A ummi cazin ah kal

A ummi cazin ah kal

Tuanbia 48: A Fim Mi Gibeon Khuami Hna

Tuanbia 48: A Fim Mi Gibeon Khuami Hna

Kanaan ram chung khuapi tampi cu Israel mi hna doh awk ah an i tim dih cang. Kan tei khawh hna lai tiah an ruah. Sihmanhsehlaw an pawng i a um mi Gibeon khuami hna nihcun cubang in an rak ruat ve lo. Israel mi hna cu Pathian nih a bawmh hna ti an zumh i, Pathian a domi si cu an duh lo. Cucaah Gibeon khuami hna nih zeidah an tuah ti nan hngal maw?

Lam hlapi i a ummi hna bantuk i lawhter an rak i zuam. Cucaah mi cheukhat nih a ṭet dih cang mi thilpuan le kedan kha an i hruk i an i danh. An laa hna kha songkhoi ṭet an phorhter i, a hlun i a car cangmi changreu kha an i phorh. Cun Joshua sin ah an kal i: ‘A liannganmi nan Pathian Jehovah kong kha kan theih caah a hlat ngaingaimi ram in kan ra. Izipt ram chung i nan caah an tuah piakmi vialte hna kha kan theih. Cucaah kan upa hna nih lam hlapi caah riahcaw i ronh u law va kal u law: ‘Kannih cu nan sal kan si. Kan mah kha ral kan in do hna lai lo tiah bia i kam ko u,’ tiah va nawl hna u an kan ti. Kan hnipuan hna cu kan ratnak lam a hlat tuk caah an ṭet dih i kan changreu hna cu an hlun i an car dih cang,’ tiah an ti.

Joshua le adang upa hna nih Gibeon mi pawl cu an zumh hna. Cucaah anmah doh lo awk ah biakamnak cu an tuah. Sihmanhsehlaw ni thum hnu ah cun Gibeon mi hna cu lam naite taktak ah an um ti kha an hngalh.

‘Zeicahdah a hlat ngaingaimi ram in a ra mi kan si tiah nan kan hlen?’ tiah an hal hna.

Gibeon khuami hna nih: ‘Nan Pathian Jehovah nih Kanaan ram dihlak kha nannih cu pek awk ah bia a kam cang ti kha kan theih caah hi bantuk in kan tuahmi a si. Cucaah nan kan thah sual lai ti kan phang,’ tiah an ti. Sihmanhsehlaw Israel mi hna nih an biakamnak cu an zulh i, Gibeon khuami cu an that hna lo. An sal tu ah an canter hna.

Gibeon khuami hna nih Israel mi hna he remnak an ser caah Jerusalem khua i siangpahrang cu a thin a rak hung. Cucaah adang siangpahrang pali sih ah: ‘Ra u law Gibeon doh awk ah ka bawm tuah u,’ tiah a ti hna. Cutikah siangpahrang panga hna nih an kal i an rak doh hna. A si ahcun Gibeon khuami hna nih Israel mi hna he remnak an ser ruang ah hi siangpahrang hna nih anmah cu an doh hna caah cutin an tuah cu an fim kan ti kho hnga maw? Kan zoh hmanh lai.

Joshua 9:1-27; 10:1-5.

Joshua le Gibeon khuami hna


Biahalnak hna

  • Zeitindah Gibeon mi hna cu an pawngkam Kanaan khuami hna he an i thleidan?
  • Hmanthlak ah langhter a si bantukin, Gibeon mi hna nih zeidah an tuah, zeicah?
  • Joshua le Israel mi hruaitu hna nih Gibeon mi hna kha zei bia dah an kamh hna, sihmanhsehlaw nithum a rauh hnuah zeidah an hngalh ṭhan?
  • Gibeon mi hna nih Israel mi he daihnak an tuah ti kha khua dang siangpahrang hna nih an theih tikah zeidah a cang?

Biahalnak dang hna

  • Joshua 9:1-27 rel.

    Jehovah nih “cuka ram chungmi vialte hna kha hrawh dih awkah” Israel mi kha nawl a pek cang hna nain, Gibeon mi hna kha luatnak a pekmi nih zei a sining dah a langhter? (Josh. 9:22, 24; Matt. 9:13; Lam. 10:34, 35; 2 Pit. 3:9)

    Gibeon mi hna sin i a biakamnak a hlawtlonak thawngin nihin Khrihfa hna caah Joshua nih zohchunhawk ṭha kha zeitindah a langhter? (Josh. 9:18, 19; Matt. 5:37; Efe. 4:25)

  • Joshua 10:1-5 rel.

    Gibeon mi Gibhna kha nihin mibu nganpi nih zeitindah an i zohchunh, cucaah aho hmuichon dah an hun si? (Josh. 10:4; Zek. 8:23; Matt. 25:35-40; Biat. 12:17)