A ummi cazin ah kal

A ummi cazin ah kal

Tuanbia 53: Jepthah A Biakamnak

Tuanbia 53: Jepthah A Biakamnak
Jepthah fanu

Biakamnak nan tuahmi a hnu ah zulh taktak awk ah a har tiah nan ruahmi a um bal maw? Hi hmanthlak i mipa cu cutin a rak si bal, cucaah a ngaih a chiat ngaimi hi a si. Amah cu Israel ram i ralṭha ngaimi biaceihtu Jepthah a si.

Jepthah cu Israel miphun nih Jehovah an biak ti lo lio caan i a rak nung mi a si. Israel mi hna cu ṭhatlonak kha an tuah ṭhan cang. Cucaah Jehovah nih annih hrem awk ah Ammon miphun kha nawl a pek hna. Cutikah Israel mi hna cu Jehovah sin ah bawmhnak hal in an rak au ṭhan: ‘Nangmah cung ah kan sual cang. Zangfahnak in kan khamh ko sawh!’ an ti.

Jepthah le a mi hna

Mi hna cu ṭhatlonak an tuahmi ruang ah an ngaih a chia. An ngaihchiatnak langhter awk ah Jehovah kha an biak ṭhan. Cucaah Jehovah zong nih annih cu a bawmh ṭhan hna.

A ṭha lomi Ammon mi hna doh awk ah Jepthah cu mi hna nih an thim. Jepthah nih raldohnak ah Jehovah bawmhnak cu a duh ngaingai. Cucaah Jehovah sin ah hitin bia aa kam: ‘Ammon mi hna cung ah teinak na ka pek a si ahcun, teinak in inn lei ka tlun tikah keimah ton awk ah ka innchungkhar mi lak in a ra chuak hmasa bikmi cu nangmah kha kan pek lai.’

Jehovah nih Jepthah a biakamnak cu a ngaih i ral tei awkah a bawmh ve. Jepthah inn lei a kir tik ah, amah ton awk i ara chuak hmasa bikmi cu aho a si ti nan hngal maw? A fa ngeihchunte a fanu cu a si. ‘Maw ka fanu! Ngaihchiatnak na ka pek ai. Sihmanhsehlaw Jehovah sin ah biakamnak ka tuah cang i, ka la ṭhan kho ti lo,’ tiah Jepthah cu a ṭap.

Jepthah a fanu nih a pa biakamnak kong cu a hngalh tikah, a hmasa ahcun amah zong a ngaih a chia ngaingai ve. Zeicahtiah, a pa biakamnak bantuk in, amah cu a pa le a hawikom vialte kha a kaltak hna a hau lai. Shiloh i a biakinn ah Jehovah a rian kha a nun chung dihlak a ṭuan cang lai. Cucaah a pa kha: ‘Jehovah sin i biakamnak na tuah cang a si ahcun, na zulh hrimhrim awk a si ko,’ tiah a ti.

Cucaah Jepthah fanu cu Shiloh ah a kal i, Jehovah biakinn chung ah a chaan chung vialte rian a ṭuan. Kumkhat ah nili chung Israel nu hna nih cuka ah amah kha an va leng tawn i, hmunkhat ah an i nuam tawn. Mi hna nih Jepthah fanu cu an dawt ngaingai. Zeicahtiah amah cu Jehovah salnu ṭha pakhat a rak si.

Biaceihtu 10:6-18; 11:1-40.



Biahalnak hna

  • Jepthah cu ahodah a si i, zei caan ah dah a nun?
  • Jepthah nih Jehovah sinah zei biakamnak dah a tuah?
  • Ammon mi a tei hnanak in a rak kir tikah zeicah Jepthah cu a ngaih a chiat?
  • A pa biakamnak kha a theih tikah Jepthah fanu nih zeidah a chim?
  • Jepthah fanu kha mi hna nih zeicah an dawt?

Biahalnak dang hna

  • Biaceihtu 10:6-18 rel.

    Israel mi hna nih Jehovah cungah zumhawktlak loin an nunnak kong in zei ralrinpeknak dah kan ngaih awk a si? (Biac. 10:6, 15, 16; Rom 15:4; Biat. 2:10)

  • Biaceihtu 11:1-11, 29-40 rel.

    Jepthah nih a fanu kha “khangh thawinak” caah a pekmi cu minung kha mei ah pekchanh a si lo ti kha zeitindah kan hngalh? (Biac. 11:31; Lev. 16:24; Deut. 18:10, 12)

    Jepthah nih a fanu kha zeiti lam indah raithawinak ah a pekchanh?

    Jehovah sin bia aa kamnak cung i Jepthah lungput in zeidah kan i cawn khawh? (Biac. 11:35, 39; Pct. 5:4, 5; Matt. 16:24)

    Jepthah fanu cu caantling rianṭuannak ah aa telmi Khrihfa mino hna caah zeitindah zohchunhawk ṭha a si? (Biac. 11:36; Matt. 6:33; Fil. 3:8)