A ummi cazin ah kal

Sifah Harnak hi A Dong Lai Maw?

Sifah Harnak hi A Dong Lai Maw?

Zeitindah na ruah?

  • a dong lai.

  • a dong lai lo.

  • a dongh zong a dong kho men.

 BAIBAL CHIMMI

‘Pathian nih an mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo.’—Biathlam 21:3, 4.

MAH IN ZEI ṬHATNAK DAH NA HMUH KHAWH?

Sifah harnak hi Pathian ruangah a si lo timi hngalhnak.—Jeim 1:13.

Sifah harnak kan ton tikah kan intuarnak kha Pathian nih a theih timi hngalhnak in kan hmuhmi hnemhnak.—Zekhariah 2:8.

Sifah harnak vialte a dong dih lai timi ruahchannak.—Salm 37:9-11.

 BAIBAL CHIMMI HI AN ZUMH KHAWH

Zumh khawh a sinak a ruang pahnih a um:

  • Pathian nih sifah harnak le dinlonak kha a huat. Baibal chan ah a mi pawl puarhrang tuk in pehtlaih an si tikah Pathian cu zeitindah a um ti kha ruathmanh. Annih cu serhsat an si ruangah Pathian cu a ngaih a chia tiah Baibal nih a ti.—Biaceihtu 2:18.

    Midang harnak a petu hna kha Pathian nih a huat tuk hna. Tahchunhnak ah, “a sual lomi thisen chuahtu kut” kha Pathian nih a fih tiah Baibal nih a ti.—Phungthlukbia 6:16, 17.

  • Pathian nih pakhat cio a kan zohkhenh. “Hremnak an in ciomi le an ngaihchiatnak cio” kha minung lawng nih an hngalhmi si loin Jehovah Pathian zong nih a hngalh2 Chanrelnak 6:29, 30.

    Jehovah Pathian nih a Pennak thawngin pakhat cio nih kan tonmi sifah harnak hi a rauh hlanah a donghter dih cang lai (Matthai 6:9, 10) Atu hmanhah lungtak tein amah a kawlmi hna cu a hnemh hna.—Lamkaltu 17:27; 2 Korin 1:3, 4.

 MAH HI RUATHMANH

Pathian nih zeicah sifah harnak hi umnak nawl a awnh?

Mah biahalnak i Baibal a phi kha ROM 5:12 le 2 PETER 3:9 ah zoh.