A ummi cazin ah kal

A ummi cazin ah kal

Tuanbia 58: David le Goliath

Tuanbia 58: David le Goliath

Israel doh awk ah Filistin mi hna cu an ra ṭhan. David a ule upa bik Pathum hna cu Saul a ralkap chung ah an um ve. Cucaah nikhat cu Jesse nih: ‘Vaireu le changreu cheukhat kha i lak law na ule sin ah hung kal tuah. Zeitindah an um va zoh tuah hna,’ tiah David kha a ti.

Goliath

Ralkap riahhmun ah David a hung phanh tik ah, a ule ton awk ah ralkapbu an i tiannak lei cu a va le. Filistin mi mikei Goliath cu Israel mi hna kha hauh awk ah a hung chuak. Cubantuk in zingfa zanfa a tuah tawn i ni 40 zong a si cang. ‘Nanmah lak ah mi pakhat kha keimah doh awk ah i thim u. Amah nih a ka tei i a ka thah ahcun, kannih cu nan sal kan si lai. Nan lak i mi pakhat khat cu hung chuak seh law kan i tawng tuah lai,’ tiah a hei hro hna.

David nihcun ralkap cheukhat kha: ‘Khi Filistin mipa a that i, Israel mi hna kha hi ningzahnak in a luattertu cu zeidah a hmuh lai?’ tiah a hal hna.

‘Amah cu Saul nih rumnak tampi a pek lai. Cun a fanu kha nupi caah a pek lai,’ tiah ralkap hna nih an chimh.

Sihmanhsehlaw Israel mi vialte nihcun a ngan tuk caah Goliath kha an ṭih ngaingai. Amah cu pe 9 (meter 3 hrawng) nak in a sang deuh i, amah caah ralkap dang pakhat nih phaw pakhat a putpiak.

Ralkap a cheu nih Siangpahrang Saul sin ah an kal i, David nih Goliath doh a duhnak kha an va chimh. Sihmanhsehlaw Saul nih: ‘Hi Filistin mipa cu na do kho lai lo. Nangmah cu ngakchiate lawng na si rih i, amah cu a nun chung vialte ralkap a si cang,’ tiah David kha a chimh. ‘Ka tuu a tlaimi vom pakhat le chindeih pakhat kha ka thah cang. Cun hi Filistin mipa zong hi anmah bantuk pakhat cu a si ve lai. Jehovah nih a ka bawmh ko lai,’ tiah David nih a leh. Cucaah Saul nih: ‘Cu ti a si ahcun va kal law, Jehovah cu na sin ah um ko seh,’ tiah a ti.

David cu tivate zul in a kal i lung mil tete panga aa lak i, a zal chung ah a sanh hna. Cun a lungherhchehnak cu a chuah i mikeipa ton awk ah cun a kal. Goliath nih amah kha a hmuh tik ah, a zum kho hrimhrim lo. David thah awk cu a fawi tuk lai tiah a ruah.

David nih lung in a cheh lio

‘Ka sin ah ra tuah, na sa kha van i a zuangmi va hna le vawlei i a ummi saram hna kha ka pek hna lai,’ tiah Goliath nih a ti. Sihmanhsehlaw David nih: ‘Nangmah nihcun vainam, fei le fei ngan pi he na ka rat hnawh, sihmanhsehlaw kei nihcun Jehovah a min in kan chuah hnawh. Nihin ni ah hin Jehovah nih nangmah cu ka kut chung ah a ka pek lai i kan thah lai,’ a ti.

Cutin a chim khawh cangka David cu Goliath sin ah a va tli. A zal chung in lung pakhat kha a lak i, a lungherhchehnak ah khan a hmanh i, a thazang dihumnak in a herh in a hei cheh. Lung nihcun Goliath a calpadar ah a khen i, a tlu i a thi! Filistin mi hna nih an mi ṭhawng bik kha a thi cang ti an hmuh tik ah, an zapi in an hnulei an i mer i an zam dih. Israel mi hna nih an hnulei in an dawi hna i ral cu an tei.

1 Samuel 17:1-54.



Biahalnak hna

  • Goliath nih Israel mi ralkap pawl kha zeidah a zuam hna?
  • Goliath cu zeitluk indah a ngan i Siangpahrang Saul nih Goliath a that kho mi cu zei laksawng pek ding dah bia a kamh hna?
  • Saul nih David kha ngakchiate lawng na si rih na do kho lai lo a ti tikah David nih zeidah a chim?
  • Goliath bia a lehnak ah David nih Jehovah aa bochannak kha zeitindah a langhter?
  • Hmanthlak chungah na hmuh bantukin David nih Goliath thahnak ah zeidah a hman i mah hnu ah Filistin mi pawl zeidah an can?

Biahalnak dang hna

  • 1 Samuel 17:1-54 rel.

    David i ṭihnak a ngeih lonak a konglam cu zeidah a si i a ralṭhatnak kha zeitindah kan i cawn khawh? (1 Sam. 17:37, 45; Efe. 6:10, 11)

    Khrihfa hna nih lung a thawhtermi lentecelhnak le hrimhnak a pemi lentecelhnak ah Goliath bantuk zuam duhnak thinlung kha zeicah kan hrial awk a si? (1 Sam. 17:8; Gal. 5:26; 1 Tim. 4:8)

    David a bia nih Pathian nih a ka um pi timi a zumhnak kha zeitindah a langhter? (1 Sam. 17:45-47; 2 Chan. 20:15)

    Mah kong nih aa domi ralkap phu hnih kong lawng si loin a hmaan lomi pathian hna le a hmaanmi Pathian Jehovah karlak i raldohnak a si ti kha zeitindah a langhter? (1 Sam. 17:43, 46, 47)

    Jehovah i bochannak ah David i zohchunhawk a nunning kha Chiti thuhmi a tang rihmi hna nih zeitindah an i cawn? (1 Sam. 17:37; Jer. 1:17-19; Biat. 12:17)