A ummi cazin ah kal

A ummi cazin ah kal

 ṬHEN RIAT

Pathian Pennak Cu Zeidah A Si?

Pathian Pennak Cu Zeidah A Si?

1. A min a thangmi zei thlacamnak kong dah atu kan i ruah lai?

MI NUAI tampi nih a min a thangmi Bawipa Thlacamnak kha ṭha tein an hngalh. Jesuh nih mah thlacamnak kha hmangin zeitindah thlacam ding a si ti kha a zultu pawl a cawnpiak hna. Jesuh nih zei caah dah thla a cam? Mah thlacamnak cu kan caah zeicah a biapit?

2. Jesuh nih a biapimi zei thil pathum caah dah thlacam dingin a kan cawnpiak?

2 Jesuh nih hitin a ti: “Hi bantuk hin thla cu nan cam awk a si: ‘Vancung khua i a um kan Pa, Na min thiang cu upat si ko seh; Na Pennak cu rung tlung ko seh, vancung khua ah na duhnak an tuah bangin vawleicung ah hin tuah si ve ko seh.’” (Matthai 6:9-13 rel.) Jesuh nih mah thil pathum caah thlacam dingin zeicah a kan cawnpiak?—A Donghnak I Fianternak 20 ah zoh.

3. Pathian Pennak he aa tlaiin zeidah kan hngalh a herh?

3 Pathian min cu Jehovah a si ti kha kan hngalh cang. Cun minung ca le vawlei ca i Pathian duhnak cu zeidah a si ti zong kan i ruah cang. Asinain “na Pennak cu rung tlung ko seh” tiah Jesuh nih a ti tikah zeidah a chimduhmi a si? Pathian Pennak cu zeidah a si, mah nih zeidah a tuah lai i Pathian min zeitindah a thianter lai ti kha i ruah u sih.

Pathian Pennak Cu Zeidah A Si?

4. Pathian Pennak cu zeidah a si, mah Pennak i Siangpahrang cu ahodah a si?

4 Jehovah nih vancung cozah kha a dirh i Jesuh kha  Siangpahrang in a thim. Mah cozah kha Baibal nih Pathian Pennak tiah a ti. Jesuh cu “siangpahrang hna Siangpahrang le bawi vialte hna Bawi a si.” (1 Timote 6:15) Jesuh cu zei bantuk minung uktu hna nakhmanh in a let tampi in thilṭha a tuah kho deuhmi a si. Cun minung uktu dihlak fonh nak zongin a ṭhawng deuh.

5. Pathian Pennak nih khoika in dah a uk lai, zeidah a uk lai?

5 Jesuh cu a thawhṭhannak in ni sawmli hnuah van ah a kai. A hnuah Jehovah nih a Pennak ah Siangpahrang in rian a pek. (Lamkaltu 2:33) Pathian cozah nih vancung in vawlei kha a uk lai. (Biathlam 11:15) Cucaah Baibal nih Pathian Pennak kha “vancung Pennak” tiah a ti.—2 Timote 4:18.

6, 7. Zeinihdah Jesuh cu minung siangpahrang hna nakin a ṭhatter deuh?

6 Jesuh ‘lawnglawng hi thih a thiam lomi’ a si caah zei bantuk minung siangpahrang hna nakin a cungnung deuh tiah Baibal nih a ti. (1 Timote 6:16) Minung uktu vialte cu a donghnak ah an thi, asinain Jesuh tu cu zeitikhmanh ah a thi lai lo. Cucaah Jesuh nih a tuah hngami thilṭha vialte cu an hmun zungzal lai.

7 Baibal nih Jesuh cu a dingmi le zaangfahnak a ngeimi Siangpahrang a si lai tiah a ti. “A mi kha a uk khawh hna nakhnga BAWIPA ṭhawnnak nih amah cu fimnak le hngalhnak le thiamnak a pek lai. BAWIPA duhnak kha zeidah a si ti a hngalh lai i BAWIPA cu a ṭih lai. Cun BAWIPA rian ṭuan kha aa lawmhnak a si lai. Lenglang men le mi chim chin bia men in bia a khiak lai lo; Sifakmi kha an bia ṭha tein a ceihpiak hna lai i nauta pawl kha a ṭanh hna lai.” (Isaiah 11:2-4) Cu bantuk siangpahrang cu na duh ko lo maw?

8. Jesuh nih amah lawngin a uk lai lo ti kha zeitindah kan hngalh?

 8 Pathian nih vancung pennak ah Jesuh he uktu ṭuanṭi dingin minung cheukhat kha a thim hna. Tahchunhnak ah, lamkaltu Paul nih Timote kha “kan in khawh peng ahcun a uk zong amah he kan ukṭi lai” tiah a ti. (2 Timote 2:12) Jesuh he uktu a ṭuanṭi ding cu zeizat dah an si lai?

9. Jesuh he uktu a ṭuanṭi hnga dingmi cu pa zeizat dah an si? Annih kha Pathian nih zeitik in dah a rak thim hna?

9 Ṭhen 7nak ah kan cawn cang bantukin lamkaltu Johan nih langhnak ah Jesuh le 144,000 cu vancung ah Siangpahrang an ṭuanṭimi kha a hmuh. 144,000 cu ahote dah an si? Annih cu “an cal i amah [Jesuh] min le a Pa min khenhmi kha an si” tiah Johan nih a ti. Cun hitin a ti chap: “Tuufa [Jesuh] kha a kalnak kip ah an zulh. A taang rihmi minung hna lakin tlanhmi an si.” (Biathlam 14:1, 4 rel.) 144,000 cu Jesuh he ‘vawlei uk awkah siangpahrang’ in Pathian nih a thimmi zumhfekmi Khrihfa an si. Annih cu an thih tikah vancung i nun dingin an tho ṭhan lai. (Biathlam 5:10) 144,000 ah aa telmi hna kha Jehovah nih lamkaltu hna chan thawkin a thim hna.

10. Minung uktu dingah Jesuh le 144,000 thim an simi cu zeicah dawtnak taktak a si?

10 Minung uktu dingah Jehovah nih Jesuh le 144,000 a thimmi hna cu dawtnak taktak a si. Jesuh cu kan sining a hngalthiammi a si caah uktu ṭha a si lai. Minung pakhat sining le tonmi harnak hna kha a hngalh. Paul nih Jesuh cu “kan santlaihlonak ah kan cung i zaangfahnak” a ngei khomi a si i “kanmah bantuk tein tukforhnak a ing vemi a si” tiah a ti. (Hebru 4:15; 5:8) 144,000 zong nih minung sining kha ṭha tein an hngalhthiam. Mah  lengah tlinlonak kha an doh i zawtnak a phunphun zong an tong. Cucaah Jesuh le 144,000 nih kan intuarmi an hngalhthiam lawng si loin kan tonmi buaibainak zong an tawnghtham lai ti kha kan zumh khawh.

Pathian Pennak nih Zeidah a Tuah lai?

11. Vancung ah Pathian duhnak tuah a si nakhnga thlacam awkah Jesuh nih a zultu hna kha zeicah a cawnpiak hna?

11 Jesuh nih a zultu hna kha vancung ah Pathian duhnak tuah a si nakhnga thlacam awkah a cawnpiak hna. Zeicah? Ṭhen 3nak ah kan cawn cang bantukin Satan Khuachia nih Jehovah kha a doh. Satan dohnak a chuah hnuah Jehovah nih Satan le zumhawktlak tein a um lomi vancungmi asiloah khuachia hna kha caan caankhat chung vancung ah umnak nawl a pek hna. Cucaah vancung ah a ummi dihlak cu Pathian duhnak a tuahmi an si lo. Ṭhen 10nak ah Satan le a khuachia pawl kong kha tam deuh in kan i ruah te lai.

12. Biathlam 12:10 nih zei a biapimi thil sining pahnih dah a langhter?

12 Jesuh cu Pathian Pennak ah Siangpahrang in rian pek a si tlawmpal ah Satan he ral an i do tiah Baibal nih a ti. (Biathlam 12:7-10 rel.) Caang 10nak nih a biapi tukmi thil sining pahnih a langhter. Mah cu Jesuh Khrih ukmi Pathian Pennak cu aa thawk cang i Satan kha vancung in vawlei ah thlak a si cang timi a si. Mah thil sining pahnih cu an tling cang.

13. Satan van in thlak a si cang caah zeithil dah a chuak?

13 Satan le a khuachia pawl vancung in vawlei ah thlak an si caah zumhfekmi vancungmi hna cu an i lawm tiah Baibal nih a ti. Hitin kan rel: “Nannih van hna le khika i a ummi vialte hna i lawm tuah u.” (Biathlam 12:12) Van ah a ummi hna cu Pathian duhnak a tuahmi lawngte an  si cang caah vancung ah daihnak le remnak tlamtling tein a um cang.

Satan le a khuachia pawl van in thlak an simi nih vawlei ah harnak tampi a chuahter. Mah harnak hna cu a rauhhlan ah a dong cang lai

14. Satan vawlei ah thlak a si caah zeithil dah a chuak?

14 Asinain vawleicung nunnak cu aa dang tuk. “Khuachia cu . . . a rung ṭum” i “caan tawite lawnglawng ka ngei ti kha a hngalh fawn caah a thin a linh in a lin.” Cucaah mi nih ṭhatlonak an tong. (Biathlam 12:12) Satan cu vancung in thlak a si cang i a rauhhlan ah hrawh ka si cang lai ti kha a hngalh caah a thin a hung tuk. Cucaah vawleicung pumpi ah buaibainak, harnak le fahnak hna chuahter awkah a tuah khawhmi zeipaoh a tuah.

15. Vawlei ca i Pathian duhnak cu zeidah a si?

15 Asinain vawlei ca i Pathian duhnak cu aa thleng lo. Vawleicung paradis ah a tlingmi minung kha zungzal in nunter a duh hna. (Salm 37:29) Mah kha Pathian Pennak nih zeitindah a tlinter lai?

16, 17. Daniel 2:44 nih Pathian Pennak he aa tlaiin zeidah a langhter?

16 Daniel 2:44 nih hitin a chimchung: “Cu siangpahrang hna chan ahcun vancung Pathian nih pennak pakhat a ser lai i cu pennak cu zeitikhmanh ah a rawk lai lo; hi pennak vialte hi a hrawh dih hna lai i a donghter dih hna lai, sihmanhsehlaw cu pennak tu cu zungzal in a hmun lai.” Mah chimchungbia nih Pathian Pennak he aa tlaiin zeidah a kan cawnpiak?

17 Pakhatnak ah, Pathian Pennak cu “cu siangpahrang hna chan” ah dirh a si lai ti kha a kan cawnpiak. Mah cu Pennak dirh a si tikah vawleicung ah a dang cozah pawl an um rih lai tinak a si. Pahnihnak ah, Pathian Pennak cu zungzal in a hmun lai, zei cozah hmanh nih a tei lai lo i a airolh lai lo. Pathumnak ah, Pathian Pennak le hi vawlei pennak hna ral an i do lai. Pathian Pennak nih a tei  lai i vawleicung pumpi kha mah cozah lawnglawng nih a uk lai. Mah tikah minung nih a ṭha bikmi cozah an ngei cang lai.

18. Pathian Pennak le hi vawlei cozah hna i hmanung bik raldohnak a min cu zeidah a si?

18 Pathian Pennak nih vawlei kha zeitindah a uk lai? Armageddon tiah auhmi hmanung bik raldohnak aa thawk hlanah khuachia hna nih “vawleicung siangpahrang vialte kha an pumh hna. Cu bantukin hmunkhat ah an pumh hna cu, Lianngan Bik Pathian ni lianngan ni ah pakhat le pakhat i do hna seh ti caah a si.” Minung cozah nih Pathian Pennak kha an doh lai.—Biathlam 16:14, 16; A Donghnak I Fianternak 10 ah zoh.

19, 20. Vawlei uk awkah Pathian Pennak kha zeicah kan herh?

19 Zeicah Pathian Pennak kan herh? A tlawm bik a ruang pathum a um. Pakhatnak ah, misual kan si caah kan zaw i kan thi. Asinain Pathian Pennak uknak tangah zungzal in kan nung lai tiah Baibal nih a ti. Johan 3:16 nih hitin a ti: “Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai.”

20 Pahnihnak ah, kannih cu miṭhalo hna lakah khua a sami kan si caah Pathian Pennak kan herh. Mi tampi cu lih an chim, an i hleng i nu le pa sualnak an tuah. Cu bantuk thil sining hna hloh awkah zeihmanh kan tuah kho lo, asinain Pathian nih cun a hloh khawh. Thil ṭhalo a tuahmi hna cu Armageddon ah hrawh an si lai. (Salm 37:10 rel.) Pathumnak ah, minung cozah pawl cu san an tlai lo, an puarhrang i an ziaza a rawkral. Cun Pathain duhnak tuah awkah mi kha an forh hna lo. Baibal nih  fiang tein hitin a chim: ‘Mi nih pakhat le pakhat an i uk tikah harnak an chuahter.’—Phungchimtu 8:9, NW.

21. Pennak nih Pathian duhnak kha vawleicung ah zeitindah a tlinter lai?

21 Armageddon a dih hnuah Pathian Pennak nih vawleicung ah Pathian duhnak a tlinter lai. Tahchunhnak ah, Pennak nih Satan le a khuachia pawl kha a hrawh hna lai. (Biathlam 20:1-3) Ahohmanh an zaw ti lai lo i an thi ti lai lo. Tlanhnak man thawngin zumhfekmi vialte cu Paradis ah zungzal in an nung kho lai. (Biathlam 22:1-3) Pennak nih Pathian min a thianter lai. Mah cu zei sullam dah a si? Pathian cozah nih vawlei a uk tikah minung vialte nih Jehovah min an upat lai tinak a si.—A Donghnak I Fianternak 21 ah zoh.

Jesuh cu Zeitik in dah Siangpahrang a Hung Si?

22. Jesuh cu vawleicung a um lio asiloah a thawhṭhan cangka in Siangpahrang a ṭuan colh lo ti kha zeitindah kan hngalh?

22 Jesuh nih a zultu hna kha “na Pennak cu rung tlung ko seh” tiah thlacam awkah a cawnpiak hna. Cucaah Pathian cozah cu hmailei ah a ra hrimhrim lai ti a fiang. Jehovah nih a cozah kha a dirh hmasa lai i Jesuh kha Siangpahrang ah a ser lai. Jesuh cu van a kai ṭhan cangka  in Siangpahrang a ṭuan maw? A ṭuan lo, a hngah rih a hau. Jesuh a thawhṭhan hnu, caan tlawmpal ah Piter le Paul nih Salm 110:1 i chimchungbia cu Jesuh he aa pehtlai tiah fiang tein an langhter. Chimchungbia ah Jehovah nih hitin a ti: “Na ral cu na ke tangah ka chiah hna hlan tiang, ka orhlei kam ah hin ṭhu tuah.” (Lamkaltu 2:32-35; Hebru 10:12, 13) Jehovah nih Siangpahrang rian a pek lai kha Jesuh nih zei can dah a hngah a hauh?

Pathian Pennak nih vawleicung ah Pathian duhnak kha a tlinter hrimhrim lai

23. (a) Jesuh nih Pathian cozah i Siangpahrang in zeitik in dah uk hram a thawk? (b) A hnu ṭhen ah zei kong dah kan i ruah lai?

23 1914 hlan, kum tampi chungin lungthin ṭha a ngeimi Khrihfa hna nih 1914 cu Baibal chimchungbia i a biapimi kum a si lai ti kha an hngalh. 1914 thawkin a cangmi thil sining nih an hngalhthiamning a hmaan kha a langhter. Mah kum ah Jesuh cu Siangpahrang a ṭuan. (Salm 110:2) Mah hnu tlawmpal ah Satan cu vawlei ah thlak a si i atu cu ‘caan tawite lawnglawng a ngei cang.’ (Biathlam 12:12) Mah caan chungah kan nung ti a langhtermi a kong tam deuh kha a hnu ṭhen ah kan i ruah lai. Cun a rauhhlan ah Pathian Pennak nih vawleicung ah a duhnak a tlinter hrimhrim lai timi kong zong kan i ruah lai.—A Donghnak I Fianternak 22 ah zoh.