A ummi cazin ah kal

A ummi cazin ah kal

Tuanbia 37: Biaknak Caah Thlam

Tuanbia 37: Biaknak Caah Thlam

Hi inn cu zeidah a si nan hngal maw? Hi cu Jehovah biaknak caah phun dang tein sakmi thlam pakhat a si. Hi cu biaknak thlam ti zong in an auh. Mi hna nih hi inn sak cu Izipt ram in an chuahnak in kumkhat hnu ah an dih. Cu inn sak awk cu aho ruahnak dah a si nan hngal maw?

Thlam

Jehovah ruahnak a si. Moses cu Sinai Tlang cung i a rak um lio ah khan, Jehovah nih zeitindah sak awk a si ti cu a rak chimh. Fawi tein phoih khawh awk in a rak sak ter hna. Cutin an sak lawng ah hmundang i an i ṭhial tik ah an phorh khawh lai i, cuka ah cun an va sak ṭhan khawh colh lai. Cucaah Israel mi hna cu ramcar chung i hmunkhat hnu hmunkhat i an rak i ṭhial lio ah khan, cu thlam cu an rak phorh leng mang tawn.

Hi thlam khatlei kam a donghnak i a khaan hmete chung ah na zoh ah cun, kuang a si lo ah bawm pakhat na hmuh lai. Hi cu biakamnak kuang ti a si. Kuang khatlei kam le khatlei kam ah sui in ser mi vancungmi a si lo ah cherub pahnih an um. Hmasa lungtlap hna kha Moses nih a khuai cang caah Pathian nih Nawlbia Pahra cu lungtlap pahnih cung ah a ṭial ṭhan. Cu lungtlap pahnih cu biakamnak kuang chung ah cun an chiah hna. Cun manna um pakhat zong a chung ah cun chiah a si ve. Manna cu zeidah a si nan hngal ti maw?

Moses upa Aaron cu tlangbawi ngan caah Jehovah nih a thimmi a si. Amah nih cun mi hna cu Jehovah biaknak ah a hruai hna. A fapale zong tlawngbawi an si ve.

Cun atu cu thlam i a ngan deuhmi a khaan kha zoh tuah u. A hme deuh mi khaan nak in let hnih in a ngan deuh. Meikhu a chuakmi kuang a si lo ah bawm hmete hi nan hmu maw? Hi cu tlangbawi hna nih rimhmui ti mi a hmui mi thil an khanghnak biakṭheng a si. Cun mei-inn pasarih a ngei mi mei-inn tung pakhat a um ve. A khaan chung i a pathumnak thil cu cabuai pakhat a si. Cu cung ah cun changreu tlang 12 an chiah.

Thlam biak-inn tual ah ti a khat mi kheng a si lo ah maihum nganpi pakhat a um. Hi cu tlangbawi hna nih kholhnak ah an hman. Biakṭheng nganpi pakhat zong a um fawn. Cuka ah cun thah mi saram hna cu Jehovah sin thawinak caah an khangh tawn hna. Cun cu thlam biak-inn cu an riahnak riahhmun laifang ah a um i, Israel mi hna cu thlam biak-inn velchum ah anmah le an thlam cio chung ah an um.

Exodus 25:8-40; 26:1-37; 27:1-8; 28:1; 30:1-10, 17-21; 34:1, 2; Hebru 9:1-5.



Biahalnak hna

  • Hmanthlak chung i inn cu zeitindah an auh i zeicaah dah an hman?
  • Thlam kha fawi tein phoih khawh awk in na tuah lai tiah zeicah Jehovah nih Moses kha a chimh?
  • Thlam khatlei kam a donghnak khaan hmete chungah a ummi cu zei kuang dah a si i kuang chungah zeidah a um?
  • Ahodah tlangbawi ngan ah thim a si i tlangbawi ngan nih zeidah a tuah?
  • Thlam i a ngan deuhmi khan chungah a ummi thil pathum an min kha chim.
  • Thlam biakinn tual ah zei thil pahnih dah a um i zeicaah dah an hman?

Biahalnak dang hna

  • Exodus 25:8-40; 26:1-37; 27:1-8; le 28:1 rel.

    “Bia hngalhternak kuang” cung i cherub nih zeidah an aiawh? (Ex. 25:20, 22; Nam. 7:89; 2 Si. 19:15)

  • Exodus 30:1-10, 17-21; 34:1, 2; le Hebru 9:1-5 rel.

    Zeicah Jehovah nih thlam ah rian a ṭuanmi tlangbawi hna caah pumsa lei thianhlimnak ngeih peng a biapitnak kha a hlei in a langhter, mahnih cun nihin kanmah kha zeidah a kan tuahter awk a si? (Ex. 30:18-21; 40:30, 31; Heb. 10:22)

    Lamkaltu Paul nih Hebru Khrihfa hna sin i a cakuat a ṭial lio caan ah thlam le biakamnak Nawlbia cu a dong cang ti kha zeitindah a langhter? (Heb. 9:1, 9; 10:1)