A ummi cazin ah kal

A ummi cazin ah kal

Tuanbia 29: Moses A Zamnak Kong

Tuanbia 29: Moses A Zamnak Kong

Izipt ram in Moses a zam lengmang lio hi zoh hmanh u. Amah a dawimi hna hi nan hmu hna maw? Zeicah Moses cu thah an duh hnga nan hngal maw? Kan hngal kho hnga maw zoh tuah u sih.

Moses Izipt ram in a zaam lio

Moses cu Izipt ram uktu Faraoh a inn chung ah a ṭhang. Amah cu a fim ngai i a lianngan ngaimi a si. Moses nih cun Izipt mi a si lo i, a nu le a pa cu Israel mi, sal an si ti kha a hngalh.

Nikhat cu kum 40 a si lio ah, Moses nih a miphun hna cu zeitin dah an um ti hngalh awk ah va zoh awk ah aa rak i tim. An hrem ning hna cu ṭihnung ngai a rak si. Izipt mipa pakhat nih Israel mi salpa pakhat a tuk len ko kha a va hmuh. Moses nih a pawngkam a zoh i aho hmanh a hmuh hna lo tik ah Izipt mipa cu a tuk i, Izipt mipa cu a thi. Cun a ruak cu Moses nih thetse chung ah a thuh.

A thaizing ah Moses nih a mi hna va zoh awk ah a kal ṭhan. Sal cannak in ka luatter khawh te rua hna lai tiah a rak ruah. Asinain Israel mi pahnih an rak i velh len ko kha a va hmuh hna. Cucaah Moses nih a palh deuh mi pa kha: ‘Zeicah na unaupa kha na velh len ko?’ tiah a ti.

Cu mipa nih cun: ‘Aho nih dah nangmah cu a kan uktu bawi le kan biaceihtu ah an in ser? Khi Izipt mipa na thah bantuk in khan maw na ka thah hnik ve?’ tiah a ti ai.

Moses cu a thin a phang cang. Izipt mipa cung i a rak tuahmi kha mi nih an hngalh cang ti kha a rak hngalh. Faraoh hmanh nih mah kong cu a rak theih i Moses kha thah awk ah mi a thlah hna. Cu ruang ah Moses cu Izipt ram in a zam a rak hau.

Moses cu Izipt ram in a zam tik ah, Midian ram tiang in a rak kal. Cuka ah cun Jethro innchungkhar kha a va ton hna i, a fanu pakhat Zipporah kha a rak ṭhit. Moses cu tuukhal a rak si i Jethro a tuu kha a rak cawngh piak hna. Midian ram ah cun kum 40 chung a rak um. Atu cu a kum 80 a si cang. Cun nikhat cu, Moses nih Jethro a tuu kha a cawngh lio hna ah, amah nunnak vialte a rak thleng dih tu thil khuaruahhar a rak tlung. Zeibantuk khuaruahhar thil dah a rak ton ti zohhmanh u sih.

Exodus 2:11-25; Lamkaltu 7:22-29.



Biahalnak hna

  • Moses cu khuazei hmun ah dah a ṭhan, sihmanhsehlaw a nu le a pa kongah zeidah a hngalh?
  • Moses cu kum 40 a si ah zeidah a rak tuah?
  • Israel mi aa vel mi hna kha Moses nih zeidah a chimh hna i mipa nih zeitindah a rak leh?
  • Zeiruangah Moses cu Izipt ram in a rak zam?
  • Moses cu khoika lei ah dah a zam i cuka ah aho he dah an i ton?
  • Izipt in a zam hnuah kum 40 chung Moses nih zeidah a tuah?

Biahalnak dang hna

  • Exodus 2:11-25 rel.

    Izipt fimnak kha kum tampi a cawng ko nain Moses nih Jehovah le a miphun hna sinah zumhawktlak a sinak kha zeitindah a rak langhter? (Ex. 2:11, 12; Heb. 11:24)

  • Lamkaltu 7:22-29 rel.

    Moses nih Israel mi hna amah thawngin Izipt ram i sal cannak in luatter awk aa zuamnak in zei cawn awk dah kan i lak khawh? (Lam. 7:23-25; 1 Pit. 5:6, 10)