A ummi cazin ah kal

A ummi cazin ah kal

Tuanbia 46: Jeriko Khua Ralhau

Tuanbia 46: Jeriko Khua Ralhau

Hi Jeriko khua ralhau cu zei nih dah a cimh ter dih? Bom nganpi nih tlak seh law cu bang in a si ko. Sihmanhsehlaw cu chan lio ah cun bom cu an rak ngei lo, meithal hmanh an rak ngei rih lo. Hi cu Jehovah nih a tuahmi a dang khuaruahharnak pakhat a si! Zeitindah a rak si cawng hmanh u sih!

Jeriko ralhau a cimh lio

Jehovah nih Joshua kha zeidah a rak chimh ngai hmanh u: ‘Nangmah le na ralkap vialte nih khua cu nan vel lai. Nikhat voikhat in, ni ruk chung nan vel lai. Biakamnak kuang kha nan i kalpi lai. Tlangbawi pasarih cu a hmai ah an kal lai i saki kha an tum lai.

‘Ni sarihnak ni ah cun khua cu voi sarih nan vel lai. Cun saki kha saupi nan tum lai i, cun mi vialte kha ral tuknak aw he fakpi in na au ter hna lai. Cutikah ralhau cu a cim lai!

Jehovah a chim bang in Joshua le mi hna nih cun an tuah. Khua an vel lio ah cun an zapi dai tein an kal. Ahohmanh bia ka khat te hmanh an chim lo. Saki thawng le mi kal thawng lawng theih a rak si. Jeriko khua chung i Pathian miphun an ral hna cu an rak ṭih ngai ko lai. Thlalangawng cung in aa thlaimi, khi hri sen khi nan hmu maw? Khi cu aho a thlalangawng dah a si? A si, Rahab nih cun mingiatu pahnih nih an rak chimh bang in a tuah. A innchungkhar mi vialte cu inn chung ah an um i an rak zoh ko.

Joshua

A donghnak ah, ni sarihnak ni ah, khua kha voi sarih an vel hnu ah saki cu an tum i, ralkap hna cu an au i ralhau cu a cim. Cu hnu ah Joshua nih: ‘Khua chung i mi vialte kha that dih hna u law khua zong kha mei in khang dih u. Sui, ngun, dar le thir lawng kha nan lak lai i Jehovah inn i chawva caah nan pek lai,’ a ti hna.

Mingiatu pahnih sin ah khan Joshua nih: ‘Rahab a inn chung ah khan lut u law amah le a innchungkhar mi vialte kha hun chuahpi hna u,’ a ti hna. Mingiatu hna nih bia an kam bang in Rahab le a innchungkhar mi cu an rak luat taktak.

Joshua 6:1-25.



Biahalnak hna

  • Jehovah nih ralkap hna le tlangbawi hna kha niruk chung zei tuah awk dah a chimh hna?
  • Mi hna nih ni sarihnak ni ah zeidah an tuah lai?
  • Hmanthlak chungah na hmuh bantukin Jeriko ralhau cu zeidah a can?
  • Zeicah hri sen cu thlalangawng ah aa thlai?
  • Joshua nih ralkap hna kha mi hna le khua kha zeitin tuah awk dah a chimh hna, sihmanhsehlaw sui, ngun, dar le thir hna kongah tah zeitin?
  • Mingiatu pahnih kha zeidah an tuahter hna?

Biahalnak dang hna

  • Joshua 6:1-25 rel.

    Hi ni hmanung bik caan ah Jehovah Hngaltu hna i phungchimnak rian cu Israel mi hna nih Jeriko khua an velmi ni sarihnak ni he zeitindah aa lawh? (Josh. 6:15, 16; Isa. 60:22; Matt. 24:14; 1 Kor. 9:16)

    Joshua 6:26 ah ṭialmi profet bia cu kum 500 tluk a rauh hnuah zeitindah a tlin i, mah nih Pathian bia kongah zeidah a kan cawnpiak? (1 Si. 16:34; Isa. 55:11)