A ummi cazin ah kal

A ummi cazin ah kal

Tuanbia 57: Pathian nih David A Thim

Tuanbia 57: Pathian nih David A Thim
David nih tuu fate a khamh

Zeidah a rak tlung nan hmu maw? Hi ngakchiapate nih hi a tuu fate cu vompi kut in a rak khamh. Vompi cu a ra i tuu fate cu a lak i ei awk ah a kalpi. Sihmanhsehlaw ngakchiapa nih an hnu in a dawi hna i vompi kaa in tuu fate cu a khamh. Vompi nih a hun zuanhnawh tik ah ngakchia pa nih vompi cu a tlaih i thi lak in a vuak! A dang voikhat lio ah ngakchiapa nih tuu pakhat kha chindeih kut in a rak khamh ve cang. A ral a ṭha ngaimi ngakchia hrimhrim a si lo mei? Cu ngakchiapa cu aho a si ti nan hngal maw?

Amah cu tlangvalpa David a si. Amah cu Bethlehem khua ah a um. A pu cu Obed, Ruth le Boaz an fapa a si. Anmah kong cu nan hngal rih maw? Cun David a pa cu Jesse a si. David cu a pa tuu pawl a cawngh hna. David cu Jehovah nih siangpahrang si awk ah Saul a thimnak in kum 10 hnu ah a chuakmi a si.

A caan a tlin tik ah Jehovah nih Samuel sin ah: ‘Chiti cheukhat kha i lak law Bethlehem khua i Jesse inn ah khan va kal tuah. Amah fapa hna lak i pakhat kha siangpahrang caah ka thim cang!’ tiah a ti. Samuel nih Jesse fapa upa bik Eliab kha a hmuh tik ah: ‘Jehovah nih a thim mi cu amah hi a si ko lai,’ tiah a ruah. Sihmanhsehlaw Jehovah nih: ‘Zeitluk sang le dawh dah a si tu kha zoh hlah. Siangpahrang caah amah cu ka thimmi a si lo,’ tiah a chimh

Cucaah Jesse nih a fapa Abinadab kha a auh i Samuel sin ah a rat pi. Sihmanhsehlaw Samuel nih: ‘A si lo, Jehovah nih amah zong hi a thim ṭhiamṭhiam lo,’ tiah a ti. Cu hnu ah Jesse nih a fapa Shammah kha a ratpi. ‘A si lo, Jehovah nih amah zong hi a thim ṭhiamṭhiam lo,’ tiah Samuel nihcun a ti rih. Jesse nih a fapale pasarih kha Samuel sin ahcun a ratpi hna nain Jehovah nihcun annih lak i pakhat hmanh kha a thim hna lo. ‘Na fapale cu mah vial lawng hi maw an si?’ tiah Samuel nih a hal.

‘A hniang bik pa pakhat a um rih,’ tiah Jesse nih a leh. ‘Asinain amah cu khualeng ah tuu a khal i a um lo,’ a ti. David cu an hun luh pi tik ah Samuel nih amah cu mi dawh ngai a si kha a hmuh. ‘Amah hi a si. Amah cung ah chiti kha toih tuah, tiah Jehovah nih a ti. Cubang in Samuel zong nih a tuah. Israel mi hna cung ah David siangpahrang a ṭuan lai nak caan a ra te lai.

1 Samuel 17:34, 35; 16:1-13.



Biahalnak hna

  • Hmanthlak chung i ngakchiapate cu a min hodah a si i, mi ralṭha a si ti kha zeitindah kan hngalh?
  • David cu khuazei ah dah a um i a pa le a pu an min cu hodah a si?
  • Zeicah Jehovah nih Samuel kha Bethlehem i Jesse inn ah kal a fial?
  • Jesse nih a fapale pasarih kha Samuel sinah a ratpi tik hna ah zeidah a cang?
  • David kha an ratpi tikah Jehovah nih Samuel kha zeidah a chimh?

Biahalnak dang hna

  • 1 Samuel 17:34, 35 rel

    Mah a cangmi nih David a ralṭhatnak le Jehovah aa bochannak kha zeitindah a hlei in a langhter? (1 Sam. 17:37)

  • 1 Samuel 16:1-14 rel.

    1 Samuel 16:7 i Jehovah bia nih duhdanh ngeih lo le lenglang muisam zohnak kha hrial awkah zeitindah a kan bawmh? (Lam. 10:34, 35; 1 Tim. 2:4)

    Jehovah nih mi pakhat sinin a thiangthlarau a ṭhial tikah a lawnnak ah thlarau ṭhalo a lut asiloah thil ṭha lo tuah a forhmi chunglei lungput a lut kho ti kha Saul a nunning nih zeitindah a langhter? (1 Sam. 16:14; Matt. 12:43-45; Gal. 5:16)