A ummi cazin ah kal

A ummi cazin ah kal

Tuanbia 50: Ralṭha Mi Nu Pahnih

Tuanbia 50: Ralṭha Mi Nu Pahnih

Israel mi hna cu harnak an phanh tikah Jehovah sin ah bawmhnak an hal tawn. Jehovah nih anmah bawmh awk ah ralṭha mi hruaitu a pek tawn hna. Baibal nih cu hruaitu pawl cu biaceihtu tiah a ti hna i, Joshua cu hmasa bik biaceihtu a si. Amah hnu in biaceihtu cheukhat hna cu Othniel, Ehud le Shamkar an si. Sihmanhsehlaw Israel mi a rak bawm mi hna lak i nu pahnih hna cu Deborah le Jael an si.

Deborah nih Barak a chawnh lio

Deborah cu profet a si. Jehovah nih hmailei a tlung hnga mi kong a chimh tawn i amah nih Israel mi hna cu Jehovah a chimmi cu a chimh ṭhan tawn hna. Deborah cu biaceihtu zong a si ve. Tlang ram ah khan ungkung pakhat tang ah a ṭhu i, mi hna cu an bia ceihpiak awk ah amah sin ah an ra tawn.

Cu lio caan ah cun Jabin cu Kanaan siangpahrang a si. Amah cu ral tuknak rangleng 900 a rak ngei. A ralkapbu cu an ṭhawng ngai i cucaah Israel mi tampi cu Jabin a sal ah canter an rak si. Siangpahrang Jabin a ralbawi ngan bik cu Sisera a si.

Nikhat cu Deborah nih Biaceihtu Barak kha a kawhter hna i: ‘Jehovah nih: “Mi 10,000 la hna law Tabor Tlang lei ah kalpi hna. Cuka ah cun Sisera kha na sin ah ka ratpi lai. Amah le a ralkap cung ah teinak kan pek lai,” an ti,’ tiah a chimh.

Barak nih: ‘Ka sin i na kal ve ah cun ka kal lai,’ tiah Deborah cu a ti. Cucaah Deborah cu a rak kal ve, sihmanhsehlaw Barak sin ah cun: ‘Ral teinak ruang ah nang cu min ṭhatnak na hmu lai lo, zeicahtiah Jehovah nih Sisera cu nu pakhat kut ah a pek lai,’ a ti. Cun a chim bantuk in a rak si taktak.

Barak cu Tabor tlang in Sisera a ralkap pawl ton awk ah a vung kal. Chikkhatte ah Jehovah nih tilian a tlunter i, an ralkap tampi cu ti chung ah an pil i an thi dih. Sihmanhsehlaw Sisera cu a rangleng in a ṭum i a zam.

Barak, Jael le Sisera

Tlawmpal hnu ah Sisera cu Jael a thlam a hung phan. A thlam chung ah cun luh awk ah a sawm i, cawhnuk tlawmpal a pek. Cuhnu ah a mit a ku i, thu hluahmah in aa hngilh. Cutikah Jael nih puan thlam khenhnak fung zum aa lak i hi mi ṭhalopa lu ah a khenh. A hnu i Barak a rat tik ah, mithipa Sisera cu amah kha a hmuhsak! Cucaah Deborah nih a chimmi cu a hmaan ti nan hngalh ko cang lai.

A donghnak ah siangpahrang Jabin zong cu thah a si ve i, Israel mi hna cu caan tlawmpal chung daihnak an rak ngei ṭhan.

Biaceihtu 2:14-22; 4:1-24 5:1-31.



Biahalnak hna

  • Biaceihtu hna cu ahote dah an si i, cheukhat hna i an min cu hodah an si?
  • Deborah nih a hleikhunmi zei rian dah a hmuh i, mah chungah cun zeidah aa tel?
  • Israel mi kha siangpahrang Jabin le a ralbawi Sisera nih an tlerhkhawnh hna tikah Deborah nih Jehovah sinin a hmuhmi zei bia dah Barak kha a chimh i, min ṭhatnak a hmumi cu aho a si lai ti in dah a chim?
  • Jael nih ralṭha minu a si kha zeitindah a langhter?
  • Siangpahrang Jabin a thih hnu ah zeidah a cang?

Biahalnak dang hna

  • Biaceihtu 2:14-22 rel.

    Israel mi hna nih Jehovah thinhunnak kha an cungah anmah tein zeitindah an tlunter i mah in khan zei cawn awk dah kan i lak khawh? (Biac. 2:20; Ptb. 3:1, 2; Ezek. 18:21-23)

  • Biaceihtu 4:1-24 rel.

    Nihin Khrihfa nu hna nih zumhnak le ralṭhatnak kongah Deborah le Jael i zohchunhawk an nunning in zeidah an i cawn khawh? (Biac. 4:4, 8, 9, 14, 21, 22; Ptb. 31:30; 1 Kor. 16:13)

  • Biaceihtu 5:1-31 rel.

    Barak le Deborah nih teinak hla an sakmi kha a ra laimi Armagedon raldohnak kong he a tlaimi thlacamnak ah zeitindah kan hman khawh? (Biac. 5:3, 31; 1 Chan. 16:8-10; Biat. 7:9, 10; 16:16; 19:19-21)