A ummi cazin ah kal

A ummi cazin ah kal

Tuanbia 78: Vanpang Cung I Kut Ṭialmi Ca

Tuanbia 78: Vanpang Cung I Kut Ṭialmi Ca
Kutbor nih vanpang ah ca a ṭial

Kahin zeidah a cang lengmang? Mi hna cu puai nganpi an tuah lio a si. Babilon siangpahrang nih bawi thongkhat a sawm hna. Annih nih Jerusalem biakinn i an lakmi sui hrai, ngun hrai le kheng hna kha an hman. Sihmanhsehlaw ruah lo pi in, minung kutbor pakhat thli lak ah a hung chuak i, vanpang cung ah ca a hung ṭial zuaimai ko. Mi vialte cu an lau dih.

Belshazzar le bawi pawl

Cu caan cu Nebukhadnezzar a tupa Belshazzar siangpahrang a ṭuan lio a si. A mifim hna kha zokzok in rung lut hna seh tiah a au. ‘Hi ca ṭialmi a rel kho i a sullam a ka chim khomi paoh cu laksawng tampi pek a si lai i, ka pennak chung ah uktu pathumnak a si lai,’ tiah siangpahrang nih a ti. Sihmanhsehlaw mifim pakhat hmanh nih vanpang cung i ca cu an rel kho lo i a sullam zong an chim kho lo.

Siangpahrang a nu nih thawng cu a theih i rawl einak khaan nganpi chung ahcun a rung lut. ‘Zangfahnak in cu tluk cun ṭih hlah. Na pennak chung ah a thiangmi pathian hna a hngalmi pakhat a um ko. Na pu Nebukhadnezzar siangpahrang a rak si lio ah khan amah cu a mifim vialte hao tu ah a ser. A min cu Daniel a si. Amah cu auhter hna law, a sullam vialte zong an chimh ko lai,’ tiah siangpahrang kha a ti.

Cucaah zokzok in Daniel cu siangpahrang hmai ah an luhter. Kan pek lai a ti mi laksawng vialte kha a al hnu ah, Daniel nih zeicahdah Jehovah nih Belshazzar a pu Nebukhadnezzar kha siangpahrang sinak in a rak ṭhumh kha a hun chimh. ‘Amah cu a hun i porhlaw, cucaah Jehovah nih dan a tat’ tiah Belshazzar kha a chimh.

‘Sihmanhsehlaw nangmah nih hi thil vialte cu na hngalh ko nain Nebukhadnezzar bantuk in naa porhlaw ve cang. Jehovah biakinn chung i an lakmi hrai le kheng hna kha na lak i zu dinnak ah nan hman. Thing le lung in sermi pathian kha na thangṭhat hna i, a kan Sertu Pathian cu na thangṭhat duh lo. Cucaah Pathian nih hi ca hna hi ṭial awk ah hi kutbor cu a run thlahmi a si,’ tiah Daniel nih Belshazzar cu a chimh.

‘Aa ṭial mi ca cu hihi a si: MENE, MENE, TEKEL le PARSIN.’

‘MENE a sullam cu Pathian nih na pennak ni cu a rel cang hna i, a donghnak a phakter cang hna ti a si. TEKEL a sullam cu nangmah cu cuai thlainak ah thlai na si cang i na tling lo ti kha hmuh a si cang tinak a si. PARSIN a sullam cu na pennak cu Media le Persia mi hna sin ah pek a si cang lai tinak a si,’ tiah Daniel nih a chimh.

Daniel nih bia a chim lengmang lio hrimhrim ahcun, Media mi hna le Persia mi hna nih Babilon cu tuk hram an thok colh. Khualipi cu an lak i, Belshazzar cu an thah. Cu zan hrimhrim ahcun vanpang cung i kut nih a ṭialmi bia cu a tling taktak! Sihmanhsehlaw Israel mi hna cu atu zei tindah an si cang lai? A rauh hlan ah kan hmuh ko lai. Asinain Daniel cung ah zeidah a tlung ti zoh hmasa u sih.

Daniel 5:1-31.



Biahalnak hna

  • Babilon siangpahrang nih rawldanghnak puai nganpi a tuahmi ah Jerusalem biakinn i a lakmi hrai le kheng hna kha a hman tikah zeidah a cang?
  • Belshazzar nih a mifim hna kha zeidah a chimh hna, sihmanhsehlaw annih nih zeidah an tuah khawh lo?
  • Siangpahrang kha a nu nih zeidah a chimh?
  • Daniel nih siangpahrang a chimhmi ah vanpang cung i caṭial awkah kutbor kha zeicah Pathian nih a thlah?
  • Daniel nih vanpang cung i ca a sullam kha zeitindah a fianter?
  • Daniel nih bia a chim cuahmah lio ah zeidah a cang?

Biahalnak dang hna

  • Daniel 5:1-31 rel.

    Pathian ṭihnak le Belshazzar nih vanpang cungah caṭial mi a hmuh lio i ṭihnak an i dannak kha langhter. (Dan. 5:6, 7; Salm 19:9; Rom 8:35-39)

    Daniel nih Belshazzar le a bawi hna hmai i bia a chim lio ah zeitindah ralṭhatnak kha a langhter? (Dan. 5:17, 18, 22, 26-28; Lam. 4:29)

    Daniel angan 5 chung bia nih Jehovah i vanraang nawlngeihnak kha zeitilam in dah a langhter? (Dan. 4:17, 25; 5:21)