A ummi cazin ah kal

CHUNGKHAR CAAH BAWMTU

Ka Fa nih Nehsawhnak a Ton ahcun Zeidah Ka Tuah Lai?

Ka Fa nih Nehsawhnak a Ton ahcun Zeidah Ka Tuah Lai?

Na fapa nih sianginn ah nehsawhnak ka tong tiah a ti. Zeidah na tuah khawh? A nehsawhtu kha dantatpiak awkah sianginn kha na chim hna lai maw? Na fa kha teirul cham awkah na cawnpiak lai maw? Biakhiahnak na tuah hlanah nehsawhnak he aa tlaiin a kong cheukhat kha ruat. *

 Nehsawhnak kong he aa tlaiin zeidah ka hngalh awk a si?

Nehsawhnak timi cu zeidah a si? Nehsawhnak timi cu hramhram in pumsalei le lungthinlei ah harnak pek kha a si. Cucaah serhsatnak asiloah ralchanhnak paohpaoh cu nehsawhnak a si lo.

Zeicah a biapit: Mi cheukhat nih thil hmete a si hmanhah midang ngaih a chiattermi tuahsernak vialte caah “nehsawhnak” timi biafang kha an hman. Asinain thil hmetete kha thil nganpi na siter ahcun na fa kha atu le hmailei caah a herhmi sining le bia alnak hna tawnghtham awkah sining a tlinh nakhnga lo na cawnpiakmi bantuk a si lai.

Baibal phunglam: “Na thin sum khawh kha i zuam.”​—Phungchimtu 7:9.

A biapimi kong: Thil sining cheukhat cu nangmah nih tawnghthampiak a hau men lai nain thil sining cheukhat tu ahcun na fa kha buaibainak tawnghtham thiam awk le mi pawl he rem tein um awkah cawn dingin caanṭha na pek khawh.​—Kolose 3:​13.

Asinain na fa nih hramhram in serhsat ka si tiah a ti ah tah zeitin?

 Zeitindah ka bawmh khawh?

  • Na fa nih a chimmi kha lungsau tein ngaihpiak. (1) Zeidah a cang ti le (2) zeicah nehsawhnak a ton ti kha hngalh awkah i zuam. Thil sining na hngalh dih hlan cu biakhiahnak tuah hlah. Hitin i hal, ‘Ka hngalh rih lomi zeidah a um kho rih?’ Thil sining dihlak na hngalh dih cang a si ahcun na fa i a saya/sayamah asiloah na fa a nehsawhtu i a nu le a pa he bia nan i ruah a hau kho men.

    Baibal phunglam: “Bia na leh hlanah ngai hmasa, cuti na tuah lo ahcun na hruh a si hleiah bia na lehmipa zei i na rel lo zong a si.”​—Phungthlukbia 18:13.

  • Na fa nih nehsawhnak a ton ahcun a lehrulh ning nih thil sining a ṭhatter khawh bantukin a chiat zong a chiatter khawh ti kha hngalhthiam awkah bawm. Tahchunhnak ah, Baibal nih “lehnak neem nih thinhunnak a damter, sihmanhsehlaw biahrang nih cun thin a phawh” tiah a ti. (Phungthlukbia 15:1) Teirul chamnak nih nehsawhnak a tonmi kha zorter loin a zualter chin khawh.

    Baibal phunglam: “Ṭhatlonak kha ṭhatlonak in lehrul hlah u, volhpamhnak kha volhpamhnak in lehrul fawn hlah u.”​—1 Peter 3:9.

  • Na fa kha teirul cham loin um cu thazaang der a si lo ti kha chim. Midang ukmi sinak a tei khawhmi cu a ṭhawn caah a si. Phundang cun nehsawhnak a tei khawhmi a si.

    Na fa nih online hmangin nehsawhnak a ton ahcun mah hi a hleiin aa cinken a hau. Online in pakhat le pakhat i doh lengmang cu nehsawhnak ton peng rih awk asiloah nehsawhnak ton awkah lam awnpiak bantuk a si. Cucaah a caan ah a ṭha bikmi lehrulh ning cu lehrulh loin um kha a si. Mah nih nehsawhnak kha a zorter deuh lai.

    Baibal phunglam: “Thing a um lo ahcun mei cu a mit.”​—Phungthlukbia 26:20.

  • Thil sining cheukhat ah na fa nih nehsawhnak a chuahter khomi minung le hmun kha a hrial khawh hna. Tahchunhnak ah, nehsawh a hmangmi pakhatkhat asiloah mibu an umnak hmun kha a hngalh ahcun lam dang in a hrial khawh.

    Baibal phunglam: “Mifim nih cun harnak a rat kha a hmuh tikah hrial khawhnak aa zuam, sihmanhsehlaw mihrut nih cun a pahchih thluahmah ko i a hnuah aa ngaichih.”​—Phungthlukbia 22:3.

Na fa i a saya, sayamah asiloah na fa a nehsawhtu i a nu le a pa he bia nan i ruah a hau kho men

MAH HI TUAHCHUNH: Aa thimmi thil ruangah a chuakmi ṭhatnak le chiatnak kha ruah khawh awkah na fa kha bawm. Tahchunhnak ah:

  • Nehsawhnak kha zei rel loin a um ahcun zeidah a cang kho?

  • Nehsawh lo awkah hlangfang tein a ti hna ah tah zeitin?

  • Nehsawhnak a tonmi kong kha sianginn ah a phuan hna ah tah zeitin?

  • Nehsawhnak kha i hawikomhnak asiloah capo saihnak in a “tei” kho lai maw?

Nehsawhnak a tonmi cu hmaitonh in a si ah, online in a si ah thil sining cu aa lo lo. Cucaah na fa he zulh awk a tlakmi tawnghtham khawhning kha kawlṭi u. Kaan bawmh peng lai tiah na fa kha chim.

Baibal phunglam: “Hawikom nih cun zeitik paohah dawt zungzal a si, u le nau cu harnak i hrawm awkah hrin kan si.”​—Phungthlukbia 17:17.

^ cat. 3 Hi capar i fapa timi nih pa kha a chim duhmi a si ko nain nu he zong aa pehtlai.