah an duh deuh. Cu mipa cu mifirpa BarAbbas a si. Pilat nih Jesuh kha a leng ah a hung chuah lio ahcun chun hrawng a si cang. Mi hna sin ah khan: ‘Nan Singpahrang hi zoh hmanh u!’ a ti hna. Sihmanhsehlaw tlangbawi ngan hna nih: ‘Amah kha hun chuah! That ko!’ tiah an au hnawh. Cucaah Pilat nih BarAbbas kha a thlah i, Jesuh cu thah awk ah an kalpi.

Cacawn ninga ni zanlei tuante ah Jesuh cu thingtung cungah an khenh chih. Hmanthlak chung ah hin cun nan hmu kho hna lai lo nain, Jesuh a kehlei le a orhlei ah misual pakhat veve thing cung ah an thlai ve hna. Jesuh a thih hlan deuh te ah, misualpa pakhat nih Jesuh sin ah: ‘Na pennak chung i na luh tik ah ka philh te hlah,’ tiah a ti. Cun Jesuh nih: ‘Paradis ah keimah he na um ve te lai tiah bia kan kam,’ tiah a leh.

Cucu khuaruahhar awk tlak biakamnak a si lo mei? Jesuh nih a chimmi Paradis cu zeidah a si ti nan hngal maw? A hramthok ah Pathian nih a sermi paradis cu khuazeiahdah a rak um? A si, vawlei cung ah a rak um. Cun Jesuh nih vancung ah siangpahrang in a uk tik ah, hi mipa cu vawlei cung i Paradis thar co awk ah a nunter ṭhan lai. Cu kong ahcun lunglawmh awk kan si hnga lo maw?

Matthai 26:57-75; 27:1-50; Luka 22:54-71; 23:1-49; Johan 18:12-40; 19:1-30.



Biahalnak hna

  • Jesuh a thihnak ah ahodah ṭuanvo a ngei bikmi a si?
  • Jesuh kha biaknak lamhruaitu pawl nih an kalpi tikah lamkaltu hna nih zeidah an tuah?
  • Tlangbawi ngan Kaiafas inn ah zeidah a cang?
  • Zeiruangah Piter cu lengah a chuah i a ṭah?
  • Pilat sin an kalpi ṭhan hnuah tlangbawi ngan pawl zeitindah an au?
  • Ninga ni chun hnu ah Jesuh nih zeidah a ton i a pawng i tung cungah an thlaimi misualpa kha zeidah a kamh?
  • Jesuh nih a chimmi Paradis cu khuazei ah dah a um lai?

Biahalnak dang hna

  • Matthai 26:57-75 rel.

    Judah biaceihnak zung i a ṭuanmi hna nih a ṭhalomi thinlung an ngeih kha zeiti lam in dah an langhter? (Matt. 26:59, 67, 68)

  • Matthai 27:1-50 rel.

    Judah aa ngaihchihnak cu a taktak a si lo ti kha zeicah kan chim khawh? (Matt. 27:3, 4; Mar. 3:29; 14:21; 2 Kor. 7:10, 11)

  • Luka 22:54-71 rel.

    Jesuh an rawi i an tlaih zanah Piter nih voithum tiang a hlawtnak in khan zeidah cawn awk kan i lak khawh? (Luka 22:60-62; Matt. 26:31-35; 1 Kor. 10:12)

  • Luka 23:1-49 rel.

    Jesuh nih a cung i a ding loin an tuahnak kha zeitindah a leh hna i mah in khan zei cawn awk dah kan i lak khawh? (Luka 23:33, 34; Rom 12:17-19; 1 Pit. 2:23)

  • Johan 18:12-40 rel.

    Piter nih minung a ṭih hna ruangah caan tlawmte chung cawlcang loin a um nain aa thleidang mi lamkaltu a si ṭhannak nih zeidah a langhter? (Johan 18:25-27; 1 Kor. 4:2; 1 Pit. 3:14, 15; 5:8, 9)

  • Johan 19:1-30 rel.

    Vawlei cung thilri kongah zei aa tlakmi hmuhning dah Jesuh nih a ngeih? (Johan 2:1, 2, 9, 10; 19:23, 24; Matt. 6:31, 32; 8:20)

    Jesuh a thih lai i a chimmi bia cu Jehovah nawlngeihnak a dirpimi teinak thawngthanhnak zeitindah a si? (Johan 16:33; 19:30; 2 Pit. 3:14; 1 Johan 5:4)