A ummi cazin ah kal

A ummi cazin ah kal

 Ṭhen 6

Fa Ngeih tikah Chungkhar ah Thlennak a um Kho

Fa Ngeih tikah Chungkhar ah Thlennak a um Kho

“Fale hi BAWIPA sinin kan hmuhmi ro an si.”—Salm 127:3

Nuleva hna nih fa an ngeih tikah an i nuamh bantukin lungretheihnak zong an tong kho. Nulepa hun si tikah fa zohkhenhnak caah a caan le thazaang zeitlukin dah a dih ti kha nan hun hngalh tikah nan khuaruah a har kho men. Lungduhnak aa thlen caah le mitkuhcim lonak hna zong nih nan chungkhar ah pehtlaihnak a rawhter khawh. Fa zohkhenh buin chungkhar dawtnak hri a feh nakhnga nan pahnih in thlennawnnak nan tuah a hau. Harnak tonghtham khawh awkah Baibal ah a ummi ruahnak cheuhnak nih zeitindah an bawmh khawh hna?

 1 FA NGEIH TIKAH CHUNGKHAR AH THLENNAK A UM KHO TI KHA HNGAL

BAIBAL CHIMMI: ‘Dawtnak cu a lung a sau, zaangfahnak a ngei, amah zawn lawng aa ruat lo, a thin a tawi lo.’ (1 Korin 13:4, 5) Fa a ngei kami nu pakhat in na fa caah na buaimi cu khuaruahhar a si lo. Asinain na vapa nih a ka daihthlanh tiah a hun ruah khawh men, cucaah amah zong kha daihthlanh hlah. Fa zohkhenhnak rian cu vale he zong aa pehtlaimi a si lengah amah bawmhnak zong na herh kha a hngalh nakhnga lungsau tein le nem tein na chimh khawh.

‘Nannih patung hna zong, nan nupile he nan um tikah, hngalhthiamnak ngei u.’ (1 Piter 3:7) Na nupi cu nan fa caah a thazaang tampi a hman caah a ba lai ti kha hngalhthiampiak. Rian thar a ngeih cang caah lungrethei, thaba in a um kho. Asiloah lungthader in fawi tein a lung zong a dong kho. Na nupi nih a caan ah na cungah a thin a hun ahcun “thinhun leiah a khul a nuarmi cu thazaang a ṭhawngmi nakin a ṭha deuh” timi Baibal bia kha i cinken in thil sining kha daihter khawh awkah i zuam. (Phungthlukbia 16:32) Na nupi nih a herhmi thil hna kha hngalhthiam i zuam law bawm. —Phungthlukbia 14:29.

NA TUAH KHAWHMI:

  • Pale hna: Fa zohkhenhnak ah na nupi kha chun he zan he bawm. Na nupi le na fa caah a caan tam deuh in na pek khawh nakhnga a dang rian hna caah a caan kha rikhiak

  • Nule hna: Fa kong he aa tlaiin na va nih aan bawmhnak kha cohlang. Ṭha tein fa zohkhenh a thiam lo hmanhah sualphaw hlah, zeitindah tuah ding a si ti kha nem tein chim

 2 NAN CHUNGKHAR DAWTNAK HRI KHA FEHTER

BAIBAL CHIMMI: ‘Annih cu pumkhat an si lai.’ (Genesis 2:24) Nan chungkhar ah fa nan hun ngeih hmanhah nan pahnih cu “pumkhat” nan si rih ti kha philhhlah. Nan chungkhar dawtnak hri a feh peng nakhnga i zuam.

Nupile hna, nan vale bawmhnak le zohkhenhnak cungah i lawm u. Naa lawmhnak na langhtermi nih nan i tlaihchanhnak kha a fehter chin khawh. (Phungthlukbia 12:18) Vale hna, nan nupile zeitlukin dah nan dawt hna le nan sunsak hna ti kha chim hna u. Chungkhar an zohkhenhmi kha thangṭhat hna u.—Phungthlukbia 31:10, 28.

“Ahohmanh nih kanmah ca ṭha ding lawng kha kan zoh awk a si lo, midang ca ṭha ding tu kha kan zoh awk deuh a si.” (1 Korin 10:24) Na innchung hawi caah a ṭha bik a si hngami thil kha a zungzal in tuah. Nan pahnih tein bia i ruah awk, i thangṭhat awk le bia i ngaihpiak awkah a caan pe u. Nuleva sinak ah mah zawn lawng i ruat hlah. Na innchung hawi nih a herhmi zong kha ruat. Baibal nih hitin a ti: “Nan pahnih hnatla in nan hrial ti dah lo ahcun nuleva sinak kha tuah u.” (1 Korin 7:3-5, NW) Cucaah mah kong kha nan pahnih in ṭha tein i ruahṭi u. Nan lungsaunak le hngalhthiamnak nan ngeihmi nih chungkhar dawtnak hri a fehter lai.

NA TUAH KHAWHMI:

  • Nan nuva caah a dang tein caan pe u

  • Na innchung hawi na dawt kha langhter awk caah ca tawi tein kuat asiloah laksawng pek tibantuk thil hmete a simi hna kha tuahpiak

 3 NA FA KHA CAWNPIAK

BAIBAL CHIMMI: ‘Na ngakchiat lio tein Cathiang kha a hngalmi na si; na hngalh bangin Cathiang nih khamhnak i an kalpi khotu fimnak kha an pek.’ (2 Timote 3:15) Na fa kha zeitindah ka cawnpiak lai ti kha ruat. Nule paw chung i an um lio hmanhah khuaruahhar awk ngaiin cawn khawhnak an ngei. Nauinn chung i an um lio hmanhah nulepa aw kha an hngalh khawh. Nule i lungduhnak cu fale cungah huham a ngei kho. Hnuk a din lio tein ca relpiak. Na relpiakmi cu a hngalthiam lai lo nain mah nih a upat tikah ca rel duhnak lungthin a ngeihter khawh.

Na fa cu a ngakchiat tuk rih hmanhah Pathian kong na chimhmi kha a theih khawh. Cucaah na fa nih a theih khawh nakhnga aw chuah in Jehovah Pathian sinah thlacam. (Deuteronomi 11:19) Lente nan i celhṭi lio hmanhah Pathian nih a sermi thil kong hna kha chim. (Salm 78:3, 4) Na fa cu a hun upat tikah Jehovah Pathian zeitlukin dah na dawt ti kha a hngalh lai i amah theng zong Pathian kha dawt awkah a cawn ve lai.

NA TUAH KHAWHMI:

  • Ka fa ka cawnpiak khawh nakhnga fimnak ka pe tiah mah ca bakah thlacam

  • Theihter na duhmi kong kha chim lengmang, mah lawngah fale nih hnuk ding ṭhi an si lio tein an cawn khawh lai