A ummi cazin ah kal

A ummi cazin ah kal

Tuanbia 61: David Siangpahrang a Hmuhnak Kong

Tuanbia 61: David Siangpahrang a Hmuhnak Kong

Saul cu David kha tlaih awk ah aa zuam ṭhan. A ralkap hna lak i a ṭha bikmi 3,000 kha a lak hna i David kawl awk ah an kal. Mah kong cu David nih a hngalh tik ah, Saul le a mi hna cu zan ah khuazei i an riah kha hngalh awk ah mingiatu a thlah hna. Cun a mi pahnih hna kha: ‘Ahodah Saul riahhmun chung ah khin a vun ka zul lai?’ tiah a hal hna.

David nih Siangpahrang Saul a auh lio

Abishai nih: ‘Keimah nih kan zulh lai,’ tiah a leh. Abishai cu David a farnu Zeruiah fapa a si. Saul le a mi hna an ih ko lio ah, David le Abishai cu a thli tein riahhmun chung ahcun an vung lut. Saul a lu hramte ah a ummi a fei le a hranthawl kha an lak. An zapi in thu hluahmah in an i hngilh ko caah ahohmanh nih an hmu hna lo i an thei hna lo.

David le Abishai hi zoh hna hmanh u. An chuak ṭhan cang i himte in tlangpar cung ah an phan cang. David nih Israel ralkap haotupa sin ah: ‘Abner, zeicah na bawipa, siangpahrang cu na kilven lo? Zoh hmanh! Siangpahrang fei le a hranthawl cu khoikadah an um?’ tiah a auh.

Saul cu aa hung i hlau. David aw a si ti kha a hngalh i: ‘Mah cu nangmah na si maw, David?’ tiah a hal. Khika a tanglei ah khin Saul le Abner cu nan hmu hna maw?

‘A si, ka bawipa siangpahrang,’ tiah David nih Saul cu a leh. Cun David nih: ‘Zeicahdah tlaih awk ah na ka dawi lengmang ko? Keimah cu zei thil ṭhalo dah ka tuah? Maw siangpahrang, Hika ah hin na fei kha a um ko. Na mi lak ah pakhat kha ra hna sehlaw, ra la hna seh,’ tiah a ti.

Siangpahrang Saul le Abner

Saul nih: ‘Ka palh cang. Hruhnak in rian ka ṭuan cang,’ tiah a chim. Khi tik ah David cu amah lam ah a kal i, Saul cu inn lei ah khan a kir ṭhan. Sihmanhsehlaw David nih amah le amah kha hitin aa ti: ‘Ni khatkhat cu Saul nih a ka thah te ko lai. Filistin mi hna ram ah ka zam ahcun a ṭha lai.’ Cun cubang in a rak zam. David nih Filistin mi hna cu atu cu kanmah lei in a ṭang cang tiah a zumhter hna i a hruhter khawh hna.

Caan tlawmpal hnu ah Filistin mi hna cu Israel mi hna kha doh awk ah an hung kal. Cu raldohnak ahcun Saul le Jonathan cu an pahnih in thah an si. Cucaah David cu a ngaih a chia ngaingai i, aa dawh ngaimi ṭah hla pakhat a ṭial i: ‘Ka u Jonathan, nangmah ruang ah ka ngaih a chia tuk hringhran e. Nangmah kha kan dawt tuk ve ko!’ tiah a sak.

Khi hnu ah David cu Israel ram Hebron khua ah a kir ṭhan. Saul fapa Ishbosheth kha siangpahrang caah aa thim mi hna le David kha siangpahrang si seh ti a duh mi hna karlak ah raldohnak a rak um. Sihmanhsehlaw a donghnak ahcun David a mi hna nih an tei hna. David cu siangpahrang a hmuh lio ah kum 30 a rak si. Kum sarih le a cheu chung cu Hebron khua in a uk hna. Cuka khua i fapa a hrinmi a cheu cu Amnon, Absalom le Adonijah an si.

Aa dawh ngaimi Jerusalem khua kha David le a mi hna nih an lak awk caan a hung phan. David a farnu Zeruiah a fapa dang pakhat Joab nih cu raldohnak ahcun a hruai hna. Cucaah David nih Joab cu a ralbawi ngan bik rian a pek. Atu cu David nih Jerusalem in a uk cang hna.

1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Chanrelnak 11:1-9.



Biahalnak hna

  • David le Abishai nih Saul a riahhmun i aa hngilh lioah zeidah an rak tuah?
  • Zei biahalnak hna dah David nih Saul kha a hal?
  • Saul a kal hnu ah David khuazei ah dah a kal?
  • Aa dawh ngaimi hla ṭial tiangin zeinihdah David kha a ngaih a chiatter ngaingai?
  • Hebron i siangpahrang a ṭuan ah David cu kum zeizat dah a si i a fale cheukhat an min cu hodah an si?
  • David nih a hnu ah khuazei in dah a uk hna?

Biahalnak dang hna

  • 1 Samuel 26:1-25 rel.

    1 Samuel 26:11 ah ṭialmi David chimmi bia nih theocratic lamhruainak cung i zei lungput dah a langhter? (Salm 37:7; Rom 13:2)

    Dawt-zaangfahnak kha zuamnak he thazaang chuah in kan langhter ko nain a ṭhalo ngaimi lehrulhnak kan hmuh tikah 1 Samuel 26:23 i David bia nih aa tlakmi hmuhning kan ngeih peng khawh nakhnga zeitindah a kan bawmh khawh? (1 Si. 8:32; Salm 18:20)

  • 2 Samuel 1:26 rel.

    Nihin Khrihfa hna nih David le Jonathan nih an ngeihmi bantuk phun “pakhat le pakhat lungtak tein i dawtnak” kha zeitindah kan ṭhanter khawh? (1 Pit. 4:8; Kol. 3:14; 1 Johan 4:12)

  • 2 Samuel 5:1-10 rel.

    (a) David hi kum zeizat chung dah siangpahrang rian a ṭuan i mah caan kha zeitindah kan ṭhen khawh? (2 Sam. 5:4, 5)

    Zei kongah dah David a min a than i mah cucu nihin kanmah caah zeitindah ralrinpeknak a si? (2 Sam. 5:10; 1 Sam. 16:13; 1 Kor. 1:31; Fil. 4:13)