A ummi cazin ah kal

CHUNGKHAR CAAH BAWMTU

Sunghnak Cohlan Thiam awkah Fale Bawmh khawh Ning

Sunghnak Cohlan Thiam awkah Fale Bawmh khawh Ning

Na fa cu caankhat khat ah sunghnak asiloah lungdongh awk a simi thil hna a tong kho. Mah kha a tei khawh nakhnga zeitindah na bawmh khawh hna?

 Na hngalh awk a simi

Sunghnak cu mikip nih kan tonmi a si. Baibal nih “kan dihlak hin palhnak kan tuah cio tawn” tiah a ti. (Jeim 3:2) Cucaah fale zong nih palhnak an tuah ve. Asinain a ṭhatnak cu harnak a tongmi ngakchia pawl cu lungṭhawnnak an ngei deuh. Mah cu an i chuahpimi a si lo caah lungṭhawnnak an ngeih nakhnga cawnpiak an hau. Laura timi nu pakhat nih hitin a ti: “A cangmi thil kha i theihter loin um canah sungnak kha cohlan thiam awkah fale cawnpiak cu a ṭha deuhmi a si ti kha kan nuva in kan hngalh. An i ruahchanmi ningin thil a can lo tikah zeitindah tawnghtham ding a si ti kha kan fale nih an hngalh.”

Ngakchia tampi nih sunghnak kha cohlan awkah an i harh. Fale cheukhat nih sunghnak cohlan awkah an i harhnak a ruang cu nulepa nih an runven peng hna caah a si. Tahchunhnak ah, an fa cu ca a thiam lo ahcun saya/ sayamah te kha sual an phawt hna. An hawile he an i sik tikah an hawile tu kha sual an phawt colh hna.

Nulepa nih thil sining kip ah an runven hna ahcun fale nih an palhnak kha zeitindah ṭuanvo an lak khawh ti lai?

 Na tuah khawhmi

  • An tuahsernak ningin an zun lai ti kha na fale cawnpiak hna.

    Baibal chimmi: “Mi nih a tuhmi cu a zun ko lai.”—Galati 6:7.

    Kan tuahsernak kip ah a phichuak a um. Thil pakhat kha kan hrawh sual ahcun remh man a um. Cu bantukin palhnak kan tuah ahcun ṭhatlonak kan tong lai. A ruang a um caah a phichuak a ummi a si, fale nih kan tuahmi thil cu kanmah nih ṭuanvo kan lak awk a si ti kha an hngalh a hau. Cucaah na fa nih palhnak a tuah tikah runven in midang kha sual phaw hna hlah. Mah canah an kum he aa tlakin an tuahsernak cu zun ko hna seh. A ṭha lomi an tuahsernak ruangah ṭhatlonak an tonmi a si ti kha fiang tein hngalhter hna.

  • Tawnghtham ning hngalh awkah na fale kha bawm hna.

    Baibal phunglam: “Miṭha mi cu voi sarih tiang tlu hmanh sehlaw a tho ṭhan zau lai.”—Phungthlukbia 24:16.

    Sunghnak cu ngaihchiat awk thil a si ko nain mah cu kan nunnak a donghnak a si rih lo. A ding lomi a si timi ruahnak ruangah lungsi loin um canah tawnghtham ning tu kha kawl awkah na fa kha bawm. Tahchunhnak ah, na fapa cu camipuai a sung hei ti u sih. A sungh ṭhan nakhnga lo ca i zuam awkah bawm. (Phungthlukbia 20:4) Na fanu cu a hawile he an i si hei ti u sih. Amah palhnak a si lo hmanhah ngaihthiamnak bia chim in i rem ṭhan khawh ning kong kha cawnpiak.—Rom 12:18; 2 Timote 2:24.

  • Toidornak ngeih awkah na fale kha cawnpiak hna.

    Baibal phunglam: “Hi bia hi nan dihlak sinah ka chim: Nanmahle nanmah kha a sang tuk ah i ruat hlah u.”—Rom 12:3.

    Na fa kha “a thiam bik” na si tiah na timi cu aa tlak lomi a si i ṭhatnak zong a um lo. A thiam taktakmi ngakchia hmanh nih sianginn ah pakhatnak an hmu zungzal lo. Zaanglente celh a thiammi hna zong nih teinak an hmu zungzal lo. Anmahle anmah a tlari tein aa hmuthiammi ngakchia pawl nih sunghnak le lungretheihnak hna kha an cohlan thiam.

    Baibal nih harnak kan tonmi nih kan lungthin a ṭhawnter i inkhawhnak ngeih awkah a kan bawmh tiah a ti. (Jeim 1:2-4) Cucaah sunghnak le lungretheihnak hna cu a cang tawnmi a si tiah an cohlan khawh nakhnga na fale kha bawm hna.

    A dang fimthiamnak cawnpiak bantukin lungthin ṭhawnnak an ngeih nakhnga cawnpiak awkah a caan le thazaang pek a hau. Asinain kumhra fai an si tikah ṭhatnak an hmu lai. “Buaibainak a tawngtham khomi kumhra fai pawl cu lungretheihnak an ton tikah hrut ngaiin thil tuah awkah a ruang a tlawm deuh. An i ruahchan lomi thil a can tik zongah thil sining he aa tlak in an um kho” tiah Letting Go With Love and Confidence timi cauk nih a ti. Lungthin ṭhawn dingin cawnpiaknak nih an upat tiang ṭhatnak a pek hna.

Ruahnak cheuhnak: Zohchunh awk ṭha chia. Na fale kha na tonmi lungretheinak hna na tawnghtham ningin na cawnpiak khawh hna ti kha i cinken.