A ummi cazin ah kal

A ummi cazin ah kal

Tuanbia 30: A Kang Mi Burbuk

Tuanbia 30: A Kang Mi Burbuk

Moses cu a tuu pawl caah ram kawl pah in Horeb tlang kha a hung phan. Cuka ah cun burbuk pakhat chung in mei a alh hluahmahmi kha a hmuh, asinain burbuk cu a kang fawn lo.

A kang mi burbuk hmai i Moses

‘Hi cu khuaruah har awk a si, ka va naih deuh lai i ṭha tein ka zoh tuah lai,’ tiah Moses nih a ruah. A hei naih tik ah cun burbuk chung in aw pakhat a hung chuak i: ‘Ra naih deuh ti hlah. Na kedan kha i phoih, zeicahtiah na dirnak hmun kha hmun thiang a si,’ a ti. Cucu vancungmi hmang in Pathian nih bia a chimmi a si. Cucaah Moses cu a hmai kha aa rak i khuh.

Cu hnu ah Pathian nih: ‘Izipt ram ah ka mi hna cu zeitluk in dah harnak an in ti kha ka hmuh cang. Cucaah anmah kha ka luat ter cang hna lai i, nangmah cu ka mi hna Izipt ram in chuahpi awk ah kan thlah lai,’ a ti. Jehovah nih a mi hna cu aa dawh ngaimi Kanaan ram ah kalpi awk ah aa tim cang.

Sihmanhsehlaw Moses nih cun: ‘Kei cu zeihmanh ka si ṭung lo. Zeitindah mah cu ka tuah khawh lai? Ka va kal hmanh ah Israel mi hna nih: “Aho nih dah a rak in thlah?” tiah an ka ti ko lai. Cutik ah zeitindah ka chim lai’? a rak ti.

Pathian nih hitin na va chim lai:’ “Abraham Pathian, Isak Pathian, Jakob Pathian, Jehovah nih keimah cu nan sin ah a rak ka thlah,” tiah na chimh hna lai,’ a ti. Cun Jehovah nih: ‘Hi cu zungzal in ka min a si lai,’ tiah a chap rih.

Moses nih: ‘Sihmanhsehlaw nang mah nih na ka thlah tiah ka chim tik ah an ka zumh lo sual ah tah,’ tiah a leh rih.

Pathian nih: ‘Na kut chung i kha zeidah a si?’ tiah a hal.

Moses nih: ‘Ṭhiangṭhunh,’ tiah a leh.

Pathian nih: ‘Vawlei ah hlonh tuah,’ tiah a ti. Moses nih a hlonh tik ah, ṭhiangṭhunh cu rul ah a cang. Cu hnu ah Jehovah nih Moses cu khuaruahhar thil pakhat a hmuhsak rih. ‘Na kut kha na angkileng chung ah khan vun nok tuah,’ a ti ṭhan. Moses nih a chim bangin a tuah i a kut kha a chuah ṭhan tik ah, hawhra bangin a rang! A kut cu thinghmui zawtnak a ngei mi bantuk ah a cang. Khi hnu ah Jehovah nih Moses cu a pathumnak khuaruahhar tuah khawh nak ṭhawnnak kha a rak pek. A donghnak ah: ‘Hi khuaruahharnak hna na tuah tik ah, Israel mi hna nih keimah nih kan thlah cu an in zumh cang lai,’ tiah a ti.

Khi hnu ah Moses cu inn ah a tlung i Jethro sin ah cun: ‘Zangfahnak in ka rualchan hna cu zeitindah an si ti zoh awk ah Izipt ram ah kalnak nawl ka pe ko,’ ti in a nawl. Cucaah Jethro nih, ‘dam tein vung kal ko,’ tiah a ti i, Moses cu Izipt ram lei ah cun a kal ṭhan.

Exodus 3:1-22; 4:1-20.



Biahalnak hna

  • Hmanthlak chung i tlang a min cu zeidah a si?
  • Moses cu a tuu pawl he tlang cung i a kai lio ah khuaruahhar thil zeidah a hmuh kha chim.
  • Burbuk chungin aw nih zeidah a chim i aho aw dah a si?
  • Pathian nih a mi hna kha Izipt ram in luatter awkah na hruai hna lai tiah a chimh tikah Moses nih zeitindah a rak leh?
  • Mi hna nih aho nih dah an thlah tiah an hal tikah zei chim awk dah Pathian nih Moses kha a chimh?
  • Pathian nih a ka thlah ti kha zeitindah Moses nih a langhter khawh lai?

Biahalnak dang hna

  • Exodus 3:1-22 rel.

    Moses a hmuhtonnak nih theocratic rian kha tlamtling tein kan ṭuan kho lai lo tiah kan ruah tikah Jehovah nih a kan ṭanpi lai tiah zeitindah zumhnak a kan ngeihter? (Ex. 3:11, 13; 2 Kor. 3:5, 6)

  • Exodus 4:1-20 rel.

    Midian ah kum 40 chung a um lio ah Moses i zei lungput kha dah aa thleng i Khrihfa bu tinvo hmuh a duhmi hna nih mah in khan zeidah an i cawn khawh? (Ex. 2:11, 12; 4:10, 13; Mik. 6:8; 1 Tim. 3:1, 6, 10)

    Jehovah nih a bupi hmangin a kan chimhhrin hmanhah Moses i zohchunhawk a nunning nih zeidah a kan zumhter khawh? (Ex. 4:12-14; Salm 103:14; Heb. 12:4-11)