A ummi cazin ah kal

A ummi cazin ah kal

Tuanbia 20: Dinah Harnak A Phan

Tuanbia 20: Dinah Harnak A Phan

Dinah cu ahote sin ah dah a va len hna lai nan hmu maw? Kanaan ram i a ummi nu cheukhat sin ah a va lenmi a si. A pa Jakob cu hi kong ah aa lawm hnga maw? Hi biahalnak a lehnak hngalh awk ah cun Kanaan minu hna cu Abraham le Isak nih zeitindah an ruah hna ti kha hngalh ṭhan awk i zuam hmanh u.

Dinah nih Kanaan minu pawl a va len hna lio

Abraham nih a fapa Isak kha Kanaan minu pakhat cu a rak ṭhit piak duh maw? A rak ṭhit piak duh lo. Isak le Rebekah nih tah an fapa Jakob cu Kanaan minu pakhat ṭhit piak awk an rak duh ve maw? An rak duh ve lo. Zeicah ti nan hngal maw?

Zeicah kan ti ah cun Kanaan ram i mi hna nih cun a hmaan lo mi pathian kha an rak biak hna caah a si. Annih cu va caah le nupi caah a ṭhami minung an rak si lo, hawikawm ah ngeih awk zong ah a ṭhami an rak si fawn lo. Cucaah a fanu nih Kanaan minu hna kha hawi kawm ah a va ser mi hna cu Jakob aa lawm hrimhrim lai lo ti a fiang tein kan hngalh khawh ko.

An ruah bantuk in Dinah cu harnak a rak phan taktak ai. Hi hmanthlak chung i Dinah kha a zoh mipa khi nan hmu kho maw? Amah min cu Shekem a si. Nikhat cu Dinah nih a hun len lio hna ah Shekem nihcun Dinah cu hramhram in a auh i a sualpi ai. Cucu a hmaan lomi a si, zeicahtiah aa ṭhium cangmi pa le nu lawng hmunkhat ah ih ṭi khawh a si. Shekem nih Dinah cung ah a tuahmi ṭhatlonak nih harnak tampi a chuah ter chin.

Dinah a ṭale nih mah kong cu an theih tik ah, an thin a hung ngaingai. Anmah lak i pahnih Simeon le Levi cu an thin a hun tuk ca ah vainam an i lak i khua chung ah cun an vung lut i an va doh hna. Anmah le an unau hna nih cun Shekem le mi dang vialte zong kha an rak thah dih hna. A fapale nih hi thil ṭhalo an tuah ruang ah Jakob cu a thin a rak hung ngaingai.

Hi harnak vialte cu zeitindah a hram aa thok? Cucu Dinah nih Pathian nawlbia zei ah a rel lo mi hna he aa rak i kawmh ruang ah a si. Cubantuk mi hna cu kanmah zong hawikawm ah kan ser duh ve hna lai lo, kan duh hnga maw?

Genesis 34:1-31.



Biahalnak hna

  • Abraham le Isak nih an fale caah Kanaan ram mi hna ṭhit kha zeicah an duh lo?
  • Jakob nih a fanu Kanaan mi nu hna he an i komhmi kha a hna a tla maw?
  • Hmanthlak chung i Dinah a zohtu pa cu ahodah a si i zei ṭhatlonak dah a tuah?
  • Dinah a ṭale Simeon le Levi nih a cangmi thil kong an theih tikah zei thil dah an tuah?
  • Jakob cu Simeon le Levi an tuahsernak cungah a hna a tla maw?
  • An chungkhar harnak an tonmi dihlak hi zeitindah aa thawk?

Biahalnak dang hna

  • Genesis 34:1-31 rel.

    Dinah nih Kanaan ram mi an fanule hna he hawikomhnak a tuah cu voikhat lawng maw a si? Fianter. (Gen. 34:1, NW: Jakob le Leah nih an hrinmi an fanu Dinah cu kha ram mi nu hna sinah a leng lengmang hna.)

    Zeicah ngaknu thiang a sinak a thlaunak ah Dinah cu ṭuanvo a ngeih? (Gal. 6:7)

    Nihin mino pawl nih Dinah i zohchunhawk ralrin peknak an lungthin ah an chiah kha zeitindah an langhter khawh? (Ptb. 13:20; 1 Kor. 15:33; 1 Johan 5:19)