A ummi cazin ah kal

A ummi cazin ah kal

 Ṭhen 8

Ngaihchiat Awk A Simi Thil Ton Tikah

Ngaihchiat Awk A Simi Thil Ton Tikah

“Nan lung i lawm ko u, hneksaknak tampi nan in ruangah hin atu ah cun nan ngaih chia hmanhsehlaw i lawm ko u.” —1 Piter 1:6

A nuammi ṭhitumnak le chungkhar si khawh awkah na si khawh chungin naa zuam ko nain naa ruahchan lomi thil nan ton ahcun nan i nuamhnak a tlau kho men. (Phungchimtu 9:11) Harnak ton tikah tonghtham khawh awkah a herhmi bawmhnak hna kha Pathian nih a kan timhpiak. A tanglei i a ummi Baibal ruahnak cheuhnak hna kha nan zulh ahcun nangmah le na chungkhar nih a har bikmi thil sining hna hmanh kha nan tei khawh lai.

 1 JEHOVAH KHA I BOCHAN

BAIBAL CHIMMI: “Amah nih an zohkhenh hna caah nan lungretheihnak vialte kha amah cungah chia dih ko u.” (1 Piter 5:7) Sifah harnak nan tonmi cu Pathian ruangah a si lo ti kha philhhlah. (Jeim 1:13) Pathian he a ṭhami pehtlaihnak na ngeih ahcun a ṭha bikmi lam in aan bawmh lai. (Isaiah 41:10) Cucaah Pathian sinah “nan harnak vialte kha chim dih u.”—Salm 62:8.

Baibal kha nifatinte na rel i na hlathlai ahcun hnemhnak na hmuh lai. Mah lengah Jehovah Pathian nih “harnak a phunphun in a ingmi” hna kha zeitindah a hnemh hna ti zong kha na hngalh lai. (2 Korin 1:3, 4; Rom 15:4) “Pathian daihnak, minung hngalhnak a lonhtu” zong kaan pek lai tiah bia aa kam.—Filipi 4:6, 7, 13.

NA TUAH KHAWHMI:

  • Lungdaih khawh awk le ṭha tein khua ruah khawh awkah Jehovah Pathian sinah thlacam

  • Na hmuhning vialte kha i chek ṭhan law a ṭha bikmi lam in na tuah khawh hngami kha i thim

2 NANGMAH LE NANGMAH I TEL IN NA CHUNGKHAR KHA ZOHKHENH HNA

BAIBAL CHIMMI: “Ruahnak a fimmi nih cun hngalhnak kha an i lak chin lengmang i mifim mi nih an hnaa in hngalhnak kha an kawl.” (Phungthlukbia 18:15) A konglam vialte kha i khon hna. Na chungkhar pakhat cio nih an herhmi kha hngalh i zuam. Bia ruah hna law an chimmi zong kha ngaihpiak hna.—Phungthlukbia 20:5.

Dawtmi pakhatkhat an thih ah tah? Na intuarnak kong chim kha na ningzak hlah. Jesuh hmanh a rak “ṭap” ve ti kha philhhlah. (Johan 11:35; Phungchimtu 3:4) Ṭha tein i dinh le ih zong a biapi. (Phungchimtu 4:6) Mah nih na ngaihchiatnak kha inkhawh awkah a fawiter deuh lai.

NA TUAH KHAWHMI:

  • Ngaihchiat awk a simi thil ton hlan in na chungkhar kha pehtlaihnak tuah peng hna. Mah lawngah harnak ton tikah zalawng tein nangmah he biaruah an ngamh lai

  • Nangmah na ton bantukin a tong vemi hna he bia i ruah u

 3 NA HMUHMI BAWMHNAK KHA COHLANG

BAIBAL CHIMMI: “Hawikom nih cun zei tik paoh ah dawt zungzal a si, u le nau cu harnak i hrawm awkah hrin kan si.” (Phungthlukbia 17:17) Na hawile nih bawmh an in duh ko nain zeidah kan tuahpiak lai ti kha an hngal men lai lo. Cucaah na herh taktakmi thil kha chimh hna awkah i cungcang hlah. (Phungthlukbia 12:25) Mah lengah Baibal lamhruainak hna kha zeitindah hman ding a si ti kha Baibal kong ṭha tein a hngalmi hna sinah bawmhnak hal hna. An in pekmi bawmhnak thawngin ṭhatnak na hmuh lai.—Jeim 5:14.

Pathian aa bochan i a biakam a zummi hna he hmaan tein naa komhnak thawngin na herhmi bawmhnak kha na hmuh lai. Thazaang pek a herhmi hna kha thazaang na pek hnanak thawngin nangmah theng hnemhnak na hmuh lai. Jehovah Pathian le a biakam na zumhnak a ruang kha chim hna. Bawmh a herhmi hna bawmhnak ah na rian i tamter. Nangmah lawngin a dang tein um hlah, aan daw i na zawn aan ruatmi hna he umṭi.—Phungthlukbia 18:1; 1 Korin 15:58.

NA TUAH KHAWHMI:

  • Na hawikom ṭha bik he bia i ruah u law an bawmhnak kha cohlang

  • Na herhmi bawmhnak hna kha a hmaanning tein le a sining tein chim