A ummi cazin ah kal

A ummi cazin ah kal

Tuanbia 35: Jehovah Nih Nawlbia A Pek Hna

Tuanbia 35: Jehovah Nih Nawlbia A Pek Hna

Izipt in an chuahnak in thla hnih hrawng hnu ah, Israel mi hna cu Horeb tiah zong an ti mi Sinai Tlang an hung phan. Hi cu Jehovah nih Moses sin ah a kang mi burbuk chung in bia a rak chimnak hmun kha a si. Mi hna cu cuka ahcun an riak i caan tlawmpal cu mahka ah cun an rak cam.

Mi hna nih a tanglei in an hngah lio ah, Moses cu tlang cung ah cun a hung kai. Cuka tlangpar ah cun Jehovah nih Israel mi hna cu Amah bia ngai hna seh law hawi hlei in a ngeih mi Amah miphun si hna seh ti a duhnak kong cu Moses sin ah a rak chim. Moses cu a rung ṭum tik ah, Jehovah nih a chimhmi cu Israel mi hna kha a chimh hna. Cun mi hna Jehovah nih hawi hlei in a ngeihmi miphun si an duh caah a bia cu kan ngaih lai tiah an rak ti.

Cutik ah Jehovah nih khuaruahhar thil pakhat a rak tuah. Tlangpar khan meikhu a chuah ter i khuari thawng fakpi zong a chuah ter. Mi hna zong kha: ‘Keimah cu Jehovah nan Pathian, Izipt ram in an chuahpitu hna ka si,’ tiah a ti hna. Cu hnu ah: ‘Keimah hlei lo pathian dang zei hmanh nan bia lai lo,’ tiah nawl a pek hna.

Lungtlap pahnih

Pathian nih Israel mi hna cu nawlbia dang pakua zong a pek rih hna. Mi hna cu an ṭih ngaingai. Moses sin ah: ‘Bia cu kan sin ah nangmah nih chim ko, zeicahtiah Pathian nih kan sin ah bia cu a chim ahcun kan thi dih sual lai ti kan phang,’ tiah mi hna nih cun an rak ti.

Cu hnu ah Jehovah nih Moses sin ah: ‘Ka sin ah tlang cung ah hung kai. Mi hna nih zul hna seh ti ka duh mi nawlbia ka ṭialnak lung tlap pahnih kha kan pek lai,’ tiah a ti. Cucaah Moses cu tlang cung ah cun a hung kai ṭhan. Ni 40 le zan 40 cuka ah cun a hung um.

Pathian cu a mi hna caah nawlbia tampi a ngei. Moses nih cu nawlbia hna cu a ṭial hna. Pathian nih Moses cu lung tlap hnih zong cu a pek. Cu cung ah cun, Pathian amah theng nih nawlbia 10, mi vialte sin i a chimmi cu a rak ṭial. Annih cu Nawlbia 10 tiah auh an si.

Moses Sinai Tlang ah a um lio

Nawlbia Pahra cu a biapi ngai mi nawlbia an si. Israel mi hna sin ah Pathian nih a pek mi hna nawlbia dang vialte zong cu an biapi ngai ve ko. Cu nawlbia hna lak i pakhat cu: ‘Jehovah nan Pathian kha nan lung dihlak, nan nunnak dihlak le nan ṭhawnnak dihlak in nan dawt lai,’ ti a si. Cun a dang pakhat cu: ‘Na innpa kha nangmah lila bang in na dawt lai,’ ti a si. Pathian Fapa, Jesuh Kri zong nih hi pahnih cu Jehovah nih a miphun Israel mi hna sin ah a rak pekmi nawlbia vialte lak ah a ngan bikmi nawlbia an si tiah a rak ti. A hnu deuh ah Pathian Fapa le a cawnpiaknak kong tampi cu kan cawng te hna lai.

Exodus 19:1-25; 20:1-21; 24:12-18; 31:18; Deuteronomi 6:4-6; Levitikas 19:18; Matthai 22:26-40.



Biahalnak hna

  • Izipt ram in an chuah hnu thla hnih hnu ah Israel mi cu khuazei ah dah an riah?
  • Jehovah nih mi hna kha zei a duhnak dah tuah awk a chimh hna i an lehnak cu zeidah a si?
  • Zeiruangah Jehovah nih Moses kha lung tlap hnih a pek?
  • Nawlbia Pahra lengah zei nawlbia hna dah Jehovah nih Israel mi kha a pek hna?
  • Jesuh nih a ngan bik tiah a chimmi nawlbia pahnih cu zeidah an si?

Biahalnak dang hna

  • Exodus 19:1-25; 20:1-21; 24:12-18; le 31:18 rel.

    Khrihfa pumpeknak kan tuahmi ah zeidah aa tel ti kan theihthiam nakhnga Exodus 19:8 ah ṭialmi nih zeitindah a kan bawmh? (Matt. 16:24; 1 Pit. 4:1-3)

  • Deuteronomi 6:4-6; Levitikas 19:18; le Matthai 22:36-40 rel.

    Khrihfa hna nih Pathian le innpa an dawtnak kha zeitindah an langhter? (Mar. 6:34; Lam. 4:20; Rom 15:2)