A ummi cazin ah kal

A ummi cazin ah kal

Tuanbia 13: Abraham—Pathian Hawi

Tuanbia 13: Abraham—Pathian Hawi

Buanchukcho hnu in mi hna an rak kal i an umnak hmun pakhat cu Ur tiah an ti. Inn ṭhaṭha a rak umnak a biapi ngaimi khua pakhat a rak si. Sihmanhsehlaw cu khua mi hna cu a hmaan lo mi pathian kha an rak biak hna. Cucu Babel i an rak tuahmi kha a si ve ko. Ur le Babel i mi hna cu Jehovah a rak bia rih ko mi Noah le a fapa Shem bantuk an rak si lo.

Buanchukcho in kum 350 hnu ah Noah cu a rak thi. Cucu hi hmanthlak i nan hmuh mi pa a chuah hnu kum hnih hnu ah a rak si. Amah cu Pathian hmai ah mi phundang ngaingai a rak si. Amah min cu Abraham a si. Amah cu a innchungkhar hna he khi Ur khua ah cun an rak um.

Abraham nih arfi a zoh lio

Nikhat cu Jehovah nih Abraham cu: ‘Ur khua le na rualchan hna kha kaltak hna law kan hmuhsak lai mi ram ah va kal tuah,’ tiah a rak ti. Abraham nih Pathian bia cu ngai in Ur khua i sunparnak vialte cu a rak kaltak maw? A si, a rak kaltak dih ko. Cun Abraham cu Pathian bia kha a ngaih zungzal caah amah cu Pathian hawi tiah an rak ti.

Abraham nih Ur khua in a rak chuah lio ah khan a rualchan a cheu zong amah sin ah an rak kal ve. A pa Terah zong a kal ve. A nau fapa Lot zong a rak kal ve. Cun Abraham a nupi Sarah zong a rak kal ve hen ta. Cun Haran an timi hmun ah khan an hung phan i cuka ah cun Terah cu a rak thi. Ur khua in lam hlapi an hung phan cang.

Cu hnu ah Abraham le a innchungkhar cu Haran khan an chuak i, Kanaan ti mi ram ah khan an hung phan. Cuka ah cun Jehovah nih: ‘Hi cu na tefa ka pek hna lai dingmi ram cu a si,’ tiah a rak ti. Abraham cu Kanaan ram ah cun thlam inn chung ah khan a rak um.

Pathian nih Abraham cu a rak bawmh caah amah cu tuurun le saram dang hna le sal tampi a rak ngei. Sihmanhsehlaw amah le Sarah cu tefa pakhat hmanh an rak ngei lo.

Abraham cu kum 99 a si tik ah, Jehovah nih: ‘Nangmah cu miphun tampi pa ah kan can ter lai tiah bia kaa kam,’ tiah a rak ti. Sihmanhsehlaw mah cu zeitindah a si khawh lai? Abraham le Sarah cu fa hrin awk ah an tar tuk cang ṭung?

Genesis 11:27-32; 12:1-7; 17:1-8, 15-17; 18:9-19.



Biahalnak hna

  • Ur khua ah zei bantuk phun minung dah an rak um?
  • Hmanthlak chung i mipa hi ahodah a si, zeitik ah dah a chuah i khuazei ah dah a um?
  • Pathian nih Abraham kha zei tuah dah a rak fial?
  • Zeicah Abraham cu Pathian hawi tiah auh a rak si?
  • Abraham Ur khua in a chuah tikah amah he hotedah a rak kal ve?
  • Kanaan ram a phak tikah Pathian nih Abraham kha zeidah a rak chimh?
  • Abraham kum 99 a si tikah Pathian nih zei bia dah a rak kamh?

Biahalnak dang hna

  • Genesis 11:27-32 rel.

    Abraham le Lot cu zeitindah rualchan an si? (Gen. 11:27)

    Terah zong a innchungkhar he Kanaan ram ah a kal ve tiah thangṭhat a si nain ṭhial hram a thawktu taktak cu Abraham a si ti kha zeitindah kan hngalh i zeiruangah cu ti a rak tuahnak a si? (Gen. 11:31; Lam. 7:2-4)

  • Genesis 12:1-7 rel.

    Abraham Kanaan ram a phak hnu ah Abraham he aa tlaimi biakamnak ah Jehovah nih zeidah a rak chapchih? (Gen. 12:7)

  • Genesis 17:1-8, 15-17 rel.

    Abram a kum 99 a si ah a min kha zeitindah thlen a si i, zeiruangah a si? (Gen. 17:5)

    Jehovah nih Sarah kha zei hmailei thluachuahnak dah a rak kamh? (Gen. 17:15, 16

  • Genesis 18:9-19 rel.

    Genesis 18:19 ah, nu le pa hna caah zei rian dah chiah a si? (Deut. 6:6, 7; Efe. 6:4)

    Jehovah sinin zeihmanh thuh khawh a si lo ti kha Sarah i zei a hmuhtonnak nih dah a langhter? (Gen. 18:12, 15; Salm 44:21)