A ummi cazin ah kal

A ummi cazin ah kal

Tuanbia 31: Moses le Aaron nih Faraoh An Ton

Tuanbia 31: Moses le Aaron nih Faraoh An Ton

Moses cu Izipt ram i a kir ṭhan hnu ah, a hmuhmi khuaruahharnak kong vialte kha a u Aaron cu a chimh dih. Cun Moses le Aaron nih Israel mi hna kha cu khuaruahharnak hna cu an hmuhsak tik hna ah, mi vialte nih annih cu Jehovah nih a umpi hna ti kha an zumh hna.

Cuhnu ah Moses le Aaron cu Faraoh ton awk ah an va kal. Annih nih a sin ah: ‘Israel Pathian Jehovah nih, “Ka mi hna cu thetse ram ah an ka biak khawh nak hnga nithum chung kal ter hna seh,” an ti’ tiah an chimh. Sihmanhsehlaw Faraoh nih cun: ‘Jehovah cu ka zum lo. Cun Israel zong ka kal ter kho lo,’ tiah a leh hna.

Mi hna nih Jehovah kha biak awk ah rian in i dinh kha an duh caah Faraoh cu a thin a rak hung. Cucaah annih cu fak deuh in rian a ṭuan ter hna. Cubantuk in fak deuh in rian an ṭuan ter hna ruang ah khan Israel mi hna nih Moses kha an mawhchiat i, Moses cu a ngaih a rak chia ngaingai. Sihmanhsehlaw Jehovah nih amah cu na thin phang hlah tiah a rak chimh. ‘Ka mi hna cu kal ter hrimhrim awk in Faraoh cu ka tuah lai,’ tiah Jehovah nih a ti.

Moses le Aaron cu Faraoh hmai ah an dir

Cun Moses le Aaron cu Faraoh ton awk ah cun an va kal ṭhan. Cu tan cu khuaruahhar thil pakhat an tuah. Aaron nih a ṭhiangṭhunh kha a hlonh i rul nganpi ah aa cang. Sihmanhsehlaw Faraoh a mifim pawl zong nih an ṭhiangṭhunh cu an hlonh ve i, rul ah cun an i cang ve. Asinain, zoh hmanh u! Aaron a rul nih mifim pawl an rul vialte cu a dolh dih hna. Cu tiang hmanh ah cun Faraoh nih Israel mi pawl cu a kal ter duh rih hna lo.

Cucaah Faraoh kha Jehovah nih fimnak a peknak ding caan a phan cang. Zeitindah a rak tuah ti nan hngal maw? Cucu Izipt ram cung ah rai phun 10 a si lo ah harnak phun 10 a tlun ter nak thawng in a si.

Rai phun tampi a tlun hnu ah Faraoh nih Moses cu a auh ter hna i: ‘Rai cu daih ter ko cang law Israel cu ka kal ter ko cang lai,’ a rak ti. Sihmanhsehlaw rai a dih tik ah cun Faraoh cu a lung kha aa thleng ṭhan tawn. Mi hna kha a kal ter duh ṭhan tawn hna lo. Asinain a donghnak ah, rai phun hra nak hnu in Faraoh nih Israel mi hna cu a rak thlah hna.

Rai phun 10 hna cu zei an si ti nan hngal hna maw? Mah kong cu cawng hmanh u sih.

Exodus 4:27-31; 5:1-23; 6:1-13,26-30; 7:1-13.



Biahalnak hna

  • Moses le Aaron nih Israel mi hna sin i khuaruahhar thil an tuahmi nih zei ṭhatnak dah a chuahter?
  • Moses le Aaron nih Faraoh kha zeidah an chimh i Faraoh i a leh hnanak cu zeidah a si?
  • Hmanthlak chungah kan hmuh bantukin Aaron nih a ṭhiangṭhunh kha a hlonh tikah zei ah dah aa can?
  • Jehovah nih Faraoh kha zeitindah fim a chimh i Faraoh nih zeitindah a rak leh?
  • Rai phun hra nak a dih hnu ah zeidah a cang?

Biahalnak dang hna

  • Exodus 4:27-31; le 5:1-23 rel.

    “Jehovah cu ka hngal lo” tiah a ti tikah Faraoh nih zeidah a chim duhmi a si? (Ex. 5:2, NW; 1 Sam. 2:12; Rom 1:21)

  • Exodus 6:1-13, 26-30 rel.

    Jehovah nih Abraham, Isak le Jakob sinah amah le amah kha zeiti lam in dah aa hngalhter hna lo? (Ex. 3:13, 14; 6:3; Gen. 12:8)

    Moses nih rian pek a simi kha ka thiamnak nih a phan lo tiah a ruah ko nain Jehovah nih a hman ṭhiam mi kan hngalhnak nih zeitindah ruahnak a kan ngeihter? (Ex. 6:12, 30; Luka 21:13-15)

  • Exodus 7:1-13 rel.

    Moses le Aaron nih Jehovah biaceihnak kha ralṭha tein Faraoh sinah an chim tikah nihin Pathian salle caah zei zohchunhawk dah an chiah? (Ex. 7:2, 3, 6; Lam. 4:29-31)

    Jehovah nih Izipt pathian hna nakin a ṭhawng deuhmi a sinak kha zeitindah a langhter? (Ex. 7:12; 1 Chan. 29:12)