A ummi cazin ah kal

CHUNGKHAR CAAH BAWMTU

Ruahnak Aa Khah Lo Tikah

Ruahnak Aa Khah Lo Tikah

Duhmi, ziaza le pumpak sining hna aa khah lomi cu nuva hna caah zuamcawhnak taktak a si. Fawi tein thinhunnak a chuahter khomi a tanglei thil sining hna a um rih:

  • Rualchan pawl he a caan hmanṭinak

  • Tangka hman ning

  • Fa ngeihnak le ngeih lonak

Na innchunghawi he nan ruahnak aa khah lo ahcun zeidah na tuah khawh?

 Hngalh awk a simi

Aa tlak timi cu aa khat dih tinak a si lo. Aa tlak bikmi nuva hna hmanh a biapimi thil kong he aa tlaiin an ruahnak aa khat zungzal lo.

“A lung aa rualmi chungkhar pakhat in a ṭhangmi ka si. Zarhte, zarhpi ahcun ka pi le ka pu, ka ni le ka ṭang le ka unau pawl he caan kan hmangṭi tawn. Ka vapa i a chungle cu an chungkhar pawl he caan an hmangṭi tuk lo. Cucaah kan chungkhar pawl he zei can dah caan kan hmanṭi lai asiloah lamhla ah a ummi kan rualchan pawl he zei can dah kan i chawnhbiak lai timi kong he aa tlaiin kan hmuhning cu aa khat lo.”—Tamara .

“Kan ṭhan ning aa khah lo caah ka nupi le kei cu zei caah dah tangka hi a bikin kan hman awk a si timi kong he aa tlaiin kan ruahnak aa khat lo. Kan i umka thla tlawmpal chung cu mah kong he aa tlaiin bia kan i al tawn. Buaibainak tawnghtham awkah atu le atu bia kan i ruah.”—Tyler .

Mi pahnih cu an zohmi aa khat ko nain an hmuhning cu aa dang kho. Nuva hna an lung aa khah lomi zong cubantuk cu a si ve

Dinhdorhnak men in a tlam a tling kho lomi buaibainak cheukhat a um. Tahchunhnak ah, Innchunghawi a nu le a pa cu an zaw i zohkhenh an herh ahcun zeitin? Asiloah innchunghawi pakhat nih fa ngeih a duh i a dang pakhat nih a duh lo ah tah zeitin? *

“Ka nupi he fa ngeihnak kong he aa tlaiin atu le atu kan i ruah. Anih cu fa ngeihnak kong lawngte a ruat. Kan hmuhning cu aa khat lo chinchin. Zeitindah kan i ruahceihṭi lai ti awk hmanh ka thei ti lo.”—Alex.

Ruahnak i khah lo ruangah chungkhar pehtlaihnak kha rawhter hlah u. A biapimi kongkau ah nan hmuhning aa khah lo ahcun i ṭhen ding a si zongah tuah na duhmi paoh kha tuah hrimhrim ko tiah mifim cheukhat nih an ti tawn. Asinain mah “tawnghtham ning” cu mah intuarnak biapi tuk ah i chiah a si. Cun zei thil kan ton hmanhah kan innchunghawi he hmunkhat ah kan umṭi peng lai timi Pathian sin nan biakam zei nan rel lo zong a si.

 Na tuah khawhmi

Ṭhitum biakamnak kha upat awkah bia khiak u. Cutin nan tuah ahcun buaibainak hna kha ral bantukin si loin rianṭuanṭihawi bantukin hmunkhat ah nan tawnghtham khawh lai.

Baibal phunglam: “Pathian nih a fonhmi hna cu mi nih an ṭhen awk hna a si lo.”—Matthai 19:6.

A hlankan in tuak. Tahchunhnak ah, innchunghawi pakhat nih fa ngeih a duh i a dang pakhat nih a duh lo hei ti u sih. Mah tikah ruah dingmi a kong cheukhat a um:

  • Chungkhar fehternak.

    Na innchunghawi nih fa zohkhenhnak he aa tlaiin lungretheihnak kha a ing kho lai maw?

  • Nulepa rian.

    Rawl, thilpuan le umnak inn ngeih lawngin a za lo.

  • Nan ngeihmi tangka.

    Nan ṭuanmi rian, chungkhar le a dang rian hna kha a tlari tein na ṭuan kho lai maw?

Baibal phunglam: “Pakhatkhat nih inn sak aa timh tikah, ka rian hi a dih tiangin ka phaisa nih a ka zo lai maw zo lai lo ti hngalhnak dingah a ṭhu hmasa i pei zeizat dah a dih lai ti kha a tuak hmasa cu.”—Luka 14:28.

Thil sining kha hmuhning a phunphun in ruat. Lung i khah lonak cheukhat cu thawnghtham khawh ning a um. Tahchunhnak ah, fa kan ngei lai maw, ngei lai lo timi kong he aa tlaiin fa ngeih a duh lomi innchunghawi nih hitin aa hal kho:

  • ‘Fa ngeih ka duh lomi cu a zungzal in ngeih ka duh lomi maw a si, atu ah ka duh lomi dah a si?’

  • ‘Nulepa ṭha ka si kho lai lo tiah ka thin a phang maw?’

  • ‘Ka innchunghawi nih a ka daw ti lai lo tiah ka thin a phang maw?’

Fa ngeih a duhmi innchunghawi zong nih mah biahalnak hna hi a ruah khawh:

  • ‘Nulepa in ṭuanvo lak awkah timhcia kan si cang maw?’

  • ‘Fale zohkhenh awkah tangka a za in kan ngei maw?’

Baibal phunglam: “Cunglei in a rami fimnak cu . . . nemte in a um [a tlari, NW].”—Jeim 3:17.

Na innchunghawi i a hmuhnak zong a ṭhatnak a um ti kha cohlang. Mi pahnih cu an zohmi aa khat ko nain an hmuhning cu aa dang kho. Cu bantukin nuva hna zong nih thil sining pakhat kha a dang dangin an hmuh khawh men. Tahchunhnak ah, tangka zeitindah hman ding a si ti bantuk thil sining ah an hmuhning cu aa dang kho. Nan hmuhning aa khat lomi kong nan i ruahṭi ding a si ahcun nan pahnih ningin nan cohlan khawhmi kong kha i ruahṭi hmasa u.

  • Aa khatmi nan hmuitinh cu zei hna dah a si?

  • Nan hmuhning ah zei a ṭhatnak hna dah a um?

  • Nan chungkhar a feh peng nakhnga pakhatkhat nih asiloah nan pahnih ningin nan hmuhning kha nan remh kho lai maw?

Baibal phunglam: “Ahohmanh nih kanmah ca ṭha ding lawng kha kan zoh awk a si lo, midang ca ṭha ding tu kha kan zoh awk deuh a si.”—1 Korin 10:24.

^ cat. 14 I ṭhitum hlanah a biapimi kong hna kha i ruah hmasa a hau. Mah bu hmanhin ruahlopi in thil sining cu aa thleng kho asiloah innchunghawi i a lungput zong aa thleng kho.—Phungchimtu 9:11.