A ummi cazin ah kal

A ummi cazin ah kal

A Donghnak I Fianternak

A Donghnak I Fianternak

1 JEHOVAH

Pathian min cu Jehovah a si i a sullam cu “A Hung Siter” tinak a si. Jehovah cu Cungnung Bik Pathian a si i zeizong vialte sertu zong a si. Tuah awkah aa tinhmi zeithil paoh tuah khawhnak ṭhawnnak a ngei.

Hebru holh ah Pathian min cu YHWH asiloah JHVH a aiawhmi cafang pali in ṭial a si. A hmasa bik ṭialmi Hebru Baibal ah Pathian min voi 7,000 hrawng a um. Vawleicung pumpi ah a ummi mi hna nih Jehovah min kha anmahle holh a kalning cio in, a aw an chuah i an hman.

Ṭhen. 1, cat. 15

2 BAIBAL CU “PATHIAN THAW CHUAH HNAWHMI A SI”

Baibal cu Pathian sinin a rami a si, asinain Pathian nih Baibal ṭial awkah pa pawl kha a rak hman hna. Mah cu rian-ngeitu nih a kut tangpa kha a ruahnak le a lamhruainak hna aa telmi ca a ṭialter bantuk a si. Pathian nih a thiang thlarau hmangin a ruahnak hna ṭial awkah lam a hruai hna. Pathian thiang thlarau nih lam a phunphun in a hruai hna. A caan ah an ṭial hnga dingmi kha langhnak in asiloah mang in a hmuhter hna.

Ṭhen. 2, cat. 5

3 PHUNGLAM

Mah cu a hrampi Baibal biatak hngalhthiam awkah Baibal cawnpiaknak a si. Tahchunhnak ah, “hawi ṭhalo nih ziaza ṭha a hrawh” timi phunglam nih kan komhmi hna nih thilṭha asiloah thilṭhalo a kan tuahter khawh ti kha a kan cawnpiak. (1 Korin 15:33) Cun “mi nih a tuhmi cu a zun ko lai” timi phunglam nih kan tuahsernak ruangah a chuakmi thil kan hrial kho lo ti kha a kan cawnpiak.—Galati 6:7.

Ṭhen. 2, cat. 12

  4 CHIMCHUNGBIA

Mah cu Pathian sinin a rami bia a si. Mah nih Pathian duhnak, ziazalei cawnpiaknak, nawlbia asiloah biaceihnak kong hna kha a langhter. Cun hmailei ah a cang hngami thil pakhatkhat kong zong a langhter. A tling cangmi chimchungbia tampi Baibal ah a um.

Ṭhen. 2, cat. 13

5 MESSIAH KONG CHIMCHUNGBIA HNA

Messiah kong Baibal chimchungbia tampi a tlintertu cu Jesuh a si. “ Messiah Kong Chimchungbia Hna” timi rinli kulh ah zoh.

Ṭhen.2, cat.17, ftn

6 VAWLEI CA I JEHOVAH TINHNAK

Jehovah nih amah a dawmi minung hna caah vawlei kha paradis ah a ser. Pathian tinhnak cu aa thleng lo. Cucaah a rauhhlan ah Pathian nih ṭhatlonak vialte hi a hrawh dih cang lai i a mi kha zungzal nunnak a pek hna lai.

Ṭhen. 3, cat. 1

7 SATAN KHUACHIA

Satan cu Pathian ralchanhnak ah a hram a thawktu vancungmi a si. Jehovah kha a doh caah “Ralchanhtu” tiah sullam a ngeimi Satan tiah auh a si. “Thangchiattu” tiah sullam a ngeimi Khuachia ti zongin auh a si. Zeicahtiah Pathian kong he aa tlaiin lihbia a chim caah le mi a hlen hna caah mah min cu pek a si.

Ṭhen. 3, cat. 4

  8 VANCUNGMI HNA

Jehovah nih vawlei a ser hlanpi in vancungmi kha a rak ser cang hna. Annih cu vancung um dingin ser an si. Vancungmi nuai zakhat leng an um. (Daniel 7:10) Annih cu min an ngei i an sining zong aa dang cio. Minung nih an biak hna tikah zumhawktlak vancungmi nih toidor tein an rak al hna. An reng zong aa lo hna lo i rian a phunphun pek an si. Cheukhat cu Jehovah bawiṭhutdan hmaiah an ṭuan, cheukhat cu Jehovah bia thanhnak, vawleicung i a salle huhphenhnak le lamhruainak rian an ṭuan. A dang cu biaceihnak le phungchim rian bawmhnak ah an ṭuan. (Salm 34:7; Biathlam 14:6; 22:8, 9) Hmailei i Armageddon raltuknak ah Jesuh he hmunkhat ah ral an doṭi lai.—Biathlam 16:14, 16; 19:14, 15.

Ṭhen. 3, cat. 5; Ṭhen. 10, cat. 1

9 SUALNAK

Jehovah le a duhnak ralchanh in kan ruahmi, kan chimmi asiloah kan tuahmi vialte cu sualnak a si. Sualnak nih Pathian he kan i pehtlaihnak kha a hrawh khawh caah sualnak kan tuah nakhnga lo a kan bawmmi nawlbia le phunglam hna kha Pathian nih a kan pek. A hramthawk ah Jehovah nih zeizong vialte kha a tlingmi in a ser ko nain Adam le Evi nih Jehovah nawlngaih lo awk an i thim tikah misual an hung si i a tlingmi an si ti lo. Cucaah an tar i an thi. Kannih zong Adam sinin sualnak ro kan co caah kan tar i kan thi ve.

Ṭhen. 3, cat. 7; Ṭhen. 5, cat. 3

10 ARMAGEDDON

Satan vawlei le ṭhatlonak vialte a hrawk hngami Pathian raldohnak kha a si.

Ṭhen. 3, cat. 13; Ṭhen. 8, cat. 18

 11 PATHIAN PENNAK

Pathian Pennak timi cu Jehovah nih vancung ah a dirhmi cozah pakhat a si. Mah Pennak ah Jesuh Khrih cu Siangpahrang a si lai. Hmailei ah Jehovah nih mah Pennak kha hmangin ṭhatlonak vialte hi a hloh dih cang lai. Vawleicung pumpi kha Pathian Pennak nih a uk lai.

Ṭhen. 3, cat. 14

12 JESUH KHRIH

Pathian nih zeizong vialte a ser hlanah Jesuh a ser hmasa bik. Minung ca i a nunnak pek awkah Jehovah nih Jesuh kha vawlei ah a rak thlah. Jesuh cu thah a si hnuah Jehovah nih a nunter ṭhan. Atu ah Jesuh nih Pathian Pennak Siangpahrang in vancung ah a uk cang.

Ṭhen. 4, cat. 2

13 ZARH 70 KONG CHIMCHUNGBIA

Messiah a chuah lainak caan kong kha Baibal nih a chimchung. Mah cu BC 455 in aa thawk i AD 29 ah a dongmi, zarh 69 tiah auhmi caan caankhat chung i a donghnak ah a si lai.

Mah caan cu AD 29 ah a dong ti kha zeitindah kan hngalh khawh? Zarh 69 timi cu Nehemiah nih Jerusalem a sak ṭhan kum, BC 455 in aa thawk. (Daniel 9:25; Nehemiah 2:1, 5-8) “Zarh” timi biafang kan theih tikah ni 7 kha kan lungah a chuak tawn. Mah chimchungbia i zarh timi cu ni sarih a ummi zarh kha si loin “nikhat caah kumkhat” timi bia ningin kum sarih a ummi zarh kha a si. (Nambar 14:34; Ezekiel 4:6) Mah cu zarhkhat cio ah kum sarih a um lai i zarh 69 ahcun kum 483 (69 x 7) a um lai tinak a si. BC 455 in kan rel ahcun kum 483 cu AD 29 ah a dong lai. Mah kum cu Jesuh tipil a ing i Messiah a hung si kum bak kha a si.—Luka 3: 1, 2, 21, 22.

 Mah chimchungbia nih a dang kum sarih a simi, a dang zarhkhat kong zong a chimchung. Mah caan chung a simi, AD 33 kum ah Messiah cu thah a si lai i AD 36 a thawknak ah Judah mi lawng si ti loin miphun vialte sinah Pathian Pennak kong thawngṭha chim a si lai.—Daniel 9:24-27.

Ṭhen. 4, cat. 7

 THUMKOMH PATHIAN A HMAAN LOMI CAWNPIAKNAK

Jehovah Pathian cu Sertu a si i thil dang vialte a ser hlanah Jesuh kha a ser hmasa bik tiah Baibal nih a kan cawnpiak. (Kolose 1:15, 16) Jesuh cu Cungnung Bik Pathian a si lo. Pathian he i tluk awk zongah aa zuam bal lo. Jesuh nih hitin a ti: “Amah [Ka Pa] cu keimah nakin a ngan deuh.” (Johan 14:28; 1 Korin 15:28) Asinain biaknak cheukhat nih Thumkomh pathian kong kha mi an cawnpiak hna. Pathian cu Pa, Fa le thiang thlarau ti in pathum fonh ah pakhat a si tiah an cawnpiak hna. “Thumkomh pathian” timi cu Baibal ah a um lo. Mah cu a hmaan lomi cawnpiaknak a si.

Thiang thlarau timi cu Pathian rianṭuan ṭhawnnak a si, Pathian nih a duhnak tuahnak caah a hmanmi mit in hmuh khawh lomi a ṭhawnnak kha a si. Anih cu mi pakhat a si lo. Tahchunhnak ah, a hmasa Khrihfa hna cu “thiang thlarau in an khat” i Jehovah nih “mi vialte kha ka thlarau ka toih hna lai” tiah a ti.—Lamkaltu 2:1-4, 17.

Ṭhen. 4, cat. 12; Ṭhen. 15, cat. 17

15 VAILAMTAH

A hmaanmi Khrihfa hna nih Pathian an biaknak ah vailamtah an hmang lo. Zei ruangah?

  1. A hmaan lomi biaknak nih vailamtah an hmannak hi caan saupi chung a si cang. Hlanlio ah vailamtah kha kokek thil biaknak caah le lawkih mi nih nupa sualnak he aa tlaimi phunglam caah an rak hman. Jesuh a thih hnu, kum 300 chungah Khrihfa hna nih an biaknak ah vailamtah kha an rak hmang lo. Kum tamnawn a rauh hnuah Rom Uktu Constantine nih vailamtah kha Khrihfa hna hmelchunh ah a hun hman. Khrihfa biaknak kha mi nih an uar deuh nakhnga cu bantuk hmelchunhnak kha a hmanmi a si. Asinain vailamtah cu Jesuh Khrih he pehtlaihnak zeihmanh a ngei lo. The New Catholic Encyclopedia nih hitin a ti: “Vailamtah hi Khrihfa chan hlan le Khrihfa a si lomi hna phung ah hmuh a si.”

  2.     Jesuh cu vailamtah cungah a thi lo. “Vailamtah” tiah lehmi a hramthawk Greek biafang cu “a dingmi tung,” “thing” asiloah “thingkung” timi sullam a ngei. The Companion Bible nih hitin a ti: “Greek Baibal [Biakam Thar] ah thing pahnih ti phun in a langhtermi zeihmanh a um lo.” Cucaah Jesuh cu a dingmi tung cungah a thihmi a si.

  3. Jehovah nih biaknak ah hmanthlak asiloah hmelchunh pakhatkhat kha hmanter a kan duh lo.—Exodus 20:4, 5; 1 Korin 10:14.

Ṭhen. 5, cat. 12

16 RUAHNOLHNAK

Jesuh nih a zultu hna kha a thih Philhlonak puai tuah awkah nawl a pek hna. Cucaah Israel mi nih Lanhtak Puai an tuah caan, Nisan 14 ah mah puai kha kum fatin an tuah. Jesuh a pum le a thi a aiawhmi changreu le mitsurhang kha Ruahnolhnak ah aa pummi vialte nih pakhat hnu pakhat an i chaan. Vancung ah Jesuh he uktu a ṭuanṭi hngami lawng nih changreu le mitsurhang kha an hman. Vawleicung ah zungzal nun ding ruahchannak a ngeimi hna cu upatnak in Ruahnolhnak ah an i pum ve ko nain changreu kha an ei lo i mitsurhang kha an ding lo.

Ṭhen. 5, cat. 21

17 SOUL

Vawlei Thar Lehnak Mirang Baibal ah “soul” timi biafang kha (1) minung, (2) saram asiloah (3) minung asiloah saram ngeihmi nunnak caah a hman. Tahchunhnak cheukhat hi zohhmanh u sih:

  • Minung. “Lawng chungah a lutmi mi tlawmte minung [soul] an dihlak ah pariat hna kha ti chung cun khamh an si.” (1 Piter 3:20) Hika ah “soul” timi biafang kha Noah le a nupi, an fapale pathum le an nupile caah a hman.

  • Saram. “Pathian nih cun aa thawh i, ‘Ti nih hin thilnung [soul] phun tampi a hrin hna lai i va hi thli lakah hin an  zuang lai,’ a ti i cu bang cun a hung si. Cun Pathian nih cun, ‘Vawlei nih hin inn zuat saṭil [soul] a phunphun le ramlak saram [soul] a phunphun, a hme he a ngan he, hring hna seh,’ a ti i cu bang cun a hung si.”—Genesis 1:20, 24.

  • Minung asiloah saram ngeihmi nunnak. Jehovah nih Moses kha hitin a ti: “Nangmah [Na nunnak] thah aan duhmi vialte kha an thi cang.” (Exodus 4:19) Vawleicung a um lioah Jesuh nih hitin a ti: “Tuukhal ṭha cu keimah hi ka si. Tuukhal ṭha cu a tuu hna caah a lu [soul] hloh kha a sian.”—Johan 10:11.

    Mah lengah mi pakhat nih a “nunnak dihlak” in thil pakhat a tuah ti tikah mah cu lungtho tein le a si khawh chungin a ṭuan tinak a si. (Matthai 22:37; Deuteronomi 6:5) A thimi pakhat asiloah mithi ruak pakhat kha a thimi soul ti zongin ti khawh a si.—Nambar 6:6; Haggai 2:13.

Ṭhen. 6, cat. 5; Ṭhen. 15, cat. 17

18 SPIRIT

Vawlei Thar Lehnak Mirang Baibal ah “spirit” tiah lehmi Hebru le Greek biafang cu sullam tampi a ngei. Mah nih thli asiloah minung le saram i an thaw ti bantuk minung mit in hmuh khawh lomi thil kha a langhter zungzal. Cun Pathian rianṭuan ṭhawnnak a simi thiang thlarau le thlarau pum a ngeimi vancungmi hna ca zongah a hman. Asinain Baibal nih mi pakhat cu a thih hnuah a nungmi a pum cheubang a um rih tiah a kan cawnpiak lo.—Exodus 35:21; Salm 104:29; Matthai 12:43; Luka 11:13.

Ṭhen. 6, cat. 5; Ṭhen. 15, cat. 17

19 GEHENNA

Gehenna timi cu Jerusalem khua pawngah a ummi hmunthur an hlonhnak le an khanghnak horkuang min a si. Jesuh chan ah saram asiloah minung kha cuka horkuang ah an hrem hna i an khangh hna tiah a langhtermi zeithil hmanh a um lo. Cucaah Gehenna timi nih mithi pawl  zungzal in an hrem hna i an khangh hnanak, mit in hmuh khawh lomi hmun kha a langhtermi a si lo. Jesuh nih Gehenna ah thlak a simi hna kong a chim tikah hrawh dih cikcek an si lainak kong kha a chimmi a si.—Matthai 5:22; 10:28.

Ṭhen. 7, cat. 20

20 BAWIPA THLACAM

Jesuh nih a zultu hna sinah zeitindah thlacam ding a si tiah a cawnpiakmi hna thlacamnak kha a si. Mah thlacamnak kha zohchunh awk thlacamnak ti zongin an auh. Jesuh nih hitin thlacam awkah a kan cawnpiak:

  • “Na min thiang cu upat si ko seh”

    Jehovah a min thianter a si nakhnga le a thang a chiattermi lihbia vialte langhter a si nakhnga thla kan cam. Mah cu vancung ah le vawleicung ah a ummi vialte nih Pathian min an upat nakhnga le an thangṭhat nakhnga caah a si.

  • “Na Pennak cu rung tlung ko seh”

    Satan vawlei ṭhalo a hrawk hngami, vawleicung pumpi a uk hngami le vawlei paradis ah a ser hngami Pathian cozah caah thla kan cammi a si.

  • “Na duhnak . . . vawleicung ah hin tuah si ve ko seh”

    Jehovah nih minung a ser lioah a rak i tinh bantukin nawlngaimi le a tlingmi minung Paradis ah zungzal an nun khawh nakhnga vawlei ca i Pathian tinhnak tlinter awkah thla kan cam.

Ṭhen. 8, cat. 2

21 TLANHNAK MAN

Jehovah nih sualnak le thihnak in minung khamh awkah tlanhnak man a kan timhpiak. Hmasa bik mipa, Adam sunghmi a tlingmi minung nunnak cawk ṭhan awk, minung le Jehovah karah a catmi pehtlaihnak kha remh ṭhan awkah  tlanhnak man pek a hau. Misual vialte kan ca i a nunnak pek awkah Pathian nih Jesuh kha vawleicung ah a rak thlah. Jesuh thihnak thawngin mi vialte nih zungzal nunnak le a tlingmi sinak tinvo an hmu.

Ṭhen. 8, cat. 21; Ṭhen. 9, cat. 13

22 1914 KUM CU ZEICAH A BIAPIT TUK?

Daniel dal 4 i chimchungbia nih 1914 ah Pathian nih a Pennak a dirh lai tiah a kan cawnpiak.

Chimchungbia: Jehovah nih Siangpahrang Nebukhadnezzar kha hau a simi thingkung nganpi kong mang a rak pek. A mang ah thingkung cu a ṭhan nakhnga lo a hmui kha thir cikcin le dar cikcin in “kum sarih” chung an ṭem. Mah hnuah thingkung cu a corh ṭhan.—Daniel 4:1, 10-16.

Chimchungbia a sullam: Thingkung nih Pathian uknak kha a aiawh. Jehovah nih Israel miphun uk awkah Jerusalem i siangpahrang hna kha kum tampi chung a hman hna. (1 Chanrelnak 29:23) Asinain mah siangpahrang hna cu zumhawktlak lo an hung si i an uknak cu a dong. BC 607 ah Jerusalem khua cu hrawh a rak si. Mah cu “kum sarih” aa thawknak a si. (2 Siangpahrang 25:1, 8-10; Ezekiel 21:25-27) “Ramdang mi nih Jerusalem khua cu an naan lai i an caan a dih hlan tiang an ke tangah a um lai” tiah Jesus nih a ti tikah “kum sarih” kong kha a chimmi a si. (Luka 21:24) Cucaah Jesuh vawleicung a rak um lioah “kum sarih” timi caan cu a rak dong rih lo. Jehovah nih “kum sarih” a donghnak ah Siangpahrang kha rian ka pek lai tiah bia aa kam. Mah Siangpahrang Jesuh uknak nih vawleicung mi vialte kha zungzal thluachuah a hmuhter hna lai.—Luka 1:30-33.

“Kum sarih” a rauh caan: “Kum sarih” timi caan cu kum 2,520 a rau. BC 607 thawkin kum 2,520 kha kan rel ahcun AD 1914 ah a dong. Mah kum ah Jehovah nih Messiah a simi Jesuh kha vancung ah Pathian Pennak i Siangpahrang in rian a pek.

 Zeitindah nambar 2,520 hi kan hmuh khawh? Baibal nih kumthum le a cheu cu ni 1,260 he an i tluk tiah a ti. (Biathlam 12:6, 14) Cucaah “kum sarih” timi cu mah nambar i a lethnih asiloah ni 2,520 a si. Asinain “nikhat caah kumkhat” timi phung ningin ni 2,520 cu kum 2,520 he an i tluk.—Nambar 14:34; Ezekiel 4:6.

Ṭhen. 8, cat. 23

23 VANCUNGMI BAWI BIK MIKHAEL

“Vancungmi lak i upa bik” timi bia cu “vancungmi lak i bawi bik” timi sullam a ngei. Baibal nih a langhtermi vancungmi bawi bik cu pakhat lawng a si i a min cu Mikhael a si.—Daniel 12:1; Judas 9.

Mikhael cu zumhawktlak vancungmi ralkapbu Hruaitu a si. Biathlam 12:7 nih hitin a ti: “Mikhael le a vancungmi hna nih khan limkeng cu an doh i limkeng nih cun a vancungmi hna he a rak doh ve hna.” Biathlam cauk nih Pathian ralkapbu Hruaitu cu Jesuh a si tiah a ti. Cucaah Mikhael timi cu Jesuh i min dang a si.—Biathlam 19:14-16.

Ṭhen. 9, cat. 4

24 NI HMANUNG BIK

Mah bia nih Pathian Pennak nih Satan vawlei a hrawh hlante ah vawleicung ah a biapimi thil sining hna a um lai caan kha a chimduhmi a si. Mah biafang he aa lomi “atu chan donghnak,” ‘Mi Fapa ratnak’ ti bantuk bia zong kha mah caan langhternak caah Baibal chimchungbia nih a hman. (Matthai 24:3, 27, 37) “Ni hmanung bik” caan cu vancung ah Pathian Pennak dirh a si caan, 1914 in aa thawk i Armageddon ah Satan vawlei hrawh a si dih tikah a dong lai.—2 Timote 3:1; 2 Piter 3:3.

Ṭhen. 9, cat. 5

 25 THAWHṬHANNAK

Pathian nih a thi cangmi pakhat a nunter ṭhanmi kha thawhṭhannak tiah auh a si. Baibal ah a thoṭhanmi hna pakua kong kan hmuh. Elijah, Elisha, Jesuh, Piter le Paul nih mithi kha an thawhter ṭhan hna. Mah khuaruahhar thil cu Pathian ṭhawnnak thawng lawngin tuah khawhmi thil a si. “Miṭha he miṭhalo he” vawleicung i nun ṭhan awkah ka thawhter ṭhan hna lai tiah Jehovah nih bia aa kam. (Lamkaltu 24:15) Cun vancung thawhṭhannak kong zong Baibal ah kan hmuh. Mah cu thimmi asiloah chiti thuhmi hna kha vancung ah Jesuh he umṭi dingin Pathian nih a thawhter ṭhan hna tikah a si lai.—Johan 5:28, 29; 11:25; Filipi 3:11; Biathlam 20:5, 6.

Ṭhen. 9, cat. 13

26 KHUACHIA THIAMNAK

Khuachia thiamnak timi cu hnam ngei, khuavang ngei le kokek sining a lonhmi ṭhawnnak ti bantuk hmangin dairek in siseh, mi pakhatkhat in siseh khuachia he pehtlaihnak tuah kha a si. Cutin pehtlaihnak a tuahmi hna cu thih hnuah minung thlarau hi a nung rih i a ṭhawngmi khuachia ah an i cang timi a hmaan lomi cawnpiaknak kha an zumh caah a si. Minung nih Pathian nawl an ngaih nakhnga lo hlen awkah khuachia cu an i zuam. Khuachia thiamnak ah kutṭial zohnak, arfi zohnak, mitleh, hnam ngei, zumhnak hrut le kokek sining a lonhmi ṭhawnnak hna aa tel. Cauk, mekazin, chuah nithla zoh in tuaknak, video, poster le hla hna nih khuachia, mitleh le kokek sining a lonhmi ṭhawnnak hna kha ṭih a nung lomi le lungthawh awk ngai a simi thil an lawhter. Mithi caah raithawinak tuah, ruakvui pumhnak, ruakvui camtuak, nuhmei sinak phungphai, ih loin hngah le khuachia he pehtlaihnak tuah ti bantuk ruakvui phungphai tampi a um. Mi nih khuachia ṭhawnnak hman awkah ritnak sii hna an hman tawn.—Galati 5:20; Biathlam 21:8.

Ṭhen. 10, cat. 10; Ṭhen. 16, cat. 4

 27 JEHOVAH UKNAK NAWL

Jehovah cu Cungnung Bik Pathian a si i van le vawlei ah a ummi vialte hi amah nih a sermi an si. (Biathlam 15:3) Cucaah Jehovah cu zeizong vialte a Ngeitu a si i a sermi thil cungah uknak nawl tling tein a ngeimi a si. (Salm 24:1; Isaiah 40:21-23; Biathlam 4:11) A sermi thil vialte caah nawlbia a ser. Cun midang kha uktu si awk zongah nawl a pek khawh hna. Jehovah kan dawt i a nawl kan zulh ahcun uknak nawl a ngeihmi kan cohlan a si.—1 Chanrelnak 29:11.

Ṭhen. 11, cat. 10

28 NAU HRAWHNAK

Nau hrawhnak timi cu a chuak rih lomi nau a thih nakhnga timh ciammam tein tuah kha a si. Mah cu ruahlopi in khawnden sual ruang asiloah pum rianṭuannak ruangah a cang sualmi kha a si lo. Naupawi cangka in naute cu a nu pum cheubang sawhsawh men si loin midang, pumdang a si cang.

Ṭhen. 13, cat. 5

29 THI RAWNHNAK

Mah cu thi a ningpi in asiloah a biapimi thi cheubang phunli chungin phunkhatkhat kha mi pakhat sinin a dang pakhat sinah rawnh asiloah khon kha a si. A biapimi thi cheubang pali cu plasma, thi sen cell, thi rang cell le platelet hna an si.

Ṭhen. 13, cat. 13

 30 CHIMHHRINHNAK

Baibal nih “chimhhrinhnak” timi biafang a hman tikah dantat lawng a si lo. Chimhhrinh kan si tikah lamhruainak, fimchimhnak le remhnak hna kan hmu. Jehovah nih bia fakfak in le puarhrang ngaiin zeitikhmanh ah mi a chimhhrin bal lo. (Phungthlukbia 4:1,NW, 2) Jehovah nih nulepa caah zohchunh awk ṭha a chiah. Jehovah chimhhrinhnak cu hmual a ngeih tuk caah a cawnpiaknak kha mi nih an hun duh khawh. (Phungthlukbia 12:1) Jehovah nih a miphun kha a dawt hna i a cawnpiak hna. A hmaan lomi an ruahnak remh awkah lamhruainak a pek hna i amah duh ningin an ruah i an tuah khawh nakhnga a bawmh hna. Nulepa caah cawnpiak timi ah an fale nih zeicah nawl kan ngaih awk a si ti an hngalhthiam nakhnga bawmh zong aa tel. Cun Jehovah le a Bia Baibal dawt awk, a cawnpiaknak hna hngalhthiam awkah cawnpiak zong aa tel.

Ṭhen. 14, cat. 13

31 KHUACHIA

Annih cu minung nakin a ṭhawng deuhmi, thlarau ṭhalo mit in hmuh khawh lomi an si. Khuachia cu a ṭha lomi vancungmi an si. Pathian nawl an ngaih lonak thawngin anmahle anmah Pathian ral i an i ser tikah a ṭhalomi an hung si. (Genesis 6:2; Judas 6) Satan nih Jehovah a dohnak ah annih cu Satan lei ah an ṭang.—Deuteronomi 32:17; Luka 8:30; Lamkaltu 16:16; Jeim 2:19.

Ṭhen. 16, cat. 4