A ummi cazin ah kal

A ummi cazin ah kal

Tuanbia 82: Mordekai le Esther

Tuanbia 82: Mordekai le Esther

Jerusalem lei ah Ezra a kal hlan kum tlawmpal ah khan kir ṭhan rih hmanh u sih. Mordekai le Esther cu Persia ram chung i a biapi bik mi Israel mi an si. Esther cu siangpahrang nupi a si i, a pa unau fa Mordekai cu nawl ngeihnak ah siangpahrang changtu a si. Zeitindah an rak si khawh ning a si ti zoh hmanh u sih.

Esther cu a ngakchiat lio tein a nu le a pa nih an thih tak i, cucaah Mordekai nih a rak cawm. Shushan ti mi khuapi ah persia siangpahrang Ahasuerus cu siangpahrang inn pakhat a ngei i, Mordekai cu a sal pakhat a si ve. Nikhat cu singpahrang nupi Vashti nih siangpahrang nawl kha a rak ngaih lo caah, siangpahrang nih nupi thar pakhat aa rak i thim. A thim mi nu cu aho a si nan hngal maw? Aa dawh ngaingai mi nute Esther kha a si.

Haman cu Mordekai cung ah a thin a hung

Mi nih an kunpiak mi hi mi ruamkaipa hi nan hmu maw? Hi cu Haman a si. Amah cu Persia ram chung ah a biapi ngai mi pakhat a si. Haman nih hika i a ṭhu ko mi nan hmuh mi Mordekai zong nih hin ka kunpiak ve seh ti a duh. Sihmanhsehlaw mordekai nihcun a kunpiak duh lo. Cubantuk mi ṭhalo pakhat hmai i kunpiak cu a hmaan lai lo tiah a rak ruah. Mah nihcun Haman a thin a hunter ngaingai. Cucaah hitin a rak tuah.

Haman nih siangpahrang kha Israel mi hna kong ah lihbia a va chimh. ‘Annih cu na nawlbia a ngai duh lo mi mi ṭhalo an si. An zapi tein thah dih awk an si,’ a ti. Ahasuerus nih a nupi Esther cu Israel mi a si ti a hngal lo. Cucaah Haman nih a chimh mi bia cu a ngaih i, Israel mi vialte cu zei ni zei thla ah an zapi tein thah dih si hna seh tiah upadi pakhat a serter hna.

Mordekai nih cu upadi kong cu a theih tik ah a awlok a chawng ngaingai. Esther sin ah hitin bia a cah: ‘Siangpahrang sin ah va lut law kanmah khamh awk ah na va nawl hrimhrim lai,’ tiah a ti. Persia upadi ah amah nih kawh lo in siangpahrang kha va kal in ton phung a si lo. Sihmanhsehlaw Esther cu kawh lo in sinagpahrang sin ahcun a va lut. Cutikah, siangpahrang nih a sui bawifung kha a hlerpiak. A sullam cu Esther cu thah awk a si lo tinak a si. Esther nih siangpahrang le Haman kha rawl danghnak puai ah a sawm hna. Cu puai ahcun siangpahrang nih Esther kha zeidah na duh tiah a hal. Esther nih siangpahrang le Haman cu a thaizing i rawl danghnak puai ah nan rat ṭhan tik ah kan chimh te lai tiah a ti.

Cu rawl danghnak puai ahcun Esther nih siangpahrang cu: ‘Keimah le ka miphun cu thah kan si lai,’ a ti. Siangpahrang cu a thin a hung tuk. ‘Cu bantuk thil tuah a ngamh mi cu ahodah a si?’ tiah a hal.

‘Cu mipa, kan ral cu, hi mi ṭhalopa Haman hi a si!’ tiah Esther nih a ti.

Siangpahrangnu Esther nih Haman sualnak a phuan lio

Khitikah siangpahrang cu a thin a hung tuk hringhran i, Haman cu thah siseh tiah nawl a pek. Cu hnu ah siangpahrang nih Mordekai cu amah chang tu nawl ngeitu ngan bik ah a ser. Cutikah Mordekai zong nih Israel mi pawl cu thah an si lai ni ah mahle nunnak khamh awk caah doh ṭhan khawh nak nawl pek si hna seh tiah upadi pakhat a chuah ṭhan ve. Mordekai cu hi bantuk in nawl ngeitu bawi nganpi pakhat a si cang caah minung tampi cu Israel mi lei in an tang i an bawmh hna caah, Israel mi hna cu an ral kut in an luat dih.

Esther Baibal cauk



Biahalnak hna

  • Mordekai le Esther cu ahodah an si?
  • Zeicah Ahasuerus nih nupi thar a duh, aho kha dah a thim?
  • Haman cu ahodah a si i zei nih dah a thin a hunter ngaingai?
  • Zei nawlbia dah chuah a si, Esther nih Mordekai sinin thawng a theih hnu ah zeidah a tuah?
  • Haman cu zeidah a can i Mordekai tah zeidah a can?
  • Israel mi hna cu an ral kut in zeitindah an luat?

Biahalnak dang hna

  • Esther 2:12-18 rel.

    Esther nih “nemnak le daihnak lungthin” ṭhanternak i man a ngeihnak kha zeitindah a langhter? (Esther 2:15; 1 Pit. 3:1-5)

  • Esther 4:1-17 rel.

    Esther nih a hmaanmi biaknak ca i tuahṭuan awkah caan ṭha a rak hmuh bantukin Jehovah kan biaknak le zumhawktlak kan sinak langhter awkah zei caan ṭha dah kan hmuh? (Esther 4:13, 14; Matt. 5:14-16; 24:14)

  • Esther 7:1-6 rel.

    Nihin Pathian mi tampi zong nih cu bantuk hremnak kan in lai ti an theih ko nain Esther bantukin zeitindah pumpek in an tuah? (Esther 7:4; Matt. 10:16-22; 1 Pit. 2:12)