A ummi cazin ah kal

CHUNGKHAR CAAH BAWMTU

Thinhunnak I Sum Khawh Ning

Thinhunnak I Sum Khawh Ning

Na innchunghawi i a biachim asiloah a tuahsernak ruangah na thin a hung ko nain na thinhunnak kha na lungchung in naa uam. Mah kha na innchunghawi nih a hngalh i hramhram in bia aan hal chih. Mah tikah na thin a hung chinchin. Cu bantuk caan ah na thinhunnak kha zeitindah naa sum khawh?

 Na hngalh awk a simi

  • Thinhun tuknak nih na ngandamnak kha a hnorsuan khawh. Thinhunnak nih thi kainak, lung zawtnak, lungdongh zawtnak le pawpi zawtnak hna a chuahter khawh tiah hlathlainak pakhat nih a ti. Thinhunnak nih i hngilh khawh lonak, lungretheihnak, cuar zawtnak le zennak hna a chuahter khawh. Cucaah Baibal nih hitin a ti: “Thinhung in um hlah u, . . .  zeihmanh an ṭhathnem hna lai lo.”​—Salm 37:8.

  • Thinhunnak lungchung in i uamnak zong nih ṭhatlonak a chuahter khawh. Thinhun peng in um cu pum chunglei harnak a pe khomi zawtnak he aa lo. Tahchunhnak ah, sual kawlnak asiloah phunzainak lungput na ngei kho. Cubantuk lungput nih na innchungkhar he umṭi awkah a harter khawh i na innchunghawi kha fakpi in harnak a pek khawh.

 Na tuah khawhmi

  • Na innchunghawi i a ṭhami a sining kha zohpiak. Na innchunghawi nih a ngeihmi sining lakah na duh bikmi pathum kha i ṭial. A tuahmi pakhatkhat ruangah na thin a hun ahcun mah a sining kong kha ruat ṭhan. Mah nih na thinhunnak kha i uk khawh awkah aan bawmh lai.

    Baibal phunglam: “Lunglawmhnak in khat u.”​—Kolose 3:​15.

  •  Ngaihthiam awkah i zuam. Pakhatnak ah na innchunghawi hmuhning kha hngalhthiam khawh awkah i zuam. Cutin naa zuam ahcun Baibal nih “zawnruahnak” tiah a auhmi zaangfahnak kha na ngei kho lai. (1 Peter 3:8) Cun hitin i hal, ‘Ngaihthiam khawh lo ding tiangin ka thin a hunnak a ruang a um maw?’

    Baibal phunglam: “Palhnak i maimilh cio hi . . . sunparnak a si.”​—Phungthlukbia 19:11.

  •  Na intuarnak kha zaangfahnak le fimkhur tein chim. “Keimah” timi kha hmang. Tahchunhnak ah, “Na umnak na ka chimh lomi cu zaangfahnak na ngeih lo a si” tiah ti canah “Na him le him lo zong ka hngal lo, khua zong a tlai cang caah ka thin a phang” tiah ti. Nem tein na intuarnak na langhtermi nih na thinhunnak kha i sum khawh awkah aan bawmh lai.

    Baibal phunglam: “Nan biachim nan holh rel cu a zungzal in ngaih a nuammi le a ṭhami a si awk a si.”​—Kolose 4:6.

  •  Ṭha tein a bia ngaihpiak. Na intuarnak na chim dih hnuah na innchunghawi kha a bia tan loin biachimnak nawl pe. A chim dih hnuah a chimmi bia kha a hmaan ning tein ka hngalthiam maw tiah i dothlat ṭhan. A sawhsawh te a simi bia ngaihpiaknak cu thinhunnak i sum khawh awkah a kan bawm khomi a biapimi tuahsernak a si.

    Baibal phunglam: “Bia theih duhnak lei ah cun a khul a rangmi si u law biachimnak lei . . . ah cun a khul a nuarmi si u.”​—Jeim 1:​19.