A ummi cazin ah kal

A ummi cazin ah kal

Tuanbia 32: Harnak Phun 10

Tuanbia 32: Harnak Phun 10

Hmanthlak hi zoh hmanh u. Hi pakhat cio nih hin Izipt ram cung ah Jehovah nih a chuahtermi harnak pakhat cio an langhter. Hmasa bik hmanthlak ahcun Aaron nih Nail Tiva cu a ṭhiangṭhunh in a tukmi nan hmuh lai. Cu tin a tuah tik ah, tiva chung ti vialte cu thisen ah an cang dih. Nga cu an thi i, ti cu a thu i a nam dih.

Izipt mi hna cung ah rai a tlung

A pahnihnak ah, Jehovah nih Nail Tiva chung in utlak a chuah ter hna. Cu utlak cu hmunkip ah an um-tappi chung, changreu sernak um chung, ih­khun cung te hna, cun khoika paoh ah an um dih. Utlak an thih tik ah Izipt mi hna nih a pon in an pon hna i, an ram vialte cu a thu i a nam dih.

Cu hnu ah Aaron nih vawlei kha a ṭhiangṭhunh in a tuk i, leidip cu fikfa ah an cang dih. Seh hmang mi a zuang khomi hmaifa phunkhat an si. Fikfa cu Izipt ram chung i a tlungmi harnak a pathumnak a si.

Cu hnu i a tlungmi rai hna cu Izipt mi hna cung lawng ah a tlung i Israel mi hna cu a tong ti hna lo. A palinak ah tho ngan pipi cu Izipt mi hna inn chung ah a bubu in an lut. A panganak cu saram cung ah a rak si. Izipt mi hna an caw le tuu le meheh tampi an rak thi.

Cu hnu ah, Moses le Aaron nih vutcam cheukhat an lak i, thlitu lak ah an rak vorh. Minung le saram cung ah hmachia an chuah ter. Mah cucu a paruknak rai a si.

Khi hnu ah Moses nih van lei ah a kut a hler i, Jehovah nih khuari le rial a rak thlah. Izipt ram i a tlung balmi rial tlaknak lak ah a fak bikmi a si.

Rai pariatnak cu khaubok bu nganpi in a si. Cutluk khaubok tam mi cu voikhat hmanh a rak um bal lo i a hnu zong ah a um bal ti lo. Rial nih a hrawh lomi thil vialte kha an ei dih.

Rai a pakuanak cu muihnak a rak si. Ni thum chung an ram cu muihnak nih a rak khuh, sihmanhsehlaw Israel mi hna cu an umnak ah ceunak an hmu ko.

A donghnak ah, Pathian nih a mi hna cu meheh fa pakhat maw tuu fa pakhat maw a thi kha an innka tung ah thuh awk ah a rak chimh hna. Cu hnu ah Pathian vancungmi pakhat cu Izipt ram ah khan aa rak i chawk. Vancungmi nih thi a hmuh tik paoh ah, khi inn chung i a um mi hna cu pakhat hmanh a rak that hna lo. Sihmanhsehlaw an innka tung i thi a um lo nak inn vial te chung ah cun, Pathian vancungmi nih minung he saram he fater paohpaoh kha a thah dih hna. Mah cucu rai pahra nak a si.

Hi hmanung bik rai hnu lawng ah Faraoh nih Israel mi hna cu chuak u tiah a ti hna. Pathian mi hna cu kal awk ah timh cia an rak si i, cu zan theng te ah cun Izipt ram in cun an rak chuak.

Exodus a ngan 7 in 12.



Biahalnak hna

  • Mahka hmanthlak i a langmi hi zoh in Jehovah nih Izipt mi hna cungah a tluntermi a hmasa harnak phunthum kha chim?
  • Hmasa harnak phunthum le a taangmi harnak an i dannak cu zeidah a si?
  • Palinak, panganak le paruknak harnak hna cu zeidah an si?
  • Pasarih, pariat le pakuanak harnak hna cu chim tuah.
  • Harnak pahranak a tlun hlan ah Jehovah nih Israel mi hna kha zeidah a chimh hna?
  • Harnak pahranak cu zeidah a si i mah harnak a dih hnu ah zeidah a cang?

Biahalnak dang hna

  • Exodus 7:19- 8:23 rel.

    Izipt camhthiam pawl nih Jehovah i hmasa harnak phunhnih he aa khatmi khuaruahhar thil kha an tuah khawh ve nain harnak pathumnak hnu in zeidah al kho loin an cohlan? (Ex. 8:18, 19; Matt. 12:24-28)

    Harnak palinak ah Jehovah nih a mi pawl cu a huhphenh khawh hna ti kha zeitindah a langhter i mah kan hngalhnak thawngin Pathian a mi pawl nih chimchungmi “harnak nganpi” kha an ton tikah zeitindah an ruah lai? (Ex. 8:22, 23; Biat. 7:13, 14, NW; 2 Chan. 16:9)

  • Exodus 8:24; 9:3, 6, 10, 11, 14, 16, 23-25;10:13-15, 21-23 rel.

    Harnak Phunhra in zei mibu pahnih dah langhter an si i mah nih khan nihin mah mibu pahnih cungah zei hmuhnak dah a kan ngeihter? (Ex. 8:10, 18, 19; 9:14)

    Exodus 9:16 nih zeicah Jehovah nih atu tiangin Satan kha umnak nawl a pek rih ti hngalhthiam awkah zeitindah a kan bawmh? (Rom 9:21, 22)

  • Exodus 12:21-32 rel.

    Zeitindah lanhtak puai nih mi vialte caah luatnak a ser khawh i lanhtak puai nih a sawh duh chanmi cu zeidah a si? (Ex. 12:21-23; Johan 1:29; Rom 5:18, 19, 21; 1 Kor. 5:7)