A ummi cazin ah kal

CHUNGKHAR CAAH BAWMTU | FALE ZOHKHENHNAK

Nulepa I Ṭhennak Nih Fale A Hnorsuan Hna Ning

Nulepa I Ṭhennak Nih Fale A Hnorsuan Hna Ning

Aa si pengmi nulepa sinah um nakin i ṭhen cu fale caah a ṭha deuh lai tiah hmunkhat ah umṭi awkah si khawh dawh a lo ti lomi nuva hna nih an ti. Thil sining nih zeidah a langhter?

 Nulepa i ṭhennak nih fale kha zeitindah a hnorsuan hna?

Nulepa i ṭhennak nih fale fakpi in a hnorsuan hna ti kha hlathlainak nih a langhter. Nulepa aa ṭhenmi fale tam deuh cu hi bantuk in an um:

  • an thin a hung, an lungre a thei i lungdong in an um

  • midang a hnorsuang khomi ziaza an ngei

  • sianginn ah ca cawn an i harh asiloah sianginn kai kha an ngol

  • an zawt a fawi

Mah lengah ngakchia tampi nih nulepa an i ṭhenmi cu kanmah ruangah a si tiah an ruah asiloah i ṭhen lo dingin kan rak kham hna awk a si tiah an ruah caah anmahle anmah kha sual an i phaw.

Nulepa aa ṭhenmi fale cu an tonmi harnak nih an upat tiang a hnorsuan khawh hna. Man ka ngei lo timi ruahnak an ngei i midang zong kha an zum kho ti hna lo. Anmah theng innchungkhar ah buaibainak an ngeih tikah i ṭhen ding a ruang a tam deuh.

A biapimi kong: Nulepa i ṭhen cu fale caah a ṭha deuh tiah mi cheukhat nih an ti ko nain hlathlainak nih mah cu a hmaan lo ti kha a langhter. “Nulepa i ṭhennak nih fale kha an lung a fahter hna” tiah ngakchia a zohkhenhtu mifim Penelope Leach nih a ti. *

Baibal phunglam: “Midang duhning kha hmuhthiam i zuam u law nanmah duhnak lawng kha ruat hlah u.”—Filipi 2:4.

 Kan i ṭhen ahcun ka fa cu aa nuam deuh lai maw?

An i nuam deuh lai tiah mi cheukhat nih an ti. Asinain nulepa ruahnak le fale ruahnak cu aa khat lo ti kha philhhlah. I ṭhen dingin khua a ruatmi hna nih nunning thar in nun an duh. Ngakchia nih cun an Nu le an Pa he hmunkhat ah umṭi kha an duh.

Aa ṭhenmi nuva thong tampi kha hlathlainak an tuah hna hnuah The Unexpected Legacy of Divorce timi cauk a ṭialtu hna nih hitin an ti: “A phi cu a fiang ko, ngakchia pawl nih kan i nuam deuh tiah an chim lo. Mah canah ‘nulepa an i ṭhen ni cu ngakchiat lio caan kan i nuamhnak a dongh ni a si’ tiah fiang tein an chim.” “An i bochan bikmi minung pahnih kar lakah pehtlaihnak hri a cah cang caah” vawlei cu “himnak a um lomi hmun le ṭih a nungmi hmun in an hun hmuh” tiah mah cauk nih a ti.

A biapimi kong: Nulepa an i ṭhen hnuah ngakchia pawl cu an i nuam ti lo.

Baibal phunglam: “Lungthin ngaihchia nih ruh kha a roter.”—Phungthlukbia 17:22.

 Fale zohkhenhṭinak kong he aa tlaiin zeidah ka hngalh awk a si?

Aa ṭhenmi nuva cheukhat nih nupa tling tein a ummi innchungkhar bantukin an fale kha an si khawh chungin zohkhenhṭi awkah an i zuam. Asinain mah cu a fawimi a si lo. Aa ṭhenmi nuva hna nih mah bantuk thil sining hi an ton khawh ti kha hlathlainak nih a langhter:

  • fale kha a caan pek khawh lonak

  • fale kha cawnpiak tikah phunglam pahnih sinak

  • nulepa nih sualnak kan ngei timi ruahnak an ngeih ca le kan tha a baa tuk timi ruahnak an ngeih caah fale an duhnak zulhnak

Nulepa aa ṭhenmi fale nih nulepa bia ngaih a hau lo tiah an ruah khawh. Cun nulepa nih hmunkhat ah umṭi ding timi an biakam kha an zul lo tiah an ruah khawh. Cucaah ‘zeicah an bia cu ka ngaih lai?’ tiah a ruah khawh men.

A biapimi kong: Aa ṭhenmi nuva hna caah fale zohkhenhṭi cu a fawimi a si lo. Fale caah cun a har chinchin.

Baibal phunglam: “Nu le pa hna, nan fale kha an ing puanter hna hlah u, an hnabei a dong sual lai.”Kolose 3:21.

 A ṭha deuhmi tawnghtham ning a um maw?

I ṭhen hnuah nunning thar in nun awkah fakpi in i zuam nakin atu i innchungkhar kha a feh nakhnga i zuam cu a ṭha deuh tawn. The Case for Marriage timi cauk nih hitin a ti: “Innchungkhar a nuamh lomi cu a nuam kho ṭhan ti lai lo tinak a si lo. Aa nuam lomi innchungkhar hna cu a caan a rauh tikah a hun i nuammi zong an um.” Thil sining a dihlak in ruah tikah ngakchia pawl caah nulepa he hmunkhat ah umṭi cu a ṭha bikmi a si.

Mah nih nuva hna cu zeitikhmanh ah an i ṭhen awk a si lo tiah a ti duhnak a si lo. Innchunghawi nih nupa sualnak a tuah ahcun i ṭhen khawh a si tiah Baibal nih a ti. (Matthai 19:9) Asinain “mifim nih cun a lamh ding kha ṭha tein a zoh” ti zongin Baibal nih a ti. (Phungthlukbia 14:15) Cucaah buaibainak a ngeimi nuva hna nih i ṭhen dingin khua an ruah ahcun an fale a hnorsuang khomi thil i telin thil sining vialte kha an ruah chih a hau.

Mi tampi nih cun thil sining kha a ṭhat deuh nakhnga i zuam loin hmunkhat ah a sawhsawh men in an umṭi hna. A nuammi innchungkhar a si khawh nakhnga a herhmi sining hna ngeih awkah nuleva a bawm khomi a ṭha bikmi ruahnak cheuhnak hna kha Baibal ah a um. Cutin ruahnak a kan cheuh khawhmi cu Baibal Ṭialtu Jehovah cu innchungkhar hram a thawktu a si caah a si.—Matthai 19:4-6.

Baibal phunglam: “Keimah cu BAWIPA nan Pathian, nan ca ṭhatnak cawnpiak aan duhtu hna . . . ka si.”—Isaiah 48:17.

^ cat. 16 Your Growing Child—From Babyhood Through Adolescence timi cauk in lakmi a si.